ສະພາຮັບຮອງລັດຖະມົນຕີກະຊວງ ປກສ ແລະ ຜູ້ວ່າການ ທຫລ ຄົນໃໝ່

ສະພາແຫ່ງຊາດໄດ້ພິຈາລະນາຮັບຮອງເອົາ ທ່ານ ພົນໂທ ວິໄລ ຫຼ້າຄຳຟອງ ເປັນລັດຖະມົນຕີກະ   ຊວງປ້ອງກັນຄວາມສະຫງົບຄົນ    ໃໝ່ ແລະ ຮັບຮອງເອົາ ທ່ານ ສອນໄຊ ສິດພະໄຊ ເປັນຜູ້ວ່າການທະນາຄານແຫ່ງ ສປປ ລາວ ( ທຫລ ).

ໃນວາລະກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ Vlll ໃນມື້ວານນີ້, ທ່ານ ນາງ ສວນສະຫວັນ ວິຍະເກດ ຄະນະປະຈໍາສະພາແຫ່ງຊາດ ເລຂາທິການສະພາແຫ່ງຊາດ ໄດ້ຂຶ້ນຜ່ານໜັງສືສະເໜີຂອງທ່ານນາຍົກລັດຖະມົນຕີ ກ່ຽວກັບການສະເໜີແຕ່ງຕັ້ງ ທ່ານ ພົນໂທ       ວິໄລ ຫຼ້າຄຳຟອງ ເປັນລັດຖະມົນຕີກະຊວງປ້ອງກັນຄວາມສະຫງົບຄົນໃໝ່. ສ່ວນທ່ານ ພົນຕີ ສົມແກ້ວ ສີລາວົງ ໄປຮັບໜ້າທີ່ໃໝ່ຢູ່ກະຊວງປ້ອງກັນປະເທດ.

ທ່ານ ພົນໂທ ວິໄລ ຫຼ້າຄຳຟອງ

ຜ່ານການປະກອບຄຳເຫັນຈາກ ສສຊ ເຫັນເປັນເອກະພາບ 90% ຂອງຈຳນວນສະມາຊິກສະພາແຫ່ງຊາດທີ່ເຂົ້າຮ່ວມປະຊຸມ ຈຳນວນ 126 ທ່ານ. ໃນນັ້ນ, ບໍ່ເຫັນດີ 09 ທ່ານ ເທົ່າກັບ 7% ແລະ ບໍ່ອອກສຽງ 2% ສະເໜີການແຕ່ງຕັ້ງ ທ່ານ ພົນໂທ ວິໄລ ຫຼ້າຄໍາຟອງ ເປັນລັດຖະມົນຕີກະຊວງປ້ອງກັນຄວາມສະຫງົບຄົນໃໝ່.

ໂດຍພາຍຫຼັງຜ່ານໜັງສືສະເໜີຂອງທ່ານນາຍົກລັດຖະມົນຕີ, ບັນດາສະມາຊິກສະພາແຫ່ງຊາດ ທີ່ເປັນຕົວແທນຂອງປະຊາຊົນໄດ້ພ້ອມກັນປະກອບຄຳຄິດເຫັນເປັນເອກະພາບໃຫ້ ທ່ານ ສອນໄຊ ສິດພະໄຊ ຂຶ້ນເປັນຜູ້ວ່າການທະນາຄານ ແຫ່ງ ສປປ ລາວ ແລະ ໄດ້ລົງຄະແນນສຽງຮັບຮອງເອົາດ້ວຍສຽງສ່ວນຫຼາຍ 108 ສຽງ ເທົ່າກັບ 87% ໃນຈຳນວນສຽງທັງໝົດ 124 ສຽງ.

ທ່ານ ສອນໄຊ ສິດພະໄຊ

ໃນທີ່ປະຊຸມຍັງໄດ້ຮຽກຮ້ອງໃຫ້ທ່ານສືບຕໍ່ປັບປຸງກົນໄກການບໍລິຫານວຽກງານພາຍໃນຂົງເຂດທະນາຄານໃຫ້ມີຄວາມໜັກແໜ້ນ, ໂປ່ງໃສ ແລະ ມີຄວາມຍຸຕິທຳ. ພ້ອມນັ້ນ, ຕ້ອງໄດ້ສືບຕໍ່ປັບປຸງ ແລະ ພັດທະນາບຸກຄະລາກອນໃຫ້ມີຄວາມກ້າວໜ້າ ໂດຍສະເພາະການປະຕິບັດຈັນຍາບັນຂອງພະນັກງານໃນການປະຕິບັດໜ້າທີ່ວຽກງານໃຫ້ມີຄວາມໂປ່ງໃສ ແລະ ເປັນທຳ.

ພ້ອມນັ້ນ, ສະມາຊິກສະພາແຫ່ງຊາດ ຍັງໄດ້ສະເໜີໃຫ້ປະຕິບັດຕາມລະບຽບກົດໝາຍບ້ານເມືອງໃຫ້ມີປະສິດທິຜົນ, ປັບປຸງກົນໄກການບໍລິຫານ ໂດຍສະເພາະແມ່ນການປ່ອຍສິນເຊື່ອໃຫ້ຫົວໜ່ວຍທຸລະກິດຂະໜາດນ້ອຍ ແລະ ຂະໜາດກາງ ຫຼື SME ໃຫ້ສາມາດເຂົ້າເຖິງແຫຼ່ງທຶນ ເນື່ອງຈາກວ່າຫົວໜ່ວຍທຸລະກິດຂະໜາດນ້ອຍໃນ ສປປ ລາວ ກວມເຖິງ 90% ຂອງທຸລະກິດທັງໝົດ, ຕ້ອງເອົາໃຈໃສ່ຄຸ້ມຄອງອັດຕາການແລກປ່ຽນ ແລະ ບັນຫາໄພເງິນເຟີ້ໃຫ້ມີປະສິດທິພາບ ໃຫ້ສາມາດເຊື່ອມໂຍງກັບສາກົນ ແລະ ພາກພື້ນໄດ້.

 

[ ຂ່າວ: ທິບອຸສາ + ກາວຊົ່ງ; ຮູບ: ສອນໄຊ ]

ຂ່າວທີ່ກ່ຽວຂ້ອງ

%d bloggers like this: