ວັດໂຕະໂມະ ສະຖານທີ່ທ່ອງທ່ຽວທາງວັດທະນະທຳແຝງດ້ວຍການສຶກສາຮຽນຮູ້

ວັດໂຕະໂມະ ຫຼື ເອີ້ນອີກຊື່ໜຶ່ງວ່າ “ ອູ້ມເມືອງ ” ມີລັກສະນະຄ້າຍຄືກັບວັດພູຈຳປາສັກ ຕັ້ງຢູ່ກາງປ່າທາງທິດຕາເວັນອອກເບື້ອງແມ່ນໍ້າຂອງເຂດບ້ານໂຕະໂມະ ເມືອງປະທຸມພອນ ແຂວງຈໍາປາສັກ, ຕາມການບອກເລົ່າຂອງຜູ້ຄົນບອກຕໍ່ກັນມາວ່າ: ວັດແຫ່ງນີ້ຖືກສ້າງຂຶ້ນໃນສະຕະວັດທີ 7 ຫາ ສະຕະວັດທີ 9 ແລະ ຖືກປະຕິສັງຂອນຄືນໃໝ່ໃນສະຕະວັດທີ 11 ຫາ 12 ຫຼື ໃນໄລຍະດຽວທີ່ມີການສ້າງວັດພູຈໍາປາສັກ.

ເມືອກ່ອນຜາສາດນີ້ຈະມີຢູ່ 2 ຫຼັງ ແຕ່ມາຮອດປັດຈຸບັນຍັງເຫຼືອພຽງຫຼັງດຽວທີ່ຕັ້ງຢູ່ແຄມຫ້ວຍໂຕະໂມະ ເຊິ່ງຄວາມມະຫັດສະຈັນຂອງຜາສາດຫີນແຫ່ງນີ້ເມື່ອໄປພົບເຫັນ ແລະ ອົດບໍ່ໄດ້ກໍ່ຄືການກໍ່ສ້າງປູສະນີຍະສະຖານຂອງຄົນສະໄໝກ່ອນ ໂດຍພື້ນທີ່ອ້ອມຮອບວັດມີຕົ້ນໄມ້ນ້ອຍ      ໃຫຍ່ຫຼາຍຊະນິດ ແລະ ມີຄວາມສູງໃຫຍ່ຈົນ 5 ຄົນອູ້ມຈຶ່ງຫຸ້ມ ຄາດວ່າບາງຕົ້ນມີອາຍຸຫຼາຍຮ້ອຍປີ, ຍ້ອນມີຕົ້ນໄມ້ຫຼາຍເຮັດໃຫ້ມີຮົ່ມ ແລະ ລົມພັດເຢັນດີ ທັງໄດ້ຍິນສຽງນົກນາໆຊະນິດຮ້ອງສຽງມ່ວນຊື່ນເມື່ອຟັງແລ້ວຈະຮູ້ສຶກຜ່ອນຄາຍ ລະຫວ່າງທາງຍ່າງເຂົ້າຫາຜາສາດຫີນ ຈະສັງເກດເຫັນຊາກຫັກພັງທີ່ເກົ່າແກ່ຈໍານວນໜຶ່ງແຕກຫັກຢັງຢາຍກັນຢູ່ ແລະ ມີແທ່ງຫີນລຽງລາຍເປັນຈໍານວນຫຼາຍກະແຈກກະຈາຍເປັນບ່ອນໆ, ພາຍໃນຜາສາດຈະເປັນອຸມົງທີ່ສາມາດຍ່າງຜ່ານຈາກທາງດ້ານໜ້າໄປຫາທາງດ້ານຫຼັງໄດ້.

ວັດໂຕະໂມະ ມີຄວາມເກົ່າແກ່ ແລະ ຊຸດໂຊມຫຼາຍ, ຊາກຫັກພັງບາງສ່ວນກໍ່ບໍ່ສາມາດຄາດເດົາໄດ້ວ່າແມ່ນຫຍັງ ຫຼື ຊິ້ນສ່ວນຫັກພັງມາຈາກສ່ວນໃດຂອງບູຮານສະຖານແຫ່ງນີ້, ພາຍໃນບໍລິເວນວັດກໍ່ບໍ່ມີຂໍ້ມູນການສຶກສາຫຼາຍ ນອກຈາກຢູ່ດ້ານໜ້າກ່ອນຮອດຜາສາດຫີນທີ່ຂຽນໂດຍ ທ່ານ ປໍລະເຊຍ ຊ໋ອກເຊ.

ວັດໂຕະໂມະ ຕັ້ງຢູ່ບ້ານໂຕະໂມະ ເມືອງປະທຸມພອນ ຫ່າງຈາກນະຄອນປາກເຊ ປະມານ 45 ກິໂລແມັດ ໄປທາງໃຕ້ ເຊິ່ງແຍກຈາກສາມແຍກລະຫວ່າງທາງເລກທີ 16 ແລະ 13 ໃຕ້, ຂັບລົດລົງໄປຕາມທາງເລກທີ 13 ໃຕ້ ປະມານ 33 ກິໂລແມັດ ແລ້ວຈະພົບທາງແຍກຢູ່ເບື້ອງຂວາມືຈຶ່ງຂັບລົດເຂົ້າໄປອີກປະມານ 4,7 ກິໂລແມັດ ຕາມທາງດິນແດງແລ້ວຈະພົບວັດໂຕະໂມະ. ແນວໃດກໍ່ດີ, ວັດດັ່ງກ່າວເປ່ເພ ຫຼື ລົ້ມກະຈາຍໄປຕາມພື້ນດິນ ເຊິ່ງຖືກຖົມເກືອບໝົດຖ້າຫາກບູລະນະສ້ອມແຊມ ແລະ ປົວແປງຄືນໃໝ່ຈະກາຍເປັນແຫຼ່ງທ່ອງທ່ຽວອີກແຫ່ງໜຶ່ງທີ່ໂດ່ງດັງຄ້າຍຄືວັດພູ.

( ຮຽບຮຽງ: ນຸ້ມນິ້ມ )

( ຮູບໂດຍ: noy images )

%d bloggers like this: