ສູນ ICT ແຂວງຊຽງຂວາງ ຈັດຝຶກອົບຮົມການນໍາໃຊ້ອິນເຕີເນັດໃຫ້ຄູສອນປະຈໍາສູນ

ສູນໄອຊີທີ ( ICT ) ແຂວງຊຽງຂວາງ ຈັດກອງປະຊຸມຝຶກອົບຮົມການນໍາໃຊ້ອິນເຕີເນັດໃຫ້ຄູສອນປະຈໍາສູນຂອງຕົນ ໃນວັນທີ 27 ສິງຫາ 2018 ນີ້ ທີ່ຫ້ອງປະຊຸມສູນ ICT ແຂວງ ໂດຍໃຫ້ກຽດເປັນປະທານຂອງ ທ່ານ ໄຊປັນຍາ ໄຊຍະຈິດ ຫົວໜ້າຂະແໜງມັດທະຍົມສຶກສາ ພະແນກ ສກຂ ເຂົ້າຮ່ວມຊຸດຝຶກອົບຮົມມີ ທ່ານ ອ່ອນສີ ແກ້ວພັກດີ ຫົວໜ້າສູນ ICT ແຂວງ, ມີຄະນະສູນ ພ້ອມດ້ວຍຄູຝຶກ ແລະ ສໍາມະນາກອນທັງໝົດ 30 ກ່ວາຄົນ.

ທ່ານ ນາງ ແສງອໍາພອນ ພັນທະວົງ ຫົວໜ້າໜ່ວຍງານບໍລິຫານສູນ ICT ແຂວງ, ໄດ້ກ່າວລາຍງານໃຫ້ຮູ້ເຖິງຈຸດປະສົງເປົ້າໝາຍຂອງປະຊຸມ ເພື່ອໃຫ້ສໍາມະນາກອນເຂົ້າຮ່ວມໄດ້ຮຽນຮູ້ກ່ຽວກັບຄວາມຮູ້ພື້ນຖານ, ການນໍາໃຊ້ອິນເຕີເນັດ ແລະ ເຫັນໄດ້ຄວາມໝາຍ – ຄວາມສໍາຄັນຕໍ່ກັບອິນເຕີເນັດ ທີ່ໃຊ້ເປັນສື່ໃນການເຜີຍແຜ່ຂໍ້ມູນ – ຂ່າວສານທາງດ້ານການສື່ສານໄປທົ່ວໂລກ ເພື່ອໃຫ້ທັນກັບສະພາບການ ແລະ ເຫດການຕ່າງໆທີ່ເກີດຂຶ້ນ, ມີຄວາມສະດວກ, ວ່ອງໄວ, ທັນເວລາ. ໃນນັ້ນ, ຈະໄດ້ລົງເລິກກ່ຽວກັບຄວາມຮູ້ພື້ນຖານການນໍາໃຊ້ອິນເຕີເນັດ, ຜົນປະໂຫຍດດ້ານອິນເຕີເນັດຕໍ່ການສື່ສານ, ຂັ້ນຕອນການລົງທະບຽນເຂົ້າໃຊ້ລະບົບຈີເມລ ( Gmail ) ແລະ ການນໍາໃຊ້ Gmail, ການສົ່ງ ແລະ ຮັບຂໍ້ມູນຜ່ານທາງອີເມລ, ການອັບໂຫຼດຂໍ້ມູນ, ການປ່ຽນແປງໄຟລ໌ PDF ເປັນໄຟລ໌ Word, Exel, Powerpoint, ການລົງທະບຽນເຂົ້າໃຊ້ Youtube ແລະ ການນໍາໃຊ້ Youtube, ການອັບໂຫຼດວິດີໂອເຂົ້າລະບົບ Youtube, ຂັ້ນຕອນການຄົ້ນຫາ ແລະ ດາວໂຫຼດວິດີໂອຈາກລະບົບ Youtube, ການຕັ້ງຄ່າລະບົບ Google ແລະ ຕົວແປພາສາຕ່າງໆໃນລະບົບ Google ໂດຍຮຽນຮູ້ທັງພາກທິດສະດີ ແລະ ລົງເລິກພາກປະຕິບັດຕົວຈິງໄປພ້ອມ ເພື່ອສ້າງຄວາມເຂັ້ມແຂງໃຫ້ສໍາມະນາກອນເວລານໍາໄປໃຊ້ຕົວຈິງໃຫ້ໄດ້ຮັບຜົນດີ ໂດຍຈະໃຊ້ເວລາຝຶກອົບຮົມທັງໝົດ 05 ມື້ ຈຶ່ງສໍາເລັດ.

ໂອກາດນີ້, ທ່ານ ໄຊປັນຍາ ໄຊຍະຈິດ ໄດ້ຮຽກຮ້ອງໃຫ້ສໍາມະນາກອນເຂົ້າຮ່ວມ, ຈົ່ງພ້ອມກັນເອົາໃຈໃສ່ຕໍ່ບັ້ນຝຶກອົບຮົມໃຫ້ເຕັມເມັດເຕັມໜ່ວຍ, ຄົ້ນຄວ້າສົນທະນາແລກປ່ຽນບົດຮຽນນໍາຄູຝຶກດ້ວຍຄວາມຕັ້ງໃຈ, ສຸດກົກສຸດປາຍ ເພື່ອຮັບປະກັນເວລານໍາເອົາຄວາມຮູ້ໄປໝູນໃຊ້ເຂົ້າໃນໜ້າທີ່ວຽກງານຕົວຈິງທີ່ຕົນເອງຮັບຜິດຊອບ.

( ໂດຍ: ຄານສີສະຫວັນ ພົງພັກດີ )

%d bloggers like this: