ຖໍ້າຕິ່ງ ສະຖານທີ່ທ່ອງທ່ຽວທີ່ງົດງາມຂອງແຂວງຫຼວງພະບາງ

ຖໍ້າຕິ່ງ ແຫຼ່ງທ່ອງທ່ຽວທາງວັດທະນະທໍາ ແລະ ທໍາມະຊາດຂອງແຂວງຫຼວງພະບາງ ເນື່ອງຈາກເປັນຖໍ້າທີ່ມີຄວາມສວຍງາມອ້ອມຮອບໄປດ້ວຍທໍາມະຊາດ ແລະ ເປັນຖ້ຳທີ່ມີພະພຸດທະຮູບຈຳນວນຫຼາຍຮ້ອຍອົງ ພ້ອມທັງເປັນສະຖານທີ່ທ່ອງທ່ຽວທາງທຳມະຊາດອີກແຫ່ງໜຶ່ງຂອງຫຼວງພະບາງ ທີ່ນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ຄວາມສົນໃຈໄປທ່ຽວຊົມເປັນຈໍານວນຫຼວງຫຼາຍໃນແຕ່ລະປີ ໂດຍສະເພາະແມ່ນການໄປທ່ອງທ່ຽວ ແລະ ຂາບໄຫວ້ຂໍພອນ.

ຖ້ຳແຫ່ງນີ້ຕັ້ງຢູ່ທາງພາກເໜືອ ຫ່າງຈາກຕົວເມືອງຫຼວງພະບາງ ປະມານ 30 ກິໂລແມັດ, ຕັ້ງຢູ່ແຄມແມ່ນ້ຳຂອງ ແລະ ປາກແມ່ນ້ຳອູໄຫຼປ່ອງໃສ່ກັນ ຢູ່ກົງກັນຂ້າມກັບບ້ານປາກອູ. ຕາມການບອກເລົ່າກັນມາວ່າເປັນຖ້ຳທີ່ສັກກາລະທາງສາສະໜາໄດ້ເກີດຂຶ້ນຄັ້ງທຳອິດ ໂດຍຂະນະທີ່ຊາວບ້ານຊ່າລືຍັງເຊື່ອຖືຜີ ຫຼື ເທວາພິບານທຳມະຊາດຢູ່, ຖ້ຳນີ້ເຄີຍເປັນເທວາສະຖານແຫ່ງເຈົ້າທີ່ແມ່ນ້ຳ, ຕໍ່ມາກໍ່ມີກຸ່ມຄົນຍ້າຍເຂົ້າມາຕັ້ງຖິ່ນຖານໃໝ່ເປັນຄັ້ງທຳອິດເມື່ອກາງສະຕະວັດທີ VIII ຫຼັງຈາກໄດ້ຍ້າຍລົງມາຈາກພາກໃຕ້ຂອງປະເທດຈີນ ອິດທິພົນຂອງພະພຸດທະສາສະໜາກໍ່ເຜີຍແຜ່ເຂົ້າມາທ້ອງຖິ່ນແຫ່ງນີ້.

ເມື່ອຕັ້ງຖິ່ນຖານດົນພໍສົມຄວນ ມາຮອດສະຕະວັດທີ XVI ພະລາຊະວັງເມືອງລາວ ໄດ້ຊົງຖືພະພຸດທະສາສະໜາ ແລະ ພະລາດຊະອຸບປະຖຳຖ້ຳຕັ້ງແຕ່ເວລານັ້ນຈົນເຖິງປີ 1975, ທຸກໆປີຂອງປີໃໝ່ລາວ ເຈົ້າມະຫາຊີວິດໄດ້ສະເດັດໄປຍັງຖ້ຳພ້ອມຄອບຄົວ ແລະ ຊາວເມືອງຫຼວງພະບາງ ຈົນກາຍເປັນສ່ວນສຳຄັນໃນງານບຸນປີໃໝ່ລາວ.

ຕໍ່ມາພະລາສະວົງ ໄດ້ແຕ່ງຕັ້ງສິລະປະກອນໃຫ້ເຮັດຮູບຄວັດພະພຸດທະຮູບໄວ້ເປັນທີ່ສັກກາລະບູຊາ ປັດຈຸບັນມີພະພຸດທະຮູບຫຼາຍກວ່າ 4 ພັນອົງ ທີ່ເຫັນຢູ່ໃນຖ້ຳຕິ່ງ ນັ້ນແມ່ນຜູ້ມານະມັດສະການໄດ້ນຳມາຕັ້ງໄວ້ເພື່ອບູຊາ ໂດຍພະພຸດທະຮູບເຫຼົ່ານີ້ສ່ວນໃຫຍ່ແມ່ນຄວັດດ້ວຍໄມ້ ຫຼື ປັ້ນຈາກຢາງໄມ້ແປກ ແລະ ເຄືອບນ້ຳກ້ຽງສີແດງ ຫຼື ສີດຳໂອບດ້ວຍຄຳປິວ, ຮູບຄວັດບາງອົງຄວັດດ້ວຍເຂົາສັດ, ທອງສຳລິດ ແລະ ດິນເຜົາອ່ອນໆ.

ພະພຸດທະຮູບເຫຼົ່ານີ້ມີຢູ່ຫຼາຍປາງ ແລະ ໄດ້ອະທິບາຍເຖິງຂັ້ນຕອນຕ່າງໆໃນຊີວິດຂອງພະພຸດທະເຈົ້າ ເຊັ່ນ: ປາງຮຽກຝົນ, ປາງປາບມານ ແລະ ປາງສະມາທິ. ນອກນີ້, ຍັງມີຖ້ຳດ້ານລຸ່ມ ຈາກບໍລິເວນນ້ຳຂອງຈະເຫັນປາກຖ້ຳລຸ່ມຢ່າງຊັດເຈນ ມີທາງລັດໄປຫາຖ້ຳເທິງ ສູງຈາກລະດັບນ້ຳປະມານ 60 ແມັດ, ມີພະພຸດທະຮູບ ປະມານ 2.500 ອົງຢູ່ຖ້ຳລຸ່ມ.

ຈຸດທີ່ໜ້າສົນໃຈຂອງນັກທ່ອງທ່ຽວທີ່ມາທ່ຽວຖ້ຳຄື “ ແທ່ນ ” ທີ່ຢູ່ໃກ້ທາງເຂົ້າເປັນບ່ອນສັກກາລະບູຊາດອກ  ໄມ້ – ທູບທຽນ, ມີຮູບສິງປ້ອງກັນທາງເຂົ້າ ແລະ ຍັງມີປະຕິມາກຳຮູບຄວັດ   “ ພະລືສີ ” ທີ່ມາຈາກເລື່ອງ ພະລັກພະລາມ ແລະ ມີສ່ວນກ່ຽວຂ້ອງກັບສະໝຸນໄພຢູ່ເທິງທາງເຂົ້າ. ນອກນີ້, ຍັງມີໂຄງຄືໂຄງພະທາດໃຫຍ່ຕັ້ງຢູ່ເທິງ, ຊາຍສູງສຸດຍັງມີເຈດີຂະໜາດນ້ອຍຕັ້ງຢູ່, ໜ້າຜາທາງໃຕ້ຈະມີກະດູກຂອງຊາວບ້ານທີ່ເສຍຊີວິດໃນສະໄໝນັ້ນເກັບໄວ້ ແລະ ມີນ້ຳອອກບໍ່ນ້ອຍໆຢູ່ໃນຖ້ຳ ໃຊ້ເປັນນ້ຳມົນໃນການປະກອບພິທີຂອງບຸນປີໃໝ່ແຕ່ລະປີ.

ບັນດານັກທ່ອງທ່ຽວທ່ານໃດທີ່ບໍ່ເຄີຍເຫັນແຫຼ່ງທ່ອງທ່ຽວແຫ່ງນີ້ ໂດຍສະເພາະບັນດານັກທ່ອງທ່ຽວ, ທ່ານໃດທີ່ສົນໃຈຢາກຈະໄປທ່ຽວໄປຊົມ, ຂາບໄຫວ້ສັກກາລະບູຊາ ແລະ ຂໍພອນອັນປະເສີດກໍ່ສາມາດໄປກັນໄດ້ ຮັບຮອງວ່າທ່ານຈະບໍ່ຜິດຫວັງ ເພາະນອກຈາກທ່ານຈະໄດ້ທ່ຽວຊົມຖໍ້າແລ້ວ ໃນເມືອງຫຼວງພະບາງ ຍັງມີແຫຼ່ງທ່ອງທ່ຽວທີ່ໜ້າທ່ຽວຊົມອີກຫຼາກຫຼາຍແຫ່ງດັ່ງທີ່ຮູ້ກັນຢ່າງກວ້າງຂວາງວ່າ ຫຼວງພະບາງ ເມືອງມໍລະດົກໂລກ.

( ຮຽບຮຽງ: ນຸ້ມນິ້ມ; ຮູບຈາກ: ລາວລ້ານແຊລ )

%d bloggers like this: