ທີມຊາດລາວ ຊຸດໃຫຍ່ ຕ້ານຟີລິບປິນ ບໍ່ໄຫວ ນັດສັ່ງລາລາຍການ ບັງກລາເທດ ໂກລ ຄັບ 2018

ທີມຊາດລາວ ຊຸດໃຫຍ່ ລົງສະໜາມນັດທີ 2 ເພື່ອລຸ້ນໂອກາດເຂົ້າຮອບ ແຕ່ບໍ່ສາມາດຕ້ານທານ ຟີລິບປິນໄດ້ ເສຍໄປ 1 – 3 ເມື່ອວັນທີ 3 ຕຸລາ 2018 ໃນການແຂ່ງຂັນ ບັງກລາເທດ ໂກລ ຄັບ 2018 ( Bangabandhu Gold Cup International Tournament 2018 ) ທີ່ປະເທດບັງກລາເທດ ລະຫວ່າງວັນທີ 1 – 12 ຕຸລາ 2018 ຕົກຮອບຢ່າງເປັນທາງການ.

ການແຂ່ງຂັນລາຍການນີ້ຈັດຂຶ້ນລະ ຫວ່າງວັນທີ 1 – 12 ຕຸລາ 2018 ເຊິ່ງມີ 6 ປະເທດເຂົ້າຮ່ວມ ແບ່ງອອກເປັນ 2 ກຸ່ມ ໂດຍກຸ່ມ A ປະກອບມີ: ເນປານ, ປາແລັສຕິນ ແລະ ທາຈິກິດສະຖານ; ສ່ວນ ກຸ່ມ B ປະກອບມີ: ບັງກລາເທດ, ລາວ ແລະ ຟີລິບປິນ ເຊິ່ງຮູບແບບການແຂ່ງຂັນແມ່ນຈະຄັດເອົາອັນດັບ 1 ແລະ 2 ຂອງກຸ່ມຜ່ານເຂົ້າສູ່ຮອບຮອງຊະນະເລີດ.

ກ່ອນໜ້ານີ້ທີມຊາດລາວ ເສຍໃຫ້ເຈົ້າພາບໄປຫວຸດຫວິດ 1 – 0 ເຮັດໃຫ້ສະຖານະການທີມຊາດລາວ ລຸ້ນເຂົ້າຮອບລໍາບາກ ເພາະຕ້ອງຊະນະສະຖານດຽວໃນນັດສຸດທ້າຍທີ່ຕ້ອງພົບກັບ ຟີລິບປິນ ໃນວັນທີ 3   ຕຸລາ 2018 ເພື່ອລຸ້ນໂອກາດເຂົ້າຮອບ.

ການແຂ່ງຂັນນັດທີ 2 ຂອງທີມຊາດລາວ ປະກົດວ່າເປັນ ຟີລິບປິນ ທີ່ຫຼິ້ນໄດ້ດີ ກວ່າ ກ່ອນຈະມາໄດ້ຈຸດໂທດໃນນາທີໆ 44 ແລະ ເປັນ Jovin Bedic ຮັບໜ້າທີ່ຍິງເຂົ້າໄປ ຈົບເຄິ່ງເວລາທໍາອິດ ຟີລິບປິນ ຂຶ້ນນໍາ   1 – 0; ສ່ວນເຄິ່ງເວລາທີ 2 ຟີລິບປິນ ຍັງຫຼິ້ນໄດ້ເໜືອກວ່າ ຍິງເພີ່ມອີກ 2 ປະຕູ ນໍາຫ່າງເປັນ 3 – 0 ຈາກການຍິງຂອງ Augustine Gayoso ໃນນາທີໆ 53 ແລະ Misagh Bahadoran ໃນນາທີໆ 82 ຈາກຈັງຫວະຈຸດໂທດ ກ່ອນທີ່ ພິທັກ ກອງມາທິລາດ ຈະມາຍິງປະຕູຕີໄຂ່ແຕກໃຫ້ກັບທີມຊາດລາວ ໄລ່ມາເປັນ 1 – 3 ຈາກຈຸດໂທດໃນນາທີໆ 88 ຈົບການແຂ່ງຂັນ ຟີລິບປິນ ເອົາຊະນະໄປ 3 – 1.

ຈາກຜົນດັ່ງກ່າວສົ່ງຜົນໃຫ້ທີມຊາດລາວ ລົງສະໜາມ 2 ນັດ ເສຍລວດ ບໍ່ມີຈັກຄະແນນ ຕົກຮອບເປັນທີ່ແນ່ນອນແລ້ວ; ສ່ວນ ຟີລິບປິນ ກອດຄໍເຈົ້າພາບເຂົ້າຮອບຮອງຊະນະເລີດຈາກການມີ 3 ຄະແນນເທົ່າກັນ ຈາກຜົນງານຊະນະ 1 ນັດ, ສ່ວນນັດທີ 2 ຟີລິບປິນ ຈະລົງແຂ່ງຂັນກັບເຈົ້າພາບໃນວັນທີ 5 ຕຸລາ 2018 ເວລາ 18:30 ໂມງ ຕາມເວລາທ້ອງຖິ່ນເພື່ອລຸ້ນເປັນແຊັມກຸ່ມ.

ສໍາລັບປັດຈຸບັນ ຟີລິບປິນ ແລະ ບັງກລາເທດ ເຂົ້າຮອບຮອງຊະນະເລີດເປັນທີ່ແນ່ນອນແລ້ວ ລໍຖ້າອີກ 2 ທີມຈາກກຸ່ມ A ທີ່ປັດຈຸບັນ ທາຈິກິດສະຖານ ມີ 3 ຄະແນນ ຈາກ 1 ນັດ; ສ່ວນຮອບຮອງຊະນະເລີດຈະແຂ່ງຂັນໃນວັນທີ 9 – 10 ຕຸລາ 2018 ແລະ ນັດຊີງຊະນະເລີດຈະແຂ່ງຂັນວັນທີ 12 ຕຸລາ 2018.

[ ຄໍາສອນ ]

( ຮູບຈາກ: ສຕລ )

%d bloggers like this: