ສ້າງລາຍໄດ້ຈາກການປູກດອກໄມ້

ເສັ້ນທາງການນໍາພາຄອບຄົວທີ່ຈະກ້າວໄປສູ່ຄວາມສໍາເລັດໃນຊີວິດ ທຸກຄົນກໍ່ຕ້ອງໄດ້ດີ້ນຮົນຜ່ານຜ່າຄວາມຫຍຸ້ງຍາກ, ອຸປະສັກນາໆປະການ ຈຶ່ງຈະໄດ້ມາເຊິ່ງຄວາມສໍາເລັດໃນຊີວິດທີ່ສົມບູນພູນສຸກ.

ດັ່ງຄອບຄົວ ທ່ານ ຮ້ອຍເອກ ແສນໄຊ ພົນອາສາ ຮອງຫົວໜ້າຫ້ອງການເມືອງ ປກສ ແຂວງໄຊຍະບູລີ ໄດ້ສ້າງຄອບຄົວກັບ ນາງ ຕຸກຕາ ສີຊົມພູ ອາຊີບປະຊາຊົນ ຢູ່ບ້ານລ້ອງປໍ ເມືອງໄຊຍະບູລີ ແຂວງໄຊຍະບູລີ ໃນປີ 2001 ປັດຈຸບັນມີລູກ 02 ຄົນ ເຊິ່ງແມ່ນໜຶ່ງໃນຄອບຄົວພະນັກງານທີ່ມີຄວາມບຸກບືນໃນການສ້າງເສດຖະກິດເພີ່ມດ້ວຍການປູກດອກໄມ້ປະດັບຂາຍ, ສ້າງລາຍໄດ້ເຂົ້າຄອບຄົວເຮັດໃຫ້ຊີວິດການເປັນຢູ່ດີຂຶ້ນເປັນກ້າວໆ.

ນາງ ຕຸກຕາ ສີຊົມພູ ຜູ້ເປັນພັນລະຍາ ເລົ່າສູ່ຟັງວ່າ: ພື້ນຖານເສດຖະກິດຂອງຄອບຄົວໃນເມື່ອກ່ອນແມ່ນອາໄສແຕ່ເງິນເດືອນ, ຕິດພັນກັບການບໍລິການຕັດຜົມໃນວັນພັກການ ແລະ ເວລາວ່າງ ໂດຍລາຍຮັບສະເລ່ຍໃສ່ຫົວຄົນໜຶ່ງຢູ່ພາຍໃນຄອບຄົວເມື່ອປີ 2010 ໄດ້ພຽງ 3 ແສນກີບຕໍ່ຄົນຕໍ່ເດືອນ ຖ້າທຽບໃສ່ຄ່າຄອງຊີບໃນທ້ອງຕະຫຼາດເຫັນວ່າຊີວິດການເປັນຢູ່ພາຍໃນຄອບຄົວເກືອບໄປບໍ່ລອດ.

ຈາກຄວາມຮູ້ສຶກທີ່ໄດ້ເອົາຊີວິດຕິດພັນກັບການທໍາມາຫາກິນແບບພໍກຸ້ມ  ປາກ – ກຸ້ມທ້ອງ, ທັງສອງຜົວ – ເມຍ ຈຶ່ງໄດ້ປຶກສາຫາລືວາງແຜນໃນການສ້າງເສດຖະກິດເພີ່ມ ເພື່ອນໍາຄອບຄົວຫຼຸດພົ້ນອອກຈາກຄວາມທຸກຍາກຕາມແນວທາງ, ແຜນນະໂຍບາຍຂອງພັກ – ລັດວາງອອກ ໂດຍຖືເອົາການປູກດອກໄມ້ປະດັບທີ່ຕົນເອງຮັກ, ມັກ ແລະ ໄດ້ເອົາຊີວິດຕິດພັນມາແຕ່ຄາວຍັງນ້ອຍເປັນອາຊີບເສີມ ໂດຍອາໄສຊ່ອງວ່າງທາງດ້ານການຕະຫຼາດ ເຊິ່ງປັດຈຸບັນ ດອກໄມ້ໄດ້ກາຍເປັນທີ່ນິຍົມຂອງສັງຄົມ ເພື່ອນໍາໃຊ້ເຂົ້າໃນການປະດັບປະດາຫ້ອງປະຊຸມ, ສໍານັກງານ – ອົງການ, ສະຖານທີ່ສາທາລະນະປະໂຫຍດ ແລະ ທີ່ຢູ່ອາໄສຕ່າງໆໃຫ້ມີຄວາມສວຍສົດງົດງາມ.

ນາງ ຕຸກຕາ ກ່າວຕື່ມວ່າ: ຂັ້ນຕອນການປູກດອກໄມ້ປະດັບ ກ່ອນອື່ນແມ່ນໄດ້ກະກຽມສະຖານທີ່ໃຫ້ເໝາະສົມ ໂດຍຈັດແຈງອະນາໄມບໍລິເວນເດີ່ນບ້ານທີ່ຕິດກັບເສັ້ນທາງຫຼວງ ເພື່ອອໍານວຍຄວາມສະດວກໃຫ້ລູກຄ້າໄດ້ເຂົ້າຊົມ ແລະ ສັ່ງຊື້ໄດ້ຕະຫຼອດເວລາ.

ໃນແຕ່ລະມື້ໄດ້ມີລູກຄ້ານັບທັງລວມໝູ່ ແລະ ສ່ວນບຸກຄົນເຂົ້າມາຕິດຕໍ່ຊື້ ແລະ ເຊົ່າເພື່ອນໍາໃຊ້ປະດັບປະດາຫ້ອງປະຊຸມ, ສໍານັກງານ, ອົງການ, ສະຖານທີ່ສາທາລະນະປະໂຫຍດ, ທີ່ຢູ່ອາໄສ ແລະ ຊື້ເປັນຂອງຝາກຂອງຕ້ອນເປັນຈໍານວນຫຼວງຫຼາຍ ໂດຍຍອດຂາຍ ຫຼື ຄ່າເຊົ່າບາງຄັ້ງສູງສຸດ 2,5 ລ້ານກີບ ແລະ ຂາຍແຕ່ລະມື້ຕໍ່າສຸດສະເລ່ຍບໍ່ຫຼຸດ 1,5 ແສນກີບ ສາມາດສ້າງຍອດກໍາໄລໄດ້ສອງສ່ວນຂອງມູນຄ່າຂາຍແຕ່ລະຄັ້ງ ແລະ ອາໄສລາຍຮັບເປັນຄັງສະສົມຂອງຄອບຄົວເພື່ອໝູນໃຊ້ເຂົ້າໃນການຂະຫຍາຍກິດຈະການ ເຊັ່ນ: ຊື້ປຸ໋ຍ, ຊື້ໂຖ, ຊື້ເຄື່ອງຮັບໃຊ້ທີ່ຈໍາເປັນພາຍໃນຄອບຄົວ. ມາຮອດປັດຈຸບັນດອກໄມ້ທີ່ມີຢູ່ຕົວຈິງປະມານ 150 ກວ່າຊະນິດ ແລະ ສາມາດຂະຫຍາຍພັນແຕ່ລະຊະນິດໄດ້ຕາມຄວາມຕ້ອງການຂອງລູກຄ້າ.

ບົນພື້ນຖານເສດຖະກິດຄອບຄົວທີ່ອາໄສເງິນເດືອນ ຕິດພັນກັບການສ້າງເສດຖະກິດເພີ່ມດ້ວຍການປູກດອກໄມ້ປະດັບຂາຍມາເປັນເວລາເກືອບ 9 ປີ, ບວກກັບມູນເຊື້ອດຸໝັ່ນຂະຫຍັນພຽນ, ນໍ້າໃຈປະຢັດມັດທະຍັດໄດ້ກາຍເປັນທ່າແຮງ ແລະ ປັດໄຈສໍາຄັນເຮັດໃຫ້ຊີວິດການເປັນຢູ່ຂອງຄອບຄົວ ທ່ານ ຮ້ອຍເອກ ແສນໄຊ ພົນອາສາ ນັບມື້ໄດ້ຮັບການພັດທະນາ ແລະ ມີຄວາມສົມບູນພູນສຸກດີຂຶ້ນເປັນກ້າວໆ. ເງິນທຸກກີບທີ່ຫາສະສົມມາເປັນເວລາຫຼາຍປີ ສາມາດປຸກສ້າງເຮືອນຢູ່ອາໄສທີ່ແໜ້ນໜາຖາວອນໄດ້ 01 ຫຼັງ, ມີລົດ   ໃຫຍ່ 01 ຄັນ ແລະ ລົດຈັກ 02 ຄັນ, ມີເງິນແຮສະສົມໄວ້ຈໍານວນໜຶ່ງເພື່ອເປັນທຶນການສຶກສາໃຫ້ລູກທັງສອງຄົນມີໂອກາດໄດ້ສຶກສາຮໍ່າຮຽນຫາຄວາມຮູ້, ມີອະນາຄົດກ້າວໜ້າ ແລະ ປະກອບສ່ວນພັນທະຕໍ່ການຈັດຕັ້ງສັງຄົມຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.

ດ້ານ ທ່ານ ຮ້ອຍເອກ ແສນໄຊ ພົນອາສາ ໃຫ້ສໍາພາດວ່າ: ນັບແຕ່ຄອບຄົວລູກ – ເມຍໄດ້ເອົາຊີວິດຕິດພັນກັບການປູກດອກໄມ້ປະດັບຂາຍເປັນເວລາເກືອບເຂົ້າ 9 ປີ ເຫັນວ່າກິດຈະການດັ່ງກ່າວແມ່ນແທດເໝາະກັບສະພາບຄອບຄົວ, ສາມາດຊ່ວຍແບ່ງເບົາພາລະໃນການໃຊ້ຈ່າຍປະຈໍາວັນ. ໃນຕໍ່ໜ້ານີ້ຈະເອົາໃຈໃສ່ຊຸກຍູ້, ສົ່ງເສີມຄອບຄົວລູກ – ເມຍໃຫ້ມີວຽກເຮັດງານທໍາ ໂດຍສືບຕໍ່ຂະຫຍາຍກິດຈະການປູກດອກໄມ້ປະດັບໃຫ້ຫຼາຍກາຍເປັນສິນຄ້າ ໂດຍນໍາໃຊ້ທຸກຄວາມອາດສາມາດ, ທ່າແຮງບົ່ມຊ້ອນ, ຂະຫຍາຍພັນດອກໄມ້ແຕ່ລະຊະນິດຈັດວາງໃສ່ເນື້ອທີ່ເປົ່າວ່າງ ແລະ ນໍາໃຊ້ແຫຼ່ງທຶນຈັດຊື້ແນວພັນໃໝ່ຈາກພາຍໃນ ແລະ ຕ່າງປະເທດທີ່ໄດ້ຮັບຄວາມນິຍົມໃນທ້ອງຕະຫຼາດມາຂະຫຍາຍພັນໃຫ້ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງລູກຄ້າ ແນໃສ່ເພື່ອພັດທະນາກິດຈະການໃຫ້ມີທ່າຄົງຕົວ ແລະ ຂະຫຍາຍຕົວ, ກາຍເປັນກໍາລັງແຮງໃຫ້ແກ່ການສ້າງສາພັດທະນາເສດຖະກິດ – ຊີວິດການເປັນຢູ່ຂອງຄອບຄົວໃຫ້ຮັ່ງມີຜາສຸກເທື່ອລະກ້າວ.

[ ສີເມືອງ ໄຊຍະເວດ ]

%d bloggers like this: