2 ລໍ້ພາລຸຍ ສູ່ດິນແດນຜົ້ງສາລີ ຊົມວິຖີຊີວິດ ແລະ ທໍາມະຊາດເມືອງເໜືອ

ຕອນທີ 1 ຈາກນະຄອນຫຼວງວຽງຈັນສູ່ປາກລາຍ

ຫຼາຍຄົນມັກຕັ້ງຄຳຖາມຢາກໄປທ່ຽວແຕ່ບໍ່ມີເວລາ, ມີເວລາແຕ່ບອກວ່າບໍ່ມີງົບໄປ ຫຼື ຮ້ອຍເລື່ອງພັນເຫດຜົນ ເຮັດໃຫ້ບໍ່ສາມາດກ້າວຂາອອກໄປປະເຊີນໂລກກວ້າງອັນສວຍງາມທີ່ລໍຖ້າຢູ່ຂ້າງໜ້າໄດ້.

ຫຼາຍປີຜ່ານມາມີຫຼາຍຄົນ ໂດຍສະເພາະໄວໜຸ່ມທີ່ຫັນມາໃຊ້ລົດຈັກເດີນທາງໄປເລາະທ່ອງທ່ຽວເມືອງລາວ ເນື່ອງຈາກເປັນການທ່ອງທ່ຽວທີ່ປະຢັດ ມີຄວາມສະດວກໃນການເຂົ້າເຖິງສະຖານທີ່ທ່ອງທ່ຽວຕ່າງໆ ທັງສາມາດຈອດແວ່ຖ່າຍຮູບຕາມຈຸດຕ່າງໆໄດ້ດີ.

ໜຶ່ງໃນນັ້ນກໍ່ມີທີມງານ 2 ລໍ້ວິຖີຊີວິດລາວ ທີ່ໄດ້ອອກທຣິບທ່ອງທ່ຽວເມືອງລາວມາຫຼາຍປີ ເຊິ່ງຫຼາຍຄົນເລີ່ມຈາກການເດີນທາງໄປຄົນດຽວ ກ່ອນທີ່ຈະມີການລວມຕົວກັນເມື່ອສາມສີ່ປີຜ່ານມາ ເພື່ອພ້ອມກັນກ້າວໄປສູ່ເປົ້າໝາຍທີ່ວາງໄວ້ດ້ວຍກັນ ນັ້ນຄືການເຜີຍແຜ່ຄວາມງົດງາມຂອງເມືອງລາວໃຫ້ຄົນລາວເອງ ແລະ ຕ່າງປະເທດໄດ້ເຫັນ ແລະ ຮັບຮູ້ຫຼາຍຂຶ້ນ.

ເມື່ອບໍ່ດົນມານີ້ທີມງານ 2 ລໍ້ວິຖີຊີວິດລາວ 3 ຊີວິດ ໄດ້ຕັດສິນໃຈເດີນທາງດ້ວຍລົດຈັກອີກຄັ້ງໜຶ່ງ ເພື່ອເປັນການມ້ວນທ້າຍປີ 2018 ໄປພ້ອມກັບການຕ້ອນຮັບສະມາຊິກໃໝ່ອີກໜຶ່ງຄົນເຂົ້າມາສູ່ທີມ.

ທຣິບນີ້ເປົ້າໝາຍແມ່ນພະຍາຍາມເກັບຮູບພາບຕາມເສັ້ນທາງທີ່ຜ່ານໃຫ້ໄດ້ຫຼາຍທີ່ສຸດ ຈິຶ່ງໄດ້ວາງເປົ້າໝາຍການເດີນທາງໃນແຕ່ລະມື້ໄວ້ ປະມານ 200 ກິໂລແມັດ ເຊິ່ງຕ່າງຈາກທຣິບຫຼາຍໆຄັ້ງຜ່ານມາ ທີ່ມີໄລຍະເດີນທາງໄກບາງມື້ຮອດລະດັບ 400 ກິໂລແມັດກໍ່ມີ.

ເດີມທີພວກເຮົາວາງແຜນການເດີນທາງລະຫວ່າງວັນທີ 3 – 10 ພະຈິກ ແຕ່ເພື່ອໃຫ້ໄດ້ພາບທີ່ຕ້ອງການ ແລະ ມີເວລາຖ່າຍຮູບຫຼາຍຂຶ້ນ ຈຶ່ງປັບມາເປັນອອກເດີນທາງວັນທີ 2 – 11 ພະຈິກແທນ ( 10 ມື້ 9 ຄືນ ).

ສ່ວນເລື່ອງລາວ ແລະ ຮູບພາບທີ່ໄດ້ຈະອອກມາເປັນຄືແນວໃດນັ້ນ ຂໍເລີ່ມທີ່ຕອນທີ 1 ກັນເລີຍ ເຊິ່ງກໍ່ມີການປັບແຜນອີກຄັ້ງໜຶ່ງ ການເດີນທາງຈາກນະຄອນຫຼວງວຽງຈັນ – ປາກລາຍ ຈະແລ່ນຕາມເສັ້ນທາງແຄມຂອງ ແຕ່ກໍ່ຕັດສິນໃຈແລ່ນໄປຜ່ານເມືອງເຟືອງ ເນື່ອງຈາກເສັ້ນທາງນີ້ຍັງບໍ່ເຄີຍໄປແດ່ ຈຶ່ງຄິດວ່າອາດມີຫຼາຍສິ່ງຫຼາຍຢ່າງໃຫ້ໜ້າສົນໃຈ.

ໄລຍະທາງມື້ທຳອິດຖືວ່າໄກສົມຄວນ ເພາະແລ່ນທາງໂຄ້ງ ແລະ ເສັ້ນທາງແຕ່ເມືອງເຟືອງຜ່ານເມືອງໝື່ນ ເຂົ້າສູ່ເມືອງຊະນະຄາມ ເປັນທາງດິນແດງທີ່ເຕັມໄປດ້ວຍຂຸມ.

ຈຸດທໍາອິດທີ່ພວກເຮົາວາງເປົ້າການຖ່າຍຮູບແມ່ນທີ່ເມືອງເຟືອງ ດິນແດນຜາທໍ່ໜໍ່ຄໍາອັນລືຊື່ ເຊິ່ງພວກເຮົາໄດ້ອອກຈາກນະຄອນຫຼວງວຽງຈັນ ປະມານ 7:00 ໂມງເຊົ້າ ມາຮອດເມືອງເຟືອງກໍ່ປະມານ 9:30 ໂມງ ເຊິ່ງໄດ້ໃຊ້ເວລາຖ່າຍຮູບຢູ່ດົນສົມຄວນ ລວມເຖິງກິນເຂົ້າສວາຍຢູ່ທີ່ນີ້່ ຈຶ່ງໄດ້ອອກເດີນທາງຕໍ່ໃນເວລາປະມານ 13:30 ໂມງ.

ອອກຈາກຕົວເມືອງເຟືອງບໍ່ພໍເທົ່າໃດກິໂລແມັດ ກໍ່ເລີ່ມເຂົ້າສູ່ເສັ້ນທາງດິນແດງ ແຕ່ກໍ່ມີການປັບໜ້າທາງເພື່ອກຽມປູຢາງແດ່ແລ້ວ ແຕ່ເມື່ອແລ່ນໄປອີກບໍ່ດົນກໍ່ເຕັມໄປດ້ວຍຂຸມ ເຮັດໃຫ້ບໍ່ສາມາດແລ່ນໄວໄດ້ ແລະ ຕ້ອງໃຊ້ຄວາມລະມັດລະວັງເປັນພິເສດໃນການຂັບຂີ່, ລະຫວ່າງທາງພວກເຮົາກໍ່ແວ່ຖ່າຍຮູບເປັນຈຸດໆ ແຕ່ດ້ວຍໄລຍະທີ່ຍັງໄກບວກກັບຕອນສວາຍແສງແດງກ້າຈຶ່ງແວ່ໜ້ອຍໜຶ່ງ.

ຈົນມາຮອດ ວັດສິນໄຊ ບ້ານໂນນຫີນແຫ່ ເມຶືອງເຟືອງ ແຂວງວຽງຈັນ ປະມານ 15:00 ໂມງ ເຊິ່ງທ້ອງຟ້າໃນເວລານັ້ນກໍ່ຍັງແດດກ້າ ເຮັດໃຫ້ການຖ່າຍຮູບວັດສິນໄຊ ອອກມາບໍ່ຄ່ອຍງາມປານໃດ ສ່ວນເຈົ້າອະທິການວັດກໍ່ໄດ້ອຳນວຍຄວາມສະດວກກັບທີມງານພວກເຮົາເຕັມທີ່ໃນການໃຫ້ຂໍ້ມູນ ແລະ ແນະນຳຈຸດຖ່າຍຮູບສຳຄັນຕ່າງໆ ພ້ອມທັງຢາກໃຫ້ທີມງານພວກເຮົາແວ່ຄືນໜຶ່ງ ເພື່ອໃຫ້ໄດ້ຮູບທີ່ງົດງາມໃນຍາມແລງຄ້ອຍຄໍ່າ ແລະ ຮຸ່ງເຊົ້າວັນໃໝ່.

ແຕ່ເນື່ອງຈາກໄດ້ວາງເປົ້າໄວ້ມື້ທີ 1 ແມ່ນຕ້ອງຮອດປາກລາຍ ຫຼັງຈາກທີ່ໃຊ້ເວລາຖ່າຍຮູບຢູ່ທີ່ນີ້ເກືອບ 1 ຊົ່ວໂມງ ພວກເຮົາກໍ່ຄອບລາເຈົ້າອະທິການວັດ ອອກເດີນທາງໄປສູ່ເປົ້າໝາຍຕໍ່ໄປ.

ພວກເຮົາຂີ່ລົດອອກມາໄດ້ໜ້ອຍໜຶ່ງກໍ່ແວ່ຖ່າຍຮູບອີກຈຸດ ເຊິ່ງເປັນຈຸດທີ່ງົດງາມ ມີຝູງ ຄວາຍກຳລັງກິນກໍເຟືອງເຂົ້າທີ່ຫາກໍ່ເກັບກ່ຽວແລ້ວ ໂດຍມີສາຍພູຜາເປັນສາກຫຼັງ.

ຍ້ອນແນມເບິ່ງເຂັມໂມງມັນ 16:00 ໂມງປາຍແລ້ວ ສ່ວນປາກລາຍຍັງຫ່າງອອກໄປນັບ 100 ກິໂລແມັດ ຈຶ່ງບິດຄັນເລັ່ງມຸ່ງໜ້າຕໍ່ໄປ ໂດຍບໍ່ໄດ້ແວ່ຖ່າຍຮູບຢູ່ຈຸດໃດເລີຍ.

ລະຫວ່າງທາງທີ່ເຕັມໄປດ້ວຍບວກ ແລະ ຂຸມ ທາງໃຈກໍ່ຄອງຄອຍ ແລະ ຈົດຈໍ່ປານໃດຈຶ່ງຈະຮອດເປົ້າໝາຍປາຍທາງ ຈົນຮອດເວລາປະມານ 19:00 ໂມງ ຈຶ່ງມາຮອດເຂດບ້ານວັງ ເມືອງໝື່ນ ພວກເຮົາແວ່ກິນເຂົ້າໄປພ້ອມກັບປຶກສາຫາລື ຈະນອນຊະນະຄາມ ຫຼື ໄປນອນປາກລາຍຕາມເປົ້າໝາຍທີ່ວາງໄວ້ ເຊິ່ງຊະນະຄາມກໍ່ຍັງປະມານ 20 ກິໂລແມັດ ແຕ່ຮອດປາກລາຍໜ້າຈະປະມານ 60 ກິໂລແມັດ.

ແຕ່ພວກເຮົາກໍ່ຕັດສິນໃຈສູ້ເດີນທາງຕໍ່ໄປປາກລາຍ ຈາກເຂດບ້ານວັງຫາຊະນະຄາມຍັງຕ້ອງຜ່ານເສັ້ນທາງເປັນຂຸມ ຂີ່ໄປດົນເຕີບຈຶ່ງເຂົ້າສູ່ທາງປູຢາງເຮັດໃຫ້ອຸ່ນໃຈຂຶ້ນແດ່. ຈາກນັ້ນ, ກໍ່ແມ່ນການບິດຄັນເລັ່ງເຕັມທີ່ເພື່ອໄປໃຫ້ຮອດປາກລາຍ ແລະ ສຸດທ້າຍພວກເຮົາກໍ່ມາຮອດເມືອງປາກລາຍ ເວລາປະມານ 21:30 ໂມງ. ຈາກນັ້ນ, ກໍ່ຊອກທີ່ພັກແລ້ວກໍ່ນອນພັກຜ່ອນ.

ເປັນອັນວ່າການເດີນທາງມື້ທຳອິດກໍ່ໂຫດກັນແລ້ວທັງຜ່ານທາງປູຢາງ ແລະ ທາງດິນແດງທີ່ເຕັມໄປດ້ວຍຂຸມເລິກ ໃຊ້ເວລາເດີນທາງລວມຫຼາຍກວ່າ 14 ຊົ່ວໂມງ.

ສ່ວນຕອນຕໍ່ໄປ ຖືເປັນປາຍທາງທີ່ໜ້າຕື່ນເຕັ້ນ ແລະ ງົດງາມຂອງການເດີນທາງຄັ້ງນີ້ ນັ້ນຄື ເມືອງໄຊສະຖານ ດິນແດນທະເລໝອກ.

( ບົດ ແລະ ຮູບໂດຍ: noy Images )

%d bloggers like this: