ບໍລິສັດ ຫົງຊວນ ກຽມຈົກເງິນ 200 ກວ່າລ້ານໂດລາ ພັດທະນາແຫຼ່ງທ່ອງທ່ຽວທີ່ເມືອງສັງທອງ

ບໍລິສັດ ຫົງຊວນ ອິເຕີເນເຊິນແນວ ຈຳກັດ ກຽມລົງມືເກັບກຳຂໍ້ມູນ, ອອກແບບ ແລະ ສຶກສາຄວາມເປັນໄປໄດ້ຂອງໂຄງການພັດທະນາແຫຼ່ງທ່ອງທ່ຽວທຳມະຊາດແບບອະນຸລັກ ອ່າງເກັບນ້ຳຫ້ວຍແຕນ ບ້ານເພຍລາວ ເມືອງສັງທອງ ນະຄອນຫຼວງວຽງຈັນ ໃນເນື້ອທີ່ 50 ເຮັກຕາຄາດ, ເບື້ອງຕົນຈະໃຊ້ທຶນ 200 ກວ່າລ້ານໂດລາ ຄາດຈະສຳເລັດໃນປີ 2023, ຕະຫຼອດໄລຍະການດຳເນີນໂຄງການຈະໃຊ້ແຮງງານລາວປະມານ 3 ພັນຄົນ.

ທ່ານ ສົມ ແກ້ວບຸນສັກ ຜູ້ຈັດການ ບໍລິສັດ ຫົງຊວນ ອິເຕີເນເຊິນແນວ ຈຳກັດ ໃຫ້ສຳພາດໃນພິທີເຊັນບົດບັນທຶກຄວາມເຂົ້າໃຈ ວ່າ: ບໍລິສັດພວກເຮົາໄດ້ລົງມືສຳຫຼວດຄວາມເປັນໄປໄດ້ກ່ອນໜ້ານີ້ 3 ເດືອນແລ້ວ ຈຶ່ງໄດ້ມີການເຊັນບົດບັນທຶກຄວາມເຂົ້າໃຈ ແລະ ນັບຈາກນີ້ອີກ 3 ເດືອນ ພວກເຮົາຈະສຸມໃສ່ໃນການເກັບກຳຂໍ້ມູນຄວາມເປັນໄປໄດ້ຂອງໂຄງການ. ຫຼັງຈາກນັ້ນ, ຈຶ່ງຈະມີການເຊັນສັນຍາກໍ່ສ້າງ ແລະ ດຳເນີນໂຄງການ ໃນເບື້ອງຕົ້ນຄາດຈະໃຊ້ທຶນປະມານ 200 ກວ່າລ້ານໂດລາສະຫະລັດ ເພື່ອພັດທະນາເຂດດັ່ງກ່າວ ລວມທັງສ້າງເສັ້ນທາງ ແລະ ສິ່ງອຳນວຍຄວາມສະດວກຕ່າງໆ, ສ່ວນເນື້ອທີ່ຂອງໂຄງການແມ່ນປະມານ 50 ເຮັກຕາ, ເນື້ອທີ່ອ່າງນ້ຳປະມານ 40 ເຮັດຕາ ຕະຫຼອດໄລຍະການດຳເນີນໂຄງການຈະໃຊ້ແຮງງານທີ່ເປັນຄົນລາວປະມານ 3 ພັນຄົນ ແລະ ວິຊາການຕ່າງປະເທດປະມານ 200 ຄົນ, ການກໍ່ສ້າງໂຄງການຄາດຈະໃຫ້ສຳເລັດໃນປີ 2023 ແຕ່ຕ້ອງເບິ່ງຕາມສະພາບຄວາມເປັນຈິງອີກເທື່ອໜຶ່ງ, ຫາບໍ່ສາມາດສຳເລັດຕາມແຜນກໍ່ອາດຈະໄດ້ເພີ່ມໄລຍະການກໍ່ສ້າງອອກໄປອີກ.

ກິດຈະກຳໃນໂຄງການຈະປະກອບມີ: ສວນພຶກສາສາດ, ສວນສັດ, ສະໜາມຍິງປື້ນ, ເຮືອນພັກຕາກອາກາດ, ຮ້ານອາຫານ, ສວນສະໜຸກ ແລະ ອື່ນໆ; ພາຍຫຼັງທີ່ໂຄງການສ້າງສຳເລັດຈະສາມາດດຶງດູດເອົາບັນດານັກທ່ອງທ່ຽວຕ່າງປະເທດເຂົ້າມາທ່ຽວຊົມຫຼາຍຂຶ້ນ ທັງຍັງຈະສາມາດສ້າງວຽກເຮັດງານທຳໃຫ້ກັບປະຊາຊົນໃນເຂດດັ່ງກ່າວໄດ້ຫຼາຍຂຶ້ນ ທັງຍັງຈະສາມາດຊຸກຍູ້ເສດຖະກິດລາວ ໃຫ້ຂະຫຍາຍຕົວຢ່າງໝັ້ນທ່ຽງ.

ທ່ານ ຍັງໃຫ້ຮູ້ຕື່ມວ່າ: ຈຸປະສົງຂອງບໍລິສັດໃນການເລືອກພັດທະນາເຂດດັ່ງກ່າວກໍຍ້ອນວ່າເປັນເຂດທີ່ອຸດົມສົມປູນໄປດ້ວຍທຳມະຊາດ ແລະ ຍັງບໍ່ໄດ້ຈາກນະຄອນຫຼວງ ການພັດທະນາເຂດດັ່ງກ່າວແມ່ນຈະເຮັດໄປໃນຮູບແບບອະນຸລັກຈະບໍ່ມີການຕັດຕົ້ນໄມ້ແຕ່ຢາງໃດເພາະທາງບໍລິສັດມີຄວາມຕ້ອງການອານຸລັກທຳມະຊາດ ນອກຈາກຈະເປັນສະຖານທີ່ທ່ອງທ່ຽວແລ້ວຍັງຈະກາຍເປັນສະຖານທີ່ສຶກສາທາງທຳມະຊາດໃຫ້ກັບນັກຮຽນນັກສຶກສາຕື່ມອີກ.
ພິທີເຊັນບົດບັນທຶກຄວາມເຂົ້າໃຈ (MOU) ຈັດຂຶ້ນໃນວັນທີ 22 ມິຖຸນາ 2018 ທີ່ໂຮງແຮມດອນຈັນພາລາດ ນະຄອນຫຼວງວຽງຈັນ ໂດຍມີ ທ່ານ ພູຂົງ ບັນນະວົງ ຫົວໜ້າພະແນກແຜນການ ແລະ ການລົງທຶນ ນະຄອນຫຼວງວຽງຈັນ, ທ່ານ ດາວເພັດ ອາລຸນ ເຈົ້າເມືອງໆສັງທອງ, ທ່ານ ສັນໄຮ ຫຼົງ (Mr. SUN HAI LONG) ປະທານ ບໍລິສັດ ຫົງຊວນ ອິເຕີເນເຊິນແນວ ຈຳກັດ, ທ່ານ ນາງ ບົວສີ ລາວລີ ຮອງປະທານ ບໍລິສັດ ຫົງຊວນ ອິເຕີເນເຊິນແນວ ຈຳກັດ ແລະ ສື່ນມວນຊົນເຂົ້າຮ່ວມເປັນສັກຂີພີຍານ.

%d bloggers like this: