ໄຊສົມບູນ ທ່າແຮງສະຖານທີ່ທ່ອງທ່ຽວທຳມະຊາດ ທີ່ກຳລັງຈະມີການພັດທະນາ

ແຂວງໄຊສົມບູນ ເປັນແຂວງທີ່ຕັ້ງຢູ່ໃຈກາງຂອງປະເທດລາວ, ເປັນແຂວງດຽວທີ່ບໍ່ມີຊາຍແດນຕິດກັບປະເທດເພື່ອນບ້ານ, ສ້າງຕັ້ງຂຶ້ນປີ 2013 ເຊິ່ງທິດເໜືອ ແລະ ທິດຕາເວັນອອກຕິດກັບແຂວງຊຽງຂວາງ, ທິດໃຕ້ຕິດກັບແຂວງບໍລິຄຳໄຊ, ທິດຕາເວັນຕົກຕິດກັບແຂວງວຽງຈັນ, ເປັນແຂວງທີ່ຕັ້ງຢູ່ເຂດພູດອຍສູງຊັນ, ມີຊັບພະຍາກອນທຳມະຊາດທີ່ອຸດົມສົມບູນ, ມີວັດທະນະທຳ ແລະ ຮີດຄອງປະເພນີອັນດີງາມຂອງປະຊາຊົນລາວບັນດາເຜົ່າ ເຊິ່ງເປັນທ່າແຮງດ້ານການທ່ອງທ່ຽວທຳມະຊາດ ເປັນຕົ້ນແມ່ນທິວທັດທຳມະຊາດ, ຖ້ຳ ແລະ ແຫຼ່ງທ່ອງທ່ຽວທາງປະຫວັດສາດຕ່າງໆ ແຕ່ຜ່ານມາຍ້ອນບັນຫາພື້ນຖານໂຄງລ່າງ ແລະ ການບໍລິການ ເປັນຕົ້ນແມ່ນເສັ້ນທາງຍັງບໍ່ສະດວກໂດຍສະເພາະແມ່ນເສັ້ນທາງລະຫວ່າງ ທ່າບົກ – ລ້ອງຊານ ແລະ ບາງເສັ້ນທາງໄປຫາແຫຼ່ງທ່ອງທ່ຽວທີ່ຍັງເປັນທາງດິນແດງ, ສ່ວນຫຼາຍນັກທ່ອງທ່ຽວຈະຕ້ອງໄປດ້ວຍລົດສ່ວນຕົວ. ສະນັ້ນ, ຈຶ່ງເຮັດໃຫ້ຂະແໜງການທ່ອງທ່ຽວຂອງແຂວງຍັງບໍ່ທັນໂດດເດັ່ນເທົ່າທີ່ຄວນ.

ປັດຈຸບັນແຂວງກຳລັງເລັ່ງຊອກຫາທຶນຮອນເພື່ອມາພັດທະນາທ່າແຮງດ້ານທ່ອງທ່ຽວເພາະສະຖານທີ່ຫຼາຍບ່ອນທີ່ສວຍງາມຍັງຕ້ອງໄດ້ຮັບການປັບປຸງປົວແປງໃຫ້ດີຂຶ້ນ.

ພວກເຮົາມາເບິ່ງກັນວ່າບັນດາສະຖານທີ່ທ່ອງທ່ຽວຂອງແຂວງໄຊສົມບູນ ມີຫຍັງແດ່ ແລະ ມີຄວາມເປັນມາແນວໃດ?.

ຖ້ຳເຈົ້າອານຸວົງ

ເປັນແຫຼ່ງທ່ອງທ່ຽວທາງປະຫວັດສາດ ເຊິ່ງຕັ້ງຢູ່ບ້ານພູຫົວຊ້າງ ຫ່າງຈາກເທສະບານເມືອງອານຸວົງ ໄປທາງທິດເໜືອ ຕາມເສັ້ນທາງຂຶ້ນພູເບ້ຍ ປະມານ 4 ກິໂລແມັດ, ເປັນຖ້ຳຫີນປູນທີ່ເກີດຈາກການສຽດເຊາະຂອງນ້ຳ, ບໍລິເວນອ້ອມຮອບຖ້ຳນັ້ນຢັງຢາຍໄປດ້ວຍສາຍພູນ້ອຍ – ໃຫຍ່, ມີສາຍນ້ຳຈ້າ ໄຫຼຜ່ານບໍລິເວນໜ້າປາກຖ້ຳກ່ອນຈະເຂົ້າເຖິງຖ້ຳ

ເຊິ່ງປະກອບມີ 2 ຖ້ຳໃກ້ຄຽງກັນ ຄື: ຖ້ຳທີໜຶ່ງ ມີ ຄວາມກວ້າງ ປະມານ 5 ແມັດ, ສູງ 3 ແມັດ ແລະ ມີຄວາມຍາວ ປະມານ 300 ແມັດ ເຊິ່ງຊາວບ້ານເລົ່າກັນວ່າເປັນບ່ອນພັກເຊົາຂອງ ເຈົ້າອານຸວົງ ເພື່ອໃຊ້ໃນການຫຼົບລີ້ສັດຕູໃນສະໄໝສະຫຍາມຮຸກຮານລາວ; ຖ້ຳທີສອງ ເປັນຖ້ຳກວ້າງ ປະມານ 5 ແມັດ ສູງ 5 – 7 ແມັດ ເຊິ່ງເປັນທີ່ພັກເຊົາຂອງກຳລັງທະຫານ ເຈົ້າອານຸວົງ ແລະ ປັດຈຸບັນຍັງເຫຼືອຮ່ອງຮອຍຢູ່ ເປັນຕົ້ນແມ່ນເຄື່ອງໃຊ້ສອຍທົ່ວໄປ ແລະ ອາວຸດຕໍ່ສູ້ຂອງເຫຼົ່າທະຫານກ້າທັງຫຼາຍ.

ພູສາມຫຼ່ຽມ

ເປັນພູທີ່ສູງອັນດັບສອງຂອງພູເບ້ຍ ແລະ ເປັນພູທີ່ງາມທີ່ສຸດ ຕັ້ງຢູ່ລະຫວ່າງກາງເມືອງອານຸວົງ – ເມືອງທ່າໂທມ – ເມືອງບໍລິຄັນ ( ແຂວງບໍລິຄຳໄຊ ) ຫ່າງຈາກເທສະບານແຂວງໄປທາງທິດຕາເວັນອອກ ປະມານ 24 ກິໂລແມັດ, ສາຍພູມີລັກສະນະຄ້າຍຄືກັບຈອມທາດ, ບໍລິເວນຕີນພູມີບໍ່ນ້ຳຫຼາຍສາຍທີ່ໄຫຼອອກມາຈາກຮ່ອມພູ ແລະ ມີນ້ຳຕົກຕາດຄັງເຊ ຫຼື ເອີ້ນວ່າ ນ້ຳຕົກຕາດຍ້ານຄັງເຊ ທີ່ສວຍສົດງົດງາມ, ພູສາມຫຼ່ຽມ ເປັນພູທີ່ມີທຳມະຊາດສວຍງາມ ແລະ ອຸດົມສົມບູນ ທີ່ປົກຄຸມໄປດ້ວຍປ່າໄມ້ທີ່ມີຄຸນຄ່າ ເຊັ່ນ: ໄມ້ດູ່, ໄມ້ແຄນ, ໄມ້ຍາງ ແລະ ອີກຫຼາຍຊະນິດ ເຊິ່ງຢູ່ເທິງຈອມພູປົກຄຸມໄປດ້ວຍຫຍ້າຄາ ແລະ ພືດຊີວະນາໆພັນ ທັງເປັນບ່ອນຢູ່ອາໄສຂອງສັດປ່າຫຼາຍຊະນິດ ເປັນຕົ້ນແມ່ນ: ໝີ, ເໝືອຍ, ເຍືອງ, ໝູປ່າ, ກວາງ, ຟານ, ທະນີ, ລີງຂາແດງ ແລະ ສັດປະເພດອື່ນໆ.

ເມື່ອທ່ານຂຶ້ນໄປຮອດເທິງຈອມພູ ທ່ານຈະໄດ້ສຳຜັດອາກາດເຢັນສະບາຍ ແລະ ມີລົມພັດຕະຫຼອດປີ ແລະ ຈະມີໝອກປົກຄຸມເປັນໄລຍະໃນຍາມເຊົ້າ. ນອກນັ້ນ, ທ່ານຍັງໄດ້ຊົມວິວທີ່ໜ້າປະທັບໃຈສາມາດເບິ່ງເຫັນສາຍນ້ຳຂອງ, ຕົວເມືອງປາກຊັນທີ່ສວຍງາມ ແລະ ເບິ່ງຕາເວັນທີ່ໃກ້ລັບຂອບຟ້າທີ່ງົດງາມຈົນບໍ່ຢາກກັບເລີຍກໍ່ວ່າໄດ້.

ພູພຣະດ່າງ

ພູພຣະດ່າງ ຕັ້ງຢູ່ບ້ານສັນປາຕອງ ເມືອງລ້ອງຊານ ຫ່າງຈາກຕົວເມືອງ ປະມານ 30 ກິໂລແມັດ, ເປັນສະຖານທີ່ທ່ອງທ່ຽວທີ່ປະກອບໄປດ້ວຍຮ່ອງຮອຍທັງວັດທະນະທຳ – ທາງພຸດທະສາສະໜາ, ເທິງຈອມພູປະກອບມີພະ 5 ອົງ ເຊິ່ງເປັນພະທີ່ຄວັດຂຶ້ນກ່ອນ    ຄ.ສ ຮຸ່ງເຮືອງກຳອຳນາດ 500 ກວ່າປີມາແລ້ວ, ພະອົງໃຫຍ່ສຸດແມ່ນມີ ຄວາມກວ້າງ ປະມານ 80 ຊັງຕີແມັດ, ໜ້າ ປະມານ 10 ຊັງຕີແມັດ, ສູງປະມານ 1,20 ຊັງຕີແມັດ; ພະອົງນ້ອຍສຸດ ມີຄວາມກວ້າງ ປະມານ 40 ຊັງຕີແມັດ, ໜ້າປະມານ 10 ຊັງຕີແມັດ, ສູງປະມານ 80 ຊັງຕີແມັດ ເຊິ່ງດ້ານຫຼັງຂອງພະ 5 ອົງ ຍັງມີຫີນກ້ອນ      ໃຫຍ່ສູງ 4 – 5 ແມັດ, ຍາວ 8 – 9 ແມັດ ທີ່ຄວັດເປັນຮູບຜູ້ຍິງນອນປິ່ນໜ້າໄປທາງພູເຂົາຄວາຍ ເອີ້ນຈອມພູດັ່ງກ່າວວ່າ ພູນາງນອນ ຫຼື ເອີ້ນລວມພູດັ່ງກ່າວວ່າ ພູພຣະດ່າງ. ນອກນັ້ນ, ເທິງຈອມພູຍັງສາມາດເບິ່ງເຫັນທິວທັດທຳມະຊາດອັນສວຍງາມ ພ້ອມທັງເບິ່ງເຫັນເມືອງໂພນໂຮງ, ເມືອງແກ້ວອຸດົມ     ( ແຂວງວຽງຈັນ ) ແລະ ເຂດ 516 ( ເມືອງລ້ອງຊານ ) ຫາກເປັນຍາມກາງຄືນຍັງສາມາດແນມເຫັນດອກໄຟຮຸ່ງມາຈາກນະຄອນຫຼວງວຽງຈັນ ອີກດ້ວຍ.

ນອກຈາກນີ້, ແຂວງໄຊສົມບູນ ຍັງມີແຫຼ່ງທ່ອງທ່ຽວອີກຫຼາຍບ່ອນ. ຫຼ້າສຸດ, ແຂວງກໍ່ໄດ້ອະນຸມັດໃຫ້ບໍລິສັດເອກະຊົນເຂົ້າມາສຶກສາ ຄວາມເປັນໄປໄດ້ໃນການພັດທະນາສະຖານທີ່ທ່ອງທ່ຽວບາງແຫ່ງ ເຊິ່ງວັນທີ 5 ກັນຍາ 2018 ຢູ່ພະແນກແຜນການ ແລະ ການລົງທຶນ ແຂວງໄຊສົມບູນ ໄດ້ເຊັນບົດບັນທຶກຄວາມເຂົ້າໃຈ MOU ກັບ ບໍລິສັດ ທີເອັສອີ ວິຊາການກໍ່ສ້າງ ຈຳກັດຜູ້ດຽວ ເພື່ອສຶກສາ – ສຳຫຼວດຄວາມເປັນໄປໄດ້ຂັ້ນເບື້ອງຕົ້ນ ໂຄງການພັດທະນາແຫຼ່ງທ່ອງທ່ຽວບໍ່ນ້ຳອຸ່ນ ບ້ານໜອງພູນໄຊ ເມືອງລ້ອງແຈ້ງ ແລະ ແຫຼ່ງທ່ອງທ່ຽວຖ້ຳ ເຈົ້າອານຸວົງ ເມືອງອານຸວົງ ແລະ ວັນທີ 6 ກັນຍາ 2018 ກໍ່ໄດ້ເຊັນບົດບັນທຶກຄວາມເຂົ້າໃຈ MOU ກັບ ກຸ່ມບໍລິສັດ ລ້ອງແຈ້ງພັດທະນາ ຈຳກັດ ເພື່ອສຶກສາ ຄວາມເປັນໄປໄດ້ເບື້ອງຕົ້ນໂຄງການພັດທະນາແຫຼ່ງທ່ອງທ່ຽວປະຫວັດສາດ ສັນພູໝອກ, ພູຕະການ ອີກດ້ວຍ.

ສຳລັບແຜນການຈັດຕັ້ງປະຕິບັດໃນການສຶກສາ – ສຳຫຼວດຄວາມເປັນໄປໄດ້ ເພື່ອສ້າງເງື່ອນໄຂໃຫ້ກັບການພັດທະນາກິດຈະກຳການທ່ອງທ່ຽວ ແລະ ສົ່ງເສີມໃຫ້ມີການຂະຫຍາຍຕົວຢ່າງຕໍ່ເນື່ອງ, ຍືນຍົງ ແລະ ກາຍເປັນອຸດສາຫະກຳທ່ອງທ່ຽວທີ່ທັນສະໄໝ, ສ້າງວຽກເຮັດງານທຳໃຫ້ປະຊາຊົນ ແລະ ສົ່ງເສີມທຸລະກິດການທ່ອງທ່ຽວພາຍໃນແຂວງໃຫ້ເຂັ້ມແຂງ ແລະ ເຊື່ອມໂຍງກັບສາກົນ ໂດຍມີເຈດຈຳນົງທີ່ຈະສົ່ງເສີມໃນການພັດທະນາແຫຼ່ງທ່ອງທ່ຽວທາງປະຫວັດສາດ ແລະ ທຳມະຊາດ, ສ້າງໂຮງແຮມ, ເຮືອນພັກ ຕິດພັນກັບການອະນຸຮັກປ່າໄມ້ ແລະ ລະບົບນິເວດຕາມແຫຼ່ງທ່ອງທ່ຽວຕ່າງໆ ໃຫ້ມີຄວາມຍືນຍົງທາງດ້ານສິ່ງແວດລ້ອມ – ສັງຄົມ, ໃຫ້ໄດ້ມາດຕະຖານສາມາດຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ.

ບໍລິສັດຕ້ອງໄດ້ສຶກສາສຳຫຼວດຢ່າງລະອຽດຕໍ່ຜົນກະທົບສິ່ງແວດລ້ອມ, ຄົ້ນຄວ້າ, ວິໄຈ ແລະ ປະເມີນຜົນກະທົບທາງດ້ານບວກ – ດ້ານລົບ, ທັງໄລຍະສັ້ນ ແລະ ຍາວ, ແຜນການຄຸ້ມຄອງ, ຕິດຕາມກວດກາສິ່ງແວດລ້ອມ ແລະ ບົດວິພາກເສດຖະກິດທີ່ຄົ້ນຄວ້າຢ່າງລະອຽດກ່ຽວກັບໂຄງການ ເພື່ອກຳນົດຄວາມເປັນໄປໄດ້ທາງດ້ານການເງິນ, ເຕັກນິກໂຄງການ ໂດຍຄຳນຶງເຖິງການໃຊ້ທີ່ດິນ ພ້ອມທັງຄາດຄະເນແຜນການສຳລັບການຕະຫຼາດລະຫວ່າງຜູ້ມາບໍລິການ ແລະ ຜູ້ໃຫ້ບໍລິການ, ການຈ້າງແຮງງານຕ່າງໆ, ໄລຍະທີ່ໄດ້ຮັບອະນຸຍາດສຳຫຼວດແມ່ນ 90 ວັນ ແລະ ສາມາດຕໍ່ສັນຍາໄດ້ຕາມການເຫັນດີທັງສອງຝ່າຍອີກດ້ວຍ.

( ໂດຍ: ກາວຊົ່ງ )

%d bloggers like this: