ເມືອງຊ່ອນ ເປີດປີທ່ອງທ່ຽວລາວ 2018

ເມືອງຊ່ອນ ແຂວງຫົວພັນ ໄດ້ຈັດພິທີເປີດປີທ່ອງທ່ຽວລາວ ປີ 2018 ແລະ ງານແຂ່ງຂັນກີລາຊ່ວງເຮືອປະຈໍາປີຂຶ້ນ ເມື່ອວັນທີ 21 ຕຸລາຜ່ານມາ, ໃນງານຍັງມີການທ່ຽວຊົມງານຕະຫຼາດນັດ, ຊີມອາຫານພື້ນເມືອງຂອງ 6 ຊົນເຜົ່າຕື່ມອີກ.

ເຂົ້າຮ່ວມພິທີດັ່ງກ່າວມີ ທ່ານ ພູໂຊນ ທຳມະວິໄຊ ຄະນະປະຈຳພັກແຂວງ, ຮອງເຈົ້າແຂວງໆຫົວພັນ, ຜູ້ຊີ້ນຳຂົງເຂດວັດທະນະທຳ – ສັງຄົມ; ທ່ານ ທອງພັດ ບຸນທໍາມີ ຮອງເລຂາພັກເມືອງ, ຮອງເຈົ້າເມືອງໆຊ່ອນ ແລະ ມີແຂກຖືກເຊີນຈາກແຂວງ, ເມືອງ, ນັກກີລາ ແລະ ປະຊາຊົນບັນດາເຜົ່າເຂົ້າຮ່ວມຢ່າງຫຼວງຫຼາຍ.

ທ່ານ ບຸນຮວງ ຊ່ອນສຸພັດ ຮັກສາການຫົວໜ້າຫ້ອງການ ຖວທ ເມືອງຊ່ອນ ໄດ້ຂຶ້ນລາຍງານໃນພິທີເປີດປີທ່ອງທ່ຽວລາວ ປະຈຳປີ 2018 ແລະ ງານບຸນຊ່ວງເຮືອ ວ່າ: ເມືອງຊ່ອນ ໄດ້ກຳນົດເອົາ 4 ທ່າແຮງຕົ້ນຕໍ ເພື່ອເລັ່ງໃສ່ພັດທະນາ ເມືອງຊ່ອນ ຄື: ທ່າແຮງໃນການປູກຝັງ – ລ້ຽງສັດ, ທ່າແຮງໃນການຕໍ່າຫູກທໍໄໝ ແລະ ຈັກສານ, ທ່າແຮງທາງດ້ານການຄ້າ – ການບໍລິການທາງຜ່ານ ແລະ ທ່າແຮງໃນດ້ານການທ່ອງທ່ຽວ.

ມາຮອດປັດຈຸບັນມີແຫຼ່ງທ່ອງທ່ຽວທີ່ໄດ້ລົງສຳຫຼວດແລ້ວ 27 ແຫ່ງ. ໃນນີ້, ມີແຫຼ່ງທ່ອງທ່ຽວທາງດ້ານປະຫວັດສາດ 9 ແຫ່ງ, ດ້ານວັດທະນະທຳ 3 ແຫ່ງ ແລະ ແຫຼ່ງທ່ອງທ່ຽວທາງທຳມະຊາດ 15 ແຫ່ງ ແລະ ສະເພາະແຫຼ່ງທ່ອງທ່ຽວທາງທຳມະຊາດ 1 ແຫ່ງ ກຳລັງໄດ້ຮັບການພັດທະນານັ້ນກໍ່ຄືຕາດໂກ່ນ ຢູ່ບ້ານເມືອງເກົ້າ ໂດຍແມ່ນ ບໍລິສັດ ພູໄຊ ທ່ອງທ່ຽວ ແລະ ພັດທະນາ ຈຳກັດຜູ້ດຽວ ເປັນຜູ້ສຳປະທານ ເຊິ່ງມີເນື້ອທີ່ທັງໝົດ 2,1 ເຮັກຕາ ເຊິ່ງນອກຈາກເຂດເນື້ອທີ່ສຳປະທານແລ້ວຍັງມີເຂດອະນຸຮັກເນື້ອທີ່ 22,7 ເຮັກຕາ ເປັນເຂດທີ່ບໍ່ອະນຸຍາດໃຫ້ມີການປຸກສ້າງສິ່ງອຳນວຍຄວາມສະດວກດ້ານຕ່າງໆ, ແຕ່ສາມາດປັບປຸງບູລະນະໄດ້ດ້ວຍມູນຄ່າການລົງທຶນ 3 ຕື້ 500 ລ້ານກີບ.

ທ່ານ ວອນແສງ ເຮືອງພັນໄຊ ຫົວໜ້າຄະນະຈັດຕັ້ງເມືອງ ທັງເປັນຫົວໜ້າຄະນະຮັບຜິດຊອບຈັດງານໃນປີນີ້ ໃຫ້ຮູ້ວ່າ: ງານເປີດປີທ່ອງທ່ຽວລາວ ປີ 2018 ແລະ ແຂ່ງຂັນກີລາຊ່ວງເຮືອປະຈໍາປີນີ້ ເຫັນວ່າມີບັນຍາກາດຄຶກຄື້ນສົມຄວນ ເພາະພາຍໃນງານນອກຈາກຜູ້ເຂົ້າຮ່ວມຈະໄດ້ຮັບຊົມການແຂ່ງຂັນກີລາຊ່ວງເຮືອແລ້ວ ຜູ້ເຂົ້າຮ່ວມຍັງໄດ້ທ່ຽວຊົມງານຕະຫຼາດນັດ, ຊີມອາຫານພື້ນເມືອງຂອງ 6 ຊົນເຜົ່າຕື່ມອີກ.

ສຳລັບປີນີ້ ເຮືອເຂົ້າຮ່ວມແຂ່ງຂັນທັງໝົດ 32 ທີມ, ຍິງ 8 ທີມ ເຊິ່ງຜ່ານການແຂ່ງຂັນ ຊະນະເລີດທີມຊາຍໄດ້ແກ່ ບ້ານແລ້ງ, ຊະນະເລີດທີມຍິງ ໄດ້ແກ່ທີມບ້ານນາທົ່ງປໍ ໄດ້ຮັບຂັນໝູນວຽນຂອງທ່ານເຈົ້າເມືອງທີມລະ 1 ໜ່ວຍ, ເງິນສົດ 2,5 ລ້ານກີບ; ອັນດັບ 2 ທີມຊາຍບ້ານຊ່ອນໃຕ້, ທີມຍິງ ແມ່ນຂົງເຂດເສດຖະກິດ ໄດ້ຮັບເງິນສົດທີມລະ 2 ລ້ານກີບ; ອັນດັບ 3 ທີມຊາຍ ໄດ້ແກ່ທີມ ປກສ, ທີມຍິງ ແມ່ນທີມຂົງເຂດວັດທະນະທຳ – ສັງຄົມ ໄດ້ຮັບເງິນສົດທີມລະ 1,5 ລ້ານກີບ.

( ຂ່າວ: ງຸດ ວິໄລຄຳ )

%d bloggers like this: