ບໍລິສັດ ບົວລະພາຈະເປີດໂຮງງານຜະລິດໄມ້ອັດໃນປີໜ້າ

ໃນປີ 2019 ບໍລິສັດ ບົວລະພາ ກະສິກຳ ແລະ ປ່າໄມ້ ມີແຜນສ້າງໂຮງງານໄມ້ອັດທີ່ມີຄວາມສາມາດຜະລິດໄດ້ເຖິງ 50 ພັນແມັດກ້ອນ ເພື່ອສົ່ງຂາຍໄປຕ່າງປະເທດ ໂດຍນຳໃຊ້ວັດຖຸດິບຈາກໄມ້ປູກຂອງບໍລິສັດ.

ພິທີເປີດຫ້ອງການໃໝ່ຂອງ ບໍລິສັດ ບົວລະພາ ກະສິກຳ – ປ່າໄມ້ ຈຳກັດ; ບໍລິສັດ ສະໂຕຣາເອັນໂຊ ລາວ ຈໍາກັດ ແລະ ສະເຫຼີມສະຫຼອງ ຄົບຮອບ 25 ປີ ຂອງບໍລິສັດ ບົວລະພາ ກະສິກໍາ – ປ່າໄມ້ ໄດ້ຈັດຂຶ້ນໃນວັນທີ 4 ທັນວາ 2018 ທີ່ນະຄອນຫຼວງວຽງຈັນໂດຍໃຫ້ກຽດເຂົ້າຮ່ວມຂອງ ທ່ານ ປີເຕີ້ ຟຸກເດີ້ ຫົວໜ້າກົງສຸນກິດຕິມະສັກ ແຫ່ງຣາຊະອານາຈັກຊູແອັດ ທັງເປັນຜູ້ອໍານວຍການ ບໍລິສັດ ສະໂຕຣາເອັນໂຊ ລາວ ຈໍາກັດ, ມີພາກສ່ວນທີ່ກ່ຽວຂ້ອງ ແລະ ແຂກທີ່ຖືກເຊີນເຂົ້າຮ່ວມ.

ທ່ານ ມາຕິນ ຟໍເຊັນ ຜູ້ອໍານວຍການ ບໍລິສັດ ບົວລະພາ ກະສິກໍາ – ປ່າໄມ້ ຈໍາກັດ ກ່າວວ່າ: ໃນໄລຍະຫຼາຍປີທີ່ຜ່ານມາ ບໍລິສັດ ບົວລະພາ ໄດ້ເຮັດວຽກໃນຫຼາຍຂົງເຂດ ເຊັ່ນ:  ການໃຫ້ຄໍາປຶກສາ, ການຜະລິດນົມ, ການປູກໄມ້ ແລະ ການແປຮູບໄມ້ປູກເປັນຜະລິດຕະພັນ. ເຖິງວ່າຈະມີຫຼາຍຂົງເຂດແຕກຕ່າງກັນ ແຕ່ກໍ່ຍັງມີຈຸດສຸມດຽວກັນຄືສ້າງລາຍຮັບທີ່ດີໄປພ້ອມໆກັນ ພວກເຮົາໄດ້ສະໜັບສະໜູນລັດຖະບານລາວ ເພື່ອຫຼຸດຜ່ອນຄວາມທຸກຍາກໃນປະເທດ ນີ້ບໍ່ແມ່ນການຊ່ວຍເຫຼືອແຕ່ເປັນການເຮັດທຸລະກິດທີ່ຍືນຍົງໃນປີ 2011, 95% ຂອງບໍລິສັດ ບົວລະພາ ໄດ້ຖືກຊື້ຫຸ້ນໂດຍບໍລິສັດການລົງທຶນຂອງຊູແອັດ, Silvicapital ແລະ ເປັນບໍລິສັດຮ່ວມທຶນ ຊູແອັດ ໃນປັດຈຸບັນກັບ ທ່ານ ນາງ            ສຸໄພວັນ ທ່ຽງຈັນໄຊ ເປັນຜູ້ຖືຫຸ້ນຂອງລາວ, ສິ່ງທີ່ເຮັດໃຫ້ນັກລົງທຶນ ຊູແອັດ ຕ້ອງການມາລົງທຶນຢູ່ປະເທດກໍ່ຍ້ອນພວກເຮົາເຊື່ອວ່າປະເທດລາວ ແລະ ຊູແອັດ ມີຄວາມຄ້າຍຄືກັນໃນຫຼາຍໆດ້ານ.

ດ້ານ ທ່ານ ນາງ ສຸໄພວັນ ທ່ຽງຈັນໄຊ ຮອງອໍານວຍການ ບໍລິສັດ ບົວລະພາ ກະສິກໍາ – ປ່າໄມ້ ຈໍາກັດ ກ່າວວ່າ: ມື້ນີ້ນອກຈາກຈະເປັນມື້ເປີດຫ້ອງການໃໝ່ແລ້ວຍັງເປັນມື້ທີ່ສໍາຄັນຂອງ ບໍລິສັດ ບົວລະພາ ທີ່ໄດ້ອຸທິດເຫື່ອແຮງທັງກໍາລັງໃຈ, ກໍາລັງກາຍດໍາເນີນທຸລະກິດກະສິກໍາ – ປ່າໄມ້ ຄົບຮອບ 25 ປີ ເຊິ່ງຕະຫຼອດໄລຍະຜ່ານມາບໍລິສັດໄດ້ປູກໄມ້ໄປແລ້ວປະມານ 4 ພັນກວ່າເຮັກຕາ ສາມາດສ້າງລາຍໄດ້ໃຫ້ປະຊາຊົນດ້ວຍການປະກອບສ່ວນປູກໄມ້ ແລະ ຍັງເປັນການປົກປັກຮັກສາສິ່ງແວດລ້ອມໄປຄຽງຄູ່ກັນ. ພ້ອມກັນນັ້ນ, ຍັງໄດ້ສ້າງໃຫ້ມີກອງທຶນຂັ້ນບ້ານ, ຂັ້ນເມືອງ ຜ່ານມາເປັນຈໍານວນຫຼາຍຕື້ກີບ. ບໍລິສັດໄດ້ມີໂຮງງານຜະລິດເຟີນີເຈີໄມ້ປູກຄົບວົງຈອນ ແລະ ໄດ້ສົ່ງອອກໄປຕ່າງປະເທດຫຼາຍກວ່າ 20 ປະເທດໃນໂລກ, ສ້າງລາຍຮັບໃຫ້ງົບປະມານຂອງລັດ ແລະ ສ້າງວຽກເຮັດງານທໍາໃຫ້ປະຊາຊົນລາວຫຼາຍສົມຄວນ.

ທ່ານ ນາງ ສຸໄພວັນ ທ່ຽງຈັນໄຊ ກ່າວຕື່ມວ່າ: ໃນປີ 2019 ບໍລິສັດຈະໄດ້ສ້າງໂຮງງານໄມ້ອັດທີ່ມີຄວາມສາມາດຜະລິດໄດ້ເຖິງ 50 ພັນແມັດກ້ອນ ເພື່ອສົ່ງຂາຍໄປປະເທດໄທ, ຫວຽດນາມ, ອາເມຣິກາເໜືອ ແລະ ສປ ຈີນ. ສ່ວນດ້ານວັດຖຸດິບທີ່ຈະປ້ອນໂຮງງານໄມ້ອັດແມ່ນຈະນຳໃຊ້ໄມ້ປູກຂອງບໍລິສັດທີ່ມີແລ້ວ 4 ພັນກວ່າເຮັກຕາ ແລະ ໃນຕໍ່ໜ້າຫາກການປູກໄມ້ໄດ້ຮອດ 20 ພັນເຮັກຕາຂຶ້ນໄປ ກໍ່ຈະເລີ່ມລົງມືສ້າງໂຮງງານເຫຍື່ອໄມ້ຂະໜາດໃຫຍ່ ເພື່ອຜະລິດເປັນແຜ່ນແພຄຸນນະພາບດີຂາຍອອກຕ່າງປະເທດ ໂຮງງານດັ່ງກ່າວຈະມີມູນຄ່າລົງທຶນເຖິງ 1 ຕື້ກວ່າໂດລາ.

ທ່ານ ມາຕິນ ຟໍເຊັນ ກ່າວຕື່ມອີກວ່າ: ຂ້າພະເຈົ້າຫວັງວ່າຫ້ອງການໃໝ່ແຫ່ງນີ້ຈະສະແດງເຖິງຍຸກສະໄໝໃໝ່ຂອງ ບໍລິສັດ ບົວລະພາ ແລະ ອຸດສາຫະກໍາປ່າໄມ້ໃນລາວ. ພວກເຮົາໄດ້ເຕີບໂຕຈາກຫ້ອງການທີ່ຜ່ານມາ ແລະ ຍັງຈະສືບຕໍ່ຂະຫຍາຍຕົວ, ໃນອີກ 2 ປີຂ້າງໜ້າ ພວກເຮົາຈະຂະຫຍາຍຕົວ 3 ເທົ່າ ແລະ ຈະສືບຕໍ່ຂະຫຍາຍການຜະລິດອຸດສາຫະກໍາ ແລະ ປ່າໄມ້ຂອງພວກເຮົາໃຫ້ຄືກັນກັບທີ່ພວກເຮົາເຊື່ອໝັ້ນວ່າອຸດສາຫະກໍາປ່າໄມ້ຈະເຕີບໂຕໃນລາວ, ພ້ອມທັງສ້າງໂອກາດການເຮັດວຽກໃນເຂດຊົນນະບົດ, ສ້າງລາຍໄດ້ໃຫ້ແກ່ລັດຖະບານ, ເກັບກໍາກາສກາກບອນ ແລະ ໃຫ້ຜົນຕອບແທນແກ່ນັກລົງທຶນ.

[ ຂ່າວ: ສົມລົດ + ເອຢິບ; ຮູບ: ສອນໄຊ ]

%d bloggers like this: