ຟາມພູຕາເວັນ ເປີດບໍລິການໃຫ້ນັກທ່ອງທ່ຽວໄປສຳຜັດ

ຟາມພູຕາເວັນ ໄດ້ເປີດໃຫ້ບໍລິການລູກຄ້າກໍ່ຄືນັກທ່ອງທ່ຽວ ມາຮອດປີນິ້ີ້ເປັນປີທີ 3 ແຕ່ສຳລັບປີນີ້ແມ່ນຈະເປີດໃຫ້ບໍລິການ ນັບແຕ່ເດືອນພະຈິກນີ້ຈົນເຖິງເດືອນມິຖຸນາ 2019 ແລະ ປີນີ້ກໍ່ມີການປັບປຸງຫຼາຍຢ່າງທີ່ເປັນໂສມໜ້າໃໝ່ຂອງຟາມ ເນື່ອງຈາກແຕ່ລະປີຜູ້ພັດທະນາຟາມກໍ່ໄດ້ມີການທຸ່ມງົບປະມານ ເພື່ອປັບປຸງໃຫ້ຟາມແຫ່ງນີ້ນອກຈາກຈະເປັນແຫຼ່ງທ່ອງທ່ຽວແລ້ວ ຍັງເປັນແຫຼ່ງຄວາມຮູ້, ຂໍ້ມູນ – ຂ່າວສານດ້ານການກະເສດ ແລະ ຍັງເປັນບ່ອນສ້າງວຽກເຮັດງານທຳໃຫ້ແກ່ປະຊາຊົນ ແລະ ຊາວໜຸ່ມທີ່ຢູ່ບ້ານໃກ້ຄຽງເຂດດັ່ງກ່າວ.

ໃນວັນທີ 17 ພະຈິກ 2018 ຟາມພູຕາເວັນ ໄດ້ຈັດພິທີເປີດແຫຼ່ງທ່ອງທ່ຽວ ຟາມພູຕາເວັນ ປະຈຳປີ 2018 ຂຶ້ນ ທີ່ຟາມດັ່ງກ່າວ ໂດຍການເຂົ້າຮ່ວມຂອງ ທ່ານ       ບຸນມາ ບຸຈະເລີນ ຮອງເຈົ້າແຂວງໆບໍລິຄຳໄຊ, ທ່ານ ອາລຸນໄຊ ສູນນະລາດ ເລຂາຄະນະສູນກາງຊາວໜຸ່ມປະຊາຊົນ ປະຕິວັດລາວ, ທ່ານ ນາງ ດາລູນີ ດວງປະເສີດ ຜູ້ອຳນວຍການ ຟາມພູຕາເວັນ, ພ້ອມດ້ວຍບັນດາແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ດາລູນີ ດວງປະເສີດ ໄດ້ກ່າວວ່າ: ຈຸດປະສົງຂອງການເປີດງານໃນມື້ນີ້ແມ່ນເປັນການແຈ້ງເປັນທາງການວ່າ ພວກເຮົາເປີດລະດູການທ່ອງທ່ຽວຂອງຟາມພູຕາເວັນ ປະຈຳປີ  2018 – 2019 ຢ່າງເປັນທາງການແລ້ວ ໃນລະຫວ່າງເດືອນພະຈິກ 2018 ຫາ ເດືອນມິຖຸນາ 2019 ແລະ ພວກເຮົາໄດ້ກະກຽມບັນດາກິດຈະກຳຕ່າງໆ ເຊັ່ນ: ເລື່ອງການກະເສດ, ດອກໄມ້, ອາຫານ ເຊິ່ງເປັນການທ່ອງທ່ຽວເຊື່ອມໂຍງລະຫວ່າງນະຄອນຫຼວງວຽງຈັນ ມາຫາແຂວງບໍລິຄຳໄຊ ແລະ ບໍລິຄຳໄຊ ຫາ ນະຄອນຫຼວງວຽງຈັນ ໂດຍສະເພາະແມ່ນເມືອງປາກງື່ມ ກັບ ເມືອງທ່າພະບາດ ພວກເຮົາມີການພັດທະນາຮ່ວມກັບທາງບ້ານ, ເມືອງ ແລະ ແຂວງ ເພື່ອພັດທະນາໃຫ້ຟາມພູຕາເວັນເປັນຈຸດສູນກາງ ເຊື່ອມລະຫວ່າງການລ່ອງເຮືອນໍ້າງື່ມໄປຫານໍ້າຕົກຕາດເລິກ ໂດຍມີຟາມພູຕາເວັນເປັນຈຸດພັກເລີ່ມຕົ້ນຂອງກິດຈະກຳທັງ 2 ເມືອງ, ມີການຈັດກິດຈະກຳຮ່ວມມືດ້ານພູມປັນຍາຂອງຊາວບ້ານ ເຊັ່ນ: ການຕົ້ມເຫຼົ້າ, ການເຮັດເຫຼົ້າໄຫ ຕະຫຼອດຮອດການຕໍ່າຫູກທໍໄໝ, ຜະລິດແຜ່ນຜ້າ, ຜະລິດເຂົ້າປຸ້ນ ເຊິ່ງປີນີ້ພວກເຮົາເນັ້ນໃສ່ສົ່ງເສີມສິນຄ້າພື້ນບ້ານ, ສິນຄ້າທ້ອງຖິ່ນເພື່ອເປັນຂອງຝາກຂອງຕ້ອນໃຫ້ກັບນັກທ່ອງທ່ຽວໄດ້.

ທ່ານກ່າວຕື່ມວ່າ: ຈຸດເດັ່ນຂອງຟາມພູຕາເວັນໃນປີນີ້ ແມ່ນພວກເຮົາເປີດເປັນໂຮງອາຫານ, ພາເຂົ້າລາວທີ່ໄດ້ນຳເອົາຜົນຜະລິດຢູ່ພາຍໃນຟາມ ແລະ ຊາວກະສິກອນອ້ອມຂ້າງມາປຸງແຕ່ງເປັນຮູບພາເຂົ້າພື້ນເມືອງລາວ, ໂຕະຈີນ ແລະ ສາກົນ, ມີການກຳນົດເອົາກິດຈະກຳໃນຮີດ 12 ຄອງ 14 ມາຈັດຢູ່ໃນຟາມ ທີ່ພິເສດກໍ່ແມ່ນບຸນບັ້ງໄຟໃນເດືອນຫ້າ ເຊິ່ງພວກເຮົາໄດ້ຂໍອະນຸຍາດຈັດງານບຸນບັ້ງໄຟເປັນຂອງພວກເຮົາເອງ, ພ້ອມທັງໄດ້ມີການຮ່ວມມືກັບໂຮງຮຽນ, ສະຖາບັນຕ່າງໆ ແລະ ວິຊາຊີບ ໂດຍກຳນົດເອົາຟາມພູຕາເວັນ ເປັນສະໜາມຫາປະສົບການໃຫ້ແກ່ຜູ້ທີ່ຮຽນຈົບມາໃໝ່ທີ່ບໍ່ມີປະສົບການ ແລະ ປີນີ້ພວກເຮົາໄດ້ມີການຮ່ວມມືກັບສູນກາງຊາວໜຸ່ມປະຊາຊົນ ປະຕິວັດລາວ ກ່ຽວກັບການສ້າງວຽກເຮັດງານທຳ ແລະ ການຝຶກງານ, ຝຶກຄວາມເປັນມືອາຊີບໃຫ້ແກ່ຊາວໜຸ່ມທີ່ກຳລັງສຶກສາ ແລະ ຜູ້ທີ່ຮຽນຈົບແລ້ວ.

ສຳລັບການປະເມີນນັກທ່ອງທ່ຽວຈາກປີທີ 1 ແມ່ນລູກຄ້າມາຫຼາຍເກີນຄາດ, ປີທີ 2 ພວກເຮົາກໍ່ໄດ້ມີການຂະຫຍາຍອອກເປັນ 3 ເດືອນ ແລະ ໃນປີທີ 3 ນີ້ ພວກເຮົາຄິດວ່າຈຳນວນນັກທ່ອງທ່ຽວແມ່ນຈະຫຼາຍກວ່າ 2 ປີຜ່ານມາຢ່າງແນ່ນອນ.

ທ່ານ ອາລຸນໄຊ ສູນນະລາດ ກ່າວວ່າ: ຟາມພູຕາເວັນ ເປັນຟາມໜຶ່ງທີ່ເປັນການສົ່ງເສີມການທ່ອງທ່ຽວແບບຍືນຍົງ ໂດຍວິຖີການດຳລົງຊີວິດຂອງປະຊາຊົນໃນທ້ອງຖິ່ນແມ່ນຖືກຕ້ອງຕາມທິດ ເຊິ່ງຈະເປັນຈຸດຂາຍໃໝ່ໃນການດຶງດູດການທ່ອງທ່ຽວ. ດັ່ງນັ້ນ, ໃນນາມສູນກາງຊາວໜຸ່ມເປັນອົງການໜຶ່ງທີ່ມີຄວາມຮັບຜິດຊອບຕໍ່ຊາວໜຸ່ມທຸກສາຂາອາຊີບໃນທົ່ວປະເທດ ແລະ ເຈົ້າຂອງຟາມກໍ່ເປັນນັກທຸລະກິດໜຸ່ມຄົນໜຶ່ງທີ່ມີຄວາມຫ້າວຫັນ, ມີຄວາມພະຍາຍາມໃນການສົ່ງເສີມ, ຄົ້ນຄິດ, ລົງມືເຮັດ ແລະ ການບໍລິຫານຕົວຈິງ ເຊິ່ງນີ້ກໍ່ແມ່ນທຸລະກິດທີ່ເປັນຫົວຄິດປະດິດສ້າງຂອງຊາວໜຸ່ມລາວ ເຊິ່ງເປັນການທ່ອງທ່ຽວແບບໃໝ່ໄດ້ທັງນັກທ່ອງທ່ຽວ, ໄດ້ທັງຜູ້ປະກອບການ ແລະ ຊາວໜຸ່ມບ້ານອ້ອມຂ້າງ ແລະ ພວກເຮົາກໍ່ຈະໄດ້ມີການປຸກລະດົມໂຮງຮຽນອ້ອມຂ້າງນອກຈາກຈະຮຽນທິດສະດີແລ້ວ ສາມາດມາຝຶກງານປະຕິບັດຕົວຈິງໄດ້ ແລະ ນັກທຸລະກິດໜຸ່ມສາມາດມາຖອດຖອນບົດຮຽນໃນການດຳເນີນທຸລະກິດໄດ້.

ທ່ານ ບຸນມາ ບຸຈະເລີນ ຮອງເຈົ້າແຂວງໆບໍລິຄຳໄຊ ກ່າວວ່າ: ການເປີດງານໃນມື້ນີ້ແມ່ນມີຄວາມໝາຍຄວາມສຳຄັນໃນການເປີດແຫຼ່ງທ່ອງທ່ຽວຟາມພູຕາເວັນ ປະຈຳປີ 2018 ເຊິ່ງຟາມແຫ່ງນີ້ເປັນຟາມຕົວແບບທີ່ຈະດຶງດູດເອົາການລົງທຶນໃຫ້ເຂົ້າມາພັດທະນາແຫຼ່ງທ່ອງທ່ຽວຢູ່ໃນແຂວງໃຫ້ເພີ່ມຂຶ້ນ, ເປັນການດຶງດູດເອົານັກທ່ອງທ່ຽວເຂົ້າມາທ່ຽວຫຼາຍຂຶ້ນ ທັງເປັນສ່ວນປະກອບໃນການພັດທະນາຊັບພະຍາກອນມະນຸດໃຫ້ມີຄວາມຊຳນານງານ ແລະ ການສ້າງວຽກເຮັດງານທຳ ເວົ້າລວມ, ເວົ້າສະເພາະກໍ່ຄືການຈ້າງງານປະຊາຊົນຢູ່ຂອບເຂດໃກ້ຄຽງນີ້ເຮັດໃຫ້ປະຊາຊົນມີລາຍຮັບເພີ່ມຂຶ້ນ ແລະ ຟາມແຫ່ງນີ້ກໍ່ເປັນແຫຼ່ງທ່ອງທ່ຽວໜຶ່ງໃນການເຊື່ອມໂຍງເຊື່ອມຈອດດ້ານການທ່ອງທ່ຽວຂອງແຂວງກັບບັນດາແຂວງອ້ອມຂ້າງອີກດ້ວຍ.

( ຂ່າວ: ຄຳນ້ອຍ; ຮູບ: ສຸກສະຫວັນ )

%d bloggers like this: