ສົງຄາມການຄ້າ ອາເມຣິກາ – ຈີນ ສ້າງຜົນກະທົບເສດຖະກິດໂລກຢ່າງຕໍ່ເນື່ອງ

ລາຍງານວິເຄາະສະບັບຫຼ້າສຸດຂອງກອງທຶນການເງິນລະຫວ່າງປະເທດ(ໄອເອັມເອັຟ) ລະບຸວ່າ ການຕັ້ງກຳແພງພາສີຕອບໂຕ້ກັນ ລະຫວ່າງ ອາເມຣິກາ ກັບ ຈີນ ສົ່ງຜົນກະທົບຕໍ່ທິດທາງການເຕີບໂຕຂອງເສດຖະກິດໂລກ ເຊິ່ງຂະຫຍາຍຕົວຊ້າລົງເຫຼືອ 3,7% ທັງປີນີ້ ແລະ ປີໜ້າ.

ສຳນັກຂ່າວຕ່າງປະເທດລາຍງານຈາກເມືອງເດນປາຊາ ປະເທດອິນໂດເນເຊຍ ເມື່ອວັນທີ 9 ຕຸລາ ວ່າ ກອງທຶນເງິນລະຫວ່າງປະເທດ (IMF:International Monetary Fund) ອອກລາຍງານວິເຄາະສະຖານະການເສດຖະກິດໂລກປະຈຳໄຕມາດສຸດທ້າຍຂອງປີນີ້ ລະຫວ່າງການປະຊຸມປະຈຳປີຂອງໄອເອັມເອັຟ ແລະ ທະນາຄານໂລກ (World Bank) ທີ່ເກາະບາຫຼີ ປະເມີນການເຕີບໂຕຂອງເສດຖະກິດໂລກ ຢູ່ທີ່ 3,7% ທັງປີນີ້ ແລະ ປີໜ້າ ຫຼຸດລົງຈາກການຄາດການໃນລາຍງານເມື່ອເດືອນກໍລະກົດ ເຊິ່ງລະບຸໄວ້ທີ່ 3,9% ສຳລັບ 2 ປີ.

ທັງນີ້ ປັດໄຈ ທີ່ສົ່ງຜົນກະທົບກໍ່ການປັບຫຼຸດທ່າອ່ຽງການຈະຫຍາຍຕົວຂອງເສດຖະກິດຕາມທັດສະນະຂອງໄອເອັມເອັຟ ຍັງລວມເຖິງການຕັ້ງກຳແພງພາສີຕອບໂຕ້ກັນ ລະຫວ່າງ ອາເມຮິກາ ກັບ ຈີນ ເຊິ່ງໄອເອັມເອັຟ ຢ້ຳວ່າຈະສົ່ງຜົນກະທົບເປັນຕ່ອງໂສ້ໄປທົ່ວໂລກ ຕົວເລກທາງເສດຖະກິດຂອງກຸ່ມ 19 ປະເທດສະມາຊິກໂຊນເອີຣົບຫຼຸດລົງ, ພາວະຊະລໍຕົວ, ນະໂຍບາຍອາເບະໂນມິກ ແລະ ການເພິ່ມອັດຕາດອກເບ້ຍນະໂຍບາຍແບບກ້າວກະໂດດຂອງກຸ່ມຕະຫຼາດເກີດໃໝ່ຫຼາຍປະເທດ ເພື່ອຫວັງຫຼຸດຜ່ອນຄວາມຜັນຜວນຂອງເງິນທຶນໄຫຼອອກ ໂດຍສະເພາະປະເທດອັກຊັງຕິນ, ບຣາຊິລ, ຕັວກກີ ແລະ ອາຟຣິກາໃຕ້.

ລາຍງານວິເຄາະຂອງໄອເອັມເອັຟ ຍັງລະບຸວ່າ ຜົນກະທົບຈາກສົງຄາມການຄ້າ ລະຫວ່າງອາເມຣິກາ ກັບ ຈີນ ຈະແກ່ຍາວໄປຈົນເຖິງປີໜ້າ ສົ່ງຜົນຕໍ່ແນວໂນ້ມການຂະຫຍາຍຕົວຂອງເສດຖະກິດອາເມຣິກາ ເຊິ່ງຈະຫຼຸດລົງຈາກ 2,7% ລົງມາຢູ່ທີ່ 2,5% ແລະ ຂອງຈີນຈາກ 6,4% ລົງມາເປັນ 6,2% ຢ່າງໃດກໍ່ຕາມ ຄາດການການເຕີບໂຕທາງເສດຖະກິດຂອງອາເມຣິກາ ແລະ ຈີນໃນປີນີ້ຍັງບໍ່ປ່ຽນແປງ ນັ້ນຄືຢູ່ທີ່ 2,9% ແລະ 6,6% ຕາມລຳດັບ.

ຂະນະທີ່ສະຖານະການເສດຖະກິດຂອງກຸ່ມ “ອາຊຽນ” ທີ່ໝາຍເຖິງ ອິນໂດເນເຊຍ, ມາເລເຊຍ, ຟີລິບປິນ, ສິງປະໂປ ແລະ ໄທ ຄາດວ່າຈະເຕີບໂຕທີ່ລະດັບ 5,6 ໃນປີນີ້ ແລະ 5,2 ໃນປີ 2019.

%d bloggers like this: