ຮັບຮອງ “ເຜົ່າບຣູ” ເປັນເຜົ່າທີ 50 ໃນວົງຄະນະຍາດແຫ່ງຊາດລາວ

ກອງປະຊຸມສະພາແຫ່ງຊາດໃນຄາບເຊົ້າຂອງວັນທີ 5 ທັນວາ 2018 ທີ່ກອງປະຊຸມສະພາແຫ່ງຊາດ ນອກຈາກໄດ້ພິຈາລະນາຮັບຮອງເອົາສອງຕຳແໜ່ງສຳຄັນໃນກົງຈັກລັດຖະບານແລ້ວ ບັນດາສະມາຊິກສະພາແຫ່ງຍັງໄດ້ພິຈາລະນາ ແລະ ຮັບຮອງເອົາຊົນເຜົ່າບຣູ ເຂົ້າເປັນຊົນເຜົ່າທີ 50 ຂອງວົງຄະນາຍາດແຫ່ງຊາດລາວດ້ວຍຄະແນນ 93% ຂອງຈໍານວນສຽງທັງໝົດ 121 ທ່ານ.

 

ໃນກອງປະຊຸມບັນດາສະມາຊິກສະພາແຫ່ງຊາດ (ສສຊ) ໄດ້ປະກອບຄຳຄິດເຫັນ ໃນນາມເປັນຕົວແທນໃຫ້ແກ່ປະຊາຊົນ ໂດຍນຳໃຊ້ສິດ ແລະ ໜ້າທີ່ໃນການພິຈາລະນາ-ຮັບຮອງເອົາຫຼາຍບັນຫາໃຫ້ມີປະສິທິຜົນ ໂດຍສະເພາະແມ່ນພິຈາລະນາ ແລະ ຮັບຮອງການສະເໜີເອົາຊົນເຜົ່າບຣູ ເຂົ້າເປັນຊົນເຜົ່າທີ 50 ຂອງບັນດາຊົນເຜົ່າທັງໝົດໃນ ສປປ ລາວ ແລະ ຈັດເຂົ້າໃນໝວດພາສາມອນ-ຂະແມ ດ້ວຍຄະແນນ 93% ໃນນີ້: ເຫັນດີ 112 ທ່ານ ເທົ່າກັບ 93%, ບໍ່ເຫັນດີ 7 ທ່ານ ເທົ່າກັບ 6%, ບໍ່ອອກສຽງ 2 ທ່ານ ເທົ່າກັບ 2% ໃນຈຳນວນທັງໝົົດ 121 ທ່ານ.

 

ນອກນັ້ນ, ບັນດາສະມາຊິກສະພາແຫ່ງຊາດ ຈຳນວນ 7 ທ່ານ ກໍໄດ້ປະກອບຄໍາຄິດເຫັນ ເພື່ອພິຈາລະນາ ແລະ ຮັບຮອງເອົາຊົນເຜົ່າບຣູ ເຂົ້າເປັນຊົນເຜົ່າທີ່ນອນຢູ່ໃນວົງຄະນະຍາດແຫ່ງຊາດລາວ ພ້ອມທັງສະແດງເຖິງຄວາມເຊື່ອໝັ້ນ ໃນການຮັບຮອງເອົາຊົນເຜົ່າບຣູ ເຂົ້າເປັນຊົນເຜົ່າທີ 50 ຂອງ ບັນດາຊົນເຜົ່າທີ່ດຳລົງຊີວິດຢູ່ໃນ ສປປ ລາວ ທັງນີ້, ກໍເຫັນໄດ້ເຖິງຄວາມສຳຄັນ ແລະ ທ່າແຮງຂອງຊົນເຜົ່າ ທີ່ຈະຊ່ວຍປະກອບສ່ວນໃນການສ້າງສາ ແລະ ພັດທະນາປະເທດຊາດ, ຊ່ວຍທັບມ້າງ ແລະ ຕີຖອຍກຳລັງອິດທິປໍລະປັກ ທັງພາຍໃນ ແລະ ຕ່າງປະເທດ ທີ່ຫວັງທຳລາຍ ແລະ ສ້າງຄວາມບໍ່ສະຫງົບໃນຜືນແຜ່ນດິນລາວ.

 

ຊົນເຜົ່າບຣູ ແມ່ນຊົນເຜົ່າໜຶ່ງ ທີ່ປະຫວັດຄວາມເປັນມາທີ່ຍາວນານ ອາໄສ ແລະ ດໍາລົງຊີວິດຢູ່ແຜ່ນດິນລາວ ເຊິ່ງສ່ວນໃຫຍ່ແມ່ນຕັ້ງຖິ່ນຖານພູມລຳເນົາ ຢູ່ເຂດພາກກາງຫາພາກໃຕ້ຂອງລາວ ໂດຍສະເພາະ ແມ່ນຢູ່ແຂວງຄໍາມ່ວນ, ສະຫວັນນະເຂດ ແລະ ແຂວງອື່ນໆ ທາງພາກໃຕ້ຂອງລາວ. ຊົນເຜົ່າບຣູ ເປັນອີກຊົນເຜົ່າທີ່ມີຂະນົບທໍານຽມ ແລະ ຮີດຄອງປະເພນີອັນດີງາມທີ່ເປັນເອກະລັກ, ມີພາສາປາກເວົ້າເປັນຂອງຕົນເອງ.

 

 

%d bloggers like this: