ວຽງໄຊ ເປີດນຳທ່ຽວຊົມຖໍ້າຊາວໜຸ່ມ ເພື່ອເຊື່ອມຊືມມູນເຊື້ອຂອງພັກ

ການເປີດນຳທ່ຽວຖໍ້າຂອງຄະນະຊາວໜຸ່ມປະຊາຊົນປະຕິວັດລາວ ໄດ້ຈັດຂຶ້ນໃນ ວັນທີ 3 ພະຈິກ 2018 ຜ່ານມາ ທີ່ເມືອງວຽງໄຊ ໂດຍການກ່າວຂອງສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ. ມີ ສະຫາຍ ຄໍາຜິວ  ວົງສະຫວັນ ຮອງເລຂາພັກແຂວງປະທານແນວລາວສ້າງຊາດ ຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ, ທ່ານເຈົ້າເມືອງໆວຽງໄຊ, ພ້ອມດ້ວຍການນຳຈາກສູນກາງຊາວໜຸ່ມ ເລຂາຊາວໜຸ່ມແຂວງທົ່ວປະເທດ ແລະ ຕົວແທນຊາວໜຸ່ມ-ເຍົາວະຊົນທົ່ວປະເທດເຂົ້າຮ່ວມ 400 ກວ່າສະຫາຍ.

 

 

ການເປີດນຳທ່ຽວຖໍ້າຊາວໜຸ່ມປະຊາຊົນປະຕິວັດລາວ ຄັ້ງນີ້ ກໍ່ເພື່ອເປັນການສຶກສາອົບຮົມຊາວໜຸ່ມ-ເຍົາວະຊົນ ໄດ້ຮຽນຮູ້ເຖິງມູນເຊື້ອຂອງພັກ, ຄວາມອົງອາດກ້າຫານຂອງບັນພະບູລຸດ, ມູນເຊື້ອການຕໍ່ສູ້, ຄວາມອົດທົນບາກບັ່ນ ແລະ ເປັນແບບຢ່າງ, ແບບແຜນວິທີເຮັດວຽກຄວາມສະຫຼາດສ່ອງໃສ ຂອງຜູ້ນຳລາວ, ປະຫວັດການ ເຄື່ອນໄຫວ ການເຕີບໃຫຍ່ຂະຫຍາຍຕົວຂອງຊາວໜຸ່ມໃນເມື່ອກ່ອນ ໂດຍມີ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ເປັນຜູ້ນຳພາ ຜ່ານຂະບວນການຕົວຈິງ ໃນການຮຽນຮູ້ປະຫວັດສາດຂອງຊາດ ປະຫວັດສາດຂອງພັກ ຂອງການປະຕິວັດຊາດປະຊາທິປະໄຕ.

 

 

ພັກເຮົາຍາມໃດກໍໄດ້ເອົາໃຈໃສ່ຊີ້ນຳ-ນຳພາ ໃຫ້ຊາວໜຸ່ມມີບົດບາດສຳຄັນຕັດສິນໄຊຊະນະ ຂອງພາລະກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຖືຊາວໜຸ່ມເປັນແຂນຂວາຂອງພັກ, ເປັນກະດູກສັນຫຼັງຂອງຊາດ, ແມ່ນກຳລັງປະຈັນບານ, ແມ່ນຜູ້ສືບທອດ ແລະ ເປັນກຳລັງຫຼັກແຫຼ່ງໃຫ້ແກ່ພັກ.

 

 ຂອບໃຈ: ຂ່າວຫົວພັນ

%d bloggers like this: