ຈຳນວນນັກທ່ອງທ່ຽວເຂົ້າຊົມຖ້ຳຈອມອອງ ມີທ່າອ່ຽງເພີ່ມຂຶ້ນທຽບໃສ່ປີຜ່າມມາ

ຖໍ້າຈອມອອງ ເປັນຖໍ້າມະຫັດສະຈັນເທິງດິນແດນແຫ່ງນີ້ທີ່ຄົ້ນພົບໄດ້ຫຼາຍຊົ່ວຄົນມາແລ້ວ ໂດຍຊາວບ້ານເຂດບ້ານຈອມອອງ ໄດ້ເປີດເຜີຍຕໍ່ອົງການຈັດຕັ້ງໃນລະຫວ່າງປີ 2004 – 2005 ແລະ ສຳຫຼວດໃນປີ 2007 ແລະ 2009 ພ້ອມເປີດບໍລິການຕາມສະພາບການທ່ອງທ່ຽວທ້ອງຖິ່ນ, ຖໍ້າຈອມອອງແມ່ນເອີ້ນຕາມຊື່ຂອງບ້ານ ປະຊາຊົນທ້ອງຖິ່ນເຄີຍເອີ້ນຊື່ຖໍ້ານີ້ໃນເມື່ອກ່ອນວ່າຖໍ້າເຈຍ ຫຼື ຖ້ຳຂີ້ເຈຍ ຍ້ອນວ່າສະໄໝກ່ອນມີໂຕເຈຍມາອາໄສຢູ່ເປັນຈຳນວນຫຼວງຫຼາຍ ເຊິ່ງປະຊາຊົນເຂດຈອມອອງ ໄດ້ພາກັນຂຸດເອົາຂີ້ເຈຍມາເຮັດໝື້ປືນແກັບ, ແຕ່ທາງຂະແໜງທ່ອງທ່ຽວໄດ້ໂຄສະນາໃຫ້ເອີ້ນຊື່ວ່າ: “ ຖໍ້າຈອມອອງ ” ຕາມຊື່ຂອງບ້ານຈົນເຖິງປັດຈຸບັນ.

ບ້ານຈອມອອງ ອີກປະຫວັດໜຶ່ງທີ່ເອີ້ນວ່າ ຈອມອອງ ຍ້ອນຄໍາວ່າ “ ຈອມ ” ເປັນພາສາກຶມມຸ ເຊິ່ງແປວ່າຕິດຕາມໄປ ຫຼື ນຳກົ້ນໄປ, ສ່ວນຄຳວ່າ “ ອອງ ” ແປວ່າໂຕຕໍ່ດິນ. ໃນສະໄໝກ່ອນປະຊາຊົນເມືອງນາໝໍ້ ໄດ້ໄປຄ້ອງຕໍ່ ຫຼື ຫາເອົາຮັງໂຕຕໍ່ ໂດຍໄດ້ເອົາໃຍຝ້າຍນ້ອຍໆອ່ອນໆມັດອາຫານໃສ່ຕີນໂຕຕໍ່ແລ້ວກໍ່ປ່ອຍຕໍ່ໃຫ້ບິນກັບໄປຫາຮັງ ແລະ ປະຊາຊົນກໍ່ນຳໂຕຕໍ່ນັ້ນໄປ ຈຶ່ງໄປພົບເຫັນເຂດພື້ນທີ່ດັ່ງກ່າວເປັນເຂດທີ່ອຸດົມສົມບູນ ເໝາະສົມໃນການຜະລິດກະສິກຳ, ປູກຝັງ, ລ້ຽງສັດ ແລະ ຕໍ່ມາຈຶ່ງພາກັນຍ້າຍຖິ່ນຖານມາຢູ່ບ້ານນີ້ແລ້ວເອີ້ນວ່າ:       “ ບ້ານຈອມອອງ ” ຈົນເຖິງປັດຈຸບັນ.

ຖໍ້າຈອມອອງ ຕັ້ງຢູ່ບ້ານຈອມອອງ ເມືອງໄຊ ແຂວງອຸດົມໄຊ ໂດຍຫ່າງຈາກເທສະບານເມືອງໄຊ 45 ກິໂລແມັດ ໄປທາງແຂວງຫຼວງນໍ້າທາ 24 ກິໂລແມັດ, ເປັນທາງປູຢາງແຍກເຂົ້າເໜືອບ້ານນ້ຳບໍ່ຕາໄກ ປະມານ 21 ກິໂລແມັດ ເປັນທາງດິນແດງອັດແໜ້ນ, ຈາກບ້ານຈອມອອງ ສາມາດເຂົ້າເຖິງໄດ້ດ້ວຍ 2 ທາງ ຄື: ຍ່າງລັດແຕ່ບ້ານຜ່ານທົ່ງນາໄປຫາຖໍ້າ 2 ກິໂລແມັດ ແລະ ທາງລົດເຂົ້າຮອດ ( ທາງດິນແດງ ) ຖ້ຳຈອມອອງ ຕັ້ງຢູ່ຫ່າງຈາກບ້ານຈອມອອງ ປະມານ 3 ກິໂລແມັດ ເປັນເສັ້ນທາງລົດສາມາດແລ່ນເຂົ້າເຖິງບໍລິເວນຖໍ້າ ເຊິ່ງເປັນຖໍ້າທີ່ໃຫຍ່, ມີຄວາມຍາວ ແລະ ສວຍງາມທີ່ສຸດຂອງແຂວງອຸດົມໄຊ ເຊິ່ງປະກອບດ້ວຍລະບົບນິເວດທຳມະຊາດທີ່ອັດສະຈັນ, ມີຫຼາຍຊ່ອງທາງເຂົ້າ – ອອກພາຍໃນຖໍ້າທີ່ຍາວປະມານ 17 ກວ່າກິໂລແມັດ, ຄວາມກວ້າງປະມານ 15 – 50 ແມັດ ແລະ ຄວາມສູງປະມານ 25 – 100 ແມັດ.

ພາຍໃນຖໍ້າບາງບ່ອນມີສາຍນໍ້າໄຫຼຜ່ານ, ມີນົມຜາ, ຫີນຍ້ອຍທີ່ມີລວດລາຍສວຍງາມ, ຫີນແກ້ວເປັນສີຂາວເຫຼື້ອມຄືກັບເພັດພອຍທີ່ເປັນກ້ອນໃຫຍ່ປະດັບປະດາຫ້ອຍຢູ່ຕາມຝາຫີນ ຄືກັບດອກໄຟປະດັບຢ່າງສວຍງາມ ແລະ ຖໍ້າຍັງເປັນລັກສະນະເດີມທີ່ຍັງບໍ່ໄດ້ຮັບການດັດແປງແຕ່ຢ່າງໃດ, ຖໍ້ານີ້ໄດ້ຜ່ານການສຳຫຼວດຂອງນັກວິທະຍາສາດຈາກສະຫະພັນເອີຣົບ ໃນປີ 2009 ແລະ ປີ 2010 ໄດ້ສຳຫຼວດ 4 ປີ, ເປັນຖໍ້າໃໝ່ລະດັບຊາດ ASEAN ແລະ ລະດັບໂລກ, ປັດຈຸບັນລັດຖະບານ ແຫ່ງ ສປປ ລາວ ໄດ້ຮັບທຶນຈາກທະນາຄານພັດທະນາອາຊີ ( ADB ) ໃຫ້ທຶນຊ່ວຍເຫຼືອເພື່ອພັດທະນາເສັ້ນທາງ ແລະ ສິ່ງອຳນວຍຄວາມສະດວກຕ່າງໆ.

ທ່ານ ບຸນກວມ ມິດເມືອງໄຊ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ໄດ້ໃຫ້ສຳພາດວ່າ: ການຈັດງານປີທ່ອງທ່ຽວລາວ 2018 ແມ່ນເພື່ອກະຕຸ້ນການດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດມາທ່ຽວແຂວງອຸດົມໄຊ ໃຫ້ບັນລຸຕາມແຜນ 1 – 2 ແສນຄົນ, ຜ່ານການຈັດຕັ້ງປະຕິບັດດັ່ງກ່າວຈຳນວນນັກທ່ອງທ່ຽວ 6 ເດືອນຕົ້ນປີ 2018 ແມ່ນເພີ່ມຂຶ້ນ 21% ໂດຍກະກຽມວາງແຜນສົມທົບຂະແໜງການເມືອງ – ທ້ອງຖິ່ນ ໃນການໂຄສະນາຂໍ້ມູນ – ຂ່າວສານ ໃຫ້ບໍລິສັດທ່ອງທ່ຽວຮັບຮູ້ຂໍ້ມູນໃຫ້ລະອຽດ ແລະ ຊັດເຈນ, ໂຄສະນາຮ່ວມມືພາຍໃນ ແລະ ຕ່າງປະເທດໃຫ້ກວ້າງຂວາງ ພ້ອມຈັດເທດສະການປະກວດອາຫານພື້ນເມືອງຢູ່ເທສະບານແຂວງ.

ຕາມການເກັບກຳສະຖິຕິນັກທ່ອງທ່ຽວຂອງຜູ້ຮັບຜິດຊອບເຂດບ້ານຈອມອອງ ແລະ ຂະແໜງການທ່ອງທ່ຽວແຂວງອຸດົມໄຊ ເຫັນໄດ້ວ່າ: ນັກທ່ອງທ່ຽວທີ່ເຂົ້າມາທ່ຽວຊົມຖ້ຳຈອມອອງ ປະຈຳປີ 2017 ມີທັງໝົດ 1.148 ຄົນ ຍິງ 524 ຄົນ, ມີນັກທ່ອງທ່ຽວພາຍໃນ ( ຄົນລາວ ) 995 ຄົນ ຍິງ 456 ຄົນ, ສາມາດສ້າງລາຍຮັບເຂົ້າບ້ານໄດ້ທັງໝົດ 8 ລ້ານກວ່າກີບ ຈາກການເກັບຄ່າເຂົ້າຊົມ, ປີ້ຝາກລົດ ແລະ ຄ່ານຳທ່ຽວຕ່າງໆ.

ສ່ວນນັກທ່ອງທ່ຽວທີ່ເຂົ້າພັກແຮມທີ່ໂຮມສະເຕນຳປະຊາຊົນ ມີທັງໝົດ 45 ຄົນ ຍິງ 21 ຄົນ, ສາມາດສ້າງລາຍຮັບໄດ້ 6 ແສນກວ່າກີບ, ຖ້າທຽບໃສ່ປີ 2018 ເຫັນວ່າປີນີ້ມີນັກທ່ອງທ່ຽວສົນໃຈ ແລະ ເຂົ້າທ່ຽວຊົມຫຼາຍຂຶ້ນກວ່າເກົ່າ ສະແດງອອກໃນໄລຍະເດືອນມັງກອນ ຫາ ເດືອນເມສາ ມີນັກທ່ອງທ່ຽວເຂົ້າຊົມທັງໝົດ 1.333 ຄົນ ຍິງ 620 ຄົນ, ສາມາດສ້າງລາຍຮັບໃຫ້ແກ່ບ້ານໄດ້ 11 ລ້ານກວ່າກີບ. ໃນນີ້, ມີນັກທ່ອງທ່ຽວຕ່າງປະເທດ 236 ຄົນ ຍິງ 103 ຄົນ.

[ ຂ່າວ: ນຸ້ມນິ້ມ ]

%d bloggers like this: