ສົ່ງອອກແລ້ວ 2 ຄັ້ງ ສໍາລັບຜະລິດຕະພັນໄມ້ປູກຈາກໂຮງງານຕົວແບບຂອງລັດຖະບານ

ຄົບຮອບ 1 ເດືອນພໍດີ ສຳລັບການປະຕິບັດໜ້າວຽກຢ່າງຂຸ້ນຂ້ຽວ ເພື່ອສ້າງຕັ້ງໂຮງງານຕົວແບບ ແລະ ເຄືອຂ່າຍການຜະລິດ – ປຸງແຕ່ງໄມ້ຂອງລັດຖະບານ ພາຍຫຼັງກອງປະຊຸມຄະນະຊີ້ນຳໂຄງການ ຄັ້ງທີ II ຜ່ານມາ, ພາກສ່ວນກ່ຽວຂ້ອງສຸມທຸກກຳລັງເອົາໃຈໃສ່ຊຸກຍູ້ ເພື່ອໃຫ້ສາມາດສົ່ງອອກ ແລະ ຫຼ້າສຸດ 1 ສິງຫາຜ່ານມາ ທາງໂຮງງານໄດ້ສົ່ງອອກໄມ້ສຳເລັດຮູບ ( ໄມ້ປູພື້ນ ) 1 ຕູ້ຄອນເທັນເນີ ຂະໜາດ 40 ຟຸດ, ບໍລິມາດ 35 ແມັດກ້ອນ ( m3 ) ໄປຍັງ  ສປ ຈີນ ແລະ ວັນທີ 8 ສິງຫາ ກໍ່ໄດ້ສົ່ງໄມ້ອັດປະສານທີ່ເຮັດດ້ວຍໄມ້ສັກປູກ 1 ຕູ້ຄອນເທັນເນີ ຂະໜາດ 20 ຟຸດ, ບໍລິມາດ 25 ແມັດກ້ອນ ໄປປະເທດຍີ່ປຸ່ນ ຕື່ມອີກ.

■ ທ່ານ ທອງສະຫວັນ ສຸລິຍະມາດ ປະທານສະມາຄົມອຸດສາຫະກຳປຸງແຕ່ງໄມ້ແຫ່ງຊາດ ໄດ້ເປີດເຜີຍເຖິງຄວາມຄືບໜ້າ ວ່າ: ຜ່ານການຈັດຕັ້ງປະຕິບັດຕາມທິດຊີ້ນຳຂອງຄະນະ ໃນວັນທີ 6 ກໍລະກົດ 2018 ຜ່ານມາ ພວກເຮົາສາມາດສົ່ງອອກຜະລິດຕະພັນໄມ້ສຳເລັດຮູບຈຳນວນ 2 ຄັ້ງແລ້ວພາຍໃນເດືອນດຽວ ເຖິງວ່າບໍລິມາດຈະບໍ່ຫຼາຍແຕ່ກໍ່ຖືວ່າເປັນການເລີ່ມຕົ້ນທີ່ດີ ເນື່ອງຈາກລັດຖະບານມີ ຄວາມພະຍາຍາມສູງໃນການສ້າງເປັນໂຮງງານຕົວແບບແຫ່ງທຳອິດ ອັນເປັນໜໍ່ແໜງຂອງອຸດສາຫະກຳປຸງແຕ່ງໄມ້ຂອງປະເທດ ພາຍຫຼັງໄດ້ມີການດຳເນີນການມາແຕ່ປີ 2017.

■ ຂໍ້ມູນສຳລັບການສົ່ງອອກຄັ້ງທຳອິດແມ່ນ: ໃນວັນທີ 1 ສິງຫາ 2018 ຜ່ານມານີ້ ປະເພດໄມ້ປູພື້ນທີ່ເຮັດດ້ວຍໄມ້ສັກ ຈຳນວນ 1 ຕູ້ຄອນເທັນເນີ ຂະໜາດ 40 ຟຸດ, ບໍລິມາດ 35 ແມັດກ້ອນ ( m3 ) ໄປຍັງ ສປ ຈີນ; ສ່ວນໃນວັນທີ 8 ສິງຫາ ກໍ່ໄດ້ສົ່ງອອກເປັນຄັ້ງທີ 2 ເປັນປະເພດໄມ້ອັດປະສານທີ່ເຮັດດ້ວຍໄມ້ສັກປູກ ຈໍານວນ 1 ຕູ້ຄອນເທັນເນີ ຂະໜາດ 20 ຟຸດ, ບໍລິມາດ 25 ແມັດກ້ອນ ໄປປະເທດຍີ່ປຸ່ນ ແລະ ຕາມແຜນໃນທ້າຍເດືອນສິງຫານີ້ ກໍ່ຈະສົ່ງບານປະຕູທີ່ເຮັດດ້ວຍໄມ້ສັກໄປຍັງປະເທດໄທຕື່ມອີກ. ນອກຈາກນັ້ນ, ຈະສືບຕໍ່ສົ່ງໄປເລື້ອຍໆຕາມແຜນການທີ່ລະບຸໄວ້ໃນສັນຍາຊື້ – ຂາຍກັບຕ່າງປະເທດ.

■ ເມື່ອເວົ້າເຖິງຕະຫຼາດຈຳໜ່າຍຢູ່ຕ່າງປະເທດ ທີ່ທາງບໍລິສັດໄດ້ເຊັນສັນຍາໄວ້ແລ້ວ ປະກອບມີ: ບໍລິສັດຈາກ ສປ ຈີນ, ໄທ ແລະ ຍີ່ປຸ່ນ ເຊິ່ງບໍລິສັດຈາກປະເທດເຫຼົ່ານີ້ມີຄວາມຕ້ອງການສິນຄ້າຈາກລາວເປັນຈຳນວນຫຼາຍ ຖືວ່າເປັນໂອກາດດີ, ເຮັດໃຫ້ອຸດສາຫະກຳປຸງແຕ່ງໄມ້ລາວເຕີບໃຫຍ່ຂະຫຍາຍຕົວຕາມທິດຂອງລັດຖະບານວາງໄວ້.

■ ປະທານສະມາຄົມອຸດສາຫະກຳປຸງແຕ່ງໄມ້ແຫ່ງຊາດ ຍັງອະທິບາຍຕື່ມວ່າ: ນັບແຕ່ຕົ້ນເດືອນກໍລະກົດ 2018 ກຸ່ມບໍລິສັດ ອຸດສາຫະກຳ ເຟີນີເຈີລາວ ຈຳກັດ ໃນນາມໂຮງງານຕົວແບບ ແລະ ເຄືອຂ່າຍການຜະລິດ – ປຸງແຕ່ງໄມ້ ໄດ້ເລີ່ມຕົ້ນດຳເນີນການຜະລິດຕາມແຜນການໄລຍະທີ I ໃນໂຄງການອຸດສາຫະກຳປຸງແຕ່ງໄມ້ ເພື່ອຮັບໃຊ້ພາຍໃນ ແລະ ສົ່ງອອກໄປຕ່າງປະເທດ ຕາມນະໂຍບາຍສົ່ງເສີມການປຸງແຕ່ງເປັນຜະລິດຕະພັນສໍາເລັດຮູບຂອງລັດຖະບານ, ສ່ວນວັດຖຸດິບຕົ້ນຕໍທີ່ນໍາໃຊ້ເຂົ້າໃນການຜະລິດນັ້ນ ແມ່ນ: ໄມ້ສັກປູກ, ໄມ້ວິກ ແລະ ໄມ້ກະຖິນເທພາ ຈາກສວນປູກຂອງປະຊາຊົນຢູ່ແຂວງພາກເໜືອ ແລະ ນະຄອນຫຼວງວຽງຈັນ ເຊິ່ງປະເພດຜະລິດຕະພັນຕົ້ນຕໍຕາມແຜນການແມ່ນ: ໄມ້ປູພື້ນ ( 5 ຕູ້ຄອນເທັນເນີ ຂະໜາດ40 ຟຸດຕໍ່ເດືອນ ); ໄມ້ອັດປະສານ ( 5 ຕູ້ຄອນເທັນເນີ ຂະໜາດ 40 ຟຸດຕໍ່ເດືອນ ) ແລະ ບານປະຕູ ( 2 ຕູ້ຄອນເທັນເນີ ຂະໜາດ 40 ຟຸດຕໍ່ເດືອນ ) ລວມທັງໝົດ 12 ຕູ້ຄອນເທັນເນີ ຂະໜາດ 40 ຟຸດຕໍ່ເດືອນ.

■ ຫວນຄືນໄປໃນເດືອນກໍລະກົດ 2017 ຜ່ານມາ ລັດຖະບານ ໄດ້ແຕ່ງຕັ້ງຄະນະຊີ້ນຳໂຄງການສ້າງໂຮງງານຕົວແບບ ແລະ ເຄືອຂ່າຍການຜະລິດ – ປຸງແຕ່ງໄມ້ ເຊິ່ງກຳນົດເອົາໂຮງງານເຟີນີເຈີ ຫຼັກ 5 ເຊິ່ງເປັນໂຮງງານໄມ້ຂອງ ກຸ່ມບໍລິສັດ ອຸດສາຫະກຳ ເຟີນີເຈີລາວ ຈຳກັດ ມີສະຖານທີ່ຕັ້ງຢູ່ບ້ານໂຄກສະອາດ ເມືອງໄຊທານີ ນະຄອນຫຼວງວຽງຈັນ ເປັນໂຮງງານຕົວແບບແຫ່ງທຳອິດໃນລາວ. ຜ່ານການຈັດຕັ້ງປະຕິບັດຮອດປັດຈຸບັນ ເຫັນວ່າມີຄວມຄືບໜ້າເປັນກ້າວໆ ເຊິ່ງກ່ອນໜ້ານັ້ນ ທ່ານຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ( ອຄ ) ທັງເປັນຫົວໜ້າຄະນະຊີ້ນຳ ກໍ່ໄດ້ເນັ້ນໃຫ້ທຸກພາກສ່ວນເອົາໃຈໃສ່ ເພື່ອຊອກແຫຼ່ງທຶນເຂົ້າມາສະໜັບສະໜູນ ແລະ ທີ່ສຳຄັນແມ່ນໃຫ້ສາມາດເປີດໂຮງງານຕົວແບບຢ່າງເປັນທາງການໃນທ້າຍປີ 2018 ນີ້.

 

%d bloggers like this: