ໂຮງຮຽນ ປາດຖະໜາ ເລັ່ງບຳລຸງນັກຮຽນເພື່ອກຽມພ້ອມເຂົ້າຮ່ວມແຂ່ງຂັນນັກຮຽນເກັ່ງ

ສົກຮຽນ 2018 – 2019 ໂຮງຮຽນ ປາດຖະໜາ ສືບຕໍ່ຈັດຕັ້ງປະຕິບັດການບໍາລຸງການຮຽນ – ການສອນນັກຮຽນເກັ່ງ ຕັ້ງແຕ່ເດືອນກັນຍາເປັນຕົ້ນມາ ສອນໂດຍອາຈານທີ່ມີປະສົບການສູງເພື່ອຖ່າຍທອດຄວາມ    ຮູ້ – ຄວາມສາມາດ ເພື່ອສ້າງນັກຮຽນດີ – ນັກຮຽນເກັ່ງໃນຂັ້ນຕ່າງໆ.

ທ່ານ ບຸນຕີ ສິດທິນົນທອງ ອຳນວຍການ ໂຮງຮຽນ ປາດຖະໜາ ໃຫ້ສຳພາດວ່າ: ສົກຮຽນ 2018 – 2019 ນີ້ ທາງໂຮງຮຽນໄດ້ຄັດເລືອກເອົານັກຮຽນເກັ່ງ ຊັ້ນ ປ 5 ແລະ ມ 4 ທີ່ມີພອນສະຫວັນ ແລະ ມີຜົນການຮຽນດີເດັ່ນໃນສົກຮຽນຜ່ານມາ ວິຊາລະ 5 ຄົນ ແລະ ເລີ່ມຈັດຕັ້ງການຮຽນ – ການສອນບຳລຸງຢ່າງເປັນປົກກະຕິ ແຕ່ເດືອນກັນຍາ ເປັນຕົ້ນມາ ເພື່ອໃຫ້ມີຄວາມພ້ອມທາງດ້ານພື້ນຖານຫຼາຍຂຶ້ນ ໂດຍທາງໂຮງຮຽນໄດ້ລວບລວມເອົາຫົວບົດສອບເສັງແຕ່ລະວິຊາທີ່ອອກສອບເສັງໃນສົກຮຽນຜ່ານມາ

ສົມທົບກັບບົດສອບເສັງລະດັບສາກົນເພີ່ມຕື່ມ ເຊັ່ນ: ບົດແຂ່ງຂັນທີ່ປະເທດໄທ, ຫວຽດນາມ, ສິງກະໂປ ແລະ ປະເທດອື່ນໆເພື່ອກະກຽມຄວາມພ້ອມ ເພາະອະນາຄົດຂ້າງໜ້ານັກຮຽນພວກເຮົາສາມາດກ້າວໄປສູ່ເວທີລະດັບພາກພື້ນ ແລະ ທາງໂຮງຮຽນຈະສືບຕໍ່ເນັ້ນສອນພາສາອັງກິດໃຫ້ແຂງຂຶ້ນຕື່ມ ໂດຍກຳນົດເອົາຊົ່ວໂມງຫຼັງເລີກຮຽນທຸກໆວັນຈັນ ຫາ ສຸກ ຄື: ຊັ້ນ ປ 5 ແມ່ນ 16:00 – 17:00 ໂມງ, ສ່ວນຊັ້ນ ມ 4 ແມ່ນ 17:00 – 18:00 ໂມງ ບາງວິຊາໃຊ້ເວລາ 18:00 – 19:00 ໂມງ, ຫຼັງຈາກບຳລຸງໃກ້ຮອດມື້ແຂ່ງຂັນ ທາງໂຮງຮຽນຈະໄດ້ສອບເສັງຄັດເລືອກຂັ້ນໂຮງຮຽນກ່ອນ ເພື່ອຄັດເອົາຜູ້ທີ່ເກັ່ງວິຊາລະ 3 ຄົນ, ເຂົ້າຮ່ວມແຂ່ງຂັນຂັ້ນເມືອງ.

ສຳລັບສົກຮຽນນີ້ ທາງໂຮງຮຽນໄດ້ຕັ້ງເປົ້າໝາຍໃນການຮ່ວມແຂ່ງຂັນນັກຮຽນເກັ່ງໃນທຸກລະດັບ ທັງຊັ້ນ ປ 5 ແລະ ມ 4 ຄາດວ່າໃຫ້ຕິດທຸກວິຊາຢ່າງໜ້ອຍວິຊາລະ 2 ຄົນ, ແຕ່ວ່າຖ້າຢາກໃຫ້ໄດ້ຕາມເປົ້າຂຶ້ນກັບຫຼາຍປັດໄຈ ເຊັ່ນ: ຄູ, ນັກຮຽນ, ຜູ້ປົກຄອງ ຖ້າທັງ 3 ຝ່າຍຮ່ວມແຮງຮ່ວມໃຈກັນສຸມໃສ່ຈັດຕັ້ງປະຕິບັດໃນການກະກຽມບຳລຸງ, ສົ່ງເສີມ ອາດຈະສາມາດສ້າງຜົນງານໃຫ້ສຳເລັດເກີນຄາດໝາຍກໍ່ເປັນໄດ້.

ພິເສດສົກຮຽນນີ້ ທາງໂຮງຮຽນເນັ້ນການຮຽນ – ການສອນເພື່ອສ້າງນັກຮຽນທຸກຄົນໃຫ້ມີຄຸນນະພາບ, ສຳລັບນັກຮຽນເກັ່ງຖືເປັນບຸລິມະສິດພິເສດອັນໜຶ່ງທີ່ເຮົາຕ້ອງສ້າງໃຫ້ໄດ້.

ທ່ານກ່າວໃຫ້ຮູ້ອີກວ່າ: ຕະຫຼອດໄລຍະທີ່ເປີດການຮຽນ – ການສອນຜ່ານມາ ໂດຍສະເພາະແມ່ນເລີ່ມແຕ່ສົກຮຽນ 2012 – 2013 ເປັນຕົ້ນມາ, ທາງໂຮງຮຽນສາມາດສ້າງນັກຮຽນເກັ່ງລະດັບຂັ້ນເມືອງຖືວ່າຕິດອັນດັບທຸກໆປີ ຊັ້ນ ປ 5 ແລະ ມ 4. ໃນນັ້ນ, ບາງສົກຮຽນພວກເຮົາສາມາດຍາດໄດ້ອັນດັບ 1 ຂອງເມືອງ ຊັ້ນ ປ 5 ແລະ ຊັ້ນ ມ 4, ບາງສົກຮຽນແມ່ນສາມາດຍາດໄດ້ອັນດັບ   ທີ 1 ທຸກວິຊາໃນລະດັບຂັ້ນເມືອງ, ສາມາດຍາດໄດ້ອັນດັບທີ 1 ຂັ້ນນະຄອນຫຼວງ ແລະ ສາມາດຍາດໄດ້ອັນດັບທີ 1 ລະດັບຊາດ ແລະ ໃນສົກຮຽນ 2017 – 2018 ຜ່ານມາ ໄດ້ສົ່ງນັກຮຽນຊັ້ນ ປ 5 ເຂົ້າແຂ່ງຂັັນຂັ້ນກຸ່ມ 9 ຄົນ ເສັງໄດ້ທັງໝົດ,

ເຂົ້າແຂ່ງຂັນຂັ້ນເມືອງໄດ້ 4 ຄົນ ແລະ ເຂົ້າແຂ່ງຂັນຂັ້ນນະຄອນຫຼວງ ສາມາດຍາດໄດ້ອັນດັບທີ 1 ວິຊາຄະນິດສາດ, ອັນດັບ 2 ແລະ ໄດ້ອັນດັບທີ 4 ວິຊາໂລກອ້ອມຕົວ 2 ຄົນ; ສ່ວນຊັ້ນ ມ 4 ສົ່ງນັກແຂ່ງຂັນເຂົ້າຮ່ວມ 8 ຄົນ, ແຂ່ງຂັນຜ່ານຂັ້ນເມືອງ 3 ວິຊາ ຈຳນວນ 7 ຄົນ ແລະ ເຂົ້າແຂ່ງຂັ້ນນະຄອນຫຼວງ ສາມາດຍາດໄດ້ລາງວັນ ອັນດັບ 3 ວິຊາເຄມີສາດ 1 ຄົນ ແລະ ອັນດັບທີ 4 ຈຳນວນ 6 ຄົນ.

ສາເຫດທີ່ພວກເຮົາສາມາດຍາດໄດ້ຜົນງານທີ່ພົ້ນເດັ່ນໃນແຕ່ລະປີ ກໍ່ຍ້ອນທາງໂຮງຮຽນໄດ້ເອົາໃຈໃສ່ທາງດ້ານການຮຽນ – ການສອນຢ່າງເຂັ້ມງວດ ແລະ ທາງໂຮງຮຽນມີນະໂຍບາຍຊຸກຍູ້ຜູ້ທີ່ຕັ້ງໃຈບຸກບືນຕົນເອງໃຫ້ເປັນນັກຮຽນດີ – ຮຽນເກັ່ງ ໂດຍສະເພາະແມ່ນເລື່ອງລາງວັນຂອງຂວັນຕ່າງໆ ຄື: ຢູ່ພາຍໃນໂຮງຮຽນຖ້ານັກຮຽນເກັ່ງໄດ້ທີ 1 ໃນ 3 ເດືອນຊ້ອນ ແມ່ນໄດ້ຮັບໃບຍ້ອງຍໍ ແລະ ຈະໄດ້ຮຽນຟຣີ 1 ເດືອນ ແລະ ຖ້າເປັນນັກຮຽນເກັ່ງຂັ້ນເມືອງ ທາງໂຮງຮຽນຈະມອບອຸປະກອບການຮຽນ ແລະ ເງິນລາງວັນໃຫ້

ຖ້າຕິດນັກຮຽນເກັ່ງຂັ້ນນະຄອນຫຼວງໃນປີທຳອິດ ໄດ້ມອບແລັບທັອບ 1 ເຄື່ອງ ແລະ ປີຕໍ່ມາໄດ້ປ່ຽນມອບເປັນເງິນລາງວັນໃຫ້ແທນ; ຖ້າຕິດອັນດັບ 1 ໄດ້ຮັບໃບຍ້ອງຍໍ ແລະ ເງິນລາງວັນຂັ້ນໂຮງຮຽນ ຈຳນວນ 5 ລ້ານກີບ. ໃນນັ້ນ, ທີ 2 ໄດ້ 3 ລ້ານກີບ, ທີ 3 ໄດ້ 1 ລ້ານກີບ; ຖ້ານັກຮຽນເສັງຕິດອັນດັບ 1 ລະດັບຊາດ ແມ່ນໄດ້ພານັກຮຽນ ແລະ ຄູສອນໃຫ້ໄປທັດສະນະທີ່ປະເທດສິງກະໂປ ພິເສດສຳລັບສົກນີ້, ຖ້ານັກຮຽນ ຊັ້ນ ປ 5 ແລະ ມ 4 ແຂ່ງຂັນຕິດນັກຮຽນເກັ່ງຂັ້ນນະຄອນຫຼວງ 1 ໃນ 3 ແມ່ນຈະໄດ້ຮຽນ ແລະ ກິນເຂົ້ານຳໂຮງຮຽນ ໂດຍບໍ່ເສຍຄ່າໃດໆທັງໝົດຈົນຈົບເພື່ອຊຸກຍູ້ນັກຮຽນຜູ້ທີ່ຕັ້ງໃຈຮຽນ.

ໂຮງຮຽນ ອະນຸບານ – ປະຖົມ – ມັດທະຍົມ ປາດຖະໜາ ຕັ້ງຢູ່ໜ່ວຍ 10 ບ້ານວັງຊາຍ ເມືອງໄຊເສດຖາ ນະຄອນຫຼວງວຽງຈັນ.

( ໂດຍ: ແກ້ວ )

%d bloggers like this: