ລາວ ກຽມສົ່ງຫົວໜ່ວຍທຸລະກິດດີເດັ່ນ ແຂ່ງຂັນເວທີອາຊຽນ

ສະພາການຄ້າ ແລະ ອຸດສາຫະກໍາແຫ່ງຊາດລາວ ( LNCCI ) ໄດ້ຈັດງານລ້ຽງ Gala Night ສໍາລັບລາງວັນທຸລະກິດ  SEAN Laos 2018 ( ABA Laos ) ຂຶ້ນເພື່ອສ້າງຄວາມເຂັ້ມແຂງໃຫ້ບັນດາຫົວໜ່ວຍທຸລະກິດໃນທຸກຂະແໜງການ ທັງເປັນການຊົມເຊີຍຍ້ອງຍໍຜົນງານທີ່ໄດ້ປະກອບສ່ວນດີເດັ່ນໃນການສ້າງສາພັດທະນາປະເທດຊາດໃຫ້ຈະເລີນກ້າວໜ້າຂຶ້ນເລື້ອຍໆ ຄຽງຄູ່ກັບການກະກຽມຄວາມພ້ອມໃນການແຂ່ງຂັນໃນເວທີອາຊຽນທີ່ຈະມີຂຶ້ນໃນເດືອນພະຈິກ ທີ່ຈະມາເຖິງນີ້.

ງານດັ່ງກ່າວໄດ້ຈັດຂຶ້ນໃນວັນສຸກທີ 28 ກັນຍາ 2018 ທີ່ຜ່ານມາ ທີ່ໂຮງແຮມ ຄຣາວ ພລາຊາ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ   ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ; ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ; ທ່ານ Jens Peter Luetkenherm ເອກອັກຄະລັດຖະທູດ ເຢຍລະມັນ ປະຈໍາລາວ, ມີບັນດາຜູ້ຊະນະລາງວັນ ABA ປີ 2018 ແລະ ບັນດາຜູ້ປະກອບການທຸລະກິດປະເພດອື່ນໆເຂົ້າຮ່ວມ.

ໂອກາດດັ່ງກ່າວ ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງ ຊາດລາວ ກ່າວວ່າ: ການຈັດງານລາງວັນອາຊຽນ ປະຈຳປີ 2018 ສປປ ລາວ ນີ້ ເພື່ອກະກຽມໃຫ້ບັນດານັກທຸລະກິດຂອງລາວ ໄດ້ໄປແຂ່ງຂັນໃນເວທີອາຊຽນ ທີ່ເພິ່ນໄດ້ຈັດການແຂ່ງຂັນຂຶ້ນໃນແຕ່ລະປີ, ຄວາມຈິງແລ້ວບັນດານັກທຸລະກິດຂອງລາວ ລ້ວນແຕ່ມີຄວາມອາດສາມາດຫຼາຍໃນທຸກຂະແໜງການ ເປັນຕົ້ນທຸລະກິດຂະໜາດໃຫຍ່, ກາງ ແລະ ຂະໜາດນ້ອຍ ທີ່ມີຄວາມສາມາດສ້າງຍີ່ຫໍ້ສິນຄ້າ ແລະ ຜະລິດຕະພັນລາວຂຶ້ນໃນເວທີອາຊຽນ ເຊິ່ງເຮັດໃຫ້ອາຊຽນ, ພາກພື້ນ ແລະ ສາກົນຮັບຮູ້ໄດ້ ແຕ່ວ່າບັນດາຜະລິດຕະພັນ ຫຼື ບໍລິສັດຕ່າງໆຍັງບໍ່ທັນຖືກຮັບຮູ້ຈາກປະເທດອ້ອມຂ້າງກໍ່ຄືປະເທດອາຊຽນ ເພາະສະນັ້ນພວກເຮົາບໍ່ສາມາດເຈາະຕະຫຼາດຂອງພວກເຂົາໄດ້ ເຊິ່ງເວທີນີ້ຈະເປັນການລະດົມໃຫ້ນັກທຸລະກິດມາເຂົ້າຮ່ວມໃນການແຂ່ງຂັນໃນລະດັບອາຊຽນ.

ທ່ານ ນາງ ເຂັມມະນີ ພົນເສນາ ກ່າວວ່າ: ງານຄັ້ງນີ້ຈະເຮັດໃຫ້ ສປປ ລາວ ມີສິນຄ້າ, ການບໍລິການເພີ່ມຂຶ້ນ ແລະ ມີຄວາມໂດດເດັ່ນ, ສາມາດໄປແຂ່ງຢູ່ໃນລະດັບພາກພື້ນ ແລະ ສາກົນ ເນື່ອງຈາກວ່າອາຊຽນ ໄດ້ກາຍເປັນປະຊາຄົມເສດຖະກິດອາຊຽນ ໃນປີ 2015 ເຊິ່ງເຮັດໃຫ້ບັນດາຫົວໜ່ວຍທຸລະກິດຂອງອາຊຽນຄ່ອຍໆຫຍັບໃກ້ເຂົ້າກັນ ໂດຍຜ່ານຕ່ອງໂສ້ການຜະລິດກາຍເປັນຕະຫຼາດ ແລະ ຖານການຜະລິດອັນດຽວກັນ, ແຕ່ໃນຕົວຈິງແລ້ວກໍ່ປາສະຈາກບໍ່ໄດ້ໃນການແຂ່ງຂັນ ເຊິ່ງການແຂ່ງຂັນໃນທີ່ນີ້ຄືເພື່ອພ້ອມກັນແຂງແຮງ, ມີກຳລັງແຮງເພື່ອໄປແຂ່ງກັບພາກພື້ນ ແລະ ສາກົນ.

ທ່ານເນັ້ນໜັກກ່ຽວກັບຄວາມສໍາຄັນຂອງເວທີດັ່ງກ່າວ ວ່າ: ໃນການສົ່ງເສີມ ຄວາມໝັ້ນໃຈຂອງ SMEs ລາວ ທີ່ໄດ້ປະສົບຜົນສໍາເລັດໃນການເຮັດທຸລະກິດທີ່ໜ້າເຊື່ອຖື ແລະ ມີຄວາມຮັບຜິດຊອບໃນ ສປປ ລາວ, ການຮັບຮອງມາດຕະຖານສູງດັ່ງກ່າວ ຈະຊ່ວຍໃຫ້ລັດວິສາຫະກິດລາວມີ ຄວາມໜ້າເຊື່ອຖືຫຼາຍກວ່າເກົ່າ ແລະ ກ້າວໄປເໜືອຂອບເຂດທີ່ມີຄວາມໝັ້ນໃຈໃນການນໍາໃຊ້ສະມາຄົມເສດຖະກິດອາຊຽນຢ່າງເຕັມສ່ວນ.

ດ້ານ ທ່ານ Jens Peter Luetkenherm ກ່າວວ່າ: ເຢຍລະມັນ ເປັນຜູ້ສະໜັບສະໜູນໂຄງການຢ່າງຈິງຈັງ ແລະ ດ້ວຍເຫດນີ້ການຮັບຮູ້ ແລະ ການມອບລາງວັນຄວາມສຳເລັດຂອງທຸລະກິດລາວ ແມ່ນມີຄວາມສຳຄັນເປັນຢ່າງຍິ່ງ ແລະ ເຊື່ອໝັ້ນວ່າຜູ້ທີ່ຊະນະເລີດໃນເວທີນີ້ຈະໄດ້ຮັບຊື່ສຽງ ແລະ ມີ ຄວາມເປັນໄປໄດ້ໃນການສ້າງເຄືອຂ່າຍ ເພື່ອອຳນວຍຄວາມສະດວກໃນການເຂົ້າເຖິງການລົງທຶນດ້ານເຕັກໂນໂລຊີ ແລະ ການຕະຫຼາດ.

ສຳລັບການແຂ່ງຂັນລາງວັນທຸລະກິດດີເດັ່ນອາຊຽນ ປະຈຳປີ 2018 ຈະໄດ້ຈັດຂຶ້ນໃນເດືອນພະຈິກ ທີ່ຈະມາເຖິງນີ້ ທີ່ປະເທດສິງກະໂປ ເຊິ່ງ ສປປ ລາວ ໄດ້ຄັດເລືອກເອົາ 19 ບໍລິສັດ ໃນ 5 ສາຂາທຸລະກິດເຂົ້າຮ່ວມແຂ່ງຂັນ ຄື: ລາງວັນຂະແໜງບຸລິມະສິດດີເດັ່ນ, ລາງວັນທຸລະກິດ SMEs ດີເດັ່ນ, ລາງວັນພິເສດ, ລາງວັນທຸລະກິດດາວເດັ່ນ ແລະ ລາງວັນທຸລະກິດຂະໜາດໃຫຍ່ດີເດັ່ນ.

 

[ ຂ່າວ: ສົມລົດ; ຮູບ: ສຸກສະຫວັນ ]

%d bloggers like this: