ກະແລັມຫົວສີໃຄຊື່ນໃຈເພື່ອສຸຂະພາບ

ເມື່ອຍໆອາດຈະຢາກກິນກະແລັມໃຫ້ຊື່ນໃຈຂຶ້ນ ແລະ ສ້າງຄວາມຕື່ນຕົວໃຫ້ກັບຮ່າງກາຍຈັກໜ້ອຍໜຶ່ງ ແຕ່ຖ້າຈະໄປຊື້ຢູ່ຮ້ານທົ່ວໄປກໍ່ຢ້ານວ່າຈະມີໄຂມັນຫຼາຍເກີນໄປ. ດັ່ງນັ້ນ, ລອງເອົາສູດກະແລັມຫົວສີໄຄ ທີ່ເຮັດຈາກຢາພື້ນເມືອງລາວໄວ້ກິນເອງຮັບຮອງວ່າຊື່ນໃຈແນ່ນອນ ແຖມຍັງດີຕໍ່ສຸຂະພາບອີກ.

ສ່ວນປະສົມ:

ນ້ຳສະອາດ 400 ມິນລີລິດ.

ຫົວສີໃຄ 200 ກຣາມ.

ນ້ຳໝາກນາວ 30 ມິນລີລິດ.

ນ້ຳຕານ ຫຼື ນໍ້າເຜິ້ງ 150 ກຣາມ.

ເກືອ 1/2 ບ່ວງກາເຟ.

ແປ້ງມັນຕົ້ນ 25 ກຣາມ.

ນ້ຳລະລາຍແປ້ງ 125 ມິນລີລິດ.

ເຈລາຕິນຊະນິດຜົງ 1 ບ່ວງແກງ.

ນ້ຳຮ້ອນລະລາຍເຈລາຕິນ 50 ມິນລິລິດ.

ວິບປິ້ງຄຣີມ ຫຼື ນົມສົດ 500 ມິນລີລິດ.

ວິທີປຸງແຕ່ງ:

ເອົານ້ຳໃສ່ໝໍ້ຄ້າງໄຟພໍນ້ຳຟົດ ທຸບຫົວສີໃຄລົງຕົ້ມປະມານ 5 – 10 ນາທີ ຫຼື ຈົນກິ່ນຫົວສີໃຄອອກແລ້ວປະໄວ້ໃຫ້ເຢັນ ແລະ ຕອງເອົາແຕ່ນ້ຳ.

ຈາກນັ້ນ, ໃຫ້ເອົານ້ຳຫົວສີໃຄທີ່ໄດ້ນັ້ນມາຄ້າງໄຟອີກພ້ອມກັບເອົານ້ຳຕານ ແລະ ເກືອລົງ ເມື່ອຟົດຈຶ່ງເອົາແປ້ງມາລະລາຍໃສ່ນ້ຳໃຫ້ເຂົ້າກັນ ແລະ ເອົາລົງໝໍ້ຄົນໃຫ້ເຂົ້າກັນດີ.

ເມື່ອແປ້ງສຸກແລ້ວໃຫ້ລະລາຍເຈລາຕິນລົງ ພ້ອມກັບເອົານ້ຳໝາກນາວລົງຄົນໃຫ້ເຂົ້າກັນດີແລ້ວປົງລົງປະໄວ້ໃຫ້ເຢັນ ( ສຳລັບສີສັນແມ່ນແລ້ວແຕ່ຜູ້ມັກວ່າຈະໃສ່ສີປະສົມອາຫານ ຫຼື ສີຈາກທຳມະຊາດ ເປັນຕົ້ນແມ່ນໃບເຕຍ, ດອກອັນຊັນ ແລະ ອື່ນໆ ).

ຫຼັງຈາກເຢັນດີແລ້ວໃຫ້ຖອກ ວິບປິ້ງຄຣີມ ລົງໄປຄົນໃຫ້ເຂົ້າກັນດີ ແລ້ວຖອກລົງເຄື່ອງປັ່ນກະແລັມປະມານ 35 ນາທີ ຫຼື ຈົນກາຍເປັນເນື້ອກະແລັມທີ່ບໍ່ແຫຼວເກີນໄປ ແລະ ຕັກໃສ່ກັບ ຫຼື ກ່ອງຕ່າງໆເຂົ້າຕູ້ເຢັນໄວ້ປະມານ 3 ຊົ່ວໂມງຢ່າງຕ່ຳ ເມື່ອໄດ້ແລ້ວກໍ່ຕັກໃສ່ຈອກພ້ອມເສີບໄດ້ເລີຍ.

( ຂ່າວ: ໝູນິ້ມ )

%d bloggers like this: