ໂຮງແຮມທະວີສຸກ ແລະ ຣີສອດກັບການຮັບມືກັບລະດູຝົນ

ທຸລະກິດໂຮງແຮມເປັນສະຖານທີ່ຮອງຮັບ ແລະ ອຳນວຍຄວາມສະດວກໃຫ້ກັບບັນດານັກທ່ອງທ່ຽວທີ່ເດີນທາງເຂົ້າໄປທ່ອງທ່ຽວໃນເຂດນັ້ນໆ ມື້ນີ້ທາງໜັງສືພີມຂອງພວກເຮົາມີໂອກາດເດີນທາງມາສຳພາດກັບທາງໂຮງແຮມທະວີສຸກ ແລະ ຣີສອດ ທີ່ຕັ້ງຢູ່ເມືອງວັງວຽງ ແຂວງວຽງຈັນ ກ່ຽວກັບການຍຸດທະສາດໃນການຮັບມືກັບໄລຍະລະດູຝົນທີ່ເຮັດໃຫ້ຫຼາຍຜູ້ປະກອບການຕ້ອງປະສົບກັບບັນຫາລູກຄ້າຫຼຸດລົງ.

ທ່ານ ນາງ ທຸງໄກສອນ ຄຳມັງ ຜູ້ບໍລິຫານ ( ລູກສາວເຈົ້າຂອງໂຮງແຮມ ) ໄດ້ໃຫ້ສຳພາດກັບທາງທີມຂ່າວຂອງເຮົາວ່າ: ທຸລະກິດໂຮງແຮມຂອງພວກເຮົາແມ່ນເກີດຈາກຄວາມຕັ້ງໃຈຂອງພໍ່ – ແມ່ ໂດຍສະເພາະທີ່ເປັນຄົນພື້ນຖານໃນເມືອງວັງວຽງ ຈຶ່ງເຫັນໄດ້ເຖິງແນວທາງດຳເນີນທຸລະກິດໃນເຂດທ່ອງທ່ຽວທີ່ສວຍງາມ ໂດຍເລີ່ມເປິດເປັນເຮືອນພັກພາຍໃນເຂດຕົວເມືອງກ່ອນ ໃນປີ 2000 ຕອນນັ້ນຖືໄດ້ວ່າເຮືອນພັກຂອງເຮົາ ເປັນແຫ່ງທີ 5 ໃນເມືອງວັງວຽງ ໂດຍເລີ່ມຕົ້ນມີຫ້ອງພັກຂະໜາດນ້ອຍ 12 ຫ້ອງ ແລະ ເລີ່ມຂະຫຍາຍຈົນໄດ້ເຖິງ 30 ຫ້ອງໃນເວລາຕໍ່ມາ , ແລະ ເມື່ອມາເຖິງປີ 2005 ຈຶ່ງໄດ້ມີການຂະຫຍາຍມາບຸກເບີກເພີ່ມຕື່ມໂດຍມີບັງກະໂລທີ່ມີຫ້ອງນຳ້ທາງໃນ 24 ຫ້ອງ ແລະ ບັງກະໂລຫ້ອງນຳ້ທາງນອກ 10 ຫ້ອງ ຕໍ່ມາກໍ່ໄດ້ຂະຫຍາຍເປັນໂຮງແຮມ 4 ຊັ້ນໃນດ້ານໜ້າໂດຍໃຊ້ຊື່ວ່າໂຮງແຮມທະວີສຸກ ແລະ ຣີສອດ.

ໃນປັດຈຸບັນໂຮງແຮມຂອງພວກເຮົາມີທັງໝົດ 130 ຫ້ອງ ໄວ້ລໍຖ້າບໍລິການ ພ້ອມທັງມີຮ້ານອາຫານຕິດແຄມນຳ້ຊອງ , ສະລອຍນຳ້ , ແລະ ນວກແຜນບູຮານພ້ອມ, ພວກເຮົາມີພະນັກງານປະຈຳໃນແຕ່ລະພາກສ່ວນທັງໝົດ 60 ຄົນເພື່ອໝັ້ນໃຈວ່າຈະສາມາດຮອງຮັບໃນການຕ້ອນຮັບກັບແຂກທີ່ມາພັກໄດ້ຢ່າງພຽງພໍ ເຊິ່ງໃນປັດຈຸບັນເຫັນວ່ານັກທ່ອງທ່ຽວທີ່ມາໃຊ້ບໍລິການກັບທາງເຮົາສ່ວນຫຼາຍຈະເປັນແຂກຕ່າງປະເທດທີ່ເປັນຊາວອາຊີ ເຊັ່ນ: ຈີນ , ເກົາຫຼີ , ໄທ ເປັນຕົ້ນໂດຍກວມຢູ່ 70% ແລະ ແຂກພາຍໃນແມ່ນຕົກຢູ່ 30% , ໃນແຕ່ລະປີ ເຫັນວ່າການຂະຫຍາຍຕົວຂອງຈຳນວນແຂກທີ່ມາພັກເພີ່ມຂຶ້ນຢູ່ປະມານ 20% – 30% . ນອກຈາກການໃຫ້ບໍລິການຫ້ອງພັກ ແລະ ຮ້ານອາຫານແລ້ວ ທາງໂຮງແຮງທະວີສຸກ ແລະ ຣີສອດ ຍັງມີບໍລິການຮັບຈັດງານໝັ້ນ – ງານດອງຂະໜາດນ້ອຍທີ່ເນັ້ນຄວາມເປັນກັນເອງ , ງານສຳມະນາ – ງານປະຊຸມ , ງານສັງສັນກິນລ້ຽງຂອງບໍລິສັດ ຫຼື ຫ້ອງການໄດ້ນຳ ໂດຍທີ່ຜ່ານມາທາງເຮົາກໍ່ໄດ້ຮັບຄວາມໄວ້ວາງໃຈຈາກລູກຄ້າຢູ່ຢ່າງຕໍ່ເນື່ອງ. ພາຍໃນໂຮງແຮມຂອງພວກເຮົາສາມາດຮອງຮັບແຂກທີ່ຕ້ອງການມາເຂົ້າພັກສູງສຸດ 260 ທ່ານ, ງານປະຊຸມ – ສຳມະນາສູງສຸດ 200 ທ່ານ ພ້ອມທັງມີເດີນຈອດລົດທີ່ກ້ວາງຂວາງຮອງຮັບລົດໄດ້ເຖິງ 100 ຄັນ.

ທ່ານ ຍັງໄດ້ກ່າວຕື່ມອີກວ່າ: ໃນໄລຍະນີ້ກໍ່ຖືວ່າເຂົ້າສູ່ລະດູຝົນ ເຊິ່ງເປັນໄລຍະທີ່ຜູ້ປະກອບການຫຼາຍຄົນໜັກໃຈພໍສົມຄວນ (Low season) ສຳລັບທາງໂຮງແຮມທະວີສຸກ ແລະ ຣີສອດ ກໍ່ໄດ້ຈັດກິດຈະກຳເພື່ອດຶງດູດລູກຄ້າຂຶ້ນຕື່ມກໍ່ຄື: ສຳລັບແຂກທີ່ມາເປັນກຸ່ມຄະນະໄລຍະນີ້ຖ້າພັກ 15 ຫ້ອງ ເຮົາແຖມລ້າ 1 ຫ້ອງ ແລະ ສຳລັບແຂກທີ່ມາພັກເປັນຫ້ອງລາຄາຫ້ອງພັກຂອງເຮົາໃນໄລຍະນີ້ກໍ່ຖືວ່າຫຼຸດລາຄາໃຫ້ຖືກກວ່າໄລຍະລະດູແລ້ງ, ໂດຍຈຸດພິເສດຂອງໂຮງແຮມຂອງພວກເຮົາແມ່ນເນັ້ນໃສ່ລາຄາທີ່ເປັນກາງບໍ່ສູງຈົນເກີນໄປ, ຄຸນນະພາບຂອງຫ້ອງພັກເພາະທຸລະກິດຂອງເຮົາແມ່ນຂາຍຫ້ອງພັກເຮົາຈຶ່ງເນັ້ນໃສ່ຄວາມສະອາດ – ສວຍງາມ , ຫ້ອງພັກທຸກຫ້ອງແມ່ນໄດ້ວິວຈາກທາງນອກທີ່ສວຍງາມ.

ທ່ານ ໃຫ້ຮູ້ຕື່ມວ່າ:ໃນອານາຄົດໂຮງແຮມເຮົາກໍ່ຈະໄດ້ມີການຂະຫຍາຍທຸລະກິດເພີ່ມຂຶ້ນເພື່ອຕອບສະໜອງການຂະຫຍາຍໂຕຂອງນັກທ່ອງທ່ຽວຄືຈະມີການສ້າງຣີສອດທີ່ມີລັກສະນະເປັນຫຼັງ ເພື່ອຮອງຮັບແຂກທີ່ມາເປັນຄອບຄົວ ເຊິ່ງໃນຕອນນີ້ແມ່ນໄດ້ເລີ່ມດຳເນີນການກໍ່ສ້າງແລ້ວ ແລະ ຄາດວ່າຈະສຳເລັດພາຍໃນປີ 2018 ນີ້ ໂດຍສະຖານທີ່ແມ່ນຂ້າມຂົວນຳ້ຊອງທີ່ມີຢູ່ພາຍໃນໂຮງແຮມຂອງເຮົາເອງຕັ້ງຢູ່ ບ້ານເມືອງຊອງເມືອງວັງວຽງ ແຂວງວຽງຈັນ.

 

DSC_2283 IMG_8621 33270918 - Copy IMAG4339

%d bloggers like this: