ກວ່າ 200 ແຫ່ງ ກຸ່ມໄອເອັສ ຖິ້ມສຸສານໝູ່ໄວ້ໃນປະເທດອິຣັກ

ເຈົ້າໜ້າທີ່ຂອງສະຫະປະຊາຊາດ ແລະ ລັດຖະບານອິຣັກຄົ້ນພົບສຸສານໝູ່ຫຼາຍກວ່າ 200 ແຫ່ງ ໃນເຂດພາກເໜືອ ແລະ ພາກຕາເວັນຕົກຂອງປະເທດ ເຊິ່ງເຄີຍຢູ່ພາຍໃຕ້ການຢຶດຄອງຂອງກຸ່ມໄອເອັສດົນຫຼາຍປີ.

ສໍານັກຂ່າວຕ່າງປະເທດລາຍງານຈາກນະຄອນຫຼວງແບກແດດ ປະເທດອິຣັກ ເມື່ອວັນພຸດ ທີ 7 ພະຈິກ ວ່າ ສໍານັກງານສະຫະປະຊາຊາດປະຈໍາອິຣັກ (ຢູນາມິ) ອອກລາຍງານເມື່ອວັນອັງຄານ ເລື່ອງການຄົ້ນພົບສຸສານໝູ່ຢ່າງໜ້ອຍ 202 ແຫ່ງ ໃນພາກເໜືອ ແລະ ພາກຕາເວັນຕົກຂອງປະເທດອິຣັກ ເຊິ່ງເຄີຍຢູ່ພາຍໃຕ້ການຢຶດຄອງຂອງກຸ່ມໄອເອັສ ລະຫວ່າງປີ 2014 ເຖິງ 2017.

ລາຍງານຂອງ ຢູນາມິ ລະບຸວ່າ ເຄິ່ງໜຶ່ງຂອງສຸສານໝູ່ທີ່ມີການຄົ້ນພົບຢູ່ໃນແຂວງນິເນເວ ເຊິ່ງມີເມືອງໂມຊຸລເປັນເມືອງເອກ ແລະ ກຸ່ມໄອເອັສ ເຄີຍໃຊ້ເມືອງແຫ່ງນີ້ເປັນເມືອງຫຼວງຂອງຕົນເອງ ຢ່າງໃດກໍ່ຕາມ ສຸສານໝູ່ລັກສະນະນີ້ ອາດຈະຍັງມີຢູ່ອີກພຽງແຕ່ຍັງບໍ່ໄດ້ຮັບການຄົ້ນພົບ ຂະນະທີ່ເບື້ອງຕົ້ນມີການປະເມີນສົບທີ່ຖືກຝັງລວມກັນຢູ່ພາຍໃນສຸສານອາດຢູ່ລະຫວ່າງ 6.000-12.000 ສົບ ໂດຍເຈົ້າໜ້າທີ່ຢູນາມິ ແລະ ລັດຖະບານອິຣັກສຳເລັດການສຳຫຼວດສຸສານໝູ່ໄປແລ້ວຢ່າງໜ້ອຍ 28 ແຫ່ງ ແລະ ສາມາດຂຸດສົບຂຶ້ນມາໄດ້ລວມກັນປະມານ 1.258 ສົບ.

ເຖິງວ່າ ການພິສູດເອກະລັກບຸກຄົນຂອງແຕ່ລະສົບຍັງບໍ່ໄດ້ເລີ່ມກວດສອບຂຶ້ນຢ່າງເປັນທາງການ ແຕ່ຫຼາຍຝ່າຍເຊື່ອວ່າ ຜູ້ເສຍຊີວິດຈໍານວນຫຼາຍໜ້າຈະເປັນກຸ່ມຊາວຢາຊິດີ້ ແລະ ພົນລະເມືອງ ເຊິ່ງນັບຖືສາສະໜາຄິດ ເນື່ອງຈາກເປັນ “ກຸ່ມເປົ້າຫມາຍ” ຂອງກຸ່ມໄອເອັສຕະຫຼອດໄລຍະເວລາທີ່ຢຶດຄອງພື້ນທີ່.

%d bloggers like this: