ບາດຈາງ ບ້ານເຄື່ອງປັ້ນດິນເຜົາທີ່ໜ້າທ່ຽວຊົມ

ບາດຈາງ ( Bat Trang ) ເປັນບ້ານທີ່ເກົ່າແກ່ບ້ານໜຶ່ງ ເຊິ່ງເປັນສະຖານທີ່ທ່ອງທ່ຽວທາງປະຫວັດສາດ, ວັດທະນະທຳ ແລະ ສິລະປະ ການປະດິດຕົກແຕ່ງທີ່ມີຊື່ສຽງທາງດ້ານເຄື່ອງປັ້ນດິນເຜົາ ທີ່ເປັນເອກະລັກສະເພາະດ້ານສີໄມ້ລາຍມືລວດລາຍແຫ່ງ    ໜຶ່ງຂອງປະຊາຊົນນະຄອນຮາໂນ້ຍ      ສສ ຫວຽດນາມ ເປັນບ້ານທີ່ຄູ່ບ້ານຄູ່ເມືອງຊາວນະຄອນຫຼວງມາແຕ່ສະໄໝກ່ອນ ແລະ ໄດ້ຜ່ານຄວາມຈະເລີນຮຸ່ງເຮືອງ ແລະ ຄວາມສຸດໂຊມຕາມການເວລາ ເຊິ່ງເປັນອີກໜຶ່ງສະຖານທີ່ທ່ອງທ່ຽວທີ່ໜ້າຢ້ຽມຊົມ ແລະ ປະທັບໃຈ, ຫາກທ່ານໄດ້ມາຮອດນະຄອນຫຼວງຮາໂນ້ຍ ນີ້ເປັນສະຖານທີ່ໆບໍ່ຄວນພາດອີກແຫ່ງໜຶ່ງ.

ບ້ານບາດຈາງ ຕັ້ງຢູ່ແຄມຝັ່ງແມ່ນ້ຳແດງ ເຊິ່ງຂຶ້ນກັບເມືອງຢາເລີມ ນະຄອນຮາໂນ້ຍ ຫ່າງຈາກຕົວເມືອງຮາໂນ້ຍ ປະມານ 15 ກິໂລແມັດ ໄປທາງທິດຕາເວັນອອກໂດຍຂ້າມແມ່ນ້ຳແດງ, ຄຳວ່າ “ ບາດຈາງ ” ໃນພາສາຫວຽດນາມ ມີຄວາມໝາຍວ່າ ເດີ່ນກວ້າງ ບ້ານແຫ່ງນີ້ມີອາຍຸປະມານ 1.000 ກວ່າປີ ໂດຍຄູ່ກັບນະຄອນທັງລອງ ເຊິ່ງໃນສະໄໝ ລາດຊະວົງລີ ແຫ່ງຫວຽດນາມ ເຈົ້າຊີວິດ ລີໄທໂຕ໊ ໄດ້ຍ້າຍນະຄອນ ຈາກ ຮົວລື ( ແຂວງນິງບີງ ປັດຈຸບັນ ) ມາທີ່ນະຄອນທັງລອງ ( ຮາໂນ້ຍ ) ປີ ຄ.ສ 1010 ປະຊາຊົນທີ່ນີ້ກໍໄດ້ຍ້າຍຕາມພະອົງມາ ໂດຍການລ່ອງເຮືອຂຶ້ນມາຕາມແມ່ນ້ຳແດງ ເມື່ອມາຮອດທີ່ນີ້ເຫັນວ່າ ດິນແດນແຫ່ງນີ້ອຸດົມສົມບູນມີດິນຂາວ, ຫີນກາວ ເໝາະແກ່ການຜະລິດເຄື່ອງປັ້ນດິນເຜົາ ຈຶ່ງມາດຳລົງຊີວິດ ແລະ ອາໄສຢູ່ທີ່ນີ້.

ປັດຈຸບັນ ບາດຈາງ ເປັນບ້ານທີ່ຜະລິດເຄື່ອງປັ້ນດິນເຜົາເກົ່າແກ່ທີ່ສຸດຂອງຫວຽດນາມ ເປັນສະຖານທີ່ທີ່ຮັບຄວາມນິຍົມຈາກນັກທ່ອງທ່ຽວບໍ່ວ່າພາຍໃນ ຫຼື ຕ່າງປະເທດ ທີ່ມັກທ່ຽວຊົມເປັນປະຈຳດ້ານການຜະລິດເຄື່ອງປັ້ນດິນເຜົາ ທັງສີມື ແລະ ລວດລາຍຕ່າງໆ ສິ່ງທີ່ປະທັບໃຈຂອງນັກທ່ອງທ່ຽວຕ່າງປະເທດ ຄື: ການໄດ້ມາຊົມ, ສຳຜັດຂັ້ນຕອນວິທີການຜະລິດເຄື່ອງປັ້ນດິນເຜົາຂອງບັນດານັກຊ່ຽວຊານ ບໍ່ວ່າຈະເປັນຜະລິດໄຫ, ຈອກ, ຖ້ວຍ, ໂຖ ແລະ ອື່ນໆອີກຫຼາຍຊະນິດ.

ບ້ານແຫ່ງນີ້ປະກອບໄປດ້ວຍເຮືອນຂອງປະຊາຊົນທີ່ມີອາຍຸເກົ່າແກ່ປະມານຫຼາຍຮ້ອຍປີ ເຊິ່ງມີທັງສະຖາປັດຕະຍະກຳຂອງຫວຽດນາມ ເດີມ ແລະ ຂອງຊາວຝຣັ່ງ ໃນສະໄໝຈັກກະພັດ ຝຣັ່ງ ເຂົ້າມາຮຸກຮານ ອິນດູຈີນ. ປັດຈຸບັນບ້ານມີການປ່ຽນແປງເລັກໜ້ອຍຕາມການພັດທະນາຂອງປະເທດຊາດ ມີບາງຫຼັງຄາເຮືອນທີ່ເປັນເຮືອນວິນລາທັນສະໄໝ ແຕ່ແຜນຜັງບ້ານຍັງຄົງຮັກສາເອກະລັກເດີມ. ນອກຈາກນັ້ນ, ທາງຫຼວງເຂົ້າບ້ານສ່ວນຫຼາຍບັນດາຮ່ອມເຂົ້ານັ້ນ ລ້ວນແຕ່ແຄບ ກວ້າງປະມານ 1,5 ແມັດ ໄປຕາມທຸກສອກມູມຂອງບ້ານ ເໝາະແກ່ການຍ່າງຊົມ, ຜູ້ຄົນທີ່ນີ້ລ້ວນແຕ່ມີນໍ້າໃຈອັນດີງາມ ຍິນດີຕ້ອນຮັບນັກທ່ອງທ່ຽວ ເມື່ອນັກທ່ອງທ່ຽວມາທີ່ນີ້ຈະໄດ້ຮັບການຕ້ອນຮັບຕາມມາລະຍາດຂອງຫວຽດນາມ ໂດຍທົ່ວໄປແມ່ນດື່ມນ້ຳຊາ ເຊິ່ງເປັນເອກະລັກຂອງຊາວຫວຽດນາມ ມາແຕ່ບູຮານນະການ.

ທ້າວ ເລຮວາງ ປະຊາຊົນ ບ້ານບາດຈາງ ໄດ້ເວົ້າວ່າ: ປະຊາຊົນຈຳນວນ 90% ຂອງບ້ານ ແມ່ນປະກອບອາຊີບຜະລິດເຄື່ອງປັ້ນດິນເຜົາ ເຊິ່ງແຕ່ກ່ອນມີດິນ ແລະ ຫີນກາວ ເປັນຈຳນວນຫຼາຍ ເໝາະແກ່ການຜະລິດເຄື່ອງປັ້ນດິນເຜົາ ແຕ່ຍ້ອນຜ່ານມາຫຼາຍຮ້ອຍປີຈຶ່ງເຮັດໃຫ້ຂາດວັດຖຸດິບ ປັດຈຸບັນວັດຖຸດິບທັງຫຼາຍແມ່ນນຳເຂົ້າຈາກບັນດາແຂວງອ້ອມຂ້າງ ສ່ວນຫີນກາວແມ່ນນຳເຂົ້າຈາກແຂວງບໍລິຄຳໄຊ ຂອງ ສປປ ລາວ ເຮົາ ເພື່ອຮັກສາການຜະລິດແບບບູຮານທີ່ໄດ້ສືບທອດມາຫຼາຍເຊັ່ນຄົນ. ການຜະລິດເຄື່ອງປັ້ນດິນເຜົາແມ່ນແນໃສ່ການຜະລິດຂະໜາດນ້ອຍແບບຄອບຄົວ, ການຜະລິດນັ້ນມີທັງຜະລິດແບບດັ້ງເດີມ ແລະ ແບບໃໝ່ ໂດຍອີງຕາມຄວາມຮຽກຮ້ອງຕ້ອງການຂອງລູກຄ້າ.

ນອກນັ້ນ, ມາທ່ຽວທີ່ນີ້ນັກທ່ອງທ່ຽວຍັງສາມາດເຂົ້າທ່ຽວຊົມຫໍວິຫານບູຊາບາດຈາງ ເຊິ່ງເປັນສະຖາປັດຕະຍະກຳທີ່ເກົ່າແກ່ທາງອະລິຍະທຳ ເປັນທີ່ນິຍົມຂອງນັກທ່ອງທ່ຽວ, ໃນຫໍວິຫານນີ້ຍັງເປັນທີ່ຈາລຶກຄວາມເປັນມາ ແລະ ເກັບຮັກສາມໍລະດົກຂອງບ້ານແຫ່ງນີ້ ເຊິ່ງມີມາແຕ່ສະໄໝກ່ອນເຖິງປັດຈຸບັນ ກ່ຽວກັບບຸນຄຸນທີ່ ບາດຈາງ ໄດ້ໃຫ້ການຊ່ວຍເຫຼືອປະເທດຊາດຕະຫຼອດມາ ເປັນຕົ້ນການຊ່ວຍເຫຼືອເຈົ້າຊີວິດສ້າງພະລາດຊະວັງທີ່ຮາໂນ້ຍ ແລະ ນະຄອນເຫວ້ ໃນສະໄໝລາດ ຊະວົງຫງວຽນ ແລະ ອື່ນໆ, ປັດຈຸບັນຍັງເກັບຮັກສາໄວ້ຢ່າງດີໃນຫໍແຫ່ງນີ້ ເປັນທີ່ບົ່ງບອກເຖິງຄຸນງາມຄວາມດີຂອງບ້ານ ເຊິ່ງເໝາະແກ່ການທ່ອງທ່ຽວ, ສຶກສາຄົ້ນຄວ້າປະຫວັດຄວາມເປັນມາ ແລະ ວັດທະນະທຳຂອງບ້ານ ກໍຄືຂອງຊາວຫວຽດນາມ.

ຫໍວິຫານແຫ່ງນີ້ສ້າງຂຶ້ນເມື່ອປີ 1720 ໃນສະໄໝພະເຈົ້າ ເລຢູຕົງ   ( ລາດຊະວົງເລ ) ໃນຫໍປະກອບມີ 3 ຫ້ອງ, ນອກຫໍມີ 5 ຫ້ອງ 2 ປິກ ( ຂ້າງ ) ເສົາຫຼັກຫໍເຮັດດ້ວຍໄມ້ດູ່ ບັນດາຫ້ອງປູໄມ້ເປັນຊັ້ນໆຮຽງສູງຕາມລຳດັບ ເຊິ່ງມີບ່ອນພັກເຊົາ, ນັ່ງ ແລະ ອື່ນໆ ປັດຈຸບັນໃນຫໍຍັງເກັບຮັກສາວັດຖຸ, ເຄື່ອງໃຊ້, ປ້າຍກຽດຕິຄຸນ ແລະ ອື່ນໆ ປະມານ 50 ກວ່າຢ່າງ ທີ່ບັນດາເຈົ້າຊີວິດຕ່າງໆຂອງ ຫວຽດນາມ ໄດ້ມອບໃຫ້ບ້ານ ເຊັ່ນ: ເຈົ້າຊີວິດ ເລແກັງຮຶງ, ພະເຈົ້າມະຫາຊີວິດກວາງຈົງ ( ໜຶ່ງໃນສາມປະຖົມມະກະສັດຂອງລາດຊະວົງຫງວຽນ ເຊິ່ງເປັນເຈົ້າຊີວິດອົງທີສອງ ) ແລະ ເຈົ້າຊີວິດແກັງທິ່ງ.

ມື້ຂຶ້ນ 14 – 15 ແລະ ແຮມ 1 ຄໍ່າເດືອນຈຽງ ຂອງທຸກໆປີ ( ປະຕິທິນຂອງຊາວ ຫວຽດນາມ ເຊິ່ງກົງກັບເດືອນກຸມພາ ) ຈະມີງານບຸນນະມັດສະການຫໍວິຫານແຫ່ງນີ້ ເຊິ່ງເປັນການຮັບຮູ້, ຍ້ອງຍໍສັນລະເສີນເຖິງຄຸນງາມຄວາມດີຂອງບັນດາເຫຼົ່າວິລະຊົນຂອງ ບ້ານບາດຈາງ ສະໄໝກ່ອນ. ຫໍວິຫານແຫ່ງນີ້ບູຊາອໍລະຫານທັງໝົດ 6 ອົງ. ໃນນັ້ນ, 4 ອົງແມ່ນນາຍພົນທະຫານທີ່ມີຜົນງານໃນການປົກປັກຮັກສາປະເທດຊາດ. ງານນະມັດສະການດັ່ງກ່າວຍັງມີກິດຈະກຳຕ່າງໆ ເຊັ່ນ: ລອຍກະໂທງ, ຕີກອງ, ລ່ອງເຮືອ, ສະແດງສິລະປະ, ວາງສະແດງສິນຄ້າຜະລິດຕະພັນເຄື່ອງປັ້ນດິນເຜົາ ແລະ ອີກຫຼາຍກິດຈະກຳຕ່າງໆ ເຊິ່ງສາມາດດຶງດູດນັກທ່ອງທ່ຽວທາງພາຍໃນ ແລະ ຕ່າງປະເທດເຂົ້າຮ່ວມ ແລະ ທ່ຽວຊົມເປັນຈຳນວນຫຼາຍ.

ປັດຈຸບັນ ບ້ານບາດຈາງ ໄດ້ກາຍເປັນສະຖານທີ່ມໍລະດົກທາງປະຫວັດສາດ – ວັດທະນະທຳ ແລະ ສິລະປະລວດລາຍ ໃນການແກະສະຫຼັກຂອງຊາດທີ່ເກົ່າແກ່ ແລະ ມີປະຫວັດໃນການຜະລິດເຄື່ອງປັ້ນດິນເຜົາມາແຕ່ດົນນານ ຕິດພັນກັບການກຳເນີດຂະຫຍາຍຕົວຂອງນະຄອນຮາໂນ້ຍ ເຊິ່ງຍັງເປັນທີ່ເກັບຮັກສາຄຸນຄ່າທາງວັດທະນະທຳອັນດີງາມຂອງນະຄອນຮາໂນ້ຍ ກໍ່ຄືຂອງ ສສ ຫວຽດນາມ, ບາດຈາງ ເປັນໜຶ່ງສະຖານທີ່ທີ່ນັກທ່ອງທ່ຽວບໍ່ຄວນພາດຫາກໄດ້ມານະຄອນຮາໂນ້ຍ. ນອກນັ້ນ, ເຄື່ອງປັ້ນດິນເຜົາ ບາດຈາງ ຍັງເປັນທີ່ນິຍົມຂອງຊາວຕ່າງປະເທດເປັນຈຳນວນຫຼາຍ ເຊິ່ງແຕ່ລະປີສາມາດສົ່ງອອກໄປຂາຍຢູ່ຫຼາຍປະເທດ ເຊັ່ນ: ຈີນ, ເກົາຫຼີ, ອາເມຣິກາ, ຝຣັ່ງ ແລະ ອື່ນໆ.

( ໂດຍ: ກາວຊົ່ງ )

%d bloggers like this: