ເມືອງລະມາມ ຕັ້ງເປົ້າປູກໄມ້ຟື້ນຟູປ່າກວ່າ 100 ເຮັກຕາ

ເພື່ອແນໃສ່ປະກອບສ່ວນເຮັດໃຫ້ການເພີ່ມເນື້ອທີ່ປົກຫຸ້ມປ່າໄມ້ໃຫ້ໄດ້ 70% ໃນປີ 2020 ທັງແນໃສ່ໃຫ້ເມືອງລະມາມເປັນເມືອງສີຂຽວສະອາດສວຍງາມ, ສ້າງໜໍ່ແໜງການພັດທະນາເສດຖະກິດສີຂຽວ ແລະຂັບເຄື່ອນໃຫ້ແຂວງເຊກອງບັນລຸແຕ່ລະເປົ້າໝາຍຂອງການພັດທະນາແບບຍືນຍົງ, ເມືອງລະມາມໄດ້ຕັ້ງເປົ້າໝາຍໃນການປູກຕົ້ນໄມ້ໃນປີ 2018 ໃຫ້ໄດ້ 138 ເຮັກຕາ.

ວັນທີ 1 ມິຖຸນາ 2018 ທີ່ເມືອງລະມາມແຂວງເຊກອງໄດ້ຈັດພິທີເປີດຂະບວນການປູກຕົ້ນໄມ້ ແລະຟື້ນຟູປ່າຂຶ້ນ ໂດຍການເຂົ້າຮ່ວມຂອງທ່ານ ຄຳພຽມ ບົວລະພາ ຮອງເລຂາພັກແຂວງເຊກອງ, ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ, ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງ, ທ່ານເຈົ້າເມືອງ-ຮອງເຈົ້າເມືອງ, ພ້ອມການນຳຂະແໜງການຕ່າງໆ, ບໍລິສັດ-ສັດວິສາຫະກິດ, ພະນັກງານ-ລັດຖະກອນ, ປະຊາຊົນບັນດາເຜົ່າຕະຫຼອດຮອດນັກຮຽນນັກສຶກສາເຂົ້າຮ່ວມຢ່າງຫຼວງຫຼາຍ.
ໃນພິທີທ່ານ ແພງສີ ສີລາວີ ເຈົ້າເມືອງໆລະມາມ ກ່າວວ່າ: ເພື່ອຈັດຕັ້ງປະຕິບັດ ສ ສີຂຽວ ຂອງເມືອງລະມາມວາງອອກທີ່ຕິດພັນກັບຂະບວນການຮັກຊາດ ແລະພັດທະນາ, ໃນຜ່ານມາການນຳພັກ-ລັດໄດ້ເອົາໃຈໃສ່ວາງນະໂຍບາຍສົ່ງເສີມການປູກໄມ້ ຊຶ່ງເຮັດໃຫ້ຂະບວນການປູກໄມ້ມີລັກສະນະກວ້າງຂວາງ ແລະຂະຫຍາຍຫຼາຍສົມຄວນ, ນັບທັງພາກລັດ ແລະເອກະຊົນ ຊຶ່ງມັນສະແດງອອກໃນການປູກໄມ້ທົ່ວເມືອງລະມາມນັບແຕ່ປີ 1995 ຮອດປີ 2017 ສາມາດປູກໄດ້ທັງໝົດ 1.885 ເຮັກຕາ, ໃນນີ້ລັດປູກ 106 ເຮັກຕາ, ບໍລິສັດ 1.584 ເຮັກຕາ ແລະປະຊາຊົນ 195 ເຮັກຕາ ໂດຍແມ່ນຊະນິດພັນໄມ້ພື້ນເມືອງ ແລະພັນໄມ້ທີ່ເປັນເສດຖະກິດເຊັ່ນ: ໄມ້ດູ່, ໄມ້ຂະຍຸງ, ໄມ້ດູ່ລາຍ, ຢາງພາລາ ແລະອື່ນໆ.

ສະນັ້ນ ເພື່ອປະຕິບັດສ້າງເມືອງລະມາມ ກໍຄືເທສະບານແຂວງເຊກອງໃຫ້ເປັນພື້ນທີ່ໜຶ່ງທີ່ເປັນຕົວແບບຂອງການອະນຸລັກຮັກສາສິ່ງແວດລ້ອມຕາມທິດຍືນຍົງເປັນພື້ນທີ່ສີຂຽວ ແລະກາຍເປັນຕົວເມືອງທຳມະຊາດໃນອະນາຄົດ ໂດຍມີເນື້ອທີ່ສີຂຽວປົກຫຸ້ມ 70% ຂຶ້ນໄປໃນປີ 2020 ດັ່ງນັ້ນ ໃນວັນປູກຕົ້ນໄມ້ແຫ່ງຊາດປີນີ້ ການນຳເມືອງ ໂດຍສົມທົບກັບຫ້ອງການກະສິກຳ ແລະປ່າໄມ້ຊຸກຍູ້ບັນຂະແໜງການພາກລັດ, ບໍລິສັດ ແລະປະຊາຊົນພາຍໃນເມືອງປູກຕົ້ນໄມ້ໃຫ້ໄດ້ຈຳນວນ 55.200 ເບ້ຍ.

ໃນນັ້ນຈະເນັ້ນໃສ່ຊະນິດເບ້ຍໄມ້ທຳມະຊາດ, ເບ້ຍໄມ້ທີ່ເປັນເສດຖະກິດ ແລະເບ້ຍໄມ້ໃຫ້ໝາຍເຊັ່ນ: ເບ້ຍໄມ້ກາກະເລົາ, ໄມ້ຂະຍຸງ, ໄມ້ແຕ້ຂ່າ, ໄມ້ໃຫ້ໝາກເປັນຕົ້ນໝາກມ່ວງ, ໝາກມີ້ ແລະອື່ນໆ, ສະເພາະການປູກໃນປີນີ້ ແມ່ນຈະໃຫ້ໄດ້ 138 ເຮັກຕາ, ໃນນີ້ພາກລັດຈະປູກ 5 ເຮັກຕາ ຊຶ່ງຈະປູກດິນລວມລັດຄຸ້ມຄອງ ແລະສະຖານທີ່ສາທາລະນະ, ສຳນັກງານອົງການ, ແຄມທາງ ເພື່ອຮັກສາສີຂຽວຂອງເມືອງລະມາມ ກໍຄືເທສະບານແຂວງເຊກອງ.

ຂ່າວ-ພາບ: ສັນຍາ,ຂ່າວ ເຊກອງ

%d bloggers like this: