ສິດເກົ່າໂຮງຮຽນປະຖົມ ໂພນສິມ ມອບເຄື່ອງມູນຄ່າຫຼາຍກວ່າ 11 ລ້ານກີບ

ສິດເກົ່າໂຮງຮຽນຕົວແບບ ປະຖົມສຶກສາສົມບູນ ບ້ານໂພນສິມ ທີ່ອາໄສຢູ່ນະຄອນຫຼວງວຽງຈັນ ໄດ້ຈັດກິດຈະກໍາມອບເຄື່ອງໃຫ້ໂຮງຮຽນປະຖົມສົມບູນ ບ້ານໂພນສິມ ນະຄອນໄກສອນ ພົມວິຫານ ແຂວງສະຫວັນນະເຂດ ລວມມູນຄ່າ 11 ລ້ານກວ່າກີບ ເພື່ອປະກອບສ່ວນຊື້ອຸປະກອນຮັບໃຊ້ວຽກງານການສິດສອນ ແລະ ອຸປະກອນກີລາ.

ພິທີມອບ – ຮັບມີຂຶ້ນໃນວັນທີ 17 ພະຈິກ 2018 ທີ່ໂຮງຮຽນປະຖົມສົມບູນ ບ້ານໂພນສິມ ໂດຍມີອໍານາດການປົກຄອງບ້ານໂພນສິມ, ເມືອງ, ຄະນະອໍານວຍການໂຮງຮຽນ, ພໍ່ແມ່ຜູ້ປົກຄອງ, ປະຊາຊົນ, ຄູ – ອາຈານ ແລະ ບັນດາສິດເກົ່າປະຖົມສົມບູນໂພນສິມ ທີ່ຢູ່ໃນບ້ານ ແລະ ຢູ່ນະຄອນຫຼວງວຽງຈັນ ເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ ທ່ານ ນ້ອຍວິໄລ   ກິດຕິລາດ ນາຍບ້ານໆໂພນສິມ ໄດ້ກ່າວວ່າ: ຂໍສະແດງຄວາມຍ້ອງຍໍຊົມເຊີຍມາຍັງບັນດາສິດເກົ່າທີ່ຢູ່ນະຄອນຫຼວງວຽງຈັນ ແລະ ຢູ່ພາຍໃນບ້ານໂພນສິມ ທີ່ຍາມໃດກໍ່ບໍ່ລືມບຸນຄຸນຂອງຄູບາອາຈານ ແລະ ເຫັນໄດ້ຄວາມຈໍາເປັນດ້ານອຸປະກອບທີ່ມາຮັບໃຊ້ວຽກງານການສິດສອນພາຍໃນໂຮງຮຽນ ເພື່ອເຮັດແນວໃດໃນການພັດທະນາໂຮງຮຽນບ້ານເກີດຂອງຕົນເອງໃຫ້ມີຄຸນນະພາບ ລວມທັງສ້າງເປັນຂະບວນການໃຫ້ຄົນລຸ້ນຫຼັງໄດ້ສືບທອດຕໍ່ໆກັນໄປ ໃນນາມຕາງໜ້າອໍານາດການປົກຄອງບ້ານ, ສະມາຄົມພໍ່ – ແມ່ນັກຮຽນ, ໂຮງຮຽນ ຂໍສະແດງຄວາມຍ້ອງຍໍຊົມເຊີຍຢ່າງສຸດອົກສຸດໃຈ.

ທ່ານ ຂາວພອນ ສຸກລາພັນ ຕາງໜ້າໃຫ້ອະດີດສິດເກົ່າໄດ້ກ່າວວ່າ: ຂ້າພະເຈົ້າຕາງໜ້າໃຫ້ອະດີດນັກສຶກສາທີ່ຢູ່ນະຄອນຫຼວງວຽງຈັນ ແລະ ໃນບ້ານທີ່ເຄີຍຮໍ່າຮຽນຢູ່ໂຮງຮຽນແຫ່ງນີ້ ໄດ້ປຶກສາຫາລືກັນ ເພື່ອລະດົມທຶນຈາກບຸກຄົນ ແລະ ບໍລິສັດຕ່າງໆ. ສະນັ້ນ, ກໍ່ໄດ້ທຶນເພື່ອມາຊື້ເຄື່ອງຮັບໃຊ້ຫ້ອງການ ແລະ ອຸປະກອບການສຶກສາຈໍານວນໜຶ່ງ ເພື່ອມອບເປັນຂອງຂວັນໃຫ້ແກ່ໂຮງຮຽນ ເຖິງວ່າຈະເປັນຈໍານວນໜ້ອຍມູນຄ່າບໍ່ສູງເທົ່າທີ່ຄວນ ແຕ່ກໍ່ເປັນນໍ້າໃຈ ແລະ ສະແດງໃຫ້ເຫັນເຖິງ ຄວາມສາມັກຄີຄືດັ່ງສຸພາສິດທີ່ວ່າ “ ໄມ້ລໍາດຽວລ້ອມຮົ້ວບໍ່ໄຂວ່ ໄຜ່ບໍ່ພ້ອມແປງບ້ານບໍ່ເຮືອງ ”. ສະນັ້ນ, ຈຶ່ງວ່າຄວາມສາມັກຄີເປັນບໍ່ເກີດແຫ່ງຄວາມສໍາເລັດ.

ທ່ານ ເພັດສະຫວັນ ມາລາບັນດິດ ຫົວໜ້າສະມາຄົມວົງຄະນາຍາດໂພນສິມທີ່ນະຄອນຫຼວງວຽງຈັນ ໄດ້ກ່າວເຖິງພາບລວມຄວາມຫຍຸ້ງຍາກດ້ານອຸປະກອນການຮຽນ ແລະ ກີລາ ໃນເມື່ອພວກເພິ່ນຍັງນ້ອຍ. ກິດຈະກໍາດັ່ງກ່າວກໍ່ເປັນແບບຢ່າງທີ່ດີເປັນຄວາມພາກພູມໃຈຂອງບັນດາສິດເກົ່າບ້ານໂພນສິມທີ່ໄດ້ໄປດໍາລົງຊີວິດຢູ່ນະຄອນຫຼວງວຽງຈັນ ທີ່ເຫັນຄວາມສໍາຄັນລະດົມທຶນໃນຄັ້ງນີ້. ຈຸດປະສົງໃນການມາມອບກໍ່ເພື່ອຢາກພັດທະນາໃຫ້ມີອັນດີຍິ່ງໆຂຶ້ນ. ພ້ອມດຽວກັນນັ້ນ, ກໍ່ຮຽກຮ້ອງໃຫ້ມີການບົວລະບັດຮັກສາ, ນໍາໃຊ້ໃຫ້ມີຄຸນຄ່າທີ່ສຸດ ເພື່ອໃຫ້ມີຄວາມຍືນຍົງ.

ສໍາລັບເຄື່ອງທີ່ມອບປະກອບມີ: ຄອມພິວເຕີຕັ້ງໂຕະ 1 ເຄື່ອງ, ເຄື່ອງພິມເອກະສານ 1 ເຄື່ອງ, ຕູ້ນໍ້າຮ້ອນ – ເຢັນ 1 ເຄື່ອງ. ພ້ອມນັ້ນ, ຍັງມີການປະກອບສ່ວນຈາກ ບໍລິສັດ PK LAB ປະກອບສ່ວນຊຸດກີລາ 20 ຊຸດ, ບໍລິສັດ ຊີໂນໄຮໂດຣ ເລກ 10 ມອບເຄື່ອງກີລາ ຈໍານວນ 20 ຊຸດ, ບານເຕະຈໍານວນ 1 ໜ່ວຍ, ບານຕີ 1 ໜ່ວຍ, ເຈ້ຍພິມເອກະສານຈໍານວນ 1 ແກັດ ແລະ ອຸປະກອນການຮຽນອື່ນໆຈໍານວນໜຶ່ງລວມເປັນເງິນ 11 ລ້ານກີບ.

ຫຼັງຈາກຈົບພິທີໃນການມອບ – ຮັບເຄື່ອງໃນຄັ້ງນີ້ ກໍ່ຍັງມີກິດຈະກໍາເຕະບານມິດຕະພາບລະຫວ່າງສິດເກົ່າທີ່ຢູ່ບ້ານໂພນສິມ ແລະ ສິດເກົ່າທີ່ຢູ່ນະຄອນຫຼວງວຽງຈັນ ພ້ອມທັງມີພາເຂົ້າສາມັກຄີຂອງໂຮງຮຽນປະຖົມສົມບູນບ້ານໂພນສິມ ເພື່ອສ້າງສາຍສໍາພັນມິດຕະພາບໃຫ້ແໜ້ນແກ່ນຂຶ້ນຫຼາຍກວ່າເກົ່າ.

( ໂດຍ: ແກ້ວ )

%d bloggers like this: