ມື້ສົ່ງທ້າຍປີເກົ່າ 2018 ຕ້ອນຮັບປີໃໝ່ 2019 ທ່ານຈະໄປນັບຖອຍຫຼັງຢູ່ໃສ?

 

ປີ 2018 ໃກ້ຈະສິ້ນສຸດແລ້ວ ປີໃໝ່ ຄ.ສ 2019 ໃກ້ຈະຍ່າງເຂົ້າມາ ຫຼາຍໆຄົນຄົງຈະມີການວາງແຜນໄປທ່ຽວນັ້ນທ່ຽວນີ້, ບາງຄົນກໍ່ອາດຈະກັບບ້ານເມືອຫາຄອບຄົວ – ພໍ່ແມ່ ແລະ ຄົງຍັງມີອີກຫຼາຍໆທ່ານທີ່ຍັງບໍ່ທັນໄດ້ມີແຜນວ່າຈະໄປທ່ຽວທາງໃດ ຫາກທ່ານຍັງຄິດບໍ່ອອກ ຫຼື ຍັງບໍ່ທັນຮູ້ວ່າຈະໄປທ່ຽວທາງໃດ ມື້ນີ້ທີມງານ ໜັງສືພິມ ເສດຖະກິດ – ການຄ້າ ພວກເຮົາຈະແນະນຳບາງສະຖານທີ່ທ່ອງທ່ຽວທີ່ເໝາະແກ່ການໄປເຄົ້າດາວ ຫຼື ນັບຖອຍຫຼັງ ທີ່ບໍ່ຫ່າງໄກຈາກນະຄອນຫຼວງວຽງຈັນ ເຊິ່ງເໝາະແກ່ການໄປກັບໝູ່ເພື່ອນ, ກັບຄອບຄົວ, ກັບຄົນຮູ້ໃຈ ຫຼື ກັບຄົນທີ່ທ່ານຮັກໄດ້.

ສະຖານທີ່ໆຫຼາຍໆຄົນນິຍົມໄປຫຼາຍໃນໄລຍະມື້ສົ່ງທ້າຍປີເກົ່າ 2018 ຕ້ອນຮັບປີໃໝ່ສາກົນ 2019 ທີ່ຢູ່ບໍ່ໃກ້ບໍ່ໄກກັບນະຄອນຫຼວງວຽງຈັນ ນັ້ນກໍ່ຄື: ວັງວຽງ ເຊິ່ງເປັນສະຖານທີ່ຍອດຮິດທີ່ນັກທ່ອງທ່ຽວທັງພາຍໃນ ແລະ ຕ່າງປະເທດນິຍົມໄປກັນຫຼາຍທີ່ສຸດ ເພາະນອກຈາກຈະເປັນເມືອງທີ່ມີສະຖານທີ່ທ່ອງທ່ຽວທີ່ເປັນທຳມະຊາດຫຼາຍແຫ່ງ, ອາກາດດີ ແລະ ບັນຍາກາດໃຫ້ແລ້ວ ຍັງເປັນສະຖານທີ່ໆມີຂົງເຂດບໍລິການ ແລະ ກິດຈະກຳປິ່ນອ້ອມໄວ້ຄອຍບໍລິການບັນດາທ່ານໃຫ້ມີຄວາມສະດວກສະບາຍເມື່ອເວລາໄປທ່ຽວ; ສ່ວນສະຖານທີ່ທ່ອງທ່ຽວທີ່ໃກ້ກັບຕົວເມືອງນະຄອນຫຼວງວຽງຈັນ ແບບເປັນເຄິ່ງທຳມະຊາດທີ່ມີການບໍລິການທີ່ສະດວກສະບາຍຂໍແນະນຳເປັນ ຟາມພູຕາເວັນ ທີ່ຕັ້ງຢູ່ລະຫວ່າງເມືອງປາກງື່ມ ນະຄອນຫຼວງວຽງຈັນ ແລະ ເມືອງທ່າພະບາດ ແຂວງບໍລິຄຳໄຊ ເຊິ່ງສະຖານທີ່ທ່ອງທ່ຽວແບບປະສົມປະສານ ທັງເປັນບ່ອນທີ່ມີບັນດາກິດຈະກຳຕ່າງໆ ເຊັ່ນ: ເລື່ອງການກະເສດ, ດອກໄມ້, ອາຫານ ແລະ ກິດຈະກຳແຄັມໄຟ ແລະ ໂຄມໄຟ ແບບຄົບວົງຈອນໄວ້ຄອຍບໍລິການບັນດາທ່ານ ຫຼື ຫາກທ່ານໃດສົນໃຈທີ່ຈະໄປແບບປິກນິກ ຟາມພູຕາເວັນ ກໍ່ຈະມີສະຖານທີ່ໄວ້ໃຫ້ບັນດາທ່ານ.

ສຳລັບທ່ານໃດມັກສະຖານທີ່ແບບລ່ອງເຮືອຕາມແມ່ນໍ້າໃຫຍ່ ຂໍແນະນຳສະຖານທີ່ທ່ອງທ່ຽວ ແດນສະຫວັນ ຣີສອດ ເມືອງທຸລະຄົມ ແຂວງວຽງຈັນ ແລະ ລ້ອງງື່ມວິວ ຣີສອດ ເມືອງແກ້ວອຸດົມ ແຂວງວຽງຈັນ ເຊິ່ງເປັນສະຖານທີ່ທ່ອງທ່ຽວໜຶ່ງທີ່ໜ້າສົນໃຈ ເພາະຈະເປັນຣີສອດທີ່ຕັ້ງຢູ່ແຄມນໍ້າງື່ມ ມີຮ້ານອາຫານ, ທີ່ພັກ, ບໍລິການລ່ອງເຮືອນ້ອຍ ແລະ ໃຫຍ່ ຕາມອ່າງນໍ້າງື່ມ ເຊິ່ງທ່ານສາມາດໄປໄດ້ໃນຈຳນວນຄົນທີ່ໜ້ອຍ ຫຼື ຈະໄປແບບກຸ່ມໃຫຍ່ໆໄດ້ແບບສະບາຍ. ນອກຈາກນີ້, ຍັງມີສະຖານທີ່ທ່ອງທ່ຽວຕິດພັນກັບກະສິກຳສະອາດ ພ້ອມນັ່ງຊົມດາວສຳຜັດອາກາດໜາວເຢັນ ແລະ ຕື່ນມາເບິ່ງທະເລໝອກໃນມື້ອາລຸນໃໝ່ ພວກເຮົາຂໍແນະນຳ ສວນສະຕໍເບີຣີ່ ພູຄູນ.

ທ່ານ ນາງ ດາລູນີ ດວງປະເສີດ ໄດ້ກ່າວວ່າ: ຟາມພູຕາເວັນ ພວກເຮົາແມ່ນໄດ້ກະກຽມບັນດາກິດຈະກຳຕ່າງໆໃນມື້ເຄົ້າດາວປີໃໝ່ 2019 ນີ້ແມ່ນສ່ວນຫຼາຍຈະເນັ້ນໃສ່ເປັນແບບຄອບຄົວ ເຊັ່ນ: ແຄັມໄຟ, ນອນເຕັ້ນຊົມດາວ, ປ່ອຍໂຄມໄຟ ປະມານ 200 ໜ່ວຍ ແລະ ກິນອາຫານທີ່ພວກເຮົາໄດ້ມີການກະກຽມໄວ້ ເຊິ່ງມາຮອດປັດຈຸບັນມີຄົນຈອງໄວ້ແລ້ວຈຳນວນ 100 ກວ່າຄົນ ທີ່ຈະໄປທ່ຽວ ຫຼື ຮ່ວມເຮັດກິດຈະກຳໃນມື້ເຄົ້າດາວ ເຊິ່ງປີນີ້ພວກເຮົາຈະເນັ້ນການທ່ອງທ່ຽວແບບວິຖີຊີວິດພື້ນບ້ານ, ເນັ້ນສຸຂະພາບ ກໍ່ຄືການກິນອາຫານຈາກວັດຖຸດິບທີ່ປອດສານຜິດ, ສະເພາະເຕັ້ນ ແລະ ອາຫານແມ່ນພວກເຮົາມີໄວ້ໃຫ້ບໍລິການໃນ ລາຄາເຕັ້ນນອນ 2 ຄົນແມ່ນ 80 ພັນກີບ, ເຕັ້ນນອນແບບຄອບຄົວ 5 ຄົນ ລາຄາ 120.000 ພັນກີບ ສ່ວນອາຫານແມ່ນພວກເຮົາຈະໄລ່ ລາຄາ 50 ພັນກີບຕໍ່ຄົນ ເຊິ່ງວັດຖຸດິບແມ່ນນຳມາຈາກສວນພວກເຮົາເອງມາເຮັດ. ນອກຈາກມື້ບຸນປີໃໝ່ລາວແລ້ວ ຟາມພູຕາເວັນ ໃຫ້ບໍລະການທຸກມື້ ໂດຍສະເພາະແມ່ນທຸກໆວັນເສົາ – ອາທິດ ແມ່ນພວກເຮົາຈະເຮັດກິດຈະກຳຄອບຄົວ ທຸກໆທ່ານສາມາດນຳພາຄອບຄົວມາຮ່ວມໄດ້. ນອກນີ້, ນັບແຕ່ວັນທີ 9 ກຸມພາ ຫາ ວັນທີ 9 ມີນາ 2019 ແມ່ນພວກເຮົາຈະຈັດເທດສະການໂຄມໄຟ ເຊິ່ງບັນດາຫ້າງຮ້ານ ແລະ ບໍລິສັດສາມາດມາເຮັດໂຄມໄຟຂອງບໍລິສັດຕົນເອງ ແລ້ວວາງສະແດງໄດ້ໂດຍບໍ່ເສຍຄ່າ.

ທ່ານ ນາງ ມົນທາທິບ ພົງວິຈິດ ຜູ້ບໍລິຫານຈັດການ ລ່ອງງື່ມວິວ ຣີສອດ ກ່າວວ່າ: ສຳລັບລ່ອງງື່ມວິວ ຣີສອດ ພວກເຮົາ ແມ່ນຕັ້ງຢູ່ບ້ານແສງສະຫວ່າງ ເມືອງແກ້ວອຸດົມ ແຂວງວຽງຈັນ ເຊິ່ງຫຼາຍໆຄົນຮູ້ຈັກແມ່ນໜ້າເຂື່ອນ ເຊິ່ງພວກເຮົາໄດ້ກະກຽມກິດຈະກຳຫຼາຍຢ່າງໃນມື້ສົ່ງທ້າຍປີເກົ່າ 2018 ຕ້ອນຮັບປີໃໝ່ 2019 ນີ້ ເຊິ່ງຣີສອດພວກເຮົານອກຈາກຈະມີທີ່ພັກ, ຮ້ານອາຫານ, ບັນເທີງ, ຫ້ອງປະຊຸມສຳມະນາ ແລະ ຂີ່ເຮືອກິນເຂົ້າແລ້ວ, ໃນມື້ສົ່ງທ້າຍປີເກົ່າພວກເຮົາຍັງຈະມີກິດຈະກຳຮ້ອງເພງ, ມອບລາງວັນ ແລະ ຈະຈັດອາຫານເປັນແບບໂຕະມົນ ຫາກທ່ານໃດສົນໃຈແມ່ນສາມາດສັ່ງຈອງ ຫຼື ມາຮ່ວມງານກັບພວກເຮົາໄດ້.

( ຄຳນ້ອຍ )

%d bloggers like this: