ຮອງລັດຖະມົນຕີກະຊວງສຶກສາ ເຄື່ອນໄຫວເຮັດວຽກຢູ່ແຂວງຊຽງຂວາງ

ວັນທີ 05 ພະຈິກ 2018 ນີ້ ທ່ານ ປອ. ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກີລາ ໄດ້ໄປເຄື່ອນໄຫວເຮັດວຽກຢູ່ແຂວງຊຽງຂວາງ ແລະ ໄດ້ຖືເອົາໂອກາດດັ່ງກ່າວເຂົ້າຮ່ວມພິທີມອບ – ຮັບອາຄານຮຽນຫຼັງໃໝ່ ຢູ່ໂຮງຮຽນ ມສ ພູວຽງ ແລະ ອາຄານຫໍສະໝຸດ ໂຮງຮຽນ ມສ ສໍາພັນໄຊ ເມືອງຄູນ ໂດຍມີ ທ່ານ ພອນມາລາ ວັນນາຮັກ ເຈົ້າເມືອງໆຄູນ, ທ່ານ ທອງສີ ພັນທະວົງ ຮອງຫົວໜ້າພະແນກສຶກສາທິການ ແລະ ກີລາແຂວງ ໃຫ້ກຽດຕ້ອນຮັບ ແລະ ຮ່ວມເດີນທາງເຄື່ອນໄຫວໃນຄັ້ງນີ້.

ທ່ານ ບີ ຢ່າງ ວິຊາການໜ່ວຍງານກໍ່ສ້າງ ຫ້ອງການສຶກສາທິການ ແລະ ກີລາເມືອງຄູນ ໄດ້ກ່າວລາຍງານສະພາບການກໍ່ສ້າງຕຶກອາຄານຫຼັງໃໝ່ທັງສອງໂຮງຮຽນໂດຍຫຍໍ້ ເຊິ່ງຕຶກອາຄານຮຽນຫຼັງໃໝ່ຂອງ ໂຮງຮຽນ ມສ ພູວຽງ ເປັນອາຄານຖາວອນ 01 ຫຼັງ, 02 ຊັ້ນ, ມີ 12 ຫ້ອງຮຽນ ຂະໜາດ 9,5 ແມັດ x 48,35 ແມັດ, ພ້ອມກັບຫ້ອງນໍ້າອີກ 01 ຫຼັງ 06 ຫົວວິດ ຂະໜາດ 08 ແມັດ x 04 ແມັດ, ກໍ່ດ້ວຍເບຕົງເສີມເຫຼັກ, ມຸງດ້ວຍກະເບື້ອງ, ປະກອບເຄື່ອງເຟີນີເຈີ, ໄຟຟ້າ, ລະບົບນໍ້າຄົບຊຸດ ເຊິ່ງລວມມູນຄ່າການກໍ່ສ້າງທັງໝົດ 3 ຕື້ກວ່າກີບ ໂດຍແມ່ນງົບປະມານຂອງລັດບ້ວງນໍ້າເທີນ II ປະຈໍາປີ 2017 ແລະ ໄດ້ເລີ່ມລົງມືກໍ່ສ້າງມາແຕ່ວັນທີ 27 ເມສາ 2017 ໃຊ້ເວລາ 14 ເດືອນ, ການກໍ່ສ້າງສໍາເລັດ 100% ໂດຍແມ່ນ ບໍລິສັດ ສະຖາພອນ ພັດທະນາຈໍາກັດ ເປັນຜູ້ຮັບເໝົາກໍ່ສ້າງ.

ສໍາລັບຕຶກອາຄານຫໍສະໝຸດ, ຫ້ອງການຄູ, ຫ້ອງທົດລອງ, ຫ້ອງຄອມພິວເຕີ ພ້ອມກັບຫ້ອງນໍ້າຂອງໂຮງຮຽນ ມສ ສໍາພັນໄຊ ປະກອບເປັນ 01 ຫຼັງ, 02 ຊັ້ນ, ຂະໜາດ 12 ແມັດ x 29 ແມັດ, ກໍ່ດ້ວຍເບຕົງເສີມເຫຼັກ, ມຸງດ້ວຍກະເບື້ອງ, ປະກອບເຄື່ອງເຟີນີເຈີ, ໄຟຟ້າ, ອຸປະກອນຮັບໃຊ້ຫ້ອງການຄົບຊຸດ ເຊິ່ງລວມມູນຄ່າການກໍ່ສ້າງທັງໝົດ 4 ຕື້ກວ່າກີບ ໂດຍແມ່ນງົບປະມານຂອງລັດບ້ວງນໍ້າເທີນ II ມີ 70% ແລະ ບ້ວງເງິນຂອງແຂວງ 30% ປະຈໍາປີ 2017 ແລະ ໄດ້ເລີ່ມລົງມືກໍ່ສ້າງມາແຕ່ວັນທີ 22 ມີນາ 2017 ໃຊ້ເວລາ 14 ເດືອນ, ການກໍ່ສ້າງສໍາເລັດ 100% ໂດຍແມ່ນ ບໍລິສັດ ສະຖາພອນ ພັດທະນາຈໍາກັດ ເປັນຜູ້ຮັບເໝົາກໍ່ສ້າງ.

ການກໍ່ສ້າງຕຶກອາຄານໃໝ່ທັງ 02 ຫຼັງ ຂອງ 02 ໂຮງຮຽນທີ່ກ່າວມາຂ້າງເທິງນັ້ນ ທາງບໍລິສັດຮັບເໝົາກໍ່ສ້າງໄດ້ໃຊ້ຄວາມພະຍາຍາມເອົາໃຈໃສ່ໃນການກໍ່ສ້າງຖືກຕາມຮູບແບບທຸກຂັ້ນຕອນ ແລະ ທັນຕາມກໍານົດເວລາ. ພ້ອມນັ້ນ, ອໍານາດການປົກຄອງທ້ອງຖິ່ນກໍ່ໃຫ້ຄວາມຮ່ວມມືຢ່າງສຸດກົກສຸດປາຍ ຈົນເຮັດໃຫ້ຕຶກອາຄານທັງສອງຫຼັງສໍາເລັດຕາມເປົ້າໝາຍທີ່ກໍານົດ. ຫຼັງຈາກນັ້ນ, ທາງບໍລິສັດກໍ່ສ້າງກໍ່ໄດ້ມອບອາຄານໃໝ່ທັງ 02 ຫຼັງ ໃຫ້ເຈົ້າຂອງໂຄງການ ແລະ ມອບຕໍ່ໃຫ້ອໍານາດການປົກຄອງທ້ອງຖິ່ນ ໂດຍສະເພາະໂຮງຮຽນທີ່ກ່ຽວຂ້ອງເປັນຜູ້ປົກປັກຮັກສາ ແລະ ນໍາໃຊ້ຕໍ່ໄປ.

ໂອກາດນີ້ ທ່ານ ປອ. ກອງສີ ແສງມະນີ ໄດ້ໃຫ້ກຽດໂອ້ລົມຕໍ່ອໍານາດການປົກຄອງເມືອງ ກໍ່ຄືອໍານາດການປົກຄອງທ້ອງຖິ່ນ ແລະ ພໍ່ແມ່ປະຊາຊົນ, ຄູ – ອາຈານສອນ ຕະຫຼອດຮອດລູກຫຼານນັກຮຽນທີ່ເຂົ້າຮ່ວມພິທີຄັ້ງນີ້ ເຊິ່ງທ່ານໄດ້ຍົກໃຫ້ເຫັນເຖິງຄວາມສໍາຄັນຂອງການສຶກສາ ເວລາໃດພັກ – ລັດກໍ່ໄດ້ຖືສໍາຄັນ ແລະ ນໍາໜ້າວຽກງານອື່ນບາດກ້າວໜຶ່ງ, ຄົ້ນຄວ້າທຸກເງື່ອນໄຂ ເພື່ອພັດທະນາວຽກງານສຶກສາຂອງປະເທດໃຫ້ກ້າວໄປສູ່ຄຸນນະພາບ, ທັນກັບພາກພື້ນ ແລະ ສາກົນ. ສະນັ້ນ, ຮຽກຮ້ອງໃຫ້ພໍ່ແມ່ປະຊາຊົນຈົ່ງເຂົ້າໃຈ ແລະ ພ້ອມກັນຊ່ວຍຊຸກຍູ້ສົ່ງເສີມລູກຫຼານຂອງຕົນໄປເຂົ້າໂຮງຮຽນ, ສົ່ງເສີມໃຫ້ເຂົາເຈົ້າຮຽນຈົນຈົບ ເພື່ອປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ທ່ານຍັງໄດ້ຮຽກຮ້ອງໃຫ້ຄູ – ອາຈານ, ນ້ອງຮຽນ ແລະ ພາກສ່ວນທີ່ກ່ຽວຂ້ອງຈົ່ງເອົາໃຈໃສ່ເປັນຫູເປັນຕາໃນການປົກປັກຮັກສາອາຄານໃໝ່ທັງສອງຫຼັງໃຫ້ມີຄວາມສະອາດ, ຍືນຍົງ ແລະ ນໍາໃຊ້ໄດ້ຍາວນານ, ກຸ້ມຄ່າເກີດຜົນປະໂຫຍດສູງສຸດ, ພະແນກສຶກສາທິການ ແລະ ກີລາແຂວງ ກໍ່ຄືຫ້ອງການສຶກສາທິການ ແລະ ກີລາເມືອງ ຈົ່ງໃກ້ຊິດຕິດແທດຊ່ວຍແນະນໍາໃນການບໍລິຫານຄຸ້ມຄອງໂຮງຮຽນ ເພື່ອເຮັດແນວໃດສ້າງໃຫ້ໂຮງຮຽນມີຄຸນນະພາບ ແລະ ກາຍເປັນໂຮງຮຽນຕົວແບບໃນອະນາຄົດ.

( ຂ່າວ – ຮູບ: ຄານສີສະຫວັນ ພົງພັກດີ )

%d bloggers like this: