ເປີດຊື້ – ຂາຍຫຸ້ນ ບໍລິສັດ ລາວອາໂກຣເທັກ ມະຫາຊົນ ຢ່າງເປັນທາງການ

ບໍລິສັດ ລາວອາໂກຣເທັກ ມະຫາຊົນ ( ລອທ/LAT ) ໄດ້ເປີດຊື້ – ຂາຍຫຸ້ນຢ່າງເປັນທາງການໃນຕະຫຼາດຫຼັກຊັບລາວ ໃນວັນທີ 25 ກັນຍາ 2018 ຜ່ານມາ ເຊິ່ງການຂາຍຈັບຄູ່ຄັ້ງທຳອິດໃນລາຄາເລີ່ມຕົ້ນ 1.400 ກີບຕໍ່ຫຸ້ນ, ມີປະລິມານການ ຊື້ – ຂາຍທັງໝົດ 256.500 ຫຸ້ນ ມູນຄ່າ 423.185.000 ກີບ.

ໃນຕອນເຊົ້າຂອງວັນທີ 25 ກັນຍາ 2018 ທີ່ຕະຫຼາດຫຼັກຊັບລາວ ນະຄອນຫຼວງວຽງຈັນ ໄດ້ມີພິທີເປີດການຊື້ – ຂາຍຫຸ້ນຄັ້ງທຳອິດ ຂອງບໍລິສັດ ລາວອາໂກຣເທັກ ມະຫາຊົນ ເປັນບໍລິສັດທີ 2 ທີ່ຈົດທະບຽນໃນຕະຫຼາດຫຼັກຊັບລາວ ໃນປີ 2018 ແລະ ເປັນບໍລິສັດ ອັນດັບທີ 9 ທີ່ມີການຊື້ – ຂາຍຫຸ້ນໃນຕະຫຼາດຫຼັກຊັບລາວ ໂດຍໄດ້ຮັບກຽດເຂົ້າຮ່ວມຂອງ ທ່ານ ນາງ ສາຍສະໝອນ ຈັນທະຈັກ ຫົວໜ້າສຳນັກງານຄະນະກຳມະການຄຸ້ມຄອງຫຼັກຊັບ, ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ, ທ່ານ ອະພິສິດ ຣຸຈິກຽດກຳຈອນ ປະທານສະພາບໍລິຫານ ບໍລິສັດ ລາວອາໂກຣເທັກ ມະຫາຊົນ, ມີພາກສ່ວນທີ່ກ່ຽວຂ້ອງເຂົ້າຮ່ວມ.

 

 

ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ ກ່າວວ່າ: ບໍລິສັດ ລາວອາໂກຣເທັກ ມະຫາຊົນ ເປັນຂະແໜງກະສິກຳທີ່ໄດ້ມາຈົດທະບຽນໃນຕະຫຼາດຫຼັກຊັບລາວ ເຊິ່ງເປັນການເພີ່ມທາງເລືອກຜະລິດຕະພັນຕົວໃໝ່ຂອງຕະຫຼາດຫຼັກຊັບລາວທີ່ສ້າງເງື່ອນໄຂໃໝ່ໃນການລົງທຶນໃນ ຕລຊລ ໃຫ້ແກ່ນັກລົງທຶນທັງພາຍໃນ ແລະ ຕ່າງປະເທດ. ບໍລິສັດ ລາວອາໂກຣເທັກ ມະຫາຊົນ ເປັນບໍລິສັດທີ່ມີການເຄື່ອນໄຫວດຳເນີນທຸລະກິດປາມນ້ຳມັນຄົບວົງຈອນໃນ ສປປ ລາວ. ນອກນັ້ນ, ຍັງເປັນຕົວແທນຈຳໜ່າຍນ້ຳມັນທີ່ຜະລິດຈາກປາມໃນ ສປປ ລາວ ແລະ ມີການເຄື່ອນໄຫວທຸລະກິດທີ່ມີທ່າຂະຫຍາຍຕົວແຂງແກ່ນ. ສະນັ້ນ, ໃນການຈົດທະບຽນເຂົ້າ ຕລຊລ ໃນຄັ້ງນີ້ ຈະເປັນນິມິດໝາຍອັນດີເພື່ອເປັນການເພີ່ມສັກກະຍະພາບໃຫ້ແກ່ບໍລິສັດໃນການພັດທະນາທຸລະກິດ ກໍ່ຄືເປັນການເພີ່ມຂີດຄວາມສາມາດຂອງຜະລິດຕະພັນໃນປະເທດ. ພ້ອມກັນນີ້, ກໍ່ຖືເປັນການສົ່ງເສີມແຮງງານກໍ່ຄືຊີວິດການເປັນຢູ່ໃຫ້ແກ່ປະຊາຊົນລາວ ເຮັດໃຫ້ປະຊາຊົນລາວສາມາດຍົກສູງຄຸນນະພາບໃນການດຳລົງຊີວິດດີຂຶ້ນ.

 

ທ່ານ ອຸດົມ ແກ້ວທະວົງ ຜູ້ອຳນວຍການໃຫຍ່ ບໍລິສັດ ລາວອາໂກຣເທັກ ມະຫາຊົນ ກ່າວວ່າ: ການທີ່ ບໍລິສັດ ລາວອາໂກຣເທັກ ມະຫາຊົນ ໄດ້ກາຍເປັນບໍລິສັດທີ່ຈົດທະບຽນຖືເປັນອີກບາດກ້າວໜຶ່ງແຫ່ງຄວາມສຳເລັດຂອງບໍລິສັດທີ່ຈະເຮັດໃຫ້ບໍລິສັດເປັນທີ່ຮູ້ຈັກຂອງສັງຄົມກວ້າງຂວາງຂຶ້ນ, ມີລະບົບການບໍລິຫານງານທີ່ດີຕາມມາດຕະການຂອງບໍລິສັດຈົດທະບຽນທີ່ສາກົນຍອມຮັບ, ມີຄວາມໂປ່ງໃສ ເຊິ່ງຈະສ້າງຄວາມເຊື່ອໝັ້ນໃຫ້ທັງລູກຄ້າ, ນັກລົງທຶນ ແລະ ພາກສ່ວນທີ່ກ່ຽວຂ້ອງໃນຂະແໜງການປາມນ້ຳມັນເພີ່ມສູງຂຶ້ນ. ສ່ວນເງິນທີ່ໄດ້ຈາກການລະດົມທຶນໃນ ຕລຊລ ແມ່ນຈະນຳມາພັດທະນາພື້ນທີ່ປູກ ແລະ ທຶນໝູນວຽນ 25% ຂອງເງິນ IPO ໃນໄລຍະປີ 2018 – 2019 ແລະ ສ້າງໂຮງງານກັ່ນນ້ຳມັນປາມ 75% ຂອງເງິນ IPO ໃນໄລຍະ 2018 – 2020.

 

 

ດ້ານ ທ່ານ ເທບສະຫວັນ ກິຕິຍະວົງ ຮັກສາການຜູ້ອຳນວຍການ ບໍລິສັດ ຫຼັກຊັບ ທຄຕລ – ກທ ຈຳກັດ ກ່າວວ່າ: ໃນນາມບໍລິສັດທີ່ປຶກສາທາງດ້ານການເງິນ ແລະ ທັງເປັນຜູ້ຄ້ຳປະກັນການອອກຈຳໜ່າຍຫຸ້ນຂອງ ບໍລິສັດ ລາວອາໂກຣເທັກ ມະຫາຊົນ ເຫັນວ່າບໍລິສັດດັ່ງກ່າວມີຄວາມພ້ອມ 100% ກ່ອນຈະເຂົ້າມາຈົດທະບຽນໃນມື້ນີ້. ໃນໄລຍະການເປີດຈອງຊື້ – ຂາຍຫຸ້ນແມ່ນມີບັນຍາກາດຟົດຟື້ນພໍສົມຄວນ ແລະ ປະສົບຜົນສຳເລັດຕາມກຳນົດເວລາ. ສາເຫດທີ່ເຮັດໃຫ້ປະສົບຜົນສຳເລັດຕາມກຳນົດເວລາຍ້ອນໄລຍະຜ່ານມາບໍລິສັດໄດ້ມີຜົນປະກອບການທີ່ດີ ແລະ ຂະຫຍາຍຕົວຢ່າງຕໍ່ເນື່ອງ ພາຍຫຼັງທີ່ເຂົ້າຈົດທະບຽນໃນຕະຫຼາດຫຼັກຊັບແລ້ວ ບໍລິສັດຍັງຈະສືບຕໍ່ຂະຫຍາຍຕົວຕື່ມອີກ.

ໃນໄລຍະການຊື້ – ຂາຍຫຸ້ນເຫັນວ່າມີປະລິມານການສັ່ງຊື້ – ຂາຍຫຸ້ນຂ້ອນຂ້າງຄຶກຄື້ນພໍສົມຄວນ ແລະ ຫຼັງຈາກການປິດຊື້ – ຂາຍຫຸ້ນມື້ທຳອິດ ເຫັນວ່າລາຄາຫຸ້ນຂອງ LAT ສາມາດຢືນຢູ່ເໜືອລາຄາ IPO ດ້ວຍລາຄາປິດແດນບວກທີ່ລາຄາ 1.400 ກີບ ມີການແລກປ່ຽນຊື້ – ຂາຍ 238.200 ຫຸ້ນ ມູນຄ່າ 333.480.000 ກີບ.

[ ຂ່າວ: ສົມລົດ; ຮູບ: ວິລະສັກ ]

%d bloggers like this: