6,6 ລ້ານຕື້ກີບ!!ອາເມຣິກາ ຂາດດຸນງົບປະມານສູງທີ່ສຸດໃນຮອບ 6 ປີ

ອາເມຮິກາຂາດດຸນງົບປະມານໃນປີການເງິນ 2018 ເພິ່ມເປັນ 779.000 ລ້ານໂດລາ (ກວ່າ 6,6 ລ້ານຕື້ກີບ) ຖືເປັນສະຖິຕິສູງທີ່ສຸດໃນຮອບ 6 ປີ ແລະ ປະລິມານໜີ້ສິນສາທະລະນະເພິ່ມຂຶ້ນອີກ 1 ລ້ານລ້ານໂດລາ (ກວ່າ 8,5 ລ້ານຕື້ກີບ).

ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດອາເມຣິກາ ເມື່ອວັນອັງຄານທີ 16 ຕຸລາ ວ່າ ກະຊວງການເງິນຂອງອາເມຣິກາອອກລາຍງານເມື່ອວັນຈັນວ່າ ລັດຖະບານອາເມຮິກາມີລາຍໄດ້ຕະຫຼອດປີງົບປະມານທີ່ຜ່ານມາຄື ລະຫວ່າງວັນທີ 1 ຕຸລາ 2017 ເຖິງ 30 ກັນຍາ 2018 ຢູ່ທີ່ 3,3 ລ້ານລ້ານໂດລາ (ປະມານ 28 ລ້ານຕື້ກີບ) ແຕ່ໃນເວລາດຽວກັນລາຍຈ່າຍລັດຖະບານພັດສູງຫຼາຍກວ່າ ຄື 4,1 ລ້ານລ້ານໂດລາ (ປະມານ 35 ລ້ານຕື້ກີບ) ເພິ່ມຂຶ້ນ 3,2% ຈາກປີງົບປະມານກ່ອນໜ້ານີ້.

ສະຖິຕິດັ່ງກ່າວໝາຍຄວາມວ່າ ສະຖານະການເມື່ອປີຜ່ານມາ ເປັນອີກຄັ້ງທີ່ງົບປະມານຂອງປະເທດຢູ່ໃນພາວະຂາດດຸນ ດ້ວຍສ່ວນຕ່າງ 779.000 ລ້ານໂດລາ (ກວ່າ 6,6 ລ້ານຕື້ກີບ) ເພິ່ມຂຶ້ນ 17% ຈາກປີງົບປະມານແລ້ວນີ້ ຖືເປັນຕົວເລກການຂາດດຸນງົບປະມານປະຈຳປີສູງທີ່ສຸດໃນຮອບ 6 ປີ ຄິດເປັນ 3,9% ຂອງຜະລິດຕະພັນລວມທັງໝົດຂອງປະເທດ (GDP) ໃນຂະນະທີ່ສັດສ່ວນການຂາດດຸນງົບປະມານປີ 2016/2017 ຄິດເປັນ 3,5% ຂອງ GDP ອີກທັງຍັງເປັນສັດສ່ວນການຂາດດຸນງົບປະມານເມື່ອທຽບກັບ GDP ໃນລະດັບທີ່ສູງກວ່າ 3,2% ຕະຫຼອດໄລຍະ 40 ປີຜ່ານມາ.

 

ນອກຈາກນີ້ ລາຍງານຂອງກະຊວງການເງິນຂອງອາເມຣິກາຍັງລະບຸເຖິງ ປະລິມານໜີ້ສາທາລະນະຂອງປະເທດເພິ່ມຂຶ້ນອີກ 1 ລ້ານລ້ານໂດລາ (ກວ່າ 8,5 ລ້ານຕື້ກີບ) ໃນຮອບປີງົບປະມານທີ່ຜ່ານມາ ເປັນ 15,75 ລ້ານລ້ານໂດລາ (ປະມານ 134 ລ້ານຕື້ກີບ) ສົ່ງຜົນໃຫ້ລາຍຈ່າຍດອກເບ້ຍໜີ້ລັດຖະບານເພິ່ມຂຶ້ນເປັນ 14% ເທົ່າກັບ 65 ພັນລ້ານໂດລາ (ປະມານ 554.000 ຕື້ກີບ).

ທັງນີ້ ມີການວິເຄາະວ່າ ປະລິມານການຂາດດຸນງົບປະມານທີ່ເພິ່ມຂຶ້ນເປັນຜົນມາຈາກການເກັບລາຍໄດ້ຈາກພາສີບໍ່ເປັນໄປຕາມເປົ້າໝາຍ ໂດຍ ປະທານາທິບໍດີໂດນັລ ທຣຳ ຕັ້ງເປົ້າຫຼຸດພາສີໃຫ້ໄດ້ 1,5 ລ້ານລ້ານໂດລາ (12 ລ້ານຕື້ກີບ) ໃນໄລຍະ 10 ປີຂ້າງໜ້າເພື່ອກະຕຸ້ນເສດຖະກິດ ແຕ່ຍັງບໍ່ໄດ້ເປົ້າໝາຍ 3,1% ທີ່ທະນາຄານກາງອາເມຣິກາ (FED: Federal Reserve (System)) ກຳນົດໄວ້.

ຂະນະທີ່ ລາຍຈ່າຍດ້ານການທະຫານຂອງອາເມຣິກາເພິ່ມຂຶ້ນ 6% ເປັນ 32 ພັນລ້ານໂດລາ (272.000 ຕື້ກີບ) ແຕ່ງົບປະມານດ້ານການສຶກສາຫຼຸດລົງຫຼາຍເຖິງ 43% ເຫຼືອ 48 ພັນລ້ານໂດລາ (ປະມານ 409.000 ຕື້ກີບ).

ອັດຕາແລກປ່ຽນອ້າງອິງຈາກ: th.exchange-rates

%d bloggers like this: