ມາຮູ້ຈັກ!!! ຂັ້ນຕອນ ແລະ ວິທີການເຮັດກະຕົ້ມມັດງ່າຍໆ.

ເຂົ້າຕົ້ມມັດ ແມ່ນອາຫານຊະນິດໜຶ່ງ ທີ່ຄົນລາວນິຍົມກິນ ແລະ ນິຍົມເຮັດໃນວັນສຳຄັນຕ່າງໆເປັນຕົ້ນແມ່ນ: ງານບຸນເຂົ້າພັນສາ, ບຸນຫໍ່ເຂົ້າປະດັບດິນ, ບຸນອອກພັນສາ ແລະ ງານອື່ນໆ. ເຊິ່ງໃນອີກບໍ່ພໍເທົ່າໃດມື້ ກໍ່ຈະຮອດວັນເຂົ້າພັນສາແລ້ວ. ດັ່ງນັ້ນ, ມື້ນີ້ແອັດມິນກໍ່ຈະມາແນະນຳຂັ້ນຕອນ ແລະ ວິທີການເຮັດເຂົ້າຕົ້ມມັດໃຫ້ແກ່ທ່ານທີ່ສົນໃຈ ເພື່ອຈະໄດ້ນຳເອົາເຂົ້າຕົ້ມໄປທຳບຸນຕັກບາດ ຕາມວັດຖຸປະສົງຂອງແຕ່ລະທ່ານ ເຊິ່ງຂັ້ນຕອນຕ່າງໆມີດັ່ງນີ້:

 

     ສ່ວນປະກອບ:

  •  ເຂົ້າໜຽວ 1 ກິໂລກຣາມ ໝ່າໄວ້ຢ່າງນ້ອຍປະມານ 3 ຊົ່ວໂມງ ແລ້ວ ລ້າງນ້ຳໃຫ້ສະອາດ
  • ຫົວກະທິ 3 ຖ້ວຍ
  • ນໍ້າຕານຊາຍ 1 ຖ້ວຍ
  • ເກືອບ 2 ບ່ວງຊາ
  • ກ້ວຍນ້ຳວ້າ 15 ໜ່ວຍ ຜ່າຕາມລວງຍາວ
  • ຖົ່ວດຳ ຫຼື ຖົ່າຂາວ 3 ຂີດ ນຳເອົາຖົ່ວໄປຕົ້ມພໍດີສຸກ ແລ້ວຕັກວາງໃສ່ກະຕ່າໃຫ້ສະເດັດນ້ຳ

 

ວິທີເຮັດ

  1. ນຳເອົາເຂົ້າໜຽວທີ່ລ້າງສະອາດແລ້ວໃສ່ກະຊາມພັກໄວ້.
  2. ປະສົມຫົວກະທິ, ເກືອ ແລະ ນ້ຳຕານຊາຍ ໃຫ້ເຂົ້າກັນ ລອງຊິມເບິ່ງໃຫ້ນຳກະທິມີລົດເຄັມນ້ອຍໜຶ່ງ
  3. ນຳເອົາກະທິໃສ່ໝໍ້ໄປຄ້າງອ່ອນໆ ແລ້ວເອົາເຂົ້າໜຽວ ແລະ ຖົ່ວດຳ, ຖົ່ວຂາວທີ່ຕົ້ມສຸກແລ້ວລົງໄປ ແລ້ວຄ່ອຍໆຄົຍໃຫ້ເນື້ອມັນປະສົມກັນດີ.
  4. ຄົນໄປຈົນນ້ຳກະທິແຫ້ງ ແລ້ວປົງລົງຈາກເຕົາ.
  5. ວາງໃບຕອງ 2 ໃບຊ້ອນກັນ ແລ້ວຕັກເອົາທີ່ຜັດແລ້ວວາງໃສ່ໃບຕອງ.
  6. ນຳເອົາກ້ວຍທີ່ຕຽມໄວ້ວາງລົງໄປ ແລ້ວຕັກເອົາເຂົ້າໜຽວມາວາງປິດກ້ວຍບາງໆ
  7. ຫໍ່ເຂົ້າຕົ້ມໃຫ້ສວຍງາມ ແລ້ວວາງໄວ້ກ່ອນ ຫຼື ຫໍ່ໄປເລື້ອຍໆຈົນໝົດ.
  8. ນຳເຂົ້າຕົ້ມທີ່ຫໍ່ໄວ້ຮຽບຮ້ອຍແລ້ວມາຈັບເປັນຄູ່ ຫັນໜ້າເຂົ້າຫາກັນແລ້ວມັດລວບກັນທັງສອງເບື້ອງ.
  9. ນຳເຂົ້າຕົ້ມທີ່ມັດເປັນຄູ່ແລ້ວ ໄປໜຶ້ງປະມານ 45 ນາທີ ຫຼື ຈົນກວ່າເຂົ້າໜຽວຈະສຸກ ຫຼັງຈາກນັ້ນ, ກໍ່ເອົາມາຮັບປະທານໄດ້ເລີຍ.

 

 

%d bloggers like this: