ຮອງນາຍົກ ຕິດຕາມຄວາມຄືບໜ້າການກະກຽມສະຫຼອງວັນສ້າງຕັ້ງເມືອງວຽງໄຊ ຖານທີ່ໝັ້ນຂອງການປະຕິວັດລາວ

ໃນຂະນະທີ່ພາກສ່ວນກ່ຽວຂ້ອງທັງສູນກາງ ແລະ ທ້ອງຖິ່ນ ກຳລັງຂຸ້ນຂ້ຽວຫ້າງຫາກະກຽມບັນດາໜ້າວຽກຕ່າງໆ ເພື່ອສະເຫຼີມສະຫຼອງ ຄົບຮອບ 50 ປີ ແຫ່ງການສ້າງຕັ້ງເມືອງວຽງ   ໄຊ ຖານທີ່ໝັ້ນການປະຕິວັດລາວ ( 30 ພະຈິກ 1968 – 30 ພະຈິກ 2019 ) ທີ່ຈະຈັດພິທີຂຶ້ນຢ່າງຍິ່ງໃຫຍ່ ໃນວັນທີ 30 ພະຈິກ 2018 ນີ້ ທີ່ເມືອງວຽງໄຊ ແຂວງຫົວພັນ  ເພື່ອເປັນການລໍ້າລຶກບຸນຄຸນ, ການຫວນຄືນເຖິງຄວາມປີຊາສາມາດໃນການຕໍ່ສູ້ຍາດເອົາຄວາມເປັນເອກະລາດຂອງການນໍາລຸ້ນກ່ອນ ໂດຍມີເມືອງວຽງໄຊ ແຂວງຫົວພັນ ເປັນຖານທີ່ໝັ້ນອັນແໜ້ນແກ່ນຂອງການປະຕິວັດ ຈົນປະສົບຄວາມສຳເລັດ ແລະ ປະກາດເອກະລາດໄດ້ຈົນມາຮອດທຸກວັນນີ້.

ຫຼ້າສຸດ, ໃນວັນທີ 6 ພະຈິກ 2018 ຜ່ານມາ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ໄປເຄື່ອນໄຫວຊຸກຍູ້ຕິດຕາມ – ກວດກາຄວາມຄືບໜ້າໃນການກະກຽມວຽກງານດ້ານຕ່າງໆ ເພື່ອສະເຫຼີມສະຫຼອງວັນສ້າງຕັ້ງເມືອງວຽງໄຊ ແຂວງຫົວພັນ ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ ທີ່ຈະຈັດຂຶ້ນໃນທ້າຍເດືອນພະຈິກ 2018 ໂດຍມີ ທ່ານ ວັນໄຊ ແພງຊຸມມາ ເຈົ້າ   ແຂວງໆຫົວພັນ ພ້ອມດ້ວຍຄະນະນຳຂອງແຂວງ ແລະ ເມືອງວຽງໄຊ ໃຫ້ການຕ້ອນຮັບຢ່າງອົບອຸ່ນ.

ທ່ານ ພູໂຊນ ທໍາມະວີໄຊ ຮອງເຈົ້າແຂວງໆຫົວພັນ ລາຍງານວ່າ: ມາຮອດປັດຈຸບັນ ການກະກຽມຄວາມພ້ອມໃນດ້ານຕ່າງໆ ໂດຍສະເພາະ ຈໍານວນ 9 ໂຄງການ ເປັນຕົ້ນ: ໂຄງການກໍ່ສ້າງທາງປູຢາງ 2 ຊັ້ນ ແຕ່ 5 ແຍກ ບ້ານບັກ ຫາ ໂຮງຮຽນການເມືອງ – ການປົກຄອງ ແລະ ເຖິງ 3 ແຍກທາງເລກ 6, ໂຄງການກໍ່ສ້າງສວນສາທາລະນະ, ໂຄງການກໍ່ສ້າງສ້ອມແປງຫໍວັດທະນະທໍາ, ໂຄງການພັດທະນາໜອງນ້ຳຜາທ້າວ ແລະ ທາງປູແຮ່, ໂຄງການກໍ່ສ້າງທາງປູຢາງອ້ອມສະໜາມຫຼວງ, ໂຄງການສ້ອມແປງທາງປູຢາງເທສະບານເມືອງວຽງໄຊ ແມ່ນສຳເລັດ 100%, ສຳລັບໂຄງການກໍ່ສ້າງສະໜາມຫຼວງ ສຳເລັດ 91%, ໂຄງການກໍ່ສ້າງປ້ອງກັນຕາຝັ່ງເຈື່ອນ ແລະ ຮ່ອງລະບາຍນ້ຳ ສຳເລັດ 98%, ໂຄງການກໍ່ສ້າງສ້ອມແປງສະໂມສອນເມືອງວຽງໄຊ ສຳເລັດ 99% ໂຄງການກໍ່ສ້າງວົງວຽນ 5 ແຍກ ສໍາເລັດ 93%, ໂຄງການກໍ່ສ້າງຕົວໜັງສືໃຫຍ່ໃສ່ຜາຫີນ ສຳເລັດ 83%, ສັງລວມແລ້ວ ມາຮອດປັດຈຸບັນ ທຸກໜ້າວຽກແມ່ນມີຄວາມຄືບໜ້າດີ ແລະ ຄາດວ່າໜ້າວຽກທັງໝົດຈະໃຫ້ສໍາເລັດກ່ອນວັນທີ 16 ພະຈິກ 2018.

ໂອກາດນີ້, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ກໍ່ໄດ້ໄປກວດກາເບິ່ງການກໍ່ສ້າງພື້ນຖານໂຄງລ່າງເພື່ອກະກຽມໃຫ້ແກ່ການສະເຫຼີມສະຫຼອງເມືອງວຽງໄຊ ຄົບຮອບ 50 ປີ ເປັນຕົ້ນແມ່ນສະໜາມຫຼວງ, ສະໂມສອນເມືອງ, ໜອງນໍ້າຜາຫ້າ, ເດີ່ນບິນ ແລະ ໄດ້ໄປຢ້ຽມຢາມສູນເສຍອົງຄະ 11 ( ນາແທ່ນ ) ເມືອງວຽງໄຊ ໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ພະນັກງານທີ່ປະຈຳຢູ່ສູນດັ່ງກ່າວ ໂດຍໄດ້ກ່າວຍ້ອງຍໍຊົມເຊີຍ ແລະ ສະແດງຄວາມຮູ້ບຸນຄຸນຕໍ່ຜົນງານການຕໍ່ສູ້ກູ້ຊາດ ກໍ່ຄືການປະກອບສ່ວນປະຕິບັດພາລະກິດສ້າງສາພັດທະນາປະເທດຊາດໃນປັດຈຸບັນ. ພ້ອມທັງຍົກໃຫ້ເຫັນຜົນສຳເລັດ ແລະ ສິ່ງທ້າທາຍໃນການປະຕິບັດແຜນພັດທະນາເສດຖະກິດ – ສັງຄົມແຫ່ງຊາດ ໃນໄລຍະຜ່ານມາກໍ່ຄືປັດຈຸບັນ ແລະ ອະນາຄົດ. ໃນນີ້, ທ່ານຮອງນາຍົກລັດຖະມົນຕີ ຍັງໄດ້ມອບລົດໃຫຍ່ ຈຳນວນ 1 ຄັນ ແລະ ເງິນສົດ ຈຳນວນ 20 ລ້ານກີບ ໃຫ້ສູນແຫ່ງນີ້ ເພື່ອປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງເຂົາເຈົ້າໃຫ້ນັບມື້ດີຂຶ້ນເປັນກ້າວໆ.

ທ່ານ ສີພັນ ວິໄນສຸກ ຫົວໜ້າຄະນະຮັບຜິດຊອບອະນຸສອນສະຖານປະທານໄກສອນ ພົມວິຫານ ແລະ ທ່ານຜູ້ນຳພັກ – ລັດເມືອງວຽງໄຊ ແຂວງຫົວພັນ ໃຫ້ຮູ້ວ່າ: ທາງຄະນະຮັບຜິດຊອບອະນຸສອນສະຖານປະທານໄກສອນ ພົມວິຫານ ແລະ ຜູ້ນຳພັກ – ລັດ ທີ່ເມືອງວຽງໄຊ ແຂວງຫົວພັນ ພວກຂ້າພະເຈົ້າໄດ້ມີການກວດກາຊີ້ນຳທາງດ້ານວິຊາການໃຫ້ປະຕິບັດການອະນຸຮັກປົກປັກຮັກສາໃຫ້ຖືກຕ້ອງຕາມຫຼັກວິທະຍາສາດ ເຊັ່ນ: ມີການອະນາໄມ, ຮັກສາວັດຖຸ, ພົມຕ່າງໆໃຫ້ຢູ່ໃນສະພາບເດີມ, ບູລະນະປະຕິສັງຂອນປົກກະຕິໃຫ້ເຮືອນຖ້ຳທ່ານຜູ້ນຳຢູ່ໃນສະພາບເດີມ, ຕ້ອນຮັບແຂກທັງພາຍໃນ ແລະ ຕ່າງປະເທດ ນັບທັງວັນເສົາ ແລະ ວັນທິດ, 7 ຖ້ຳ ແລະ ເຮືອນຂອງກົມການເມືອງສູນກາງພັກລຸ້ນທຳອິດໄດ້ບູລະນະເປັນທີ່ຮຽບຮ້ອຍແລ້ວ.

ເນື່ອງໃນໂອກາດກະກຽມຈັດງານສະເຫຼີມສະຫຼອງເມືອງວຽງໄຊ ຄົບຮອບ 50 ປີ ຈະມາເຖິງນີ້, ທາງຄະນະຮັບຜິດຊອບໄດ້ພະຍາຍາມລະດົມທຶນຈາກຄອບຄົວການນຳ, ພັກລັດ ແລະ ປະຊາຊົນ ປະກອບທຶນເຂົ້າໃນການບູລະນະບັນດາຖ້ຳທ່ານຜູ້ນຳໄດ້ສຳເລັດ ໃຫ້ແຂກສາມາດທ່ຽວຊົມໄດ້ ເຊັ່ນ: ເຂດອະນຸສອນສະຖານຂອງທ່ານ  ປະທານ ໄກສອນ ພົມວິຫານ ( ທີ່ຖ້ຳຜາຫ່ານ ), ເຂດເຮືອນຖໍ້າຂອງ ທ່ານ ໜູຮັກ  ພູມສະຫວັນ ( ຢູ່ຖ້ຳຜາຂາວ ), ເຂດເຮືອຖ້ຳ ຂອງທ່ານປະທານ ສຸພານຸວົງ ( ຢູ່ລ້ອງຜາດົງປຸ່ງໃຕ້ ), ເຂດເຮືອນຖໍ້າຂອງ ທ່ານ ຄຳໄຕ ສີພັນດອນ ( ຜາຊ້າງລອດ ), ເຂດເຮືອນຖໍ້າຂອງ ທ່ານ ພູນ ສີປະເສີດ ( ຜາຫຼົງບ້ານຢ່ອນຊອງ ), ເຂດເຮືອນຖໍ້າຂອງ ທ່ານ ພູມີ ວົງວິຈິດ ( ຜາຖ້ຳລ້ອງກົກຟາດ ), ເຂດເຮືອນຖ້ຳຂອງ ທ່ານ ສີສົມພອນ ລໍວັນໄຊ ( ຜາຈັດຕັ້ງ ) ແລະ ເຮືອນຖ້ຳຂອງ ທ່ານ ສະໝານ ວິຍະເກດ ແລະ ທ່ານ ສີສະຫວາດ ແກ້ວບຸນພັນ ເຊິ່ງສາມາດສັງລວມໄດ້ວ່າພວກເຮົາຍິນດີຕ້ອນຮັບນັກທ່ອງທ່ຽວທີ່ຈະມາທ່ຽວຊົມສະຖານທີ່ແຫ່ງນີ້ໂດຍຈະມີພະນັກງານນຳທ່ຽວຂອງຄະນະຮັບຜິດຊອບອະນຸສອນສະຖານເປັນຜູ້ອະທິບາຍປະຫວັດຄວາມເປັນມາຂອງຖ້ຳເຫຼົ່ານັ້ນ.

ທ່ານ ຄຳ ໂຮມມີໄຊ ຮອງເລຂາພັກເມືອງ ປະທານແນວລາວສ້າງຊາດ ເມືອງວຽງໄຊ ຫົວໜ້າຄະນະຮັບຜິດຊອບງານສະເຫຼີມສະຫຼອງວັນສ້າງຕັ້ງເມືອງວຽງໄຊ ຖານທີ່ໝັ້ນການປະຕິວັດລາວ ຄົບຮອບ 50 ປີ ຂັ້ນເມືອງ ໃຫ້ຮູ້ວ່າ: ມາຮອດປັດຈຸບັນນີ້ ພວກເຮົາໄດ້ກະກຽມຄວາມພ້ອມໃນການຈັດງານດັ່ງກ່າວ ເຊັ່ນ: ດ້ານສະຖານທີ່ຈັດງານ ເຊິ່ງຈະໄດ້ຈັດຂຶ້ນຢູ່ທີ່ສະໜາມຫຼວງ ເມືອງວຽງໄຊ ແຂວງຫົວພັນ ສະໜາມຫຼວງແຫ່ງນີ້ແມ່ນໄດ້ຮັບທຶນກໍ່ສ້າງເພື່ອກະກຽມງານສະເຫຼີມສະຫຼອງວັນສ້າງຕັ້ງເມືອງວຽງໄຊ ຄົບຮອບ 50 ປີ, ການຈັດງານຄັ້ງນີ້ແມ່ນຕິດພັນກັບບຸນຊົນເຜົ່າປະຈຳປີຂອງເມືອງວຽງໄຊ ໃນລະຫວ່າງວັນທີ 28 – 29 ພະຈິກ 2018 ເຊິ່ງເປັນວາລະງານບຸນຊົນເຜົ່າຈະມີພິທີບາສີສູ່ຂວັນຂອງ 5 ຊົນເຜົ່າ ພາຍໃນເມືອງວຽງໄຊ, ການສະແດງສິລະປະ – ວັດທະນະທຳ ບັນດາເຜົ່າພາຍໃນເມືອງ, ງານຕະຫຼາດນັດຂອງພີ່ນ້ອງຊາວລາວ ແລະ ຊາວຫວຽດນາມ, ການແຂ່ງຂັນກີລາພື້ນເມືອງ, ການວາງສະແດງຮູບພາບການເຄື່ອນໄຫວ, ຜະລິດຕະພັນຂອງແຕ່ລະກຸ່ມບ້ານພາຍໃນເມືອງວຽງໄຊ ມາວາງສະແດງ ແລະ ຈຳໜ່າຍ.

ສຳລັບພິທີສະເຫຼີມສະຫຼອງວັນສ້າງຕັ້ງເມືອງວຽງໄຊ – ຖານທີ່ໝັ້ນ ການປະຕິວັດລາວ ຄົບຮອບ 50 ປີ ແມ່ນຈະໄດ້ຈັດຂຶ້ນໃນວັນທີ 30 ພະຈິກ 2018 ເຊິ່ງພາຍໃນງານຈະມີການສະແດງບົດຟ້ອນທີ່ສະທ້ອນເຖິງຊີວິດການເປັນຢູ່ຂອງຊາວເມືອງວຽງໄຊ ແຕ່ສະໄໝສົງຄາມຮອດປັດຈຸບັນຂອງນ້ອງໆນັກຮຽນ ຈຳນວນ 600 ນ້ອງ, ພິທີເດີນສວນສະໜາມ ແລະ ກ້ອນກຳລັງຕ່າງໆພາຍໃນເມືອງ ຈຳນວນ 20 ກ້ອນກຳລັງ ເພື່ອເຂົ້າສູ່ພິທີຢ່າງເປັນທາງການ. ນອກຈາກນີ້, ຍັງມີການສະແດງຂອງກອງສິລະປະກອນສູນກາງ, ກອງກາຍະສິນແຫ່ງຊາດ ແລະ ຍິງບັ້ງໄຟດອກ, ບັນດາກິດຈະກຳທີ່ໄດ້ກຳນົດ ເມືອງວຽງໄຊ ໄດ້ສົມທົບກັບຄະນະຮັບຜິດຊອບຂັ້ນແຂວງ, ຂັ້ນສູນກາງ ເພື່ອແບ່ງຄວາມຮັບຜິດຊອບໃນການຊີ້ນຳ ມາຮອດປັດຈຸບັນນີ້ ເຫັນວ່າມີຄວາມພ້ອມ 90% ແລ້ວ ແລະ ຄາດວ່າແຕ່ນີ້ຮອດມື້ສະເຫຼີມສະຫຼອງຈະມີຄວາມພ້ອມ 100%. ສ່ວນງົບປະມານທີ່ນຳໃຊ້ເຂົ້າໃນການຈັດງານຄັ້ງນີ້ແມ່ນສູນກາງໄດ້ຮັບອະນຸມັດໃນການກໍ່ສ້າງພື້ນຖານໂຄງລ່າງໃນ 9 ໂຄງການ ຈຳນວນ 24 ຕື້ກວ່າກີບ, ງົບປະມານໃນການນຳໃຊ້ເຂົ້າໃນວຽກບໍລິຫານ ຈຳນວນ 10 ຕື້ກວ່າກີບ.

ກ່ອນໜ້ານີ້, ທ່ານ ພັນຄຳ ວິພາວັນ ຮອງປະທານປະເທດ, ທັງເປັນຫົວໜ້າຄະນະຮັບຜິດຊອບ ກໍ່ໄດ້ໃຫ້ຖະແຫຼງກ່ຽວກັບການສະເຫຼີມສະຫຼອງ ວັນສ້າງຕັ້ງເມືອງວຽງໄຊ ຖານທີ່ໝັ້ນການປະຕິວັດລາວ ຄົບຮອບ 50 ປີ ຂຶ້ນໃນວັນທີ 16 ຕຸລາ 2018 ບາງຕອນທ່ານກ່າວວ່າ: ສຳລັບເນື້ອໃນກິດຈະກຳໃນການສະເຫຼີມສະຫຼອງໃນຄັ້ງນີ້ປະກອບມີ 12 ເນື້ອໃນກິດຈະກຳຫຼັກ ຄື:

  1. ຈັດພິທີໂຮມຊຸມນຸມໃຫຍ່ຢູ່ເມືອງວຽງໄຊ ( ນາໄກ່ ) ໃນວັນທີ 30 ພະຈິກ 2018.
  2. ຈັດວາງສະແດງຮູບພາບຢູ່ນະຄອນຫຼວງວຽງຈັນ ແລະ ຢູ່ຖໍ້າຊ້າງລອດ ເມືອງວຽງໄຊ ແຂວງຫົວພັນ.
  3. ຈັດຕັ້ງການປາຖະກະຖາເລົ່າມູນເຊື້ອເມືອງວຽງໄຊ ຕິດພັນກັບມູນເຊື້ອການປະຕິວັດລາວ.
  4. ຈັດງານປະກວດບົດປະດິດຄິດແຕ່ງຕ່າງໆກ່ຽວກັບເມືອງວຽງໄຊ.
  5. ຈັດໂຄສະນາເມືອງວຽງໄຊຜ່ານສື່ຕ່າງໆ.
  6. ຈັດຂະບວນຄາຣາວານ ປະກອບມີ 4 ຂະບວນໃຫຍ່ ຄື:

ຂະບວນຄາຣາວານຂອງສູນກາງສະຫະພັນແມ່ຍິງລາວ ( ຈັດແຕ່ວັນທີ 8 – 12 ຕຸລາ 2018 ).

ຂະບວນຄາຣາວານຂອງສູນກາງສະຫະພັນກຳມະບານລາວ ( ຈັດແຕ່ວັນທີ 23 – 27 ຕຸລາ 2018 ).

ຂະບວນຄາຣາວານສູນກາງຊາວໜຸ່ມປະຊາຊົນ ປະຕິວັດລາວ ( ຄາດວ່າຈະຈັດແຕ່ວັນທີ 27 – 31 ຕຸລາ 2018 ).

ຂະບວນຄາຣາວານຂອງຄະນະຮັບຜິດຊອບການກະກຽມສະເຫຼີມສະຫຼອງເມືອງວຽງໄຊ ຈັດໂດຍກະຊວງ ຖວທ ( ຈັດລະຫວ່າງວັນທີ 27 – 30 ພະຈິກ 2018 ).

  1. ປຸກລະດົມບັນດາການຈັດຕັ້ງພັກ – ລັດ ແລະ ອົງການຈັດຕັ້ງມະຫາຊົນ ຕະຫຼອດຮອດບຸກຄົນສ້າງຂະບວນການປັບປຸງບູລະນະສະຖານທີ່ ຫຼື ຖໍ້າທີ່ເປັນສຳນັກງານຂອງຕົນໃນອະດີດຢູ່ເມືອງວຽງໄຊ.
  2. ຈັດກອງປະຊຸມສຳມະນາວິທະຍາສາດຢູ່ນະຄອນຫຼວງ.
  3. ຮຽບຮຽງປະຫວັດສາດເມືອງວຽງໄຊ.
  4. ປັບປຸງພິພິທະພັນມູນເຊື້ອເມືອງວຽງໄຊ ຕິດພັນກັບພິພິທະພັນ ທ່ານ ໄກສອນ ພົມວິຫານ.
  5. ເປີດຂະບວນການຮັກຊາດ ແລະ ພັດທະນາຢູ່ເມືອງວຽງໄຊ.
  6. ຊຸກຍູ້ບັນດາໂຄງການພັດທະນາຢູ່ແຂວງຫົວພັນ ທີ່ລັດຖະບານໄດ້ຕົກລົງແລ້ວໃຫ້ດຳເນີນຕາມແຜນການໃຫ້ສຳເລັດ.
%d bloggers like this: