ໂບໂກ ຮາຣາມ ບຸກຂ້າຍົກກຸ່ມຊາວກະສິກອນ ປະເທດໄນຈີເຣຍ

ນັກຮົບກຸ່ມໂບໂກ ຮາຣາມ ບຸກຂ້າກຸ່ມຊາວກະສິກອນຢ່າງໜ້ອຍ 16 ຄົນ ແລະ ສູນຫາຍອີກ 35 ຄົນ ຈາກການໂຈມຕີຄັ້ງຫຼ້າສຸດ ໃນລັດໂບໂນ ທາງພາກຕາເວັນອອກສຽງເໜືອຂອງປະເທດໄນຈີເຣຍ

ສໍານັກຂ່າວເອເອັຟພີ ລາຍງານຈາກເມືອງຄາໂນ ປະເທດໄນຈີເລຍ ເມື່ອວັນພຸດ ທີ 14 ພະຈິກ ວ່າ ອາສາສະໝັກປ້ອງກັນໄພພົນລະເມືອງທີ່ກໍາລັງຕໍ່ສູ້ກັບກຸ່ມຕິດອາວຸດຫົວຮຸນແຮງໂບໂກ ຮາຣາມ ພົບຜູ້ເສຍຊີວິດ 15 ສົບ ໃນໄຮ່ສວນໃກ້ໝູ່ບ້ານຄາຊາ ແລະ ດາຣາ ປະມານ 5 ກິໂລແມັດ ຈາກເມືອງທີ່ທະຫານມອງກູໂນຕັ້ງຄ້າຍຢູ່ ແລະ ຊາວກະສິກອນອີກຄົນໜຶ່ງຖືກຍິງເສຍຊີວິດ ຂະນະເຮັດວຽກໃກ້ໝູ່ບ້ານເກມາລີ ຫ່າງຈາກເມືອງໄມດູກູຣີ ເມືອງເອກຂອງລັດໂບໂນ 13 ກິໂລແມັດ.

ທ່ານ ອິບຣໍຮິມ ລິມານ ຫົວໜ້າກຸ່ມອາສາສະຫມັກ ເຜີຍເມື່ອວັນພຸດວ່າ ຜູ້ເສຍຊີວິດທັງ 16 ຄົນ ຖືກຂ້າ ເມື່ອວັນຈັນ ແລະ ກຸ່ມອາສາສະໝັກເຂົ້າໄປກູ້ສົບໃນວັນຕໍ່ມາ ແລະ ຍັງມີຜູ້ສູນຫາຍອີກ 35 ຄົນ ອາສາສະໝັກກໍາລັງເລັ່ງຊອກຫາ.

ເຈົ້າໜ້າທີ່ກອງທັບໄນຈີເຣຍ ເຜີຍວ່າ ກຸ່ມໂບໂກ ຮາຣາມ ຫັນມາໂຈມຕີຊາວກະສິກອນແລະ ຄົນຕັດໄມ້ຫຼາຍຂຶ້ນ ໃນໄລຍະ 2-3 ປີຫຼ້າມານີ້ ໂດຍກຸ່ມໂບໂກ ຮາຣາມ ກ່າວຫາວ່າ ຄົນກຸ່ມນີ້ເປັນສາຍສົ່ງຂໍ້ມູນໃຫ້ກອງທັບ.

ເດືອນທີ່ຜ່ານມາ ກຸ່ມໂບໂກ ຮາຣາມ ໃຊ້ອາວຸດມີດຟັນແທງເສຍຊີວິດ 12 ຄົນ ຂະນະ ກໍາລັງເຮັດວຽກໃນໄຮ່ສວນໃກ້ໝູ່ບ້ານຄັນເລ ປະມານ 17 ກິໂລແມັດ ຈາກເມືອງໄມດູກູຣີ.

%d bloggers like this: