14 ຄ້າຍ ນຳລົດເຂົ້າວາງສະແດງພ້ອມຈັດກິດຈະກຳດຶງຜູ້ຊື້

ເລີ່ມເປັນທາງການ ງານວາງສະແດງລົດນາໆຊາດວຽງຈັນ ຄັ້ງທີ 3 ເຊິ່ງມີ 14 ຄ້າຍ ນໍາລົດຄຸນນະພາບເຂົ້າປະຊັນກັນຢ່າງດຸເດືອດ, ດ້ານຜູ້ຈັດງານວາງຍອດຂາຍສູງເຖິງ 600 ຄັນ, ຄາດຜູ້ເຂົ້າຮ່ວມງານ 30 ພັນຄົນຕໍ່ມື້.

ງານວາງສະແດງລົດນາໆຊາດວຽງຈັນ ຄັ້ງທີ 3 ເປີດຂຶ້ນຢ່າງເປັນທາງການ ວັນທີ 1 ຕຸລາ 2018 ເຂົ້າຮ່ວມມີ ທ່ານ  ພັນທອງ ພິດທຸມມາ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ເຈົ້າໜ້າທີ່ໆກ່ຽວຂ້ອງຈາກພາກລັດ, ຜູ້ປະກອບການທຸລະກິດ ແລະ ບັນດາຄ້າຍລົດເຂົ້າຮ່ວມ.

ທ່ານ ພອນຈັນ ເພັງສຸວັນ ປະທານ ບໍລິສັດ ພີພີໄຊໂຍ ເອັນເຕີເທັນເມັນ ແອນອີເວັນອໍກາໄນເຊີ ຈຳກັດ ປະທານຈັດງານ ໄດ້ກ່າວວ່າ: ງານວາງສະແດງລົດນາໆຊາດວຽງຈັນ 2018 ( Vientiane International Motor Expo 2018 ຈະໄດ້ດຳເນີນການວາງສະແດງເປັນເວລາ 9 ວັນ ເລີ່ມແຕ່ວັນທີ 29 ກັນຍາ – 7 ຕຸລາ 2018 ທີ່ສູນການຄ້າ ລາວ – ໄອເຕັກ ເຊິ່ງງານຄັ້ງນີ້ແມ່ນໄດ້ຈັດຂຶ້ນເປັນຄັ້ງທີ 3 ໂດຍຢູ່ພາຍໃຕ້ແນວຄິດ ( ການເດີນທາງທີ່ຍິ່ງໃຫຍ່ໃນລາວ ).

ທ່ານກ່າວວ່າ: ຈຸດປະສົງການຈັດງານຄັ້ງນີ້ ເພື່ອເປັນການຊຸກຍູ້ບັນຍາກາດດ້ານເສດຖະກິດ ແລະ ການສ້າງລາຍຮັບເຂົ້າສູ່ປະເທດ, ສ້າງເງື່ອນໄຂໃຫ້ກຸ່ມບໍລິສັດທັງພາຍໃນ ແລະ ຕ່າງປະເທດຈະໄດ້ມີໂອກາດນຳສະເໜີສິນຄ້າ ແລະ ການບໍລິການຂອງຕົນເອງເພື່ອສ້າງການຕະຫຼາດ, ການນຳສະເໜີງານ, ການເພີ່ມຊ່ອງທາງດ້ານການຈຳໜ່າຍສິນຄ້າ ແລະ ຖານລູກຄ້າໃໝ່ ເພື່ອສະແດງເຖິງສັກກະຍະພາບໃນດ້ານການປະຢັດພະລັງງານຂອງຍານພາຫະນະໃນປັດຈຸບັນ ເພື່ອເປີດກວ້າງໃນການເຮັດທຸລະກິດຮ່ວມກັນຂອງພາກເອກະຊົນພາຍໃນ ແລະ ຕ່າງປະເທດ.

ພ້ອມກັນນັ້ນ, ຍັງໄດ້ມີການດໍາເນີນການໂຄສະນາໃຫ້ສັງຄົມທັງພາຍໃນ ແລະ ຕ່າງປະເທດ ໄດ້ຮັບຮູ້ຜ່ານຫຼາຍຊ່ອງທາງລົງໜັງສືພິມ, ວິທະຍຸ, ປ້າຍໂຄສະນາ, ອິນເຕີເນັດ ແລະ ອື່ນໆ.

ສ່ວນກິດຈະກຳພາຍໃນງານໃນປີນີ້ ສຳລັບຄົນທີ່ເຂົ້າມາຮ່ວມງານຈະໄດ້ບັດຊີງໂຊກລຸ້ນຮັບເອົາຂອງລາງວັນ ບໍ່ວ່າຈະເປັນສາຍຄໍຄຳ, ໂທລະສັບມືຖື ຫົວເຫວີຍ P20, Samsung galaxy note 9 ແລະ ຂອງລາງວັນອື່ນໆ, ຈະມີການທັດສະນະສຶກສາຈາກບັນດານັກສຶກສາວິທະຍາໄລຕ່າງໆ, ການໃຫ້ຄວາມຮູ້ກ່ຽວກັບກົດລະບຽບຈະລາຈອນ, ການສາທິດການປະຖົມພະຍາບານເບື້ອງຕົ້ນຈາກສະມາຄົມກູ້ໄພນະຄອນຫຼວງ, ການບັນຍາຍທິດທາງຂອງການຂາຍ – ການຕະຫຼາດຈາກອາຈານທີ່ມີຊື່ສຽງທີ່ຈະມາໃຫ້ຄຳແນະນຳ, ຈະມີບັນດາສິລະປິນ – ນັກຮ້ອງທັງລາວເຮົາ ແລະ ປະເທດເພື່ອນບ້ານ ທີ່ມາຫຼິ້ນເກມແຈກຂອງລາງວັນໃຫ້ກັບແຂກທີ່ເຂົ້າຮ່ວມງານ, ມີການສະແດງລົດຍີ່ຫໍ້ຕ່າງໆ ແລະ ສຳລັບງານຄັ້ງນີ້ມີ 14 ກຸ່ມຍີ່ຫໍ້ລົດ, ມີ 7 ຮ້ານຕົກແຕ່ງລົດ, ບໍລິສັດປະກັນໄພ, 1 ສິນເຊື່ອ.

ສ່ວນດ້ານນອກການທົດລອງຂັບລົດຂອງແຕ່ລະຄ້າຍລົດແມ່ນຟຣີຕະຫຼອດງານ, ຈະມີການກວດເຄື່ອງສຽງ, ສະແດງຄວາມສວຍງາມຂອງເຄື່ອງສຽງ, ມີຄອນເສີດຈາກບັນດາສິລະປິນ – ນັກຮ້ອງທັງພາຍໃນ ແລະ ຕ່າງປະເທດ ມາມອບຄວາມສຸກໃຫ້ກັບແຂກທີ່ມາຮ່ວມງານ ສະເພາະວັນທີ 5 – 7 ຕຸລາ 2018 ເທົ່ານັ້ນ.

ພາຍໃນງານປີນີ້ຄາດວ່າຈະມີຜູ້ເຂົ້າຊົມງານພວກເຮົາປະມານ 30 ພັນຄົນຕໍ່ມື້ ແລະ ຄາດວ່າຈະມີຍອດຂາຍຫຼາຍກວ່າປີຜ່ານມາ.

ທ່ານ ໄຊສົມເພັດ ນໍຣະສິງຫ໌ ຮັກສາການຫົວໜ້າ ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ການຈັດງານດັ່ງກ່າວມີຄວາມສໍາຄັນຕໍ່ຜູ້ປະກອບການລົດ ເຊິ່ງສາມາດສ້າງຊ່ອງທາງໃຫ້ແກ່ຜູ້ຊື້ ແລະ ຜູ້ຂາຍໄດ້ພົບກັນ ເຮັດໃຫ້ມີຫຼາຍໂອກາດເກີດຂຶ້ນໃນງານ ເປັນຕົ້ນແມ່ນສ້າງເງື່ອນໄຂໃຫ້ບໍລິສັດລົດຍີ່ຫໍ້ຕ່າງໆໄດ້ໃຊ້ງານວາງສະແດງຄັ້ງນີ້ເປີດໂຕສິນຄ້າໃໝ່ໆ, ເປັນການເພີ່ມຊ່ອງທາງໃຫ້ຜູ້ບໍລິໂພກໄດ້ເລືອກສິນຄ້າທີ່ມີຄຸນນະພາບໃນລາຄາທີ່ເໝາະສົມ, ເປັນການກະຕຸ້ນອຸດສາຫະກຳບໍລິການທີ່ປິ່ນອ້ອມໃຫ້ຂະຫຍາຍຕົວເພີ່ມຂຶ້ນ ເປັນຕົ້ນອຸດສາຫະກຳປະກອບລົດ, ການຈັດຟາຍແນນ, ມີໂປຣໂມຊັນຂອງແຕ່ລະຄ້າຍ ໄດ້ອອກມານໍາສະເໜີເພື່ອກະຕຸ້ນການຂາຍ ແລະ ພິເສດແມ່ນເປັນການໂຄສະນາປີທ່ອງທ່ຽວລາວ 2018 ໃຫ້ມີບັນຍາກາດມ່ວນຊື່ນ.

ງານວາງສະແດງລົດນາໆຊາດວຽງຈັນ ຄັ້ງທີ 3 ຈັດຂຶ້ນ ໃນລະຫວ່າງວັນທີ 29 ກັນຍາ – 7 ຕຸລາ 2018 ທີ່ສູນການຄ້າ ລາວ – ໄອເຕັກ ( ຫຼັງເກົ່າ ) ນະຄອນຫຼວງວຽງຈັນ.

[ ຂ່າວ: ພຸດຕີ້; ຮູບ: ວິລະສັກ ]

%d bloggers like this: