ງົດງາມ ໂດດເດັ່ນ ສີມືຊ່າງພາບລາວ ລວມຜົນງານວາງສະແດງອອກສູ່ສາຍຕາສັງຄົມ

ໃນວັນທີ 28 ກັນຍາ 2018 ຜ່ານມາ, ທີ່ສູນການຄ້າວິວມໍ ບ້ານພະຂາວ ນະຄອນຫຼວງວຽງຈັນ ໄດ້ມີງານວາງສະແດງຮູບພາບເມືອງລາວ ເຊິ່ງເປັນງານໜຶ່ງທີ່ສະແດງພາບຖ່າຍບັນດາຈຸດຕ່າງໆ, ສະຖານທີ່ຕ່າງໆທົ່ວປະເທດລາວຜ່ານເລນກ້ອງ ປະມານ 200 ຮູບພາບໃຫ້ຊົມ. ນອກນັ້ນ, ຍັງມີການສະແດງສິລະປະການນຸ່ງເຄື່ອງຖ່າຍຮູບໃນມູມທີ່ຈັດຂຶ້ນເພື່ອໃຫ້ເຫັນວິຖີຊີວິດຂອງຄົນລາວໃນສະໄໝກ່ອນ ກໍ່ຄືປັດຈຸບັນທີ່ຮຽບງ່າຍ ແລະ ນຳໃຊ້ພາຊະນະທີ່ເປັນທຳມະຊາດແບບພື້ນເມືອງ ເຊິ່ງຄົນໃນເມືອງໃຫຍ່ໆປັດຈຸບັນແມ່ນຫາເບິ່ງໄດ້ຍາກແລ້ວ.

ທ່ານ ຫຸມເພັດ ມະນີສຸກ ຕາງໜ້າທີມງານຊ່າງພາບ ໃຫ້ຮູ້ວ່າ: ງານວາງສະແດງຮູບພາບເມືອງລາວ ກໍ່ເປັນອີກງານໜຶ່ງທີ່ບັນດາຊ່າງພາບທັງໝົດ 8 ທ່ານ ໂດຍໄດ້ນຳເອົາຜົນງານຂອງຕົນເອງມາວາງສະແດງໃຫ້ສັງຄົມລາວໄດ້ເຫັນເຖິງຄວາມສາມາດຂອງບັນດາພາບຊ່າງພາບ ເພື່ອເປັນການສ້າງສັນຜົນງານອອກສູ່ສາຍຕາສັງຄົມທັງພາຍໃນ ແລະ ຕ່າງປະເທດໄດ້ເຫັນວ່າສີໄມ້ລາຍມືການຖ່າຍຮູບຂອງຄົນລາວເຮົາກໍ່ບໍ່ໜ້ອຍໜ້າກັບປະເທດອື່ນ.

ພາຍໃນງານພວກເຮົາແມ່ນມີຫຼາກຫຼາຍກິດຈະກໍາ ບໍ່ວ່າຈະເປັນການວາງສະແດງຮູບພາບເມືອງລາວ, ຊົມຜົນງານຮູບຖ່າຍຂອງຄົນລາວ, ຊົມພາບເກົ່າໆຂອງປະເທດລາວ, ນຸ່ງຊຸດຊົນເຜົ່າຖ່າຍຮູບ ແລະ ໂອ້ລົມສ້າງແຮງບັນດານໃຈເລື່ອງຖ່າຍຮູບຕ່າງໆ; ພິເສດໄປກວ່ານັ້ນຝ່າຍທີມງານພວກເຮົາແມ່ນດີໃຈຫຼາຍ ທີ່ມີຜູ້ໃຫ້ຄວາມສົນໃຈເປັນຢ່າງດີທີ່ໄດ້ມາຖ່າຍຮູບຊົນເຜົ່າຕ່າງໆຂອງເມືອງລາວ ເຊິ່ງຫາໄດ້ຍາກທີ່ຈະລວມຊຸດຊົນເຜົ່າຕ່າງໆໄວ້ໃນງານນີ້ຫຼາຍທີ່ສຸດນັບແຕ່ເໜືອຮອດໃຕ້ ເຊິ່ງເອີ້ນໄດ້ວ່າເປັນການສະແດງຜົນງານເພື່ອເຮັດໃຫ້ຜູ້ທີ່ບໍ່ເຄີຍໄດ້ໄປໃນສະຖານທີ່ນີ້ ຫຼື ເຄີຍໄດ້ໄປສຳຜັດມາແລ້ວກໍ່ຢາກໃຫ້ເຫັນອີກ ເພາະບາງຮູບພາບທີ່ນໍາມາວາງສະແດງນີ້ບາງຮູບກໍ່ມີອາຍຸຫຼາຍຮ້ອຍປີ ເຊິ່ງເປັນພາບທີ່ເກົ່າແກ່ຫາເບິ່ງໄດ້ຍາກ ລວມທັງການໃຫ້ເຊົ່າຊຸດຊົນເຜົ່າແຕ່ລະຊົນເຜົ່ານໍາອີກ.

ຂະນະທີ່ ທ່ານ ໃສຫຼ້າຄຳ ຂະຫຍອງເອກ  ໜຶ່ງໃນ 8 ຊ່າງພາບທີ່ນຳຜົນງານເຂົ້າຮ່ວມວາງສະແດງໃຫ້ຮູ້ວ່າ: ຖ້າເວົ້າເລື່ອງການຈັດງານວາງສະແດງຮູບພາບໃນຄັ້ງນີ້ແມ່ນພວກເຮົາໄດ້ມີເປົ້າໝາຍ ເພື່ອຢາກໃຫ້ສັງຄົມໄດ້ເຫັນວ່າຊ່າງພາບປະເທດລາວເຮົາໃນປັດຈຸບັນ ກໍ່ມີການປະກອບສ່ວນສຳຄັນໃນດ້ານວຽກງານການອະນຸລັກຮັກສາປະເພນີ – ວັດທະນະທຳອັນດີງາມ ທັງເປັນການສົ່ງເສີມປີທ່ອງທ່ຽວລາວ ເພາະວ່າທີ່ຜ່ານມາເຫັນວ່າຊ່າງພາບຄົນລາວເຮົາຖ່າຍແລ້ວ ກໍ່ໂພສລົງທາງໂຊຊຽວມີເດຍ ເມື່ອຜູ້ຄົນໄດ້ເຫັນຮູບພາບເຫຼົ່ານັ້ນກໍ່ເກີດມີຄວາມຄິດຢາກໄປທ່ຽວຊົມໃນສະຖານທີ່ນັ້ນ.

ດັ່ງນັ້ນ, ພວກເຮົາຈຶ່ງຕັດສິນໃຈຈັດງານນີ້ຂຶ້ນມາເພື່ອໃຫ້ຄົນລາວເຮົາໄດ້ຊົມພາບງາມໆ, ໄດ້ເຫັນຄວາມງາມຂອງຮູບ, ຄວາມຫຼົງໄຫຼຂອງຜູ້ທີ່ໄດ້ເກັບພາບນີ້ມາວ່າມັນໄດ້ສະທ້ອນໃຫ້ເຫັນຍັງແດ່? ແລະ ອັນທີ່ຫຼັກໆແມ່ນຢາກໃຫ້ຜູ້ທີ່ມາທ່ຽວຊົມຮູບພາບດັ່ງກ່າວໄດ້ເຫັນເຖິງຄຸນຄ່າຂອງຮູບພາບຂອງແຕ່ລະສະຖານທີ່ດັ່ງກ່າວ ຄືດັ່ງທີ່ເຮົາໄດ້ເຫັນຢູ່ໃນປັດຈຸບັນແຕ່ລະສະຖານທີ່ກໍ່ມີການປ່ຽນແປງຕາມການເວລາຈຶ່ງໄດ້ສັງລວມເອົາຮູບເກົ່າໆທີ່ມີອາຍຸຫຼາຍຮ້ອຍປີມາວາງສະແດງ ແລະ ສົມທຽບວ່າຮູບສະໄໝກ່ອນ ແລະ ປັດຈຸບັນມັນແຕກຕ່າງກັນແນວໃດ?.

ສ່ວນຜົນງານຂອງຂ້າພະເຈົ້າເອງກໍ່ບໍ່ແຕກຕ່າງຈາກຜົນງານຂອງຊ່າງພາບຄົນອື່ນໆ ແຕ່ອາດຈະແຕກຕ່າງລະຫວ່າງຈຸດເດັ່ນໃນວິທີການຖ່າຍພາບວ່າມັນມີສີສັນແບບໃດ ເພາະຂ້າພະເຈົ້າກໍ່ເປັນຜູ້ໜຶ່ງທີ່ມັກຮັກໃນເລື່ອງການຖ່າຍຮູບເຖິງວ່າສະຖານທີ່ທ່ອງທ່ຽວຈະໃກ້ ຫຼື ໄກ ຕົນເອງກໍ່ຈະມຸ່ງໜ້າໄປຖ່າຍເພື່ອຢາກໄດ້ພາບເຫຼົ່ານັ້ນເກັບໄວ້ ເພື່ອໃຫ້ຄົນລຸ້ນຫຼັງໄດ້ເຫັນພາບງາມໆ ສ່ວນຮູບພາບຂ້າພະເຈົ້າເອງແມ່ນຈະມີທຸກຮູບແບບ ແລະ ກໍ່ຫຼາຍກວ່າໝູ່ປະມານ 30 ຮູບ ທຸກພາບຈະສະທ້ອນໃຫ້ເຫັນເຖິງວິຖີຊີວິດ ແລະ ພາບທໍາມະຊາດຕ່າງໆ. ສ່ວນລາຄາຕາມທີ່ພວກເຮົາໄດ້ວາງຂາຍນີ້ແມ່ນເລີ່ມຕົ້ນ 2 ແສນກີບ ຈົນເຖິງລາຄາສູງສຸດ 2 ລ້ານກີບ.

ທ່ານ ນາງ ໄກ່ແກ້ວ ໄຊຍະສານ ອີກໜຶ່ງຊ່າງພາບທີ່ຫຼາຍຄົນຮູ້ຈັກ ກ່າວອີກວ່າ: ການທີ່ນຳເອົາຮູບພາບມາວາງສະແດງໃນງານນີ້ກໍ່ຍ້ອນວ່າ ໃນທີມງານພວກເຮົາໃຜໆກໍ່ມັກຮັກໃນເລື່ອງການຖ່າຍຮູບຢູ່ແລ້ວ ຈຶ່ງໄດ້ປຶກສານຳທີມວ່າພວກເຮົາຄວນຈະເອົາພາບທີ່ພວກເຮົາໄດ້ຖ່າຍໄວ້ນີ້ມາຈັດເປັນງານວາງສະແດງຮູບພາບເພື່ອເຮັດໃຫ້ຫຼາຍຄົນໄດ້ເຫັນຜົນງານຂອງບັນດາຊ່າງພາບ. ທີ່ຈິງແລ້ວກ່ອນໜ້ານີ້ທາງທີມງານພວກເຮົາແມ່ນໄດ້ຕັ້ງເພຈ໌ເຟສບຸ໊ກ ທີ່ມີຊື່ວ່າ “ Lao Postcard- ຮູບພາບເມືອງລາວ ” ສ່ວນຜົນງານຂອງຂ້າພະເຈົ້າແມ່ນມີຢູ່ 2 ກຸ່ມໃຫຍ່ ທີ່ສະທ້ອນໃຫ້ເຫັນເຖິງການເຮັດບຸນປະເພນີຂອງຊາວເມືອງມໍລະດົກໂລກ ແລະ ພາບທໍາມະຊາດ.

ຖ້າເວົ້າເລື່ອງເຕັກນິກການຖ່າຍນີ້ແມ່ນຂຶ້ນກັບເຮົາໄດ້ສັງເກດວ່າຈະເອົາມູມໃດທີ່ໜ້າສົນໃຈ ແລະ ກໍ່ໃສ່ ຄວາມສາມາດຂອງເຮົາໃນການປັບເລນກ້ອງວ່າເຮົາຕ້ອງການໃຫ້ພາບເດັ່ນງາມແບບໃດເທົ່າໃດ ແລ້ວກໍ່ກັບມາຕົກແຕ່ງເພື່ອໃຫ້ພາບນັ້ນເດັ່ນຂຶ້ນຕື່ມ ສ່ວນຄວາມຫຼົງໄຫຼນີ້ແມ່ນຍ້ອນ ຄວາມມັກໃນການຖ່າຍຮູບ ແລະ ເດີນທາງຊອກຫາສະຖານທີ່ ຫຼື ງານບຸນປະເພນີຕ່າງໆ ຈຶ່ງໄດ້ພາບງາມໆນີ້ມາ.

ສະນັ້ນ, ການວາງສະແດງຄັ້ງນີ້ຖືວ່າມີ ຄວາມພາກພູມໃຈຫຼາຍທີ່ໄດ້ນໍາເອົາຜົນງານຕົນເອງມາວາງສະແດງ ແລະ ກໍ່ໄດ້ປະສົບການຫຼາກຫຼາຍໃນງານວາງສະແດງໃນຄັ້ງນີ້ ແລະ ທີ່ສໍາຄັນແມ່ນດີໃຈຫຼາຍທີ່ສັງຄົມໃຫ້ຄວາມສົນໃຈ ໂດຍໄດ້ຊື້ບັນດາພາບເຫຼົ່ານີ້ໄປແລ້ວຈໍານວນໜຶ່ງ ທ່ານ ນາງ ໄກ່ແກ້ວ ກ່າວ.

ທ້າຍນີ້, ທ່ານ ຫຸມເພັດ ມະນີສຸກ ຍັງໃຫ້ຮູ້ຕື່ມວ່າ: ຜ່ານການຈັດງານຄັ້ງນີ້ອາດຈະບໍ່ແມ່ນແຕ່ຄັ້ງດຽວເທົ່ານັ້ນ ເຊິ່ງພວກເຮົາອາດຈະຈັດຕື່ມອີກໃນຄັ້ງຕໍ່ໄປ ເພາະຫຼາຍພາກສ່ວນບໍ່ວ່າຈະເປັນທາງພາກທຸລະກິດ, ຫ້າງຮ້ານ ແລະ ໂຮງແຮມ ໂດຍສະເພາະແມ່ນຊາວຕ່າງປະເທດແມ່ນໃຫ້ ຄວາມສົນໃຈຫຼາຍກັບຮູບພາບຂອງພວກເຮົາ. ນອກນັ້ນ, ພວກເຮົາຍັງມີຊຸດຊົນເຜົ່າໃຫ້ເຊົ່າ ຊຸດລະ 30 ພັນກີບຕໍ່ຊຸດ.

ທີ່ຈິງແລ້ວງານວາງສະແດງຮູບພາບຂອງທີມງານ Lao Postcard – ຮູບພາບເມືອງລາວ ແມ່ນເລີ່ມຕົ້ນເປີດງານຕັ້ງແຕ່ວັນທີ 28 ກັນຍາ ຈົນເຖິງວັນທີ 4 ຕຸລາ ແມ່ນຈະໄດ້ປິດງານ ແຕ່ເນື່ອງຈາກສັງຄົມໃຫ້ຄວາມຕອບຮັບເປັນຢ່າງດີ ພວກເຮົາຈຶ່ງຈໍາເປັນໄດ້ເພີ່ມເວລາໄປຈົນເຖິງວັນທີ 7 ຕຸລາ 2018 ທີ່ຈະມາເຖິງນີ້ຈຶ່ງຈະໄດ້ປິດງານດັ່ງກ່າວ.

ແນວໃດກໍ່ຕາມ, ທາງທີມງານ Lao Postcard – ຮູບພາບເມືອງລາວ ພວກເຮົາກໍ່ຂໍຝາກຜົນງານນີ້ໄວ້ໃນອ້ອມອົກອ້ອມໃຈໃຫ້ກັບຜູ້ທີ່ໃຫ້ການສະໜັບສະໜູນງານຄັ້ງນີ້ ກໍ່ຄືຄັ້ງຕໍ່ໄປແມ່ນອາດຈະຈັດຂຶ້ນອີກໃຫ້ດີໄປກວ່ານີ້ ແຕ່ກໍ່ຢ່າລືມມາແວ່ເບິ່ງຜົນງານພາບຖ່າຍຂອງເມືອງລາວ ແລະ ຊ່ວຍສະໜັບສະໜູນພາບຕ່າງໆ ເພື່ອເປັນການສົ່ງເສີມຊ່າງພາບຂອງລາວເຮົາ ຫຼື ສາມມາດເບິ່ງຜົນງານຂອງຊ່າງພາບລາວເຮົາໄດ້ຕື່ມທີ່ເວັບໄຊ: www.LaoPostcard.com.

[ ຂ່າວ: ເພັດລີສອນ, ຮູບ: ວິລະສັກ ]

%d bloggers like this: