ເມືອງຊານໄຊ ປະກາດ ເປັນເມືອງສະຫະພັນ ແມ່ຍິງ 3 ດີ ແລະ ເມືອງຊາວໜຸ່ມ 4 ບຸກ

ໃນວັນທີ 7 ພະຈິກ 2018 ຜ່ານມາ ທີ່ເມືອງຊານໄຊ ແຂວງ ອັດຕະປື ຈັດພິທີປະກາດເມືອງຊານໄຊເປັນເມືອງສະຫະພັນແມ່ຍິງ 3 ດີ ແລະ ເມືອງຊາວໜຸ່ມ 4 ບຸກຂຶ້ນ ໂດຍພາຍໃຕ້ໃຫ້ກຽດເຂົ້າຮ່ວມຂອງສະຫາຍ ນາງ ມີນາພອນ ໄຊສົມພູ, ຫົວໜ້າຄະນະຈັດຕັ້ງ ແຂວງອັດຕະປື, ມີການນຳຈາກຂັ້ນແຂວງ, ຂັ້ນເມືອງ, ແຂກເຊື້ອເຊີນຈາກບັນດາເມືອງ 4 ຕົວເມືອງ, ຕະຫຼອດເຖິງມວນຊົນຊາວເມືອງເຂົ້າຮ່ວມຢ່າງພ້ອມພຽງ.

 

 

ໂອກາດນີ້ ສະຫາຍ ສຸວັນສີ ແກ້ວວິເສີດ ເລຂາພັກເມືອງເຈົ້າເມືອງໆຊານໄຊ ໄດ້ໃຫ້ກຽດກ່າວເປີດພິທີ ເມືອງຊານໄຊເປັນມືອງສະຫະພັນແມ່ຍິງ 3 ດີ ແລະ ເປັນເມືອງຊາວໜຸ່ມ 4 ບຸກຢ່າງເປັນທາງການ ແລະ ນະໂອກາດດຽວກັນນັ້ນໄດ້ໃຫ້ກຽດຮັບຟັງການສະຫຼຸບລາຍງານວຽກງານຂະບວນການແຂ່ງຂັນ 3 ດີຂອງສະຫະພັນແມ່ຍິງ ແລະ ຂະບວນການແຂ່ງຂັນຂອງຊາວໜຸ່ມ 4 ຈາກປະທາສະຫະພັນແມ່ຍິງເມືອງ ແລະ ເລຂາຄະນະບໍລິຫານງານຊາວໜຸ່ມເມືອງເຊິ່ງສະຫາຍໄດ້ກ່າວວ່າ: ທົ່ວເມືອງຊານໄຊມີ 67 ໜ່ວຍ,ສະມາຊິກແມ່ຍິງທັງໝົດ 3.518 ສະຫາຍ ໃນນັ້ນ: ມີໜ່ວຍແມ່ຍິງ 3 ດີກວມເອົາ 59 ໜ່ວຍເທົ່າກັບ 88.05 % ແລະ ທົ່ວເມືອງມີໜ່ວຍຊາວໜຸ່ມທັງໝົດ 63 ໜ່ວຍ, ມີສະມາຊິກຊາວໜຸ່ມທັງໝົດ 2.625 ສະຫາຍ, ຍິງ 912 ສະຫາຍ ມີໜ່ວຍຊາວໜຸ່ມໄດ້ຮັບເປັນໜ່ວຍຊາວໜຸ່ມ 4 ບຸກ 58 ໜ່ວຍ ເທົ່າກັບ 92%.

 

 

ຕະຫຼອດໄລຍະຜ່ານມາຄະນະບໍລິຫານງານຊາວໜຸ່ມ, ແມ່ຍິງ ແລະ ຄະນະໜ່ວຍຮາກຖານອອ້ມພ້ອມສະມາຊິກຊາວໜຸ່ມ, ແມ່ຍິງພາຍໃນເມືອງໄດ້ນຳເອົາເນື້ອໃນຂໍ້ແຂ່ງຂັນຕ່າງໆຂອງຊາວໜຸ່ມ ແລະ ແມ່ຍິງເປັນຕົ້ນ: ຂະບວນການແຂ່ງຂັນແມ່ຍິງ 3 ດີ, ຊາວໜຸ່ມ 4 ບຸກ ທີ່ສູນກາງວາງອອກໄປຜັນຂະຫຍາຍຈັດຕັ້ງປະຕິບັດໃຫ້ເກີດດອກອອກຜົນ, ເອົາໃຈໃສ່ຈັດຕັ້ງເຊື່ອມຊຶມບັນດາເນື້ອໃນເອກະສານຕ່າງໆທີ່ສຳຄັນຂອງພັກຂອງຊາດ, ມີຄວາມຕື່ນຕົວຫ້າວຫັນໃນການຈັດຕັ້ງປະຕິບັດ ຖືກຕ້ອງຕາມລະບຽບກົດໝາຍ, ເຄື່ອນໄຫວຊຸກຍູ້ ອົງການຈັດຕັ້ງຂອງຕົນ, ຂະຫຍາຍສະມາຊິກຮັບປະກັນທາງດ້ານປະລິມານ ແລະ ຄຸນນະພາບ,ສຶກສາອົບຮົມການເມືອງ-ນໍາພາແນວຄິດ, ເປັນເຈົ້າການແບບແຜນວິທີນຳພາ, ເປັນເຈົ້າປົກປ້ອງສິດຜົນປະໂຫຍດອັນຊອບທຳ ເຊິ່ງສະແດງໃນການຈັດຕັ້ງປະຕິບັດໃນແຕ່ລະດ້ານ: ບຸກທາງດ້ານແນວຄິດ ປະຕິບັດໄດ້ 87%, ບຸກດ້ານເຝິກຝັນຫຼໍ່ຫຼອມຮ່ຳຮຽນປະຕິບັດໄດ້ 87%, ບຸກທາງດ້ານການຈັດຕັ້ງ ປະຕິບັດໄດ້ 89%, ບຸກທາງດ້ານອາຊີບສ້າງວຽກເຮັດງານທຳ ປະຕິບັດໄດ້ 88% ແລະຂະບວນການແຂ່ງຂັນແມ່ຍິງ 3 ດີ : ພົນລະເມືອງດີ ປະຕິບັດໄດ້ 95 %, ພັດທະນາດີ ປະຕິບັດໄດ້ 92 %, ສ້າງຄອບຄົວດີໃຫ້ມີຄວາມຜາສຸກ ປະຕິບັດໄດ້ 87% .

 

 

ຈາກນັ້ນ, ໃນພິທີສະຫາຍ ຫັດສະໄນ ສີບຸນເຫຼືອງ ຄະນະບໍລິຫານງານສູນກາງເລຂາຄະນະບໍລິຫານງານຊາວໜຸ່ມ ແຂວງອັດຕະປື ແລະ ສະຫາຍນາງຈັນເພັດ ຈັນທະມາດ ຮອງປະທານສະຫະພັນແມ່ຍິງ ແຂວງອັດຕະປື ໄດ້ໃຫ້ກຽດຜັດປ່ຽນກັນກ່າວມອບໃບຢັ້ງຢືນ ເມືອງຊານໄຊເປັນເມືອງ ສະຫະພັນແມ່ຍິງ 3 ດີ ແລະ ເມືອງ ຊາວໜຸ່ມ 4 ບຸກ ໃຫ້ກຽດກ່າວຮັບໂດຍ ສະຫາຍ ນາງ ພຽງມະໄລ ຊ່ອງພູຊິດກຳມະການພັກເມືອງປະທານສະຫະພັນແມ່ຍິງເມືອງ ແລະ ສະຫາຍ ນາງມັງສີ ບຽດມະນີ ກຳມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງ ພ້ອມແຂກທຸກພາກສ່ວນເປັນສັກຄີພີຍານ.

 

 

 

ຕອນທ້າຍພິທີໄດ້ໃຫ້ກຽດຮັບຟັງການມີຄຳຄິດຄຳເຫັນໂອ້ລົມຈາກສະຫາຍນາງມີນາພອນໄຊສົມພູ ຄະນະປະຈຳພັກແຂວງ ຫົວໜ້າຄະນະຈັດຕັ້ງ ແຂວງ ອັດຕະປື ຕື່ມອີກ.

ຈາກນັ້ນໄດ້ຕັດແຖບຜ້າ ແລະ ລັ່ນຄ້ອງ 9 ບາດພ້ອມເປີດປ້າຍປະກາດເມືອງຊານໄຊເປັນເມືອງແມ່ຍິງ 3 ດີ ແລະ ເມືອງຊາວໜຸ່ມ 4 ບຸກຢ່າງເປັນທາງການ.

 

 

ຂ່າວ: ມະນີວອນ ນັກຂ່າວ ແຂວງ ອັດຕະປື

%d bloggers like this: