ວັດເພຍວັດ ສະຖາປັດຕະຍະກຳ ບູຮານ ທີ່ຄົງຄວາມເປັນເອກະລັກ

ເມືອງຄູນ ແຂວງ ຊຽງຂວາງ ເປັນເມືອງທີ່ມີຊາຍແດນຕິດກັບແຂວງໄຊສົມບູນ ລົງມາຫາແຂວງບໍລິຄຳໄຊ ເຊິ່ງເປັນເສັ້ນທາງເຊື່ອມຕໍ່ລະ ຫວ່າງພາກກາງ ຫາ ພາກເໜືອ ເຊິ່ງເມືອງຄູນ ເປັນເມືອງທີ່ມີ ຄວາມເປັນເອກະລັກໂດດເດັ່ນດ້ານສະຖານທີ່ທ່ອງທ່ຽວວັດທະນະທຳ ທີ່ຕິດພັນກັບປະຫວັດສາດ ໂດຍສະເພາະແມ່ນວັດເພຍວັດ ເປັນສະຖານທີ່ ທີ່ຖືກສ້າງຂຶ້ນມານັບຫຼາຍຮ້ອຍປີ ແຕ່ຍ້ອນສົງຄາມຈຶ່ງເຮັດໃຫ້ວັດແຫ່ງນີ້ຖືກທຳລາຍ ແລະ ຍັງຄົງເຫຼືອໄວ້ພຽງຮ່ອງຮອຍ, ຊາກຂອງວັດ ແລະ ພະພຸດທະຮູບ ຈົນມາເຖິງທຸກວັນນີ້ ແລະ ວັດແຫ່ງນີ້ກໍ່ກາຍເປັນສະຖານທີ່ທ່ອງທ່ຽວທີ່ສຳຄັນອີກແຫ່ງຂອງເມືອງຄູນ ແຂວງຊຽງ ຂວາງ.

ວັດເພຍວັດ ແຫ່ງນີ້ແມ່ນຕັ້ງຢູ່ໃຈກາງຂອງເມືອງຄູນ ແຂວງຊຽງຂວາງ ເຊິ່ງແມ່ນສິລະປະ ແລະ ສະຖາປັດຕະຍະກຳທີ່ຖືກສ້າງຂຶ້ນມາແຕ່ບູຮານ ເຊິ່ງເມື່ອກ່ອນເສົາທັງໝົດມີ 8 ເສົາຫຼັກ ທີ່ໃຊ້ຄໍ້າຊູຫຼັງຄາສິມ ໂດຍມີຊໍ່ດອກບົວທີ່ຕົກແຕ່ງຂ້າງເທິງ ເຊິ່ງມີລວດລາຍດອກກີບທັງໝົດ ລວມທັງເປັນລັກສະນະດອກໄມ້ກຳລັງບານ ແລະ ເປັນກີບດອກໄມ້ຮູບເພັດ ເຊິ່ງອັນທີ່ໂດດເດັ່ນຂອງ ວັດເພຍວັດ ແຫ່ງນີ້ແມ່ນຮູບປັ້ນພະພຸດທະຮູບນູນສູງ, ພະອົງຕື້ ນັ່ງຖານບົວ ແລະ ເປັນພະພຸດທະຮູບປາງມະຣະວິໄຊ. ຮູບປັ້ນພະພຸດທະຮູບນີ້ມີຂະໜາດທີ່     ໃຫຍ່ ແຕ່ປັດຈຸບັນຍັງເຫຼືອພຽງຊາກຂອງເສົາສິມເປັນຮ່ອງຮອຍຄວາມສະຫງ່າງາມຂອງວັດເພຍວັດ.

ຈາກຂໍ້ມູນຂອງວັດໃຫ້ຮູ້ວ່າ: ວັດເພຍວັດ ແຫ່ງນີ້ໄດ້ສ້າງຂຶ້ນໃນສະຕະວັດທີ 14 ຈາກຂໍ້ມູນການເລົ່າຂານກັນມາຜູ້ທີ່ສ້າງວັດເພຍວັດແຫ່ງນີ້ແມ່ນສ້າງພ້ອມກັນກັບວັດສິພົມ ທີ່ຕັ້ງຢູ່ບໍ່ໄກຈາກວັດເພຍວັດປານໃດ ເຊິ່ງໃນໄລຍະສະຕະວັດທີ 19 ວັດເພຍວັດ ໄດ້ຖືກໂຈມຕີປຸ້ນສະດົມ ແລະ ຖືກທຳລາຍຢ່າງໜັກໜ່ວງ ຈາກພວກບຸກລຸກຊອກຫາວັດຖຸບູຮານມີຄ່າ ໃນປີ ຄ.ສ 1953 ສົງຄາມອິນດູຈີນ ຄັ້ງທີ 1 ອັນໄດ້ເຮັດໃຫ້ທັງວັດ ແລະ ພະພຸດທະຮູບໃຫຍ່ໄດ້ຖືກທຳລາຍ, ປີຕໍ່ມາປະຊາຊົນຈຶ່ງໄດ້ສ້າງ ແລະ ປົວແປງບູລະນະວັດຄືນໃໝ່ ແຕ່ຕົກມາຮອດໄລຍະສົງຄາມອິນດູຈີນ ຄັ້ງທີ 2 ທັງຕຶກອາຄານ, ຮູບປັ້ນພະພຸດທະຮູບຂອງວັດໄດ້ຖືກທຳລາຍຢ່າງໜັກໜ່ວງ ຍັງເຫຼືອໄວ້ແຕ່ພະພຸດທະຮູບ, ເສົາຂອງສິມ ແລະ ຝາຈຳນວນໜຶ່ງຈົນມາຮອດເທົ່າທຸກວັນນີ້. ດັ່ງນັ້ນ, ພວກເຮົາຈະຍັງຄົງເຫັນພຽງເຫຼົ່ານີ້ທີ່ຍັງເຫຼືອຄ້າງໄວ້ໃຫ້ເບິ່ງ.

ເຖິງວ່າປັດຈຸບັນວັດດັ່ງກ່າວຈະຍັງເຫຼືອໄວ້ພຽງຮ່ອງຮອຍ ແລະ ຊາກຫັກພັງກໍ່ຕາມ ແຕ່ວັດແຫ່ງນີ້ກໍ່ຍັງເປັນສະຖານທີ່ທ່ອງທ່ຽວແຫ່ງໜຶ່ງທີ່ຫຼາຍຄົນກາຍໄປກາຍມາຕ້ອງໄດ້ແວ່ກາບໄຫວ້ ເນື່ອງຈາກເປັນສະຖານທີ່ ແລະ ວັດທະນະທຳທີ່ມີຫຼາຍຮ້ອຍປີ ແລະ ກໍ່ກາຍເປັນແຫຼ່ງທ່ອງທ່ຽວແຫ່ງໜຶ່ງຂອງເມືອງຄູນ ທີ່ສາມາດດຶງດູດເອົານັກທ່ອງທ່ຽວໃຫ້ເຂົ້າມາທ່ຽວໄດ້ເປັນຈຳນວນຫຼາຍ.

( ຂໍ້ມູນຈາກວັດເພຍວັດ, ຮຽບຮຽງ

ແລະ ຖ່າຍຮູບໂດຍ: ຄຳນ້ອຍ )

%d bloggers like this: