ອັງກິດຢຶດຊັບສາວຄົນໜຶ່ງຫຼັງພົບເຫັນການໃຊ້ຈ່າຍຢ່າງຟຸມເຟືອຍ

ສາວຈາກປະເທດອາເຊີໄບຈານ ທີ່ໃຊ້ເງິນປະມານ 16 ລ້ານປອນ (ປະມານ 180 ຕື້ກີບ) ຊື້ເຄື່ອງປະດັບ, ເຄື່ອງດື່ມວາຍ ແລະ ສິນຄ້າອື່ນໆ ຈາກຫ້າງແຮຣັອດ ໃນນະຄອນຫຼວງລອນດອນ ໄລຍະ 10 ປີ ຜ່ານມາ ກາຍເປັນເປົ້າໝາຍຄົນທຳອິດຂອງກົດລະບຽບໃໝ່ຂອງປະເທດອັງກິດ  ທີ່ອະນຸຍາດໃຫ້ເຈົ້າໜ້າທີ່ຢຶດອາຍັດເງິນທີ່ຕ້ອງສົງໄສວ່າໄດ້ມາຈາກການທຸຈະລິດ.

ສຳນັກຂ່າວເອພີລາຍງານຈາກນະຄອນຫຼວງລອນດອນ ປະເທດອັງກິດ ເມື່ອວັນທີ 10 ຕຸລາ ວ່າ ສານອັງກິດ ໃນລອນດອນມີຄຳສັ່ງໃຫ້ນາງ ຊາມິຣາ ອາຈິເຍວາ ອາຍຸ 55 ປີ ຊີ້ແຈງແຫຼ່ງທີ່ມາຂອງເງິນ ເຊິ່ງລາວໄດ້ນຳເງິນຈຳນວນອີກ 11,5 ລ້ານປອນ (ປະມານ 129 ຕື້ກີບ) ຊື້ເຮືອນຫຼັງໜຶ່ງໃນນະຄອນຫຼວງລອນດອນ ໃກ້ກັບຫ້າງແຮຣັອດ ແລະ ຊື້ສະໜາມກັອຟນອກເມືອງດ້ວຍລາຄາ 10,5 ລ້ານປອນ (118 ຕື້ກີບ).

ຜົວຂອງນາງ ຮາຈິເຍວາ ຄື ທ້າວ ຈາຮານກີ ຮາຈິເຍວາ ອາດີດປະທານທະນາຄານ ອິນເຕີເນຊັ່ນແນລ ແບງ ອາເຊີໄບຈານ (International Bank of Azerbaijan) ເຊິ່ງປັດຈຸບັນຕິດໂທດຈຳຄຸກຢູ່ທີ່ປະເທດອາເຊີໄບຈານ ເປັນເວລາ 15 ປີ ເລິ່ມຕັ້ງແຕ່ປີ 2016 ຈາກຄວາມຜິດທຸຈະລິດຊັບ ແລະ ສໍ້ໂກງ.

ກໍລະນີຂອງນາງ ຮາຈິເຍວາ ຖືວ່າເປັນຄັ້ງທຳອິດທີ່ອັງກິດບັງຄັບໃຊ້ກົດໝາຍທີ່ຮ້ອງວ່າ “ກົດຄວາມລ່ຳລວຍທີ່ບໍ່ສາມາດອະທິບາຍໄດ້ (Unexplained Wealth Orders)” ທີ່ບັງຄັບໃຊ້ໃນປີນີ້ ເພື່ອຄວບຄຸມສະຖານະຂອງນະຄອນຫຼວງລອນດອນທີ່ເຄີຍມີຊື່ສຽງວ່າເປັນພື້ນທີ່ປອດໄພສຳລັບພວກໂກງທຸຈະລິດ ເຊິ່ງກົດໝາຍໃໝ່ອະນຸຍາດໃຫ້ເຈົ້າໜ້າທີ່ສາມາດອາຍັດຊັບສິນມູນຄ່າຫຼາຍກວ່າ ຕັ້ງແຕ່ 50 ພັນປອນ ຈາກປະຊາຊົນທີ່ຕ້ອງສົງໄສວ່າ ມີການຄໍຣັບຊັ່ນ ຫຼື ກ່ຽວພັນກັບອົງກອນອາຊາຍາກຳ ຈົນກວ່າເຈົ້າຂອງຊັບສິນຈະສາມາດຊີ້ແຈງການໄດ້ມາໂດຍສຸຈະລິດ.

ໃນລະຫວ່າງການໄຕ່ສວນໃນສານນັດທີ່ແລ້ວ ນາງຮາຈິເຍວາ ຖືກລະບຸຊື່ສົມມຸດວ່າ ນາງ ເອ ແຕ່ສານມີຄຳສັ່ງຍົກເລີກການປິດບັງຊື່ຂອງລາວເມື່ອວັນພຸດຜ່ານມາ ແລະ ການໄຕ່ຄັ້ງຜ່ານມາ ທະນາຍຄວາມຂອງສຳນັກງານອາຊາຍາກຳແຫ່ງຊາດ (NCA: National Crime Agency) ຂອງອັງກິດ ເບີກຄວາມລະອຽດກ່ຽວກັບການໃຊ້ຈ່າຍຂອງນາງຮາຈິເຍວາ ທີ່ຫ້າງແຮຣັອດ ໂດຍໃຊ້ບັດເຄຣດິດ 35 ໃບ ທີ່ອອກໃຫ້ໂດຍທະນາຄານທີ່ຜົວຂອງລາວເຄີຍເຮັດວຽກ ລະຫວ່າງປີ 2006-2016 ລາວໃຊ້ເງິນຊື້ເຄື່ອງຈາກຫ້າງແຮຣັອດຫຼາຍກວ່າ 16 ລ້ານປອນ ໃນຈຳນວນນີ້ລວມເຖິງ 100.000 ປອນ (ປະມານ 1 ຕື້ກີບ) ໃນມື້ດຽວສຳລັບຊື້ເຄື່ອງປະດັບຂອງຄາເທຍ ອີກ 150.000 ປອນ (ປະມານ 1,5 ຕື້ກີບ) ຊື້ເຄື່ອງປະດັບຂອງບູເຊີຣອງ ແລະ ອີກ 1.800 ປອນ ຊື້ເຄື່ອງດື້ມໄວນ໌.

NCA ກ່າວວ່າ ການໃຊ້ຈ່າຍຢ່າງຫຼູຫຼາຟຸມເຟືອຍຂອງນາຮາຈິເຍວາ ເປັນສັນຍານບົ່ງບອກວ່າເງິນທີ່ໄດ້ມາໃນທາງທີ່ຜິດ. ແຕ່ທາງດ້ານ ນາງຮາຈິເຍວາ ປະຕິເສດວ່າບໍ່ໄດ້ກະທຳຜິດໃດໆ ແລະ ພະຍາຍາມຕໍ່ສູ້ເພື່ອໃຫ້ສານກັບຄຳສັ່ງ ແລະ ໄດ້ຊັບສິນທີ່ຖືກອາຍັດກັບຄື້ນມາ.

%d bloggers like this: