ລາຄາເຂົ້າໜຽວອ່ອນຕົວລົງຫຼັງເຂົ້ານາປີເລີ່ມອອກສູ່ທ້ອງຕະຫຼາດ

ໃນໄລຍະ 2 – 3 ອາທິດຜ່ານມາ ລາຄາເຂົ້າໜຽວໃນທ້ອງຕະຫຼາດເລີ່ມອ່ອນຕົວລົງແນ່ແລ້ວ ເນື່ອງຈາກເຂົ້າໃໝ່ນາປີຂອງປະຊາຊົນເລີ່ມອອກສູ່ທ້ອງຕະຫຼາດ, ສ່ວນລາຄາເຂົ້າຈ້າວຍັງບໍ່ມີທ່າທີປັບລົງ.

ທ່ານ ທອງສະຫວັນ ມີບຸນ ປະທານ ບໍລິສັດ ພັນເພັດ ພັດທະນາກະສິກຳຈຳກັດຜູ້ດຽວໃຫ້ຮູ້ວ່າ: ປັດຈຸບັນທ່າອ່ຽງລາຄາເຂົ້າໜຽວໃນທ້ອງຕະຫຼາດເລີ່ມອ່ອນຕົວລົງສູ່ສະພາບປົກກະຕິ ເນື່ອງຈາກເຂົ້າໃໝ່ຂອງຊາວນາເລີ່ມອອກສູ່ທ້ອງຕະຫຼາດແລ້ວ, ສໍາລັບເຂົ້າຂອງບໍລິສັດພວກເຮົາກໍ່ເກັບກ່ຽວແລ້ວ 40% ຂອງເນື້ອທີ່ ເຊິ່ງຄາດວ່າຈະໃຫ້ສາມາດເກັບກ່ຽວໃຫ້ແລ້ວໃນໄວໆນີ້ ເພື່ອຈະໃຫ້ສາມາດລົງມືໃນການທໍາການຜະລິດເຂົ້ານາແຊງໃນຕົ້ນເດືອນພະຈິກ ທີ່ຈະມາເຖິງ.

ທ່ານໃຫ້ຮູ້ວ່າ: ປີນີ້ມີເຫດການໄພທໍາມະຊາດເກີດຂຶ້ນຫຼາຍໃນຂອບເຂດທົ່ວປະເທດສົ່ງຜົນກະທົບຕໍ່ການຜະລິດເຂົ້ານາປີ, ສະເພາະປີນີ້ລາຄາເຂົ້າມີການເໜັງຕີງຂຶ້ນສູງຫຼາຍໃນຮອບຫຼາຍປີ ເຊິ່ງລາຄາເຂົ້າເປືອກໃນໄລຍະເດືອນກໍລະກົດ – ເດືອນກັນຍາ ພົບວ່າລາຄາເຂົ້າເປືອກທີ່ຂາຍ 3.500 ກີບຕໍ່ກິໂລ ຈາກປົກກະຕິ 2.500 ກີບຕໍ່ກິໂລ, ສ່ວນເຂົ້າຈ້າວແມ່ນບໍ່ມີຂາຍຕ້ອງນໍາເຂົ້າເພື່ອມາດຸນດ່ຽງ.

ສໍາລັບ ບໍລິສັດ ພັນເພັດ ໃນປີນີ້ຈະເພີ່ມການຜະລິດເຂົ້ານາແຊງໃຫ້ໄດ້ 1 ພັນກວ່າເຮັກຕາ ໂດຍໃນເນື້ອທີ່ຂອງບໍລິສັດເອງ ແລະ ການຮ່ວມມືກັບປະຊາຊົນພາຍໃນເມືອງຫາດຊາຍຟອງ. ທັງນີ້, ກໍ່ຕ້ອງໄດ້ເບິ່ງຄວາມອາດສາມາດໃນການ ສະໜອງນໍ້າຊົນລະປະທານ.

ສ່ວນທິດທາງລາຄາເຂົ້າໃນປີ 2019 ຈາກປະສົບການໃນການດຳເນີນທຸລະກິດກະສິກໍາ 30 ກວ່າປີ ເຊິ່ງທ່ານໃຫ້ຮູ້ວ່າ: ເນື່ອງຈາກຫຼາຍທ້ອງຖິ່ນໄດ້ຮັບຜົນກະທົບໄພທໍາມະຊາດ, ເນື້ອທີ່ນາປະຊາຊົນໄດ້ຮັບຄວາມເສຍຫາຍກໍ່ຈະກະທົບລາຄາຊື້ – ຂາຍເຂົ້າໃນທ້ອງຕະຫຼາດ, ແຕ່ກໍ່ຢູ່ໃນເກນທີ່ລັດຖະບານຈະສາມາດຄຸ້ມຄອງກົນໄກການຊື້ – ຂາຍໄດ້ ເນື່ອງຈາກພວກເຮົາມີຄັງແຮເຂົ້າ, ຖ້າຫາກລາຄາມີການປັບຂຶ້ນສູງລັດຖະບານກໍ່ນໍາເຂົ້າມາຈໍາໜ່າຍໃນທ້ອງຕະຫຼາດ. ພ້ອມກັນນັ້ນ, ລັດຖະບານກໍ່ໄດ້ມີແຈ້ງການ ເລກທີ 1265/ອຄ.ກຄພນ ອອກມາເພື່ອຕັດວົງຈອນການເກັບຊື້ເຂົ້ານອກລະບົບ ເພື່ອຮັກສາສະຖຽນລະພາບລາຄາຂາຍເຂົ້າຈາກຊາວນາ ແລະ ລາຄາຂາຍເຂົ້າໃນທ້ອງຕະຫຼາດປີ 2019 ບໍ່ໃຫ້ເໜັງຕີງສູງ.

ກ່ອນໜ້ານີ້ ທີມຂ່າວ ເສດຖະກິດ – ການຄ້າ ໄດ້ສໍາພາດ ທ່ານ ນາງ ບຸນຮຽງ ພົມມີໄຊ ເຈົ້າຂອງໂຮງສີເຂົ້າ ບຸນຮຽງກ່າວວ່າ: ລາຄາເຂົ້າຈ້າວປີນີ້ອາດຈະມີທ່າອ່ຽງສູງ ເນື່ອງຈາກວ່າເຂົ້າຈ້າວຈໍານວນໜຶ່ງຂອງປະຊາຊົນໄດ້ຮັບຜົນກະທົບຈາກໄພພິບັດ. ພ້ອມດຽວກັນນັ້ນ, ປະຊາຊົນບໍ່ນິຍົມປູກເຂົ້າຈ້າວໃນລະດູນາແຊງເພາະບໍ່ໄດ້ຄຸນນະພາບ.

ຢ່າງໃດກໍ່ຕາມ, ທີມຂ່າວ ເສດຖະກິດ – ການຄ້າ ໄດ້ລົງຕິດຕາມສະພາບລາຄາຂາຍເຂົ້າໃນທ້ອງຕະຫຼາດ ພົບວ່າລາຄາເຂົ້າທີ່ຂາຍມີຫຼາຍລາຄາທີ່ແຕກຕ່າງກັນອີງໃສ່ຄຸນນະພາບ, ຊະນິດເຂົ້າ ເຊິ່ງສັງລວມໄດ້ ຄື: ເຂົ້າຈ້າວມະລິ ລາຄາ 120.000 – 130.000 ຕໍ່ໝື່ນ, ເຂົ້າຈ້າວໄຮ່ 90.000 – 100.000 ຕໍ່ໝື່ນ, ເຂົ້າຈ້າວຫັດ 70.000 ຕໍ່ໝື່ນ, ສ່ວນລາຄາເຂົ້າໜຽວແມ່ນຂາຍຕາມລາຄາເລີ່ມແຕ່ 75.000 – 90.000 ກີບຕໍ່ໝື່ນ.

ຂໍ້ມູນຄະນະກໍາມະການສະເພາະກິດແກ້ໄຂໄພພິບັດລະດັບຊາດ ເຜີຍໃຫ້ຮູ້ວ່າ: ເນື້ອທີ່ນາໃນປີ 2018 ຖືກຜົນກະທົບເສຍຫາຍທັງໝົດ 114.434 ເຮັກຕາ, ສ່ວນແຂວງທີ່ໄດ້ຮັບຜົນກະທົບຫຼາຍກວ່າໝູ່ແມ່ນແຂວງຄໍາມ່ວນ, ສະຫວັນນະເຂດ, ບໍ່ແກ້ວ, ບໍລິຄໍາໄຊ ແລະ ນະຄອນຫຼວງວຽງຈັນ.

 

[ ຂ່າວ: ພຸດຕີ້; ຮູບ: ສຸກສະຫວັນ ]

%d bloggers like this: