ທົ່ວປະເທດມີແຫຼ່ງທ່ອງທ່ຽວທີ່ຂຶ້ນບັນຊີແລ້ວ ຈຳນວນ 2 ພັນກວ່າແຫ່ງ

ສປປ ລາວ ເປັນປະເທດໜຶ່ງທີ່ມີສະຖານທີ່ທ່ອງທ່ຽວຫຼາຍແຫ່ງ ຈາກສະຖິຕິມາຮອດທ້າຍປີ 2017 ມີທັງໝົດ 2.104 ແຫ່ງ. ຂະນະທີ່ຕົວເລກນັກທ່ອງທ່ຽວ 6 ເດືອນຕົ້ນປີ 2018 ເພີ່ມຂຶ້ນ 6% ແຕ່ເພື່ອດຶງດູດນັກທ່ອງທ່ຽວໃຫ້ໄດ້ຕາມເປົ້າໝາຍ ຍັງຕ້ອງສ້າງຄວາມປະທັບໃຈແກ່ຜູ້ມາຢາມ.

ອີງຕາມບົດສະຫຼຸບຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ປະຈຳປີ 2017 ໃຫ້ຮູ້ວ່າ: ມາຮອດທ້າຍປີ 2017 ໃນທົ່ວປະເທດມີແຫຼ່ງທ່ອງທ່ຽວທີ່ໄດ້ຄົ້ນພົບ ແລະ ຂຶ້ນບັນຊີແລ້ວ ຈຳນວນ 2.104 ແຫ່ງ. ໃນນັ້ນ, ເປັນແຫຼ່ງທ່ອງທ່ຽວທຳມະຊາດ ຈຳນວນ 1.094 ແຫ່ງ, ສະຖານທີ່ທ່ອງທ່ຽວວັດທະນະທຳຈຳນວນ 628 ແຫ່ງ ແລະ ສະຖານທີ່ທ່ອງທ່ຽວປະຫວັດສາດ ຈຳນວນ 282 ແຫ່ງ.

ສຳລັບສະຖານທີ່ພັກແຮມ ທັງໝົດ 2.997 ແຫ່ງ, ມີ 46.513 ຫ້ອງ. ໃນນັ້ນ, ມີໂຮງແຮມທັງໝົດ 545 ແຫ່ງ ມີ 21.617 ຫ້ອງ, ຣີສອດ ແລະ ທີ່ພັກມີທັງໝົດ 2.452 ແຫ່ງ ມີ 24.896 ຫ້ອງ, ການຈັດຂັ້ນໂຮງແຮມ ແລະ ເຮືອນພັກໄດ້ທັງໝົດ 126 ແຫ່ງ. ໃນນັ້ນ, ມີໂຮງແຮມ ແລະ ຣີສອດ ຈໍານວນ 70 ແຫ່ງ, ເຮືອນພັກ 56 ແຫ່ງ, ໂຮງແຮມລະດັບ 5 ດາວ ມີ 4 ແຫ່ງ, ໂຮງແຮມ 4 ດາວ ມີ 12 ແຫ່ງ, ໂຮງແຮມ 3 ດາວ ມີ 23 ແຫ່ງ, ໂຮງແຮມ 2 ດາວ ມີ 17 ແຫ່ງ, ໂຮງແຮມ 1 ດາວ ມີ 14 ແຫ່ງ; ສ່ວນເຮືອນພັກ 3 ດອກຈໍາປາ ມີ 11 ແຫ່ງ, 2 ດອກຈໍາປາ ມີ 25 ແຫ່ງ ແລະ 1 ດອກຈໍາປາ ມີ 20 ແຫ່ງ; ບໍລິສັດທ່ອງທ່ຽວມີ 433 ບໍລິສັດ. ໃນນັ້ນ, ມີບໍລິສັດແມ່ 391 ບໍລິສັດ ແລະ ມີ 49 ສາຂາບໍລິສັດທ່ອງທ່ຽວ, ຈໍານວນພະນັກງານນໍາທ່ຽວທົ່ວປະເທດ 1.275 ທ່ານ, ພັດຕາຄານທັງໝົດ 6 ແຫ່ງ, ຮ້ານອາຫານ 1.664 ແຫ່ງ, ຮ້ານກິນດື່ມ 1.217 ແຫ່ງ, ສະຖານບັນເທີງ 164 ແຫ່ງ ແລະ ຮ້ານຄາຣາໂອເກະ 195 ແຫ່ງ.

ທ່ານ ສີວິໄວ ອຸດົມສຸກ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມທັງເປັນຜູ້ຊີ້ນຳວຽກງານທ່ອງທ່ຽວແຂວງຊຽງຂວາງ ໃຫ້ຮູ້ວ່າ: ແຂວງຊຽງຂວາງ ມີແຫຼ່ງທ່ອງທ່ຽວທັງໝົດ 146 ແຫ່ງ. ໃນນັ້ນ, ເປີດໃຫ້ບໍລິການ 42 ແຫ່ງ, ເປັນທາງປະຫວັດສາດ 12 ແຫ່ງ, ທາງວັດທະນະທຳ 18 ແລະ ທາງທຳມະຊາດ 12 ແຫ່ງ ເຊິ່ງທາງແຂວງຂອງພວກເຮົາໄດ້ເອົາໃຈໃສ່ຊຸກຍູ້ໃຫ້ນັກທຸລະກິດເຂົ້າມາລົງທຶນ ໂດຍການສ້າງໂຮງແຮມ, ເຮືອນພັກ ແລະ ຮ້ານອາຫານ. ປັດຈຸບັນນີ້ແຂວງຊຽງຂວາງ ມີບໍລິສັດທ່ອງທ່ຽວ 10 ບໍລິສັດ, ມີໂຮງແຮມທັງໝົດ 18 ແຫ່ງ, ຣີສອດທັງໝົດ 3 ແຫ່ງ, ເຮືອນພັກທັງໝົດ 118 ແຫ່ງ, ສວນອາຫານ 4 ແຫ່ງ ແລະ ຮ້ານອາຫານ 119 ແຫ່ງ ໂດຍສາມາດຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ຢ່າງພຽງພໍ; ສ່ວນແຜນໃນຕໍ່ໜ້າທາງພະແນກ ຖວທ ແຂວງຊຽງຂວາງ ຈະໄດ້ປັບປຸງວຽກງານການທ່ອງທ່ຽວ ໂດຍສະເພາະແມ່ນການປັບປຸງແຫຼ່ງທ່ອງທ່ຽວໃຫ້ມີກິດຈະກຳທີ່ມີຄວາມຫຼາກຫຼາຍ, ມີສິ່ງອຳນວຍຄວາມສະດວກຫຼາຍຂຶ້ນ, ພັດທະນາບຸກຄະລາກອນໃນວຽກງານການທ່ອງທ່ຽວໃຫ້ມີຄຸນນະພາບ ແລະ ປະລິມານທີ່ພຽງພໍ.

ທ່ານ ບຸນກວມ ມິດເມືອງໄຊ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ໄດ້ໃຫ້ສຳພາດວ່າ: ເພື່ອໃຫ້ບັນລຸຕາມແຜນຄາດໝາຍການສົ່ງເສີມໃຫ້ນັກທ່ອງທ່ຽວເຂົ້າມາທ່ຽວຊົມແຂວງອຸດົມໄຊ ແມ່ນໄດ້ມີການປັບປຸງສິ່ງອຳນວຍຄວາມສະດວກທາງດ້ານສະຖານທີ່ພັກແຮມ, ສະຖານທີ່ບໍລິການ, ສະຖານທີ່ທ່ຽວຊົມໃຫ້ໄດ້ຄຸນນະພາບ ແລະ ມາດຕະຖານ ພ້ອມທັງຍົກລະດັບຂອດການບໍລິການພາກທຸລະກິດ, ຜູ້ປະກອບການໃຫ້ມີຄຸນນະພາບ, ເອົາໃຈໃສ່ໂຄສະນາຮ່ວມມືບັນດາບໍລິສັດຜູ້ປະກອບການທ່ອງທ່ຽວພາຍໃນ ແລະ ຕ່າງປະເທດໃຫ້ກວ້າງຂວາງ, ຄຸ້ມຄອງພາກທຸລະກິດຫັນເຂົ້າສູ່ລະບຽບກົດໝາຍ, ປັບປຸງຜະລິດຕະພັນການທ່ອງທ່ຽວທຳມະຊາດ, ປະຫວັດສາດ, ວັດທະນະທຳໃຫ້ຫຼາກຫຼາຍ ແລະ ໂດດເດັ່ນເປັນເອກະລັກສະເພາະທ້ອງຖິ່ນ.

ແຂວງອຸດົມໄຊ ມີແຫຼ່ງທ່ອງທ່ຽວທັງໝົດ 106 ແຫ່ງ, ທາງທຳມະຊາດ 54 ແຫ່ງ, ທາງວັດທະນະທຳ 40 ແຫ່ງ ແລະ ທາງປະຫວັດສາດ 12 ແຫ່ງ; ສ່ວນຂະແໜງບໍລິການດ້ານທີ່ພັກ ປັດຈຸບັນມີໂຮງແຮມ 21 ແຫ່ງ, ຣີສອດ 6 ແຫ່ງ, ເຮືອນພັກ 106 ແຫ່ງ ແລະ ຮ້ານອາຫານ 256 ແຫ່ງ ໂດຍສາມາດຮອງຮັບນັກທ່ອງທ່ຽວໄດ້ພຽງພໍ.

ທ່ານ ແສງອາລຸນ ວິໄລເຮືອງ ຮອງຫົວໜ້າຂະແໜງທ່ອງທ່ຽວ ແລະ ເປັນຜູ້ຊີ້ນໍາວຽກງານຄຸ້ມຄອງການທ່ອງທ່ຽວແຂວງວຽງຈັນ ໃຫ້ສຳພາດວ່າ: ແຜນພັດທະນາຂະແໜງທ່ອງທ່ຽວແມ່ນປຸກລະດົມຂົນຂວາຍດຶງດູດນັກລົງທຶນພາຍໃນ ແລະ ຕ່າງປະເທດເຂົ້າມາລົງທຶນໃນຂະແໜງການທ່ອງທ່ຽວພາຍໃນແຂວງໃຫ້ນັບມື້ຫຼາຍຂຶ້ນ ລວມທັງອຳນວຍຄວາມສະດວກ ແລະ ປະສານສົມທົບກັບຂະແໜງການທີ່ກ່ຽວຂ້ອງພາຍໃນແຂວງ ໃນການໂຄສະນາກິດຈະກຳການທ່ອງທ່ຽວພາຍໃນແຂວງອອກສູ່ສັງຄົມພາຍໃນ ແລະ ຕ່າງປະເທດໃຫ້ນັບມື້ກວ້າງຂວາງ ເຊິ່ງແຂວງວຽງຈັນ ມີແຫຼ່ງທ່ອງທ່ຽວທັງໝົດ 211 ແຫ່ງ. ໃນນັ້ນ, ເປັນທາງວັດທະນະທຳ 22 ແຫ່ງ, ທາງທຳມະຊາດ 180 ແຫ່ງ ແລະ ທາງປະຫວັດສາດ 9 ແຫ່ງ.

[ ຂ່າວ: ຄໍານ້ອຍ + ນຸ້ມນິ້ມ ]

%d bloggers like this: