ຈີດີພີຈີນ ໄຕມາດ 3 ເຕີບໂຕຊ້າສຸດນັບຕັ້ງແຕ່ປີ 2011

ຜະລິດພັນໂດຍລວມພາຍໃນປະເທດຂອງຈີນໃນໄຕມາດທີ 3 ຂອງປີນີ້ ຂະຫຍາຍຕົວທີ່ອັດຕາ 6,5% ເຖິງວ່າ “ຍັງຢູ່ໃນເປົ້າໝາຍ” ຂອງລັດຖະບານແຕ່ຖືວ່າໜ້ອຍທີ່ສຸດນັບຕັ້ງແຕ່ໄຕມາດທໍາອິດຂອງປີ 2011.

ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນທີ 19 ຕຸລາ ວ່າ ສໍານັກງານສະຖິຕິແຫ່ງຊາດຂອງຈີນ ອອກຖະແຫຼງການກ່ຽວກັບສະຖານະການທາງເສດຖະກິດຂອງປະເທດໃນໄລຍະໄຕມາດທີ 3 ຂອງປີນີ້  ລວມຍອດຜະລິດພັນພາຍໃນ (ຈີດີພີ) ຂະຫຍາຍຕົວທີ່ອັດຕາ 6,5% ເມື່ອທຽບແບບລາຍປີ ຫຼຸດລົງຈາກໄຕມາດທໍາອິດ ແລະ ໄຕມາດທີ 2ຂອງປີນີ້ ເຊິ່ງຢູ່ທີ່ 6,8% ແລະ 6,7% ຕາມລໍາດັບ ສ່ວນຄ່າສະເລ່ຍຂອງ ຈີດີພີ ຕະຫຼອດ 3 ໄຕມາດຢູ່ທີ່ 6,7%.

ເຖິງວ່າ ສະຖິຕິຈີດີພີຂອງໄຕມາດທີ 3 ປະຈໍາປີນີ້ຍັງຖືວ່າເປັນໄປຕາມເປົ້າໝາຍຂອງລັດຖະບານ ນັ້ນຄືຕ້ອງການໃຫ້ເສດຖະກິດຂອງຈີນໃນປີນີ້ຂະຫຍາຍຕົວ “ປະມານ 6,5%” ແຕ່ຖືເປັນສະຖິຕິການເຕີບໃຫຍ່ທາງເສດຖະກິດລາຍໄຕມາດຕ່່ຳທີ່ສຸດນັບຕັ້ງແຕ່ໄຕມາດທໍາອິດຂອງປີ 2011 ເຊິ່ງເປັນໄລຍະທີ່ວິກິດການເງິນໂລກມີຄວາມຮຸນແຮງທີ່ສຸດ.

ສໍາລັບການເປີດເຜີຍຂໍ້ມູນທາງເສດຖະກິດຂອງລັດຖະບານ ໃນໄຕມາດທີ 3 ຂອງປີນີ້ ເກີດຂຶ້ນໃນສະຖານະການຄວາມສໍາພັນທາງການຄ້າ ລະຫວ່າງ ອາເມຣິກາ ກັບ ຈີນ ທີ່ມີຂໍ້ພິພາດກັນຢ່າງໜັກຕັ້ງແຕ່ຕົ້ນປີນີ້ ຈາກການທີ່ທັງສອງເປັນປະເທດມະຫາອຳນາດດ້ານເສດຖະກິດ ອັນດັບ 1 ແລະ 2 ຂອງໂລກຕາມລໍາດັບຕ່າງຝ່າຍກໍ່ຕັ້ງກໍາແພງພາສີຕອບໂຕ້ກັນ.

ໂດຍມາດຕະການກໍາແພງພາສີຂອງລັດວໍຊິງຕັນໂຈມຕີມູນຄ່າສິນຄ້ານໍາເຂົ້າຈາກຈີນປະມານເຄິ່ງໜຶ່ງ ແລະ ສ່ວນຫຼາຍເປັນສິນຄ້າປະເພດເທີກໂນໂລຊີ ສ່ວນມາຕະການກໍາແພງພາສີຂອງຈີນໂຈມຕີສິນຄ້າດ້ານກະສິກຳຂອງອາເມຣິກາເປັນຫຼັກ ຢ່າງໄດກໍ່ຕາມ ສົງຄາມການຄ້າທີ່ເກີດຂຶ້ນສົ່ງຜົນກະທົບຕໍ່ຄວາມເຊື່ອໝັ້ນຂອງຜູ້ບໍລິໂພກໃນທັງສອງປະເທດ.

%d bloggers like this: