ຖ້ຳຂຸນລາງ ຄວາມງາມເຮືອນຫໍຂອງເສດຖີແຫ່ງເມືອງນະຄອນກາຍ

ຖໍ້າຂຸນລາງ ເປັນສະຖານທີ່ທ່ອງທ່ຽວທຳມະຊາດທີ່ສວຍສົດງົດງາມ ເຊິ່ງຕັ້ງຢູ່ເຂດປ່າສະຫງວນຂອງເມືອງກາສີ ໄປທາງທິດຕາເວັນຕົກສ່ຽງເໜືອ ຫ່າງຈາກເສັ້ນທາງຕັດໃໝ່ ລະຫວ່າງ ເມືອງກາສີ – ເມືອງນານ ປະມານ 1 ກິໂລແມັດ ໃກ້ກັບບ້ານຫ້ວຍສານ ຫ່າງຈາກເທສະບານເມືອງກາສີ ໄປປະມານ 15 ກິໂລແມັດ ສາມາດເຂົ້າໄປເຖິງດ້ວຍລົດ ຫຼື ຍ່າງ, ເປັນສະຖານທີ່ທາງທໍາມະຊາດທີ່ສວຍງາມ ແລະ ຄົບບັນຍາກາດທີ່ຫາເບິ່ງໄດ້ຍາກໃນແຫຼ່ງອື່ນ ເພາະໃນສະຖານທີ່ແຫ່ງນີ້ນອກຈາກມີຖໍ້າຫີນຍ້ອຍດ້ວຍລວດລາຍຕ່າງໆ ຕະຫຼອດເສັ້ນທາງການໄປຫາປາກຖໍ້າຍັງມີນໍ້າຕົກຕາດນ້ອຍ – ໃຫຍ່ຢັງຢາຍກັນຢ່າງສວຍງາມ ແລະ ເປັນສະຖານທີ່ ທີ່ອຸດົມສົມບູນດ້ວຍຊີວະນາໆພັນທີ່ຂຽວກະຈີ ແລະ ຊຸ່ມເຢັນຕະຫຼອດປີ.

ບໍລິເວນອ້ອມຂ້າງຖ້ຳມີຕົ້ນໄມ້ນ້ອຍ -ໃຫຍ່ອາຍຸຫຼາຍຮ້ອຍປີກະແຈກກະຈາຍຕາມເນີນພູ, ຮ່ອງຫ້ວຍຕ່າງໆ ເຮັດໃຫ້ພື້ນທີ່ມີອາກາດທີ່ເຢັນສົດຊື່ນ ພິເສດແມ່ນທຳມະຊາດອັນອຸດົມສົມບູນທີ່ຢູ່ພາຍນອກຖ້ຳແຫ່ງນີ້ ຈາກທາງເຂົ້າທີ່ເປັນປະຕູໃຫຍ່ໄປຈົນຮອດທາງເຂົ້າປາກຖ້ຳ ແມ່ນມີປ່າໄມ້ທີ່ຂຽວງາມ ແລະ ສົດຊື່ນຢູ່ຕະຫຼອດເວລາ ແຖມຍັງມີນ້ຳຕົກຕາດສອງສາຍທີ່ມາບັນຈົບກັນຢູ່່ທາງຈະຂຶ້ນໄປປາກຖ້ຳ ມີຊື່ວ່າ “ ນ້ຳຫ້ວຍຕາດ ” ອ້ອມຮອບຖ້ຳແຫ່ງນີ້ ເປັນປ່າໄມ້ທຳມະຊາດທີ່ກວ້າງຂວາງ ເຊິ່ງມີເນື້ອທີ່ ປະມານ 1.080 ເຮັກຕາ ປະກອບໄປດ້ວຍບັນດາພູຫີນປູນທີ່ປົກຄຸມດ້ວຍຕົ້ນໄມ້ໃບຫຍ້າ ແລະ ກົກກ້ວຍອັນດົກໜາ ແລະ ຂຽວກະຈີ. ນອກນັ້ນ, ຍັງມີນ້ຳຕົກຕາດ 2 ແຫ່ງ ຄື: ນໍ້າຕົກຕາດຫ້ວຍສານ ແລະ ນ້ຳຕົກຕາດຫ້ວຍສະໄພ ທີ່ສູງປະມານ 10 ແມັດ ໄຫຼລົງເປັນຊັ້ນໆຕາມຮ່ອມຜາຊັນ ແລະ ມີນ້ຳທີ່ໄຫຼບໍ່ຂາດສາຍຕະຫຼອດປີ.

ຄຳວ່າຖໍ້າ ຂຸນລາງ ເຊິ່ງມັນກໍ່ຄືຖ້ຳຂອງ ຂຸນລາງ ຕົວລະຄອນເອກອີກໜຶ່ງຕົວລະຄອນທີ່ສຳຄັນໃນຕຳນານໂສກອະນາດຕະກຳແຫ່ງຄວາມຮັກສາມເສົ້າທີ່ຂຶ້ນຊື່ຂອງຊາວແຂວງວຽງຈັນ ກໍ່ຄືຊາວເມືອງກາສີ ເລື່ອງນິທານ ຮັກອໍາມະຕະຂອງ “ ຂຸນລູ – ນາງອົ້ວ ” ທີ່ຜູ້ເຖົ້າຜູ້ແກ່ໄດ້ເລົ່າຂານໃຫ້ລູກຫຼານຟັງຕໍ່ໆກັນມາ.

ຕາມການເລົ່າຂານກັນວ່າ ບໍລິເວນຖໍ້າແຫ່ງນີ້ເປັນໄຮ່ນາ, ເປັນສະຖານທີ່ພັກຜ່ອນ, ບ່ອນເກັບມ້ຽນຊັບສົມບັດຂອງ  ຂຸນລາງ ( ເສດຖີແຫ່ງນະຄອນກາຍ ໃນສະໄໝນັ້ນ ) ເຊິ່ງ ຂຸນລາງ ໄດ້ຕົກແຕ່ງສະຖານທີ່ແຫ່ງນີ້ເພື່ອໃຊ້ເປັນເຮືອນຫໍໃນພິທີແຕ່ງດອງ ແລະ ຈະຄອງຄູ່ກັບ ນາງ ອົ້ວຄ່ຽມ ສາວງາມແຫ່ງເມືອງນະຄອນກາຍ ແລະ ໃນປັດຈຸບັນແມ່ນສະຖານທີ່ທ່ອງທ່ຽວທາງທຳມະຊາດທີ່ອຸດົມສົມບູນ ແລະ ງົດງາມສຸດໆ.

ຖ້ຳ ຂຸນລາງ ແຫ່ງນີ້ ຍັງມີອີກຊື່ໜຶ່ງທີ່ຊາວເມືອງກາສີ ຮຽກຂານກັນວ່າ “ ຖ້ຳຫີນຂັນໝາກ ” ທີ່ຊາວເມືອງພາກັນເອີ້ນຊື່ນີ້ ກໍ່ເພາະວ່າພາຍໃນຖ້ຳມີຫີນເປັນຮູບໝາກເບັງໃຫຍ່ ເຊິ່ງໝາກເບັງນີ້ເພິ່ນບອກວ່າເປັນໝາກເບັງຂັນໝາກທີ່ ຂຸນລາງ ຈະນຳໄປສູ່ຂໍ ນາງ ອົ້ວ ແຕ່ ນາງ ອົ້ວ ພັດຂ້າຕົວຕາຍໜີຂັນໝາກຂອງ ຂຸນລາງ ສາກ່ອນ ເຮັດໃຫ້ ຂຸນລາງ ກາຍເປັນໝ້າຍຂັນໝາກ ເພິ່ນເລີຍປະໄວ້ແນວນັ້ນຈົນກາຍເປັນຫີນ ແລະ ພາຍໃນຖ້ຳກໍ່ມີຜົ້ງທັງໝົດ 7 ຜົ້ງ ທີ່ບາງບ່ອນເບິ່ງຄ້າຍຄືເປັນຫ້ອງໂຖງຮັບແຂກ, ຫ້ອງນອນທີ່ມີຕຽງນອນ, ຜ້າກັ້ງ ເປັນຮ່ອງຮອຍໄວ້ຈົນເທົ່າທຸກວັນນີ້.

ນອກນັ້ນ, ຖໍ້າ ຂຸນລາງ ແຫ່ງນີ້ເປັນຖໍ້າທີ່ມີນ້ຳຍ້ອຍອອກມາຈາກຜາ ແຖມພາຍໃນຖ້ຳຍັງມີຫີນນ້ຳຍ້ອຍອີກ ເຮັດໃຫ້ພາຍໃນຖ້ຳເບິ່ງຄືດິນແດນອັດສະຈັນທີ່ສວຍງາມ ຖືກປະດັບເອ້ໄວ້ດ້ວຍເພັດນິນຈິນດາ ທີ່ເຫຼື້ອມລະຍິບລະຍັບຢ່າງສວຍງາມ.

ນັກທ່ອງທ່ຽວສາມາດຍ່າງມາທາງທິດຕາເວັນຕົກ ເຊິ່ງມີຂັ້ນໄດຂຶ້ນ ປະມານ 400 ຂັ້ນ ຈຶ່ງຮອດປາກຖໍ້າ ແລະ ມີຂັ້ນໄດລົງອີກດ້ານໜຶ່ງ ປະມານ 130 ຂັ້ນ ເພື່ອໄປຫານ້ຳຕົກຕາດ. ພາຍໃນຖໍ້າມີກ້ອນຫີນໃຫຍ່ຕັ້ງຢູ່ 2 ກ້ອນ ຄື: ກ້ອນໜຶ່ງແມ່ນຄ້າຍຄືໝາກເບັງ ສູງປະມານ 3 – 4 ແມັດ ແລະ ກ້ອນທີສອງ ຄ້າຍຄືກອງເຂົ້າ ສູງປະມານ 2 – 3 ແມັດ,ພື້ນຖ້ຳມີຮູບຄ້າຍຄືທົ່ງນາກວ້າງຂວາງ ແລະ ມີບ່ອນນອນໃນຖໍ້າ, ມີຫີນງອກ, ຫີນຍ້ອຍ ເປັນຊວດຊົງຮູບຮ່າງຕ່າງໆ ທີ່ສວຍງາມແຕກຕ່າງກັນ ເຊິ່ງແຍກອອກເປັນຫຼາຍຜົ້ງ, ຫຼາຍໂພງ, ຫຼາຍຫ້ອງ, ຫຼາຍຊັ້ນ ກວ້າງ – ແຄບເຖິງສີ່ລະດັບ, ມີທາງຍ່າງລວງດຽວທີ່ຍາວໄປທາງທິດຕາເວັນອອກ ປະມານ 250 ແມັດ ສະດວກໃນການທ່ຽວຊົມ.

ປັດຈຸບັນຖ້ຳ ຂຸນລາງ ແຫ່ງນີ້ໄດ້ກາຍເປັນແຫຼ່ງທ່ອງທ່ຽວທີ່ສາມາດດຶງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າຊົມເປັນຈຳນວນຫຼາຍ ມີເສັ້ນທາງເຂົ້າໄປຫາຖໍ້າຢ່າງສະດວກ, ມີໄຟຟ້າເຂົ້າເຖິງ, ມີຕູບພັກເຊົາ, ເຮືອນພັກ, ບັງກາໂລ ແບບທຳມະຊາດ ສາມາດນອນແຮມຄືນໄດ້ ແລະ ມີຮ້ານອາຫານ ສາມາດບໍລິການນັກທ່ອງທ່ຽວໄດ້ຕະຫຼອດ, ເປັນແຫຼ່ງທ່ອງທ່ຽວທາງທຳມະຊາດ, ວັດທະນະທຳ ອັນເປັນເອກະລັກສະເພາະຂອງຊາວເມືອງກາສີ ທີ່ສວຍສົດງົດງາມ ແລະ ເໝາະສຳລັບນັກທ່ອງທ່ຽວຜູ້ທີ່ມັກທ່ຽວຊົມທຳມະຊາດພູຜາປ່າໄມ້, ຫ້ວຍນ້ຳລຳເຊ, ວິຖີການດຳລົງຊີວິດຂອງປະຊາຊົນເຂດຊົນນະບົດ ແລະ ສຶກສາຕຳນານເລື່ອງລາວຄວາມຮັກຂອງ ທ້າວ    ຂຸນລູ – ນາງ ອົ້ວ ແລະ ທ້າວ ຂຸນລາງ ທີ່ເປັນນິທານເລົ່າລືກັນມາເທົ່າທຸກວັນນີ້.

( ໂດຍ: ກາວຊົ່ງ )

%d bloggers like this: