ຊຽງຂວາງ ຈັດເທດສະການບຸນເຂົ້າໄກ່ນ້ອຍ

ແຂວງຊຽງຂວາງ ຈັດເທດສະການບຸນເຂົ້າໄກ່ນ້ອຍ ຄັ້ງທີ 5 ຂຶ້ນໃນຕອນເຊົ້າວັນທີ 5 ທັນວາ ຢູ່ທີ່ເດີ່ນບານແຂວງ ໂດຍການເປັນປະທານຂອງ ທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ, ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ມີຮອງລັດຖະມົນຕີ, ການນຳອ້ອມຂ້າງແຂວງ, ການນຳແຂວງ, ພະນັກງານຫຼັກແຫຼ່ງ ຕະຫຼອດຮອດພໍ່ແມ່ປະຊາຊົນຊາວຊຽງຂວາງເຂົ້າຮ່ວມ.
ເທດສະການບຸນເຂົ້າໄກ່ນ້ອຍປີນີ້ ໄດ້ຮັບການສະໜັບສະໜູນຈາກ ບໍລິສັດ ເບຍລາວ ຈຳກັດ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ບໍລິສັດ, ຫ້າງຮ້ານຊ່ວຍອຸປະຖຳ ເຊິ່ງພາຍໃນງານກໍ່ໄດ້ຊົມກ້ອນກຳລັງຈາກບັນດາເມືອງຂອງແຂວງທີ່ແຕກຕ່າງຈາກທຸກປີ ແລະ ປີນີ້ແຕ່ລະກ້ອນກຳລັງໄດ້ສະແດງໃຫ້ເຫັນການຜະລິດເຂົ້າໄກ່ນ້ອຍ, ການຊົມໃຊ້, ຫັດຖະກຳ, ແຫຼ່ງທ່ອງທ່ຽວ ແລະ ວັດທະນະທຳແຕ່ລະທ້ອງຖິ່ນ. ນອກນີ້, ຍັງມີກ້ອນກຳລັງຊາວໜຸ່ມ, ນັກສຶກສາຜູ້ມີເຫື່ອແຮງໃນການອອກແຮງງານຜະລິດເຂົ້າໄກ່ນ້ອຍ.

ທ່ານເຈົ້າແຂວງໆຊຽງຂວາງ ກ່າວວ່າ: ງານເທດສະການບຸນເຂົ້າໄກ່ນ້ອຍປີນີ້ ຕິດພັນກັບການຈັດຕັ້ງປະຕິບັດກິດຈະກຳປີທ່ອງທ່ຽວລາວ, ຕັ້ງໜ້າປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກເຂົ້າສູ່ຊີວິດຕົວຈິງ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ກະກຽມເປັນເຈົ້າພາບຈັດມະຫະກຳກີລາແຫ່ງຊາດ ຄັ້ງທີ 11, ກຽມຄວາມພ້ອມເອົາທົ່ງໄຫຫີນ 11 ແຫ່ງ ເຂົ້າເປັນມໍລະດົກໂລກ ແຫ່ງທີ 3 ຂອງ ສປປ ລາວ ແລະ ການສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 43 ປີ, ການສະເຫຼີມສະຫຼອງສ້າງຕັ້ງເມືອງວຽງໄຊ ຄົບຮອບ 50 ປີ, ສ້າງຜົນງານຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ແລະ ວັນສຳຄັນອື່ນໆຂອງຊາດ.
ເທດສະການປີນີ້ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ກໍ່ໄດ້ມອບໃບຢັ້ງຢືນຈົດທະບຽນຖິ່ນກຳເນີດເຂົ້າໄກ່ນ້ອຍ ກ່າວຮັບໂດຍ ທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ.
 
ໃນເທດສະການຄັ້ງນີ້ຄະນະຜູ້ແທນ ແລະ ພໍ່ແມ່ປະຊາຊົນກໍ່ໄດ້ພ້ອມກັນສູ່ຂວັນເຂົ້າ, ໄດ້ຊີມອາຫານພື້ນເມືອງຂອງຊາວຊຽງຂວາງ ທີ່ເປັນເອກະລັກສະເພາະແຂວງຊຽງຂວາງ.
 
( ຂ່າວ: ບຸນມີ ແສງທຸມມີ )

%d bloggers like this: