ສະຖານທີ່ແບບໃດທີ່ທ່ານມັກໄປໃນວັນພັກຜ່ອນທ້າຍອາທິດ?

ເມື່ອຍກັບການເຮັດວຽກງານໝົດອາທິດແລ້ວ ວັນພັກຜ່ອນທ້າຍອາທິດຫຼາຍຄົນກໍ່ຢາກພາໝູ່ເພື່ອນ, ພາຄອບຄົວ ແລະ ຄົນຮັກໄປທ່ຽວພັກຜ່ອນຢ່ອນໃຈ ເຊິ່ງຄົນໃນເມືອງໃຫຍ່ຢ່າງນະຄອນຫຼວງວຽງຈັນ ສ່ວນຫຼາຍແມ່ນບໍ່ມີທາງເລືອກ ເນື່ອງຈາກວ່າສະຖານທີ່ທ່ອງທ່ຽວທີ່ເປັນທຳມະຊາດບໍ່ຫຼາຍ ບ່ອນທີ່ມີບາງແຫ່ງກໍ່ຍັງບໍ່ສາມາດຕອບໂຈດລູກຄ້າໄດ້ເທື່ອ, ບາງແຫ່ງຕອບໂຈດເລື່ອງທຳມະຊາດໄດ້ ແຕ່ການເກັບຄ່າບໍລິການຕ່າງໆແມ່ນແພງ. ສະນັ້ນ, ມື້ນີ້ພວກເຮົາມາສັງລວມເບິ່ງວ່າທັດສະນະຂອງຄົນຢູ່ໃນນະຄອນຫຼວງວຽງຈັນ ເຂົາມັກໄປສະຖານທີ່ແບບໃດໃນວັນພັກຜ່ອນທ້າຍອາທິດ.

ທ່ານ ບຸນທະວີ ບ້ານສົມຫວັງເໜືອ ເມືອງຫາດຊາຍຟອງ ນະຄອນຫຼວງວຽງຈັນ ພະນັກງານບໍລິສັດເອກະຊົນແຫ່ງໜຶ່ງ ກ່າວວ່າ: ສ່ວນຫຼາຍຄົນໃນເມືອງໃຫຍ່ແມ່ນມີຄວາມກະຫາຍທຳມະຊາດ ເນື່ອງຈາກແຕ່ລະມື້ແມ່ນຢູ່ກັບລົດຕິດ, ຕຶກ, ອາຄານ, ສຽງຟົດສຽງນັນຕ່າງໆນາໆ ສົມທົບກັບການນັ່ງຢູ່ໜ້າຄອມພິວເຕີໝົດມື້ ( ທັງ 5 ມື້ໃນວັນເຮັດວຽກ ) ແລະ ກໍ່ຄຽດກັບໜ້າວຽກມາເປັນອາທິດ. ສະນັ້ນ, ວັນເສົາ – ວັນອາທິດ ທີ່ເປັນມື້ພັກຜ່ອນກໍ່ບໍ່ມັກໄປທ່ຽວບ່ອນທີ່ມັນໄກເກີນໄປ ສ່ວນຫຼາຍມັກອອກໄປທ່ຽວເຂດໃກ້ໆ ໂດຍສະເພາະແມ່ນຫາກໄປກັບໝູ່ກໍ່ຈະຊວນກັນໄປນັ່ງຫຼິ້ນຢູ່ບ່ອນທີ່ເປັນຕູບອ້ອມໜອງປາຊຸມກັນ ເພາະມັນເປັນສ່ວນຕົວ ແລະ ມີການບໍລິການດ້ານອາຫານ ແລະ ອື່ນໆ, ຖ້າໄປກັບຄອບຄົວກໍ່ຈະມັກໄປທ່ຽວຕາດເພື່ອໄປກິນເຂົ້າຊຸມກັນ ເຊິ່ງຖ້າຖາມວ່າສະຖານທີ່ໆໄປທ່ຽວປັດຈຸບັນນີ້ແມ່ນຄັກບໍ່?ຖືກໃຈບໍ່ກໍ່ບໍ່ແມ່ນ ທີ່ໄປແມ່ນຍ້ອນບໍ່ມີທາງເລືອກຫຼາຍ ເພາະວ່າໃນຂອບເຂດນະຄອນຫຼວງວຽງຈັນ ແມ່ນຍັງບໍ່ທັນມີສະຖານທີ່ທ່ອງທ່ຽວທີ່ເປັນທຳມະຊາດ, ມີລະບົບການຈັດການ ຫຼື ຮັກສາຄວາມສະອາດໄດ້ດີ, ຄວາມປອດໄພ, ມີການບໍລິການອຳນວຍຄວາມສະດວກອື່ນໆ ( ຖ້າມີບ່ອນພັກຜ່ອນແບບນອນໄດ້ຍິ່ງເປັນການດີ ເພາະຈະໄດ້ໄປນອນພັກຢູ່ບ່ອນທີ່ມີບັນຍາກາດດີປ່ຽນບັນຍາກາດ ), ຖ້າເປັນເຂດທີ່ມີຕູບກໍ່ໃຫ້ຫ່າງກັນແນ່ເນື່ອງຈາກຫຼາຍຄົນໄປກໍ່ມັກເປີດເພງເຮັດໃຫ້ສົ່ງສຽງຟົດນັນກັນ ເຮັດໃຫ້ມື້ພັກຜ່ອນກາຍເປັນມື້ທີ່ຄຽດຍ້ອນສຽງເພງ ເພາະຖ້າຫາກຈະມັກຟົດນັນເຮົາກໍ່ບໍ່ຈຳເປັນຕ້ອງໄປແບບນັ້ນນັ່ງຊຸມແຊວຢູ່ຕາມຮ້ານໃນເມືອງຈະດີ ກວ່າ, ສະຖານທີ່ທ່ອງທ່ຽວນັ້ນບໍ່ຈຳເປັນຕ້ອງຫຼູຫຼາ, ການເກັບຄ່າບໍລິການຕ່າງໆກໍ່ບໍ່ຕ້ອງເກັບແພງເກີນໄປ, ທຸກຄົນສາມາດເຂົ້າເຖິງໄດ້ ທີ່ສຳຄັນສະຖານທີ່ນັ້ນແມ່ນຕ້ອງບໍ່ຫ່າງໄກຈາກຕົວເມືອງຫຼາຍເກີນໄປ ປະມານ 80 ກິໂລແມັດລົງມາກໍ່ຈະດີ ເພາະສາມາດໄປຕອນເຊົ້າກັບຕອນແລງ ມາຮອດຈຶ່ງບໍ່ຄໍ່າເກີນໄປ.

ທ່ານ ນາງ ນ້ອຍ ບ້ານທົ່ງພານທອງ ເມືອງສີສັດຕະນາກ ພະນັກງານເອກະຊົນແຫ່ງໜຶ່ງ ກ່າວວ່າ: ສ່ວນຫຼາຍວັນເສົາ – ອາທິດ ແມ່ນມັກຈະຊວນໝູ່ໄປນັ່ງຫຼິ້ນຢູ່ສວນ ຫຼື ຮ້ານອາຫານທີ່ມີຕູບແຄມໜອງ ເພາະວ່າມັນເປັນສ່ວນຕົວດີ, ບາງອາທິດກໍ່ພານ້ອງໆໄປເບິ່ງໜັງ ແລະ ກິນອາຫານ ເຊັ່ນ: ກິນບຸບເຟ່ຕອນແລງປະມານນີ້, ບາງອາທິດກໍ່ຈະຂ້າມໄປຫຼິ້ນຢູ່ໜອງຄາຍ ປະເທດເພື່ອນບ້ານ ເພາະບໍ່ຄ່ອຍມັກໄປຫຼິ້ນແບບສວນດອກໄມ້ ຫຼື ຕາດມູນ, ຫີນຄັນນາ ເພາະວ່າລົດກໍ່ຫຼາຍຫາກເປັນມື້ເທດສະການ ແລະ ທີ່ສຳຄັນທຳມະຊາດງາມ ແຕ່ບໍ່ມັກສະພາບແວດລ້ອມ ແລະ ການບໍລິການຂອງຜູ້ໃຫ້ບໍລິການ ເນື່ອງຈາກວ່າອັນໃດກໍ່ເກັບໝົດ, ຄັນຊື້ອັນໃດກໍ່ແພງ ອີກຢ່າງບັນດາສວນດອກໄມ້ທີ່ເພິ່ນສ້າງຂຶ້ນອ້ອມແອ້ມນະຄອນຫຼວງວຽງຈັນນີ້ໃຜໆໄປກໍ່ຈົ່ມວ່າລົດຕິດ, ບໍ່ມີບ່ອນພັກເຊົາ ແດດຮ້ອນກໍ່ໄດ້ເລາະຕາກແດດ, ຈຸດບໍລິການດ້ານອາຫານ, ເຄື່ອງດື່ມກໍ່ບໍ່ສະດວກ ເລີຍເລືອກທີ່ຈະໄປແບບທີ່ມັນສະດວກສະບາຍ ເຖິງວ່າຈະເປັນບ່ອນທີ່ໜ້າເບື່ອກໍ່ຕາມ, ຖ້າຖາມວ່າໄປຕູບແບບນັ້ນມັນດີບໍ່? ມັນກໍ່ດີຢູ່ ແຕ່ມັນກໍ່ບໍ່ມີຄວາມເປັນທຳມະຊາດ ເພາະເປັນຄົນມັກທຳມະຊາດ, ມັກສາຍນໍ້າ, ມັກປ່າ ເວລາໄດ້ໄປສຳຜັດແລ້ວກໍ່ສະບາຍໃຈ, ປັດຈຸບັນຢູ່ໃນນະຄອນຫຼວງວຽງຈັນ ສ່ວນຫຼາຍມັກເຮັດຄ້າຍຄືກັນ ເຮັດເປັນສວນດອກໄມ້ກໍ່ຄ້າຍຄືກັນ, ເຮັດຮ້ານແຄມໜອງກໍ່ຄ້າຍຄືກັນບາງບ່ອນມີແຕ່ຕູບແຄມໜອງລ້ອນຈ້ອນແດດຮ້ອນໆສ່ອງໃສ່ ຖ້າຈະເຮັດເປັນຕູບແຄມໜອງກໍ່ຢາກໃຫ້ມີຕົ້ນໄມ້ລຽນໄປເປັນຮົ່ມ ເອົາທຳມະຊາດເຂົ້າມາຫຼາຍໆ, ອາຫານກໍ່ບໍ່ຕ້ອງແພງເກີນໄປ ຈຶ່ງຈະດຶງດູດເອົາຄົນເຂົ້າໄປທ່ຽວ ຫຼື ລູກຄ້າເຂົ້າໄປໃຊ້ບໍລິການຫຼາຍ.

ທ່ານ ໃສຫຼ້າຄຳ ຂະຫຍອງເອກ ບ້ານສາລາຄຳ ກ່າວວ່າ: ສິ່ງສຳຄັນຕ້ອງເບິ່ງວ່າຖ້າເປັນຄອບຄົວແມ່ນມີລູກນ້ອຍບໍ່ ເພາະວ່າວັນເສົາ – ວັນອາທິດ ເຮົາຕ້ອງໄດ້ພາລູກໄປທ່ຽວເພື່ອເຮັດໃຫ້ລູກມີພັດທະນາການທີ່ດີຂຶ້ນ, ໄດ້ຮັບຮູ້, ໄດ້ເຫັນຫຼາຍສິ່ງຫຼາຍຢ່າງ. ສະນັ້ນ, ສະຖານທີ່ນັ້ນຄວນເປັນບ່ອນທີ່ເດັກນ້ອຍໄປແລ້ວຫຼິ້ນໄດ້, ຮັບປະກັນຄວາມປອດໄພ ທີ່ສຳຄັນຕ້ອງມີທັງບ່ອນຜູ້ໃຫຍ່ສາມາດນັ່ງພັກຜ່ອນໄດ້ ( ບໍ່ແມ່ນວ່າພໍ່ແມ່ຈະໄປນັ່ງເຝົ້າເບິ່ງລູກຫຼິ້ນຢ່າງດຽວ ) ຂະນະທີ່ລູກຫຼິ້ນຜູ້ປົກຄອງ ຫຼື ຜູ້ທີ່ເປັນພໍ່ເປັນແມ່ກໍ່ສາມາດເຮັດກິດຈະກຳອື່ນໄດ້ ແລະ ໄລຍະທາງໄປສະຖານທີ່ນັ້ນຂີ່ລົດປະມານ 1 ຊົ່ວໂມງໃຫ້ໄປຮອດ ເພາະຖ້າກາຍກໍ່ຈະເມື່ອຍແລ້ວ ຫຼື ຫ່າງຈາກຕົວເມືອງປະມານ 30 ກິໂລ ແຕ່ສ່ວນໃຫຍ່ສະຖານທີ່ຮອງຮັບໃນວັນພັກຜ່ອນຢູ່ໃນນະຄອນຫຼວງ ສ່ວນໃຫຍ່ຈະເຫັນວ່າຖ້າເປັນສະຖານທີ່ເດັກນ້ອຍກໍ່ຈະເປັນເດັກນ້ອຍໝົດ ບໍ່ມີສະຖານທີ່ສຳລັບຜູ້ໃຫຍ່ ແລະ ຖ້າສະຖານທີ່ຜູ້ໃຫຍ່ກໍ່ຈະເປັນຜູ້ໃຫຍ່ໝົດ ບໍ່ມີສະຖານທີ່ສຳລັບເດັກນ້ອຍ. ສະນັ້ນ, ກໍ່ໝາຍຄວາມວ່າສະຖານທີ່ທ່ອງທ່ຽວຢູ່ລາວຈະເຮັດແບບເຈາະຈົງເກີນໄປ ແຕ່ເຫັນວ່າຜູ້ທີ່ສ້າງໃຫ້ເປັນທັງສະຖານທີ່ທ່ຽວໄດ້ທັງເດັກນ້ອຍ ແລະ ຜູ້ໃຫຍ່ ສ່ວນຫຼາຍກໍ່ຈະເປັນຫ້າງ  ຮ້ານ ( ໄອເຕັກ ແລະ ວຽງຈັນເຊັນເຕີ ) ແຕ່ພາບລວມແລ້ວຕ້ອງມາເບິ່ງວ່າເຮົາຢາກໄປຫ້າງຮ້ານບໍ່? ສ່ວນຫຼາຍຄົນກໍ່ມັກອອກໄປຫຼິ້ນນອກເມືອງ ຫຼື ຊານເມືອງ ເພາະເຮົາເຮັດວຽກແຕ່ວັນຈັນ – ວັນສຸກ ກໍ່ແມ່ນນັ່ງຢູ່ຫ້ອງການ, ຫ້ອງສີ່ຫຼ່ຽມ, ຫ້ອງແອຢູ່ແລ້ວ ຖ້າຈະໄປນັ່ງແບບນັ້ນອີກຄິດວ່າມັນບໍ່ຄ່ອຍຄັກ. ສະນັ້ນ, ເຮົາຈະຊອກຫາສະຖານທີ່ໆເປັນບ່ອນທ່ຽວຂອງເດັກນ້ອຍ ແລະ ຜູ້ໃຫຍ່ທີ່ເປັນແບບທຳມະຊາດບໍ່ໄດ້ກໍ່ຈຳເປັນພາລູກໄປສູນການຄ້າ.

ທ່ານກ່າວຕື່ມວ່າ: ຜ່ານມາສະຖານທີ່ທ່ອງທ່ຽວທຳມະຊາດຊານເມືອງກໍ່ຈະມີ: ສວນພຶກສາ, ຟາມພູຕາເວັນ ແຕ່ພາບລວມຍັງເປັນກິດຈະກຳທີ່ໄປຄັ້ງໜຶ່ງກໍ່ບໍ່ມີແຮງຈູງໃຈໃຫ້ໄປອີກ ຕ້ອງເຂົ້າໃຈວ່າຄົນໃນເມືອງຕ້ອງພາລູກໄປຫຼິ້ນ ແລະ ມີຈັກສະຖານທີ່ໆພາລູກໄປໄດ້ ເຊິ່ງບາງບ່ອນບໍ່ມີບ່ອນໃຫ້ລູກເຮັດກິດຈະກໍາ ສະຖານທີ່ກໍ່ຖືກແດດໃນເວລາກາງເວັນ ( ຕ້ອງເບິ່ງວ່າເວລາກາງເວັນເດັກນ້ອຍສາມາດເຮັດກິດຈະກຳຫຍັງໄດ້ ). ສະນັ້ນ, ວັນພັກຕ້ອງພາລູກໄປທ່ຽວ ເພາະລູກຮຽນໜັງສືໝົດອາທິດແລ້ວ. ສະນັ້ນ, ເມື່ອຊອກຫາສະຖານທີ່ແບບນັ້ນບໍ່ມີກໍ່ຈຳເປັນພາລູກໄປເລາະຫ້າງແລ້ວກໍ່ກັບ. ດັ່ງນັ້ນ, ບໍ່ເປັນເລື່ອງແປກທີ່ວັນເສົາ – ອາທິດ ຄົນລາວຈະມັກຂ້າມໄປທ່ຽວອຸດອນ, ໜອງຄາຍ ປະເທດເພື່ອນບ້ານເພາະບໍ່ມີບ່ອນໄປ ຂີ່ລົດຂ້າມໄປເລາະຄໍ່າແລ້ວກໍ່ກັບ ແລະ ຖ້າເປັນສະຖານທີ່ພົບປະໝູ່ຄູ່ ແລະ ພີ່ນ້ອງຄິດວ່າສະຖານທີ່ໃນລາວຄວນພັດທະນາໃຫ້ມັນຫຼາກຫຼາຍ ບໍ່ແມ່ນຈະເປັນສະຖານທີ່ກິນ – ດື່ມສະເໝີໄປ, ສວນດອກໄມ້, ຕູບແຄມໜອງກໍ່ຄວນໃຫ້ເປັນຫຼາຍກວ່າບ່ອນກິນລົມຊົມວິວ ເພາະສະຖານທີ່ແບບນີ້ປັດຈຸບັນແມ່ນມີຫຼາຍແລ້ວ.

ທ່ານ ບຸນຄົງ ແສງທະສຸກ ພະນັກງານເອກະຊົນແຫ່ງໜຶ່ງ ກ່າວວ່າ: ໂດຍສ່ວນຕົວແລ້ວແມ່ນມັກໄປສະຖານທີ່ໆເປັນທຳມະຊາດຫຼາຍກວ່າ ອາດຈະເປັນສວນພຶກສາ, ສວນນໍ້າ ແລະ ຈຸດທີ່ມີສະຖານທີ່ສຳລັບເດັກນ້ອຍຫຼິ້ນ ແລະ ເປັນບ່ອນໃຫ້ຜູ້ໃຫຍ່ໄດ້ນັ່ງຊິວໆ ກໍ່ຈະເຮັດໃຫ້ໄດ້ຜ່ອນຄາຍທັງຕົວເຮົາເອງ, ລູກ ແລະ ຄອບຄົວນໍາເພາະມັກຈະພາລູກໄປຫຼິ້ນຫຼັງຈາກຮຽນທັງອາທິດແລ້ວ ສະຖານທີ່ທ່ອງທ່ຽວທີ່ມີຢູ່ໃນນະຄອນຫຼວງວຽງຈັນ ປັດຈຸບັນຖ້າຖາມວ່າສາມາດຕອບໂຈດໃຫ້ລູກຄ້າ ຫຼື ສັງຄົມໄດ້ບໍ່ນັ້ນກໍ່ຍັງບໍ່ທັນໄດ້ດີເທົ່າທີ່ຄວນ ເຊັ່ນ: ຖ້າເປັນສວນນໍ້າໃນນະຄອນຫຼວງກໍ່ຈະມີປະມານ 2 ແຫ່ງ ເຊິ່ງລາຄາມັນແພງຫຼາຍ ເຮັດໃຫ້ຄົນທີ່ມີລາຍຮັບຕໍ່າບໍ່ສາມາດເຂົ້າເຖິງໄດ້, ສ່ວນສະຖານທີ່ອື່ນກໍ່ອາດຈະເວົ້າເຖິງການຕົກແຕ່ງສະຖານທີ່ ແລະ ກິດຈະກຳໃນສວນໃຫ້ຫຼາກຫຼາຍ ເພາະປັດຈຸບັນຖ້າວ່າສວນກໍ່ຈະມີກິດຈະກຳຄ້າຍໆຄືກັນ ເຊັ່ນ: ມີໄດໂນເສົາກັບຂີ່ສະລິງກໍ່ມີຄ້າຍກັນ ເຊິ່ງກິດຈະກຳຍັງຫຼາຍຢ່າງທີ່ຍັງບໍ່ມີ ເພາະວ່າກຸ່ມຄົນໃນນະຄອນຫຼວງວຽງຈັນແມ່ນມີຫຼາຍກຸ່ມ ເຊິ່ງມີທັງກຸ່ມຜູ້ເຖົ້າ, ກຸ່ມຜູ້ໃຫຍ່, ກຸ່ມໄວລຸ້ນ ແລະ ເດັກນ້ອຍ ສ່ວນຫຼາຍຄົນເຮັດສວນຈະຄິດໃສ່ແຕ່ຄົນທີ່ມີກຳລັງຈ່າຍ ກໍ່ຄືຄົນເຮັດວຽກ ແຕ່ຄວນເບິ່ງຄືນວ່າກຸ່ມຄົນທີ່ເຮັດວຽກເຂົາກໍ່ມີຄອບຄົວ, ມີລູກ, ມີພໍ່ແມ່ເພາະສະນັ້ນ, ສະຖານທີ່ທ່ອງທ່ຽວແຕ່ລະຈຸດຄວນຈະມີກິດຈະກຳສຳລັບທັງເດັກນ້ອຍ ແລະ ຜູ້ເຖົ້າ ຫຼື ຖ້າມີສວນສະໜຸກແບບຄົບວົງຈອນຢູ່ໃນນະຄອນຫຼວງຈະສ້າງແຮງຈູງໃຈໃຫ້ຄົນລາວເດີນທາງທ່ຽວນອກປະເທດຍາມວັນເສົາ – ອາທິດໜ້ອຍລົງກໍ່ເປັນໄດ້.

ທ່ານ ມິດຕະພາບ ບ້ານໜອງໄຮ ກ່າວວ່າ: ສະຖານທີ່ໆຈະເປັນບ່ອນພັກຜ່ອນຢ່ອນໃຈໃນວັນພັກວຽກວັນເສົາ – ອາທິດກໍ່ຈະມັກໄປນັ່ງຕູບ, ຫຼິ້ນຕາດ, ເລາະກິນນັ້ນກິນນີ້ຕາມຮ້ານອາຫານແລ້ວກໍ່ກັບ ແຕ່ໂດຍສ່ວນຕົວແລ້ວມັກແບບສະຖານທີ່ທຳມະຊາດ, ອາກາດບໍລິສຸດ, ບໍ່ແອອັດ, ສຽງຟົດສຽງນັນກໍ່ບໍ່ມັກປານໃດ ແຕ່ວ່າປັດຈຸບັນສະຖານທີ່ໆເປັນທຳມະຊາດ, ບໍ່ມີສຽງຟົດສຽງນັນ, ຫ້ອງນໍ້າສະອາດ, ມີຈຸດໃຫ້ຖ່າຍຮູບ, ມີຄວາມສະອາດ, ມີຈຸດບໍລິການອາຫານທີ່ແຊບ ແຕ່ລາຄາບໍ່ສູງເກີນໄປນັ້ນແມ່ນບໍ່ມີ. ສະນັ້ນ, ຈຶ່ງເຮັດໃຫ້ບໍ່ມີທາງເລືອກໃນການຈະໄປພັກຜ່ອນຢ່ອນໃຈໃນວັນພັກທ້າຍອາທິດ.

( ຄຳນ້ອຍ )

%d bloggers like this: