ພະທາດສາມປາງ ສະຖານທີ່ທ່ອງທ່ຽວທີ່ຊາວເມືອງໃຫ້ການສັກກາລະບູຊາ

ພະທາດສາມປາງ ເປັນສະຖາປັດຕະຍະກຳຫີນທີ່ສ້າງຂຶ້ນໃນສະໄໝບູຮານໃນລັກສະນະແບບຂອມບູຮານ ເຊິ່ງພະທາດສາມປາງ ແມ່ນຕັ້ງຢູ່ເຂດ 4 ໂນນຍາງ ເມືອງສຸຂຸມາ ແຂວງຈຳປາສັກ ຫ່າງຈາກຕົວເມືອງສຸຂຸມາ ໄປທາງຕາເວັນຕົກສ່ຽງເໜືອ ປະມານ 13 ກິໂລແມັດ ແລະ ຫ່າງຈາກເມືອງປາກເຊ ໄປທາງຕາເວັນຕົກສ່ຽງໃຕ້ ປະມານ 72 ກິໂລແມັດ, ຈາກຄວາມເຊື່ອຖືຂອງພໍ່ແມ່ປະຊາຊົນຢູ່ເຂດດັ່ງກ່າວ ໃນທຸກໆປີ ມື້ຂຶ້ນ 15 ຄໍ່າ ເດືອນ 2 ( ເດືອນຍີ່ ) ບັນດາຊາວບ້ານ, ຊາວເມືອງຈະມີການຈັດພິທີສະເຫຼີມສະຫຼອງພະທາດສາມປາງແຫ່ງນີ້ ເຊິ່ງຖືເປັນປະເພນີທີ່ໄດ້ສືບທອດກັນມາ.

ພະທາດສາມປາງ ເປັນຜາສາດຫີນສາມຍອດ ເຊິ່ງໃນອະດີດເຄີຍຮຸ່ງເຮືອງ ແລະ ໄດ້ຫຼົ້ມສະຫຼາຍໃນຍຸກແຫ່ງອາລິຍະທຳຂອມ ເຊິ່ງຊາວຂອມບູຮານນັ້ນ ເດີມເປັນຊາດນິຍົມສາສະໜາຮິນດູ ແລະ ໄດ້ແຜ່ລາມສາສະໜານີ້ໄປດ້ວຍຮູບແບບຕ່າງໆ ບໍ່ວ່າຈະເປັນຫຼັກການປົກຄອງ, ຄະຕິ ຄວາມເຊື່ອ ແລະ ວິຖີການດຳລົງຊີບ. ດ້ວຍເຫດຫຼັກປັດໄຈນີ້ ພະທາດສາມປາງອາດຈະເປັນເທວະສະຖານ, ເປັນຕົວແທນ ຫຼື ໝາຍເຖິງພະຊີວະ, ພະວິສະນຸ ແລະ ພະພົມ ກໍ່ເປັນໄດ້.

ຕາມການບອກເລົ່າຂອງເຖົ້າແກ່ແນວໂຮມບ້ານໃນເຂດນັ້ນ ໃຫ້ຮູ້ວ່າ: ພະທາດສາມປາງເປັນພະທາດທີ່ກໍ່ສ້າງຂຶ້ນມາໃນໄລຍະສະຕະວັດທີ 12 ເຊິ່ງສ້າງບໍ່ສໍາເລັດ ໂດຍຕັ້ງລຽງກັນເທິງແທ່ນ ສັນນິຖານວ່າ ສຸພາທາ ເປັນຜູ້ສ້າງຂຶ້ນ. ຜູ້ຊ່ຽວຊານທາງບູຮານນະຄະດີໄດ້ສັນນິຖານວ່າ: ສຸພາທາ ອາດແມ່ນບຸກຄົນດຽວກັນກັບ ທິວາກາຮາປັນດິຕາ ເຊິ່ງເປັນທີ່ປຶກສາຂອງເຈົ້າຊີວິດ.

ຫີນສີລາຈາລຶກຢູ່ຕໍ່ໜ້າຫໍທີ່ມີໜັງສືຂຽນໄວ້ທັງ 4 ດ້ານ ສັນນິຖານວ່າ ມານດາຂອງພະອົງເປັນຄົນງາມ ແລະ ເປັນຜູ້ເກັ່ງທາງດ້ານອັກສອນສາດກໍ່ຄືທາງດ້ານກາບກອນ. ຫີນສີລາຈາລຶກໄດ້ບັນທຶກເຫດການດັ່ງກ່າວນັ້ນໄວ້ ເຊິ່ງເປັນຂໍ້ມູນທີ່ສຳຄັນສຳລັບນັກຊ່ຽວຊານທາງດ້ານໜັງສືຈາລຶກຫີນສີລາ ເຊິ່ງພົວພັນເຖິງປະຫວັດສາດຂະແມ ຫຼື ກຳປູເຈຍໃນປັດຈຸບັນ.

ເຖິງຢ່າງໃດກໍ່ຕາມສະຖານທີ່ແຫ່ງນີ້ຍັງເປັນປິດສະໜາ ເຊິ່ງຫາຄຳຕອບຍັງບໍ່ໄດ້ວ່າໃຜເປັນຜູ້ສ້າງກັນແທ້ ແລະ ສ້າງເພື່ອຈຸດປະສົງຫຍັງ ເພາະເປັນພຽງການບອກເລົ່າກັນມາປາກຕໍ່ປາກຜູ້ເຖົ້າຜູ້ແກ່ທີ່ອາໄສຢູ່ບໍລິເວນນັ້ນເລົ່າເທົ່ານັ້ນ, ບາງຄົນກໍ່ວ່າ: ທາດສາມປາງແມ່ນສະຖານທີ່ບູຮານທີ່ພວກຂອມສ້າງຂຶ້ນໂດຍການນຳພາຂອງສາມອ້າຍນ້ອງຜູ້ທີ 1 ຊື່ວ່າ ກຳມະລໍ, ຜູ້ທີ 2 ຊື່ວ່າ ກຳມະລິເກຍ ແລະ ຜູ້ທີ 3 ຊື່ວ່າ ກຳມະລິເມຍ ແຕ່ກໍ່ຍັງຫາສາເຫດມາສະຫຼຸບບໍ່ໄດ້ເທື່ອເຖິງປະຫວັດຄວາມເປັນມາຢ່າງແທ້ຈິງ.

ແນວໃດກໍ່ດີ, ຄວາມເກົ່າແກ່ຂອງສະຖານທີ່ໃດໜຶ່ງກໍ່ສາມາດບົ່ງບອກໄດ້ເຖິງຄວາມຈະເລີນຮັ່ງມີໃນສະໄໝກ່ອນ ແລະ ຄວາມອຸດົມສົມບູນທາງດ້ານວັດທະນະທຳ, ສິລະປະ, ການດຳລົງຊີວິດທີ່ຜູກພັນມາຈົນເຖິງເທົ່າທຸກວັນນີ້.

ປັດຈຸບັນ ພະທາດສາມປາງແຫ່ງນີ້ໄດ້ກາຍເປັນແຫຼ່ງທ່ອງທ່ຽວ ແລະ ຍັງເປັນສະຖານທີ່ປະຫວັດສາດໃຫ້ຜູ້ຄົນລຸ້ນຫຼັງໄດ້ສຶກສາຮຽນຮູ້ເຖິງປະຫວັດຄວາມເປັນມາ, ຜູ້ທີ່ໃຝ່ຫາ ຄວາມຮູ້ໄດ້ເກັບກຳຂໍ້ມູນບໍ່ວ່າຈະເປັນດ້ານວັດທະນະທໍາ, ດ້ານສິລະປະກໍາ ແລະ ອື່ນໆອີກຫຼາຍຢ່າງ ເພື່ອປົກປັກຮັກສາສິ່ງທີ່ມີຄ່ານີ້ໄວ້ ແລະ ຊ່ວຍກັນເຜີຍແຜ່ໃຫ້ນັກທ່ອງທ່ຽວໄດ້ຮູ້ວ່າປະເທດລາວກໍ່ມີສະຖານທີ່ໆເກົ່າແກ່ ແລະ ມີປະຫວັດຄວາມເປັນມາທີ່ໜ້າສົນໃຈ.

( ຮູບຈາກ: Kan Sapata )

%d bloggers like this: