ຫົວພັນ – ເຊິນລາ ຮ່ວມຈັດງານວັດທະນະທຳ ຮັດແໜ້ນສາຍສຳພັນ

ງານວັນວັດທະນະທຳ ແລະ ທ່ອງທ່ຽວລະຫວ່າງ ແຂວງຫົວພັນ – ແຂວງ ເຊິນລາ ສສ ຫວຽດນາມ ປະຈໍາປີ 2018 ໄດ້ຈັດຂຶ້ນໃນຄໍ່າຄືນຂອງວັນທີ 5 ແລະ ໄດ້ປິດລົງໃນຄໍ່າຄືນຂອງວັນທີ 6 ພະຈິກ ຜ່ານມາ ທີ່ຫໍວັດທະນະທຳແຂວງ ໂດຍການເຂົ້າຮ່ວມຂອງທ່ານ ພູໂຊນ ທຳມະວິໄຊ ຮອງເຈົ້າແຂວງໆຫົວພັນ, ທ່ານ ຟ້າມ ວັນທຸ້ຍ, ຮອງປະທານຄະນະກຳມະການປະຊາຊົນແຂວງເຊິນລາ, ມີການນຳຂອງສອງແຂວງ, ນັກສະແດງ ແລະ ມວນຊົນຊາວເມືອງຊຳເໜືອເຂົ້າຮ່ວມ.

 

 

ການເປີດງານວັນວັດທະນະທຳ ແລະ ທ່ອງທ່ຽວສອງແຂວງຫົວພັນ – ເຊິນລາ 2018 ຢູ່ແຂວງຫົວພັນຄັ້ງນີ້ ໄດ້ມີຫຼາຍກິດຈະກຳເປັນຕົ້ນແມ່ນ ການສະແດງສິລະປະວັນນະຄະດີ, ການວາງສະແດງສິ້ນຄ້າຕ່າງໆ, ການວາງສະແດງຮູບພາບທີ່ຕິດພັນກັບການຮ່ວມມື, ແຫຼ່ງທ່ອງທ່ຽວທຳມະຊາດ, ປະຫວັດສາດ ແລະ ວິທີຊີວິດຂອງປະຊາຊົນບັນດາເຜົ່າສອງແຂວງ, ຊິມອາຫານພື້ນເມືອງ, ຫຼີ້ນກິລາພື້ນເມືອງ ແລະ ກິດຈະກຳອື່ນໆທີ່ເປັນເອກະລັກສະເພາະຂອງແຕ່ລະເຜົ່າຂອງສອງແຂວງ.

 

 

ງານໃນຄັ້ງນີ້ ຖືເປັນຂີດໝາຍໃໝ່ແຫ່ງການພົວພັນຮ່ວມມືມິດຕະພາບລະຫວ່າງສອງແຂວງ ເພື່ອເປັນການໂຄສະນາເຜີຍແຜ່ຜະລິດຕະພັນການທ່ອງທ່ຽວທີ່ເປັນທ່າແຮງບົ່ມຊ້ອນ, ບັນດາແຫຼ່ງທ່ອງທ່ຽວຕ່າງໆ, ວັດທະນະທຳຮີດຄອງປະເພນີ, ສີໄມ້ລາຍມື ແລະ ຫົວຄິດປະດິດສ້າງທີ່ເປັນເອກະລັກສະເພາະຂອງປະຊາຊົນສອງແຂວງຫົວພັນ – ເຊິນລາອອກສູ່ໂລກພາຍນອກໃຫ້ຮັບຮູ້ຢ່າງກວ້າງຂວາງ ເພື່ອເປັນການດຶງດູດນັກທ່ອງທ່ຽວທັງພາຍໃນ ແລະ ຕ່າງ ປະເທດເຂົ້າມາທ່ຽວໃຫ້ນັບມື້ຫຼາຍຂຶ້ນ. ທັງເປັນການສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ປະຊາຊົນສອງຊາດ ກໍຄືປະຊາຊົນແຂວງຫົວພັນ ແລະ ແຂວງ ເຊີນລາ ສາມາດພົວພັນຊື້ຂາຍ, ແລກປ່ຽນສິນຄ້າ ແລະ ທ່ອງທ່ຽວຢ້ຽມຢາມເຊິ່ງກັນ ແລະ ກັນສະດວກຂຶ້ນກວ່າເກົ່າ.

 

%d bloggers like this: