ອາຫານທີ່ປຸງຈາກຫົວສີໄຄ ສາມາດແກ້ອາການທ້ອງອືດໄດ້.

ຫົວສີໄຄເປັນພືດສະໝຸນໄພທີ່ສາມາດໃຊ້ປະກອບອາຫານລາວໄດ້ຫຼາຍປະເພດບໍ່ວ່າຈະເປັນອາຫານປະເພດກ້ອຍ, ລາບ, ແກງ ຫຼື ຍຳຕ່າງໆ ແລະ ຍັງມີອາຫານອີກຫຼາຍຢ່າງທີ່ມີສ່ວນປະກອບຂອງຫົວສີໄຄ.

 

 

ມື້ນີ້, ແອັດຈະມາແນະນຳເມນູ ຂົ້ວຊີ້ນງົວໃສ່ຫົວສີໄຄ ເຊິ່ງໂດຍສັບພະຄຸນຂອງ ຫົວສີໄຄເປັນຢາປິ່ນປົວພະຍາດຫືດ, ແກ້ອາການເຈັບທ້ອງ, ແກ້ຖອກທ້ອງ, ທ້ອງອືດ ຫຼື ຈະໃຊ້ເປັນຢານວດກໍ່ໄດ້ ແລະ ຍັງສາມາດໃຊ້ລວມກັບສະໝຸນໄພອື່ນໆໄດ້ອີກເພື່ອບຳລຸງທາດ, ເຮັດໃຫ້ຈະເລີນອາຫານ ແລະ ຂັບເຫື່ອ.

 

ສ່ວນປະສົມ:

  1. ຊີ້ນງົວຊອຍ 5 ຂີດ.
  2. ຫົວສີໄຄ 10-15 ຫົວ.
  3. ຫົວຜັກບົ່ວແດງ 5 ຫົວ.
  4. ຫົວກະທຽມ 2 ຫົວ.
  5. ໃບຂີ້ຫູດ 10-15 ໃບ.
  6. ໝາກເຜັດ 5-10 ໜ່ວຍ.
  7. ນ້ຳມັນ 2 ບ່ວງແກງ.
  8. ນ້ຳປາ 1/2 ບ່ວງແກງ.
  9. ນ້ຳສະອິ້ວຂາວ 1 ບ່ວງແກງ.
  10. ນ້ຳມັນຫອຍ 2 ບ່ວງແກງ.
  11. ເກືອ 1/4 ບ່ວງກາເຟ.
  12. ນ້ຳຕານ 1/2-1 ບ່ວງແກງ.

 

 

ວິທີປຸງແຕ່ງ.

  • ຊອຍຫົວສີໄຄ, ໃບຂີ້ຫູດ, ຫົວຜັກບົ່ວແດງ, ຫົວກະທຽມທຸບ ແລະ ໝາກເຜັດກຽມໄວ້. ຈາກນັ້ນ, ກໍ່ເອົານ້ຳມັນໃສ່ໝໍ້ຄ້າງໄຟປານກາງ ເມື່ອນ້ຳມັນຮ້ອນກໍ່ເອົາສ່ວນປະກອບທີ່ຊອຍໄວ້ລົງໄປຂົ້ວຈົນຫອມ ແລ້ວຈຶ່ງໃສ່ຊີ້ນລົງໄປປຸງລົດດ້ວຍນ້ຳຕານ, ເກືອ, ນ້ຳປາ, ນ້ຳມັນຫອຍ ແລະ ນ້ຳສະອິ້ວຂາວ. ຂົ້ວຈົນຊີ້ນສຸກດີແລ້ວຊີມລົດຊາດຕາມໃຈມັກ ຕັກໃສ່ຈານແລ້ວຊອຍຫົວສີໄຄ, ໃບຂີ້ຫູດ ແລະ ໝາກເຜັດເປັນເສັ້ນນ້ອຍໆໂຮຍໜ້າພ້ອມເສີບ.

 

%d bloggers like this: