ປະທານທະນາຄານໂລກປະກາດຈະລາອອກ ໃນເດືອນໜ້າ

ທ່ານ ຈິມ ຢອງ ຄິມ ປະທານທະນາຄານໂລກ ປະກາດຈະລາອອກຈາກຕໍາແໜ່ງ ໃນເດືອນໜ້າ ກ່ອນໝົດວາລະອີກສາມປີໜ້າ.

ສໍານັກຂ່າວເອເອັຟພີລາຍງານ ເມື່ອວັນຈັນ ທີ 7 ມັງກອນ ວ່າ ທ່ານ ຈິມ ຢອງ ຄິມ ອາຍຸ 59 ປີ ປະທານທະນາຄານໂລກຊາວອາເມຣິກັນ ເຊື້ອສາຍເກົາຫຼີ ປະກາດລາອອກຈາກຕໍາແໜ່ງ ໃນວັນທີ 1 ກຸມພານີ້ ທັງທີ່ມີວາລະການດໍາລົງຕໍາແໜ່ງດົນ 6 ປີ ແລະ ອາດຈະເຮັດໃຫ້ປະທານາທິບໍດີໂດນັລ ທຣຳ ຂອງອາເມຣິກາມີອໍານາດ ໃນການຕັດສິນໃຈກ່ຽວກັບຫົວໜ້າຄົນໃໝ່ຂອງສະຖາບັນການເງິນ ເພື່ອການພັດທະນາເສດຖະກິດໂລກ.

ຖະແຫຼງການຂອງທ່ານ ຄິມ ລະບຸວ່າ ຖືເປັນກຽດຢ່າງຍິ່ງສໍາລັບຕົນ ໃນການເຮັດໜ້າທີ່ປະທານສະຖາບັນການເງິນ ແຫ່ງນີ້ ເຊິ່ງເຕັມໄປດ້ວຍບຸກຄົນຜູ້ອຸທິດຕົນໃຫ້ກັບພາລະກິດການຢຸດຕິຄວາມທຸກຍາກຂອງໄລຍະການດຳລົງຊີວິດຄົນເຮົາ ເຊິ່ງທະນາຄານໂລກໄດ້ກໍານົດເປົ້າໝາຍກໍາຈັດບັນຫາຄວາມທຸກຍາກໃຫ້ໝົດ ພາຍໃນປີ 2030.

ທ່ານ ຄິມ ເຂົ້າຮັບຕໍາແໜ່ງປະທານທະນາຄານໂລກ ເມື່ອປີ 2011 ມີກໍານົດຈະໄປຮ່ວມງານກັບບໍລິສັດດ້ານການລົງທຶນ ເຊິ່ງຍັງບໍ່ໄດ້ເປີດເຜີຍຊື່ ໃນປະເທດກໍາລັງພັດທະນາ ແລະ ຍັງຈະກັບໄປເປັນກໍາມະການບໍລິຫານອົງການ Partners-in-Health ທີ່ເປັນຜູ້ຮ່ວມກໍ່ຕັ້ງຂຶ້ນມາ.

ຖະແຫຼງການຂອງທະນາຄານໂລກ ລະບຸດ້ວຍວ່າ ທ່ານນາງ ຄຣິສຕາລິນາ ຈໍຈີວາ ປະທານເຈົ້າໜ້າທີ່ບໍລິຫານຂອງທະນາຄານໂລກຈະເຮັດໜ້າທີ່ຮັກສາການປະທານທະນາຄານໂລກສືບແທນທ່ານ ຄິມ.

%d bloggers like this: