ແມ່ນຫຍັງ! ຈະບໍ່ສຳເລັດຖ້າສາມັກຄີກັນຄືປະຊາຊົນບ້ານອາລ໋ອງ

ປະຊາຊົນ ບ້ານອາລ໋ອງ, ເມືອງ ນອງ ແຂວງ ສະຫວັນນະເຂດ ໄດ້ສາມັກຄີຮ່ວມມືກັນສ້າງຂົວຂ້າມເຊລະນອງ ເພື່ອຄວາມສະດວກໃນການທຽວໄປມາຂອງປະຊາຊົນພາຍໃນບ້ານ.

 

ທ່ານ ກາຍອນ ນາຍບ້ານໆອາລ໋ອງ ໄດ້ໃຫ້ຮູ້ວ່າ: ການກໍ່ສ້າງຂົວຂ້າມເຊລະນອງ ແມ່ນທາງອຳນາດການປົກຄອງບ້ານໄດ້ລະດົມ ພໍ່ແມ່ນປະຊາຊົນພາຍໃນບ້ານ ຮ່ວມກັນສ້າງຂຶ້ນ ເພື່ອສະດວກໃນການໄປມາ ເຊິ່ງມີແຮງງານທັງໝົດຈຳນວນ 130 ແຮງງານ ແບ່ງອອກເປັນ 11 ຈຸ ເຊິ່ງຮັບຜິດຊອບຈຸລະ 24 ແມັດ ແລະ ໄດ້ແບ່ງໜ້າທີ່ຮັບຜິດຊອບກັນຢ່າງລະອຽດ.

 

 

ຂົວແຫ່ງນີ້ ໄດ້ຖືກສ້າງຂຶ້ນຢູ່ຈຸດແກ້ງຫຼວງຂ້າມໄປຫາບ້ານອາລ໋ອງ ເຊິ່ງມີຂະໜາດກວ້າງ 2 ແມັດກວ່າ, ຍາວ 260 ແມັດ. ເຊິ່ງການສ້າງຂົວ ແມ່ນເອົາໄມ້ມາເຮັດເສົາຝັງຄ້ຳໄປຕາມໂງ່ນຫີນ ຫຼື ຫຼືບຫີນ ແລະ ໄດ້ວາງຂາງຂົວດ້ວຍໄມ້ກົມໃຫ້ມີຄວາມແໜ້ນໜາ. ຫຼັງຈາກນັ້ນ, ກໍເອົາໄມ້ໄລ່ທີ່ຜ່າແລ້ວມາສານເປັນແຜ່ນເພື່ອປູພື້ນຂົວຕໍ່ກັນ ໂດຍນຳໃຊ້ເຫຼັກຕະປູຕອກ ແລະ ຫຼວດມັດເພື່ອໃຫ້ແໜ້ນໜາຖາວອນ.

 

 

ພາຍຫຼັງສ້າງຂົວແຫ່ງນີ້ສຳເລັດ ແມ່ນຈະໄດ້ເອື້ອອຳນວຍຄວາມສະດວກໃນການໄປມາຫາສູ່, ແລກປ່ຽນສິນຄ້າ ຢ່າງສະດວກສະບາຍຫຼາຍຂຶ້ນ. ນອກຈາກນີ້, ຍັງສາມາດສ້າງລາຍຮັບເຂົ້າບ້ານຈໍານວນຫຼາຍລ້ານກີບຕໍ່ປີ ໂດຍການເກັບຄ່າບໍລິການຈາກພໍ່ຄ້າຊາວຂາຍ ທີ່ແກ່ສິນຄ້າຜ່ານຂົວດັ່ງກ່າວ. ພ້ອມນັ້ນ, ຍັງເປັນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ ແລະ ສຳພັດກັບທຳມະຊາດແກ້ງຫຼວງ ຫຼື ແກ້ງອາລ໋ອງນຳອີກ.

 

 

ທ່ານ ນາຍບ້ານ ຍັງໃຫ້ຮູ້ຕື່ມວ່າ: ຂົວແຫ່ງນີ້ຈະຖືກສ້າງຂຶ້ນໃໝ່ໃນແຕ່ລະປີ ພາຍຫຼັງສິ້ນສຸດລະດູຝົນ ເນື່ອງຈາກວ່າ ອຸປະກອນທີ່ຊາວບ້ານນຳມາເຮັດມີອາຍຸການໃຊ້ງານບໍ່ໄດ້ດົນ ໂດຍສະເພາະໄມ້ໄຜ່ທີ່ນຳມາເຮັດເປັນກະແຕະເຊື່ອມຕໍ່ຂົວ ເມື່ອຖືກຝົນກໍຈະເປ່ເພເໜົ່າໄປຕາມການເວລາ. ສະນັ້ນ, ພວກເຮົາຈຶ່ງໄດ້ສ້າງໃໝ່ໃນທຸກໆປີ ໂດຍໄດ້ເລີ່ມກໍ່ສ້າງຕັ້ງແຕ່ຕົ້ນເດືອນພະຈິກເປັນຕົ້ນມາ. ເຊິ່ງອຸປະກອນ ແລະ ວັດສະດຸສ່ວນຫຼາຍແມ່ນນຳໃຊ້ໄມ້ທີ່ມີຕາມທຳມະຊາດເປັນຕົ້ນແມ່ນ: ໄມ້ກົມຊະນິດຕ່າງໆ ເພື່ອນໍາມາເຮັດເສົາ ແລະ ຂາງຂົວ ປະມານ 5.600 ລໍາ ແລະ ໄມ້ໄລ່ 7.000 ລໍາ ຈຶ່ງຈະພຽງພໍກັບການສ້າງຂົວໃນແຕ່ລະປີ.

 

 

%d bloggers like this: