ນ້ຳຕົກຕາດຊາຍ ມົນສະເໜເຂດປ່າສະຫງວນແຫ່ງຊາດພູເຂົາຄວາຍ

ແຂວງບໍລິຄຳໄຊ ຖືໄດ້ວ່າເປັນອີກໜຶ່ງແຂວງທີ່ມີຄວາມສຳຄັນທາງດ້ານການຄ້າ, ບໍລິການທາງຜ່ານແລ້ວຍັງເປັນແຂວງທີ່ຂຶ້ນຊື່ໃນດ້ານການທ່ອງທ່ຽວອີກດ້ວຍ ເພາະເປັນແຂວງປະຕູທຳອິດທີ່ຈະເຊື່ອມຕໍ່ຈາກພາກເໜືອ ແລະ ແຂວງພາກກາງລົງສູ່ພາກໃຕ້ ແລະ ຍັງເປັນແຂວງທ່າດ່ານທີ່ມີຊາຍແດນຕິດກັບ 2 ປະເທດ ຄື: ສສ ຫວຽດນາມ ແລະ ປະເທດໄທ. ຖິ່ນນ້ຳສອງສີແຫ່ງນີ້ແມ່ນອ້ອມຮອບໄປດ້ວຍພູຜາປ່າດົງ ແລະ ແມ່ນໍ້າ ທີ່ສຳຄັນເປັນເຂດທີ່ຂຶ້ນຊື່ວ່າມີສັດປ່າທີ່ຫາຍາກອາໄສຢູ່ເຂດແຂວງດັ່ງກ່າວ ເຊັ່ນ: ເສົາລາ. ພ້ອມນີ້, ກໍ່ມີປ່າສະຫງວນພູເຂົາຄວາຍທີ່ອຸດົມສົມບູນຕັ້ງຢູ່ໃກ້ກັບເທສະບານແຂວງ, ມີນໍ້າຕົກຕາດທີ່ງົດງາມຫຼາຍແຫ່ງເກີດຂຶ້ນໃນປ່າສະຫງວນດັ່ງກ່າວ ແລະ ກາຍເປັນສະຖານທີ່ທ່ອງທ່ຽວທາງທຳມະຊາດທີ່ນັກທ່ອງທ່ຽວໃຫ້ ຄວາມສົນໃຈ.

ປ່າສະຫງວນແຫ່ງຊາດພູເຂົາຄວາຍ ຍັງມີມົນສະເໜທີ່ເປັນເອກະລັກສະເພາະ ແລະ ຄວາມງາມຂອງທຳມະຊາດແຫ່ງພຶກສານາໆພັນຢ່າງບໍ່ມີວັນຈາງຫາຍ ເຊັ່ນ: ຄວາມງາມຂອງຫ້ວຍນ້ຳລຳທານທີ່ໃສເຢັນໄຫຼລິນຢູ່ຕະຫຼອດປີ ບວກກັບຄວາມງາມຂອງຕົ້ນໄມ້ໃບຫຍ້າພຶກສາຊາດນາໆພັນທີ່ຄົງຄວາມງາມຂຽວອຸ່ມທຸ່ມຢູ່ຕະຫຼອດປີໃນອ້ອມຮອບປ່າສະຫງວນແຫ່ງດັ່ງກ່າວ.

“ ຕາດຊາຍ ” ເປັນແຫຼ່ງທ່ອງທ່ຽວອີກແຫ່ງໜຶ່ງທີ່ມີຄວາມສວຍງາມ ແລະ ອຸດົມສົມບູນທາງທຳມະຊາດ ເຊິ່ງຕັ້ງຢູ່ເຂດບ້ານຫາດໄຄ້ ບໍລິເວນປ່າສະຫງວນແຫ່ງຊາດພູເຂົາຄວາຍ ຫ່າງຈາກເທສະບານເມືອງທ່າພະບາດ ແຂວງບໍລິຄຳໄຊ ໄປປະມານ 19 ກິໂລແມັດ.

ໃນລະດູຝົນຕາດຊາຍຈະມີຄວາມງົດງາມເປັນພິເສດ ເພາະເປັນນ້ຳຕົກຕາດຫຼາຍຊັ້ນ ສາມາດເດີນທາງໄປທ່ຽວຊົມໄດ້ດ້ວຍການຂີ່ເຮືອ ຫຼື ລົດກໍ່ໄດ້. ນອກນັ້ນ, ບໍລິເວນຜາຊາຍຍັງເປັນບ່ອນສຶກສາຄົ້ນຄວ້າວິໄຈຊີວະນາໆພັນ ໂດຍສະເພາະແມ່ນດອກເຜິ້ງປ່າ ( ດອກກ້ວຍໄມ້ ) ທີ່ມີຢ່າງຫຼວງຫຼາຍເປັນສິ່ງປະດັບປະດາໃຫ້ຜືນປ່າບໍລິເວນດັ່ງກ່າວມີຄວາມສວຍງາມ.

ຕາດຊາຍ ເລີ່ມເປີດໃຫ້ນັກທ່ອງທ່ຽວເຂົ້າໄປທ່ຽວຊົມຢ່າງເປັນທາງການເມື່ອປີ 2004 ປັດຈຸບັນນີ້ໄດ້ມີສິ່ງອຳນວຍຄວາມສະດວກໃຫ້ແກ່ນັກທ່ອງທ່ຽວບໍ່ວ່າຈະເປັນສາລາຊົມວິວ, ເຮືອນພັກ, ຫ້ອງນ້ຳ ແລະ ອື່ນໆ. ບັນຍາກາດຕາດຊາຍເໝາະແກ່ການພັກຜ່ອນກິນເຂົ້າປ່າ, ລົງຫຼິ້ນນ້ຳເຢັນສະບາຍ ແລະ ສຳຜັດກັບທຳມະຊາດຍັງຄົງອຸດົມສົມບູນ.

ນ້ຳຕົກຕາດຊາຍ ຖືໄດ້ວ່າເປັນທາງເລືອກໜຶ່ງໃນຍາມວັນພັກຜ່ອນສຳລັບໃຜຫຼາຍຄົນ, ນ້ຳຕົກແຫ່ງນີ້ແມ່ນມີຄວາມສວຍງາມຫຼາຍ ແລະ ແຕກຕ່າງຈາກບ່ອນອື່ນ ເພາະມີຄວາມງາມທີ່ເປັນເອກະລັກຈາກການໄດ້ໄປພົບເຫັນ ເຊິ່ງເປັນນ້ຳຕົກທີ່ມີດານຫີນສູງເປັນຊັ້ນໆ

ຄ້າຍຄືຂັ້ນໄດ ພ້ອມມີສາຍນ້ຳມະຫາສານທີ່ກະທົບໃສ່ກັບແຜ່ນຫີນຈາກຈຸດສູງສຸດລົງມາສູ່ທາງດ້ານລຸ່ມທີ່ເປັນອ່າງທີ່ມີຄວາມໃສເຢັນ ເຊິ່ງນັກທ່ອງທ່ຽວສາມາດລອຍຫຼິ້ນໄດ້ ເຮັດໃຫ້ນ້ຳຕົກຕາດຊາຍແຫ່ງນີ້ເປັນຈຸດເດັ່ນທີ່ດຶງດູດເອົານັກທ່ອງທ່ຽວເຂົ້າມາທ່ຽວເມືອງ ຫຼື ແຂວງໄດ້ເປັນຈຳນວນຫຼວງຫຼາຍໃນແຕ່ລະປີ.

ນອກຈາກຕາດຊາຍແລ້ວບໍລິເວນໃກ້ຄຽງກັນຍັງມີຕາດເລິກ, ຕາດຍອງ ບ້ານຍາງເຄືອ ເຊິ່ງນອນຢູ່ໃນເຂດປ່າສະຫງວນແຫ່ງຊາດພູເຂົາຄວາຍເຊັ່ນດຽວກັນ ແລະ ຍັງມີໝູ່ບ້ານແຖບນັ້ນ ເຊັ່ນ: ບ້ານນາ ( ບໍລິເວນໃກ້ໆກັບວັດທ່າພະບາດ ) ກໍ່ໄດ້ເປີດໂຮມສະເຕໃຫ້ກັບນັກທ່ອງທ່ຽວ ເພື່ອຮຽນຮູ້ວິຖີການດຳລົງຊີວິດແບບຊາວບ້ານຄຽງຄູ່ກັບກິດຈະກຳ ເຊັ່ນ: ການຍ່າງປ່າ, ຕັ້ງແຄັມເບິ່ງດາວ, ທັດສະນະສຶກສາຊີວະນາໆພັນເອີ້ນວ່າເປັນການສ້າງສັນປະສົບການ ແລະ ຄວາມຮູ້ສຸດພິເສດໃຫ້ແກ່ນັກທ່ອງທ່ຽວທັງຊາວລາວ ແລະ ຕ່າງປະເທດຜູ້ທີ່ມີຄວາມມັກຮັກທຳມະຊາດຢ່າງແທ້ຈິງ.

[ ນຸ້ມນິ້ມ ]

[ ຂໍ້ມູນຈາກ: bolikhamxay.gov.la ]

( ຮູບ: Thaphabath Review )

%d bloggers like this: