ກ້າວເຂົ້າສູ່ລະດູການທ່ອງທ່ຽວແລ້ວ ລະດູໜາວປີນີ້ໄປທ່ຽວໃສດີ

ຫວິດຈາກລະດູຝົນແລ້ວກໍ່ກ້າວເຂົ້າສູ່ລະດູແລ້ງ ເຊິ່ງເປັນລະດູການທີ່ເໝາະແກ່ການໄປທ່ອງທ່ຽວ ເຊິ່ງມື້ນີ້ພວກເຮົາຈະມາແນະນໍາບາງສະຖານທີ່ທ່ອງທ່ຽວ ທີ່ເໝາະແກ່ການໄປສຳຜັດໃນໄລຍະລະດູໜາວນີ້ ເພາະຫຼາຍຄົນກໍ່ອາດບໍ່ເຄີຍໄປສຳຜັດ ຫຼື ບໍ່ເຄີຍຮູ້ວ່າສະຖານທີ່ທ່ອງທ່ຽວໃນລາວກໍ່ມີດີຫຼາຍແຫ່ງ ແລະ ອາກາດກໍ່ດີອີກດ້ວຍ ເນື່ອງຈາກຕົ້ນໄມ້ຊີວະນາໆພັນກຳລັງຂຽວສະອຸ່ມໃນການອີ່ມນໍ້າຈາກລະດູຝົນ. ດັ່ງນັ້ນ, ທຳມະຊາດແມ່ນກຳລັງງົດງາມ ປະສົມກັບໝອກໃນຍາມເຊົ້າເຮັດໃຫ້ຫຼາຍແຫ່ງເກີດມີທະເລໝອກທີ່ງົດງາມ.

ເມືອງຫຼວງພະບາງ: ເມືອງມໍລະດົກໂລກ ທຸກຢ່າງສົມບູນແບບຈົນກາຍເປັນເມືອງທີ່ຕິດອັນດັບ 10 ທີ່ໂຣແມນຕິກທີ່ສຸດໃນໂລກ, ທັງບັນຍາກາດ, ອາກາດ, ອາຄານສະຖານທີ່ສວຍງາມ, ສົດຊື່ນສະບາຍທັງກາຍ ແລະ ໃຈ ເມື່ອໄດ້ໄປທ່ຽວແລ້ວເໝືອນມີສິ່ງສະກົດຈິດເອົາໄວ້ ໃນລະດູໜາວແບບນີ້ ຖ້າຄູ່ຮັກໃດແຕ່ງດອງໃໝ່ໆບໍ່ຮູ້ຈະໄປທ່ຽວທາງໃດ ຕ້ອງມາທີ່ເມືອງມໍລະດົກໂລກແຫ່ງນີ້ ຮັບຮອງວ່າຖືກໃຈແນ່ນອນ.

ເມືອງພູຄູນ ແຂວງຫຼວງພະບາງ: ທີ່ເປັນເມືອງຕິດກັບເມືອງກາສີ ແຂວງວຽງຈັນ ເຊິ່ງປົກກະຕິແລ້ວເຂດນັ້ນຈະເປັນເນີນສູງອາກາດດີຢູ່ແລ້ວ ສົມທົບກັບໄລຍະລະດູໜາວ ຈະມີທະເລໝອກງາມໆ ແລະ ແນມເຫັນພູຜາປ່າດົງທີ່ຂຽວງາມເຫັນແລ້ວສະບາຍຕາ ແລະ ສະບາຍໃຈ ເຊິ່ງເມືອງພູຄູນແມ່ນຈະມີສະຖານທີ່ທ່ອງທ່ຽວ ດັ່ງນີ້:

ສວນສະຕໍເບີຣີ ພູຄູນ: ເຊິ່ງສວນທີ່ປູກສະຕໍເບີຣີ ແບບອໍການິກ ຫຼື ປອດສານຜິດ ເຊິ່ງທີ່ນັ້ນນອກຈາກຈະເປັນສວນສະຕໍເບີຣີແລ້ວຍັງເປັນແຫຼ່ງທ່ອງທ່ຽວເໝາະແກ່ການໄປກາງເຕັ້ນນອນຮັບລົມໜາວໃນກາງຄືນ ແລະ ຕື່ນມາເບິ່ງທະເລໝອກເມືອງລາວ ໃນຍາມເຊົ້າທີ່ເປັນສະຖານທີ່ໆນັກທ່ອງທ່ຽວພາຍໃນ ແລະ ຕ່າງປະເທດໄປຫຼາຍ ແລະ ຖ້າຫາກທ່ານໃດທີ່ຍັງບໍ່ທັນເຄີຍໄປ ຄວນຫາໂອກາດຊວນໝູ່ເພື່ອນ, ຄອບຄົວ ຫຼື ຄົນຮັກໄປສຳຜັດຈັກຄັ້ງໃນຊີວິດ.

ສາລາພູຄູນ ຫຼື ສາມແຍກເມືອງພູຄູນ ແຂວງຫຼວງພະບາງ: ໃນອະດີດເຄີຍເປັນທີ່ຕັ້ງຄ້າຍທະຫານທີ່ມີການສູ້ຮົບກັນໃນສະໄໝຕໍ່ສູ້ກູ້ຊາດ, ເປັນເຂດຍາດແຍ່ງ ແລະ ເຂດຍຸດທະສາດທີ່ສຳຄັນທາງການທະຫານທີ່ຍັງມີຮ່ອງຮອຍໃຫ້ເຫັນໃນທຸກວັນນີ້ ແຕ່ເຖິງຢ່າງໃດກໍ່ຕາມ ມາຮອດປັດຈຸບັນສະຖານທີ່ດັ່ງກ່າວໄດ້ກາຍເປັນຈຸດພັກຜ່ອນທີ່ສຳຄັນຂອງນັກທ່ອງທ່ຽວກ່ອນທີ່ຈະເດີນທາງໄປເມືອງມໍລະດົກໂລກຫຼວງພະບາງ ແລະ ທົ່ງໄຫຫີນຊຽງຂວາງ ກາຍເປັນຈຸດທີ່ດຶງດູດຜູ້ຄົນກໍ່ຄືນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ມາແວ່ຊົມກິ່ນອາຍທຳມະຊາດອັນບໍລິສຸດ ແລະ ຄວາມງາມຂອງຮຸ່ງອາລຸນວັນໃໝ່ ຫຼື ຍາມອັດສະດົງລົງແລງ.

ວັງວຽງ: ເມືອງທີ່ຂຶ້ນຊື່ຄວາມໂດ່ງດັງດ້ານສະຖານທີ່ທ່ອງທ່ຽວຂອງແຂວງວຽງຈັນ ຫຼື ທີ່ຫຼາຍຄົນເອີ້ນກັນວ່າ: ເມືອງຝຣັ່ງ ເພາະມີນັກທ່ອງທ່ຽວຕ່າງປະເທດມາທ່ຽວຫຼາຍຕະຫຼອດປີ. ດັ່ງນັ້ນ, ນອກຈາກມີສະຖານທີ່ທ່ອງທ່ຽວຫຼາຍແຫ່ງທີ່ໜ້າສົນໃຈແລ້ວອາກາດກໍ່ດີ ແລະ ບໍ່ໄກຈາກຕົວເມືອງນະຄອນຫຼວງວຽງຈັນຫຼາຍປານໃດ ແລະ ໃນເດືອນທັນວາທີ່ເປັນໄລຍະອາກາດໜາວທີ່ສຸດ ໃນ 2 – 3 ປີຜ່ານມາ ກໍ່ຈະມີການຈັດງານ VangVieng Music Fest ທີ່ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປຮ່ວມຢ່າງຫຼວງຫຼາຍ. ດັ່ງນັ້ນ, ທ່ານຄວາມຈະໄປສຳຜັດເບິ່ງວ່າບັນຍາກາດຍາມໜາວກັບຍາມຮ້ອນມັນແຕກຕ່າງກັນແນວໃດ?.

ເມືອງປາກຊ່ອງ: ເປັນດິນແດນແຫ່ງໝາກກາເຟ ຂອງແຂວງຈຳປາສັກ ນອກຈາກຈະເປັນເມືອງທີ່ມີຊື່ສຽງວ່າເປັນດິນແດນທີ່ມີກາເຟແຊບຕິດອັນດັບໂລກແລ້ວ ດິນແດນແຫ່ງນີ້ຍັງອຸດົມສົມບູນໄປດ້ວຍແຫຼ່ງທ່ອງທ່ຽວທາງທໍາມະຊາດຫຼາກຫຼາຍບ່ອນ ເປັນຕົ້ນທິວທັດທໍາມະຊາດປ່າສະຫງວນດົງຫົວສາວ, ທໍາມະຊາດດ່ານສິນໄຊ, ທໍາມະຊາດເຂດບ້ານໜອງຫຼວງດິນແດນທີ່ມີດອກກຸຫຼາບ 1.000 ປີ, ພູເທວະດາ ( ປາກພູໄຟ ) ທີ່ພົ່ນຄວາມອຸດົມສົມບູນມາສູ່ດິນແດນແຫ່ງນີ້ເມື່ອຫຼາຍລ້ານປີກ່ອນ ແລະ ແຫຼ່ງທ່ອງທ່ຽວແຫ່ງອື່ນທີ່ພ້ອມໃຫ້ທ່ານໄດ້ສຳຜັດກັບຄວາມງາມຕົວຈິງຢ່າງທີ່ທ່ານບໍ່ສາມາດຈິນຕະນາການລ່ວງໜ້າໄດ້ເລີຍ.

ບໍ່ນ້ຳຮ້ອນເມືອງຄຳ: ໜາວນີ້ຕ້ອງຫານ້ຳອຸ່ນໆແຊ່ກັນ ແລະ ຖ້າມີບໍ່ນໍ້າອຸ່ນຢູ່ໃສແລ້ວ ຫຼື ຢູ່ຕ່າງປະເທດແມ່ນສະຖານທີ່ນັ້ນຈະມີຊື່ສຽງທີ່ສຸດ ແຕ່ທ່ານບໍ່ຕ້ອງເສຍເງິນຊື້ປີ້ຍົນໄປແຊ່ນໍ້າອຸ່ນຮອດຕ່າງປະເທດ ບໍ່ນໍ້າອຸ່ນ ເມືອງຄໍາ ແຂວງຊຽງຂວາງ ນອກຈາກຈະໄດ້ເຫັນຄວາມງາມຂອງສະຖານທີ່ແລ້ວຍັງໄດ້ນອນແຊ່ນ້ຳອຸ່ນໆວັງໃຫຍ່ໆທີ່ທໍາມະຊາດເປັນຜູ້ສ້າງຂຶ້ນ ທີ່ໄດ້ແຊ່ແລ້ວຈະສະບາຍທັງຕົວ ເພາະການແຊ່ນໍ້າອຸ່ນແມ່ນຊ່ວຍໃຫ້ເລືອດລົມໄຫຼໝູນວຽນດີ.

ບໍ່ນ້ຳຮ້ອນປຸ່ງເລາະ: ທີ່ຕັ້ງຢູ່ເມືອງເມິງ ແຂວງບໍ່ແກ້ວ ຫຼາຍທ່ານອາດຈະບໍ່ຄຸ້ນຊື່ ແຕ່ຖ້າໄດ້ໄປແລ້ວຮັບຮອງວ່າບໍ່ຜິດຫວັງແນ່ນອນ ບໍ່ນ້ຳຮ້ອນແຫ່ງນີ້ຍັງຄົງຄວາມເປັນທຳມະຊາດໄວ້ຢ່າງສົມບູນ ທ່ານຈະໄດ້ເຫັນນ້ຳຮ້ອນຟົດຂຶ້ນມາຈາກບໍ່ ສາມາດຕົ້ມໄຂ່ໃຫ້ສຸກໄດ້ ຖ້າບໍ່ເຊື່ອໜາວນີ້ໃຫ້ທ່ານລອງໄປດ້ວຍຕົນເອງກໍ່ແລ້ວກັນ.

ບໍ່ນ້ຳອຸ່ນເມືອງກາສີ: ເປັນອີກສະຖານທີ່ໜຶ່ງທີ່ໜ້າສົນໃຈ ເພາະມີທີ່ຕັ້ງບໍ່ໄກຈາກນະຄອນຫຼວງວຽງຈັນ ເຊິ່ງມີສິ່ງອຳນວຍ ຄວາມສະດວກຫຼາຍຢ່າງໄວ້ບໍລິການແກ່ນັກທ່ອງທ່ຽວ, ມີບໍ່ນ້ຳອຸ່ນໃຫຍ່ໄວ້ໃຫ້ນັກທ່ອງທ່ຽວໄດ້ແຊ່. ນອກຈາກນັ້ນ, ຍັງມີຮ້ານອາຫານ ແລະ ບ່ອນພັກແຮມໄວ້ບໍລິການແບບບໍ່ຕ້ອງກັງວັນໃດໆທັງນັ້ນ.

ບັນດາສະຖານທີ່ທ່ອງທ່ຽວທີ່ນໍາສະເໜີມານັ້ນເປັນພຽງສ່ວນໜຶ່ງຂອງແຫຼ່ງທ່ອງທ່ຽວທີ່ໜ້າສົນໃຈໃນລະດູໜາວ ແລະ ເຊື່ອວ່າຫຼາຍຄົນຍັງບໍ່ເຄີຍໄປສຳຜັດ ຈຶ່ງຝາກໃຫ້ທ່ານພິຈາລະນາເພື່ອລະບຸໄວ້ໃນເປົ້າໝາຍປາຍທາງການພັກຜ່ອນຂອງທ່ານ. ສິ່ງໜຶ່ງທີ່ຢາກຢໍ້າຕື່ມນັ້ນກໍ່ຄືການກຽມພ້ອມດ້ານເຄື່ອງນຸ່ງຫົ່ມແມ່ນຢູ່ວ່າຕ້ອງການທ້າທາຍກັບຄວາມໜາວ ແຕ່ຈະດີທີ່ສຸດຫາກມີແຜນສໍາຮອງໄວ້ໃນກໍລະນີສຸຂະພາບປັບຕົວບໍ່ທັນ ຈຶ່ງບໍ່ປະເຊີນກັບບັນຫາ ຕ້ອງເພີ່ມຄ່າໃຊ້ຈ່າຍທັງໆທີ່ເຮົາມີຢູ່ແລ້ວ.

ນອກນີ້, ທາງແຂວງເໜືອສຸດຂອງປະເທດ ເຊັ່ນ: ແຂວງຜົ້ງສາລີ ດິນແດນແຫ່ງພູເຂົາທີ່ຄົນລາວສ່ວນໜ້ອຍຈະພາກັນໄປທ່ຽວ ເນື່ອງຈາກວ່າເປັນແຂວງຢູ່ເໜືອສຸດ, ເສັ້ນທາງໄກຈຶ່ງເຮັດໃຫ້ນັກທ່ອງທ່ຽວລາວບໍ່ຄ່ອຍຈະຄິດເດີນທາງໄປ ແລະ ບາງທ່ານກໍ່ບໍ່ຮູ້ຊໍ້າວ່າທີ່ແຂວງຜົ້ງສາລີ ກໍ່ມີສະຖານທີ່ທ່ອງທ່ຽວທີ່ງົດງາມຫຼາຍແຫ່ງ ແລະ ອາກາດກໍ່ດີ ເນື່ອງຈາກເປັນ      ແຂວງທີ່ຢູ່ເໜືອສຸດແລ້ວ ຍັງເປັນແຂວງທີ່ຕັ້ງຢູ່ພູສູງ ສະເລ່ຍສູງກວ່າລະດັບໜ້ານໍ້າທະເລຫຼາຍຮ້ອຍແມັດ. ດັ່ງນັ້ນ, ເມື່ອຮອດລະດູໜາວຈຶ່ງເຮັດໃຫ້ເຂດນັ້ນໜາວເຢັນທີ່ສຸດ ແຕ່ໃນຄວາມໜາວເຢັນນັ້ນນອກຈາກທ່ານຈະເຫັນວິຖີຊີວິດຂອງປະຊາຊົນ, ສວນຊາທີ່ກວ້າງຂວາງສຸດສາຍຕາແລ້ວ ພູຟ້າທີ່ເປັນສະຖານທີ່ສັກກາລະບູຊາຂອງຊາວເມືອງແລ້ວ ຢູ່ຈຸດເທິງພູຟ້າແນມໄປຍັງມີທະເລໝອກງາມໆ ແລະ ເຫັນມູມສູງຂອງເທສະບານແຂວງອີກດ້ວຍ.

ປ່າສະຫງວນພູຖະແຫຼງ: ດິນແດນແຫ່ງທະເລໝອກ ເຊິ່ງຕັ້ງຢູ່ເມືອງບຸນເໜືຶອ ແຂວງຜົ້ງສາລີ ແຂວງເໜືອສຸດຂອງປະເທດລາວ ເຊິ່ງມີໄລຍະທາງຫ່າງຈາກເທສະບານແຂວງລົງໄປທາງທິດໃຕ້ ປະມານ 30 ກິໂລແມັດ ເປັນສະຖານທີ່ທ່ອງທ່ຽວທາງທຳມະຊາດທີ່ອ້ອມຮອບດ້ວຍພູຜາປ່າໄມ້ທີ່ສະຫຼັບສັບຊ້ອນ ມີຄວາມງົດງາມຢູ່ໃນຕົວ ເຖິງວ່າໄລຍະທາງຈະໄກແດ່ ແຕ່ເມື່ອທ່ານໄດ້ໄປຮອດໄປເຖິງແລ້ວຮັບຮອງວ່າຈະບໍ່ຜິດຫວັງແນ່ນອນ.

%d bloggers like this: